Ɲanmiɛn sulɛ wafa kun o lɛ m’ɔ ti kpa ɔ

?Ɲanmiɛn sulɛ wafa’m be nun kun i ayeliɛ’n boli ɔ wla? Atrɛkpa’n i sɔ’n ti’n, a se ɔ wun kɛ wie fi nunman lɛ m’ɔ ti kpa ɔ. Sɛ ɔ ti sɔ’n, é sé ɔ kɛ kun o le m’ɔ ti kpa ɔ. Yɛ a kwla fa ɔ wla guɛ i su. I nun mɔ Klist o asiɛ’n su wa’n, ɔ fali sran wie mun yoli i sɔnnzɔnfuɛ. Kpɛkun, ɔ kleli be kɛ be nanti Ɲanmiɛn mmla’m be su. Be yɛ be ti Klistfuɛ kpa mun ɔn. Afin be tinuntinun be miannin be ɲin be nantili kɛ Klist kleli be’n sa. Sran kɛ be sa’n, be o lɛ andɛ. ?Wan yɛle sran sɔ mun?

Ɛstɛli mɔ e dun mmua kɛnnin i ndɛ’n, ɔ seli kɛ: “Zoova i Lalofuɛ mun yɛ be wa kleli min Biblu’n nun like ɔ. Ndɛ ng’ɔ o Zan 8:32 nun’n, w’a cɛman naan m’an wun kɛ ɔ ti nanwlɛ. Ɔ se kɛ: ‘Amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.’”

Re mɔ e kɛnnin i ndɛ wie’n seli kɛ: “Kɛ Zoova i Lalofuɛ’m be wa kleli min Biblu’n nun like’n, n wa wunnin kɛ nán Ɲanmiɛn yɛ ɔ fa ɲrɛnnɛn yi i sran’m be su ɔ. Naan i kpa bɔbɔ’n, ɔ ka kaan sa’n, ɔ́ núnnún ɲrɛnnɛn’n kwlaa. Sanngɛ sɛ dɔ nga su ɔ yaci klunwifuɛ’m be lɛ’n, sa kpa kun ti ɔ. I kwlaa sɔ’n yoli min fɛ dan.”

Sran’m b’a saci. Ɔ maan sran nga i waan ɔ́ nánti sein, ɔ ti kekle mɛn i. Sanngɛ nán kɛ be nanti sein ɔn, ɔ yoman ye ɔ. I sɔ yɛ andɛ sran sunman be kunndɛ kɛ bé yó ɔ. Be kunndɛ kɛ be kle be Biblu’n nun like naan bé fá su. I sɔ junman yɛ asiɛ wunmuan’n su’n, Zoova i Lalofuɛ’m be di ɔ. Ɔ maan le mɔcuɛ kwlaa nun’n, sran kaka kpa be suan like nga Biblu’n kle’n. Yɛ be deman be sika. Kɛ ɔ yo sɔ’n, be fa be wun mantan be Si Ɲanmiɛn, kpɛkun be wun kpaja be.a

Like nga ti yɛ Zoova i Lalofuɛ’m be se kɛ be asɔnun’n ti kpa mɔ i ti yɛ be fa be wla gua su’n, fa usa be. Kpɛkun, nian ndɛ nga be kan’n, sɛ ɔ ti nanwlɛ naan i su yɛ be nanti o. I liɛ’n, Ɲanmiɛn sulɛ wafa ng’ɔ ti kpa ɔ ɲrun’n, sɛ lɔ yɛ á kɔ́ annzɛ á kɔ́ uflɛ nun’n, a kwla fɛ i ajalɛ.

[Ja ngua lɛ ndɛ’n]

[Foto, bue 7]

[Ndɛ kwle, bue 7]

Like nga ti yɛ Zoova i Lalofuɛ’m be se kɛ be asɔnun’n ti kpa mɔ i ti yɛ be fa be wla gua su’n, fa usa be.