Fluwa nga é fá yía asiɛ wunmuan’n su sran mun E Wla Kpɛnlɛ Cɛn Aɲia’n i bo’n
1. ?Asiɛ wunmuan’n su’n, junman ngunmin kun benin yɛ é dí naan sran’m b’a ba E Wla Kpɛnlɛ Cɛn Aɲia’n i bo ɔ?
1 Zezi i ndɛ ng’ɔ kannin mɔ i waan: “An yo i kɛ nga ń yó i yɛ’n sa, maan amun wla kpɛn n su,” Zoova i sufuɛ’m be nanti su. (Lik 22:19) I sɔ’n ti’n, afuɛ nga be flɛ i 2010 nga nun’n, Marsi i cɛn ba 30 su’n, be nin be nga be klo Ɲanmiɛn ndɛ’n, bé yía bé klé kɛ be wla kpɛn Zezi i wie’n su. Kɛ ɔ ko yo naan sran’m b’a tran aɲia sɔ’n i bo’n, bé cɛ́cɛ́ be fluwa m’ɔ ti i liɛ ngunmin ɔn. Bé bó i bo Marsi i le 13 lele fá jú i le 30, yɛ bé yó i sɔ’n asiɛ wunmuan’n su.
2. ?Wafa sɛ yɛ é fá sran’m be yialɛ fluwa’n é yía sran mun ɔn?
2 Wafa nga é fá cɛ́cɛ́’n: Sɛ e to sran kun i awlo’n, e kwla fa fluwa’n i bue nga desɛn’n wo su’n e kle i, kpɛkun e fa wlɛ i sa nun. Kpɛkun e kwla se i kɛ: “Marsi anglo nga e o nun yɛ’n i cɛn ba 30 su’n, kɛ sɛnzɛ’n ko tɔ’n, asiɛ’n wunmuan su sran kpanngban kpa bé yó aɲia kun, bé fá klé kɛ be wla kpɛn Zezi i wie’n su. N bali kɛ ń fá fluwa nga ń yía wɔ nin ɔ awlofuɛ mun aɲia sɔ’n i bo. Ɔ janvuɛ’m be kwla ba wie. Dɔ nin aɲia yowlɛ’n be yɛ.” Ɔ ju wie kusu’n, e kwla fa sran’n i ɲin sie i Biblu’n nun ndɛ mma ng’ɔ se kɛ e yo aɲia sɔ’n su kwlaa naan y’a kan dɔ’n nin aɲia yowlɛ’n be ndɛ. Sanngɛ, nán e wla fi kɛ blɛ nga é fá fluwa’n cɛ́cɛ́ sran mun e jasin bowlɛ lika wunmuan nun’n, w’a sɔnman. I sɔ’n ti’n, nán e ijɔ dan.
3. ?Wan mun yɛ e kwla yia be ɔ?
3 Sɛ amun asɔnun’n i jasin fɛ bowlɛ’n cɛnnin’n, asɔnun kpɛnngbɛn’m be kwla se amun kɛ sɛ amun a toman sran kun i awlo’n, amun fa fluwa’n fa wlɛ i i anuan’n bo. Kɛ amún fá fluwa’n mán sran mun’n, sɛ an nian naan ɔ ti mɔ an fa periodiki mun uka su’n, an fa uka su. Nán amun wla fi be nga Ɲanmiɛn ndɛ’n lo be mɔ an ko nian be osu’n, nin be nga amun kle be Biblu’n nun like’n, nin amun wiengu junman difuɛ annzɛ suklu ba. Amun osufuɛ nin amun mantanfuɛ ɔ nin sran uflɛ nga amun si be kusu’n, nán amun wla fi be wie.
4. ?Sɛ e wun kɛ Zoova klo e ti yɛ ɔ fɛli i wa’n kpɔli e ti’n naan e si i ye’n, ngue yɛ é yó ɔ?
4 E siesie e wun naan e uka e junman’n su: Blɛ ng’ɔ mantan Zezi i wie cɛn’n, ɔ ti blɛ kpa kun mɔ e kwla fa uka e jasin fɛ’n bolɛ’n su kpa ɔ. ?I lɛ nun’n, e kwla siesie e wun naan y’a yo atin bofuɛ? Wie liɛ kusu’n, sɛ e wun kɛ e wa annzɛ be nga e kle be Biblu’n nun like’n, be nun wie’m be su kɔ be ɲrun Ɲanmiɛn ndɛ’n i silɛ nun’n, e kwla bo su kle asɔnun kpɛnngbɛn mun. I liɛ’n, be kwla nian sɛ be kwla yo jasin bofuɛ naan b’a di junman ngunmin kun sɔ wie o. Sɛ e wun kɛ Zoova klo e ti yɛ ɔ fɛli i wa’n kpɔli e ti’n naan e si i ye’n, nán e ngunmin e balɛ’n yɛ ɔ́ yó e cinnjin ɔn. Sanngɛ é yía sran kpanngban kpa naan b’a tran aɲia sɔ’n i bo wie.—Zan 3:16.