?Ɲanmiɛn sulɛ wafa nga amun si be’n, be nunfuɛ’m be nanti sein?

Be flɛ bla kun kɛ Silvia. Ɔ di junman dɔɔtrɔ kun mɔ be yo sran oke’m be ayre lɔ’n, i nun. Ɔ se kɛ: “Min wiengu nga e nin be e dili suklu’n, be nun kpanngban be se kɛ be su Ɲanmiɛn. Sanngɛ kɛ be man e junman’n, be di nun ndrunmun. Asa ekun’n, be nɔn ayre tɛtɛ mun. Be kleman kɛ be su Ɲanmiɛn bɔbɔ kaan sa.”

Bian kun liɛ’n, be flɛ i Liɔnɛli. Ɔ se kɛ: ‘Min wiengu junman difuɛ’m be kpɛ gblɛ kɛ be wunnɛn yo be ya, kpɛkun be baman junman. Be fa Ɲanmiɛn sulɛ’n yo be gbanflɛn nin talua dilɛ like.’

Sa nga sran sunman be yo’n, ɔ kleman kɛ be si Ɲanmiɛn kaan sa. Andɛ sran kpanngban be ‘yo be wun kɛ be sro Nyanmiɛn sa, sanngɛ be su lafi-mɛn i su kɛ ɔ kwla sa yo.’ (2 Timote 3:5) Be kpɛnngbɛn’m b’a kleman be ajalɛ kpa. Afɔtuɛ nga be ko fɛ i Ɲanmiɛn Ndɛ’n nun ko man be kusu naan b’a nanti sein’n, b’a fa manman be. Ɔ maan, sɛ sran kpanngban be bu i kɛ Ɲanmiɛn buman sa nga be yo’n be ndɛ’n, ɔ boman e nuan.

?BIBLU’N SE SƐ?

Biblu’n kle kɛ sa nga e yo be’n, Ɲanmiɛn fɛ i ɲin sie be su kpa. Sɛ be ti kpa’n, i klun jɔ. Sɛ be ti tɛ kusu’n, i klun jɔman. I wie yɛlɛ kɛ, kɛ Izraɛlifuɛ’m be yoli ɲin kekle Ɲanmiɛn su’n, w’a yomɛn i fɛ. Biblu’n waan be “klɔklɔli i.” (Jue Mun 78:40) Sanngɛ kɛ sa tɛ yofuɛ kun kaci i nzuɛn’n, ‘be klun ng’ɔ jɔ nyanmiɛn su lɔ’n,’ ɔ ti dan. (Lik 15:7) Kɛ sran kun ko si Ɲanmiɛn i nzuɛn wafa mɔ be yo ɲɛnmɛn’n, ɔ klo Ɲanmiɛn kpa ekun. Ɔ maan, ɔ klo sa nga Ɲanmiɛn klo be’n. Kpɛkun sa nga Ɲanmiɛn kpɔ be’n, ɔ kpɔ be wie.​—Amɔs 5:15.

WAFA NGA ZOOVA I LALOFUƐ’M BE YO’N

Fluwa kun seli kɛ Zoova i Lalofuɛ’m be “kle sran mun kɛ maan be nin be awlofuɛ’m be tran kpa, be yo junman difuɛ, yɛ be yo sran mɔ be kwla lafi be su’n.” Fluwa kunngba’n se kɛ: “Be nanti Ɲanmiɛn mmla’m be su kpa. Be liɛ’n, siklɛti nɔnlɛ nin nzanbɔɛ’n, nin drɔgi nɔnlɛ’n, nin sika nun mma tolɛ nin bla nin bian kunndɛlɛ’n, nin be wiengu yasua annzɛ be wiengu bla kunndɛlɛ’n, be ti ayeliɛ mɔ be saci sran nin Ɲanmiɛn be afiɛn ɔn.”

?Kɛ Zoova i Lalofuɛ’m be suan Ɲanmiɛn i nzuɛn’n i su like’n, ngue yɛ be yo ɔ? Silvia mɔ e dun mmua kɛnnin i ndɛ’n seli kɛ: “Dɔɔtrɔ nga be yo sran oke’m be ayre nun’n, be nga be di lɔ junman’n be nun sunman be di ndrunmun kpa. Ɔ maan, ɔ cɛman naan w’a nian be ayeliɛ’n su. Sanngɛ kɛ mɔ n si wafa nga Zoovaa bu ndrunmun dilɛ’n ti’n, n yo sa ng’ɔ ti kpa’n. I sɔ’n yo min fɛ, yɛ min wun jɔ min kpa fɔun.” Silvia wun i wlɛ weiin kpa kɛ i asɔnun’n i mmla m’ɔ nanti be su’n, i ti yɛ i nzuɛn’n ti kpa ɔ.

[Ja ngua lɛ ndɛ’n]

[Foto, bue 6]

[Ndɛ kwle 6]

?Ɲanmiɛn sulɛ wafa’m be su kpɛn’m be kle be sran mun kɛ be nanti Ɲanmiɛn i mmla’m be su?