“Kɛ n nian wɔ sa’n, a nin atin bolɛ junman’n fata!”
1. ?Ndɛ benin yɛ aniaan bla kun kɛnnin i i atin bolɛ junman’n su ɔ?
1 Aniaan bla kun suan Kate Palm. Ɔ klɛnnin i wun boli jasin fɛ’n afuɛ blu ko yo wie Amlɛnkɛn’m be mɛn’n i ja ngua lɔ lika ng’ɔ suan Chili, i likalika kwlaa nun. Ɔ seli kɛ: “N wunman junman uflɛ kun mɔ ń dí mɔ ń klun jɔ́ kɛ nga sa ɔ. Annzɛ kusu m’ɔ́ yó mɔ Ɲanmiɛn sulɛ nun’n, min wun kpája min kɛ nga sa ɔ.” Atrɛkpa’n sran kun seli e kɛ: “Kɛ n nian wɔ sa’n, a nin atin bolɛ junman’n fata!” Kɔlɛ, aklunjuɛ nga be nga be di Ɲanmiɛn junman blɛ kwlaa nun’n i ti yɛ ɔ seli e sɔ ɔ.
2. Sa nga ti yɛ Ɲanmiɛn junman dilɛ’n yo maan e wun kpaja e’n, an yiyi nun.
2 Ɔ yo maan be wun kpaja be: Zezi m’ɔ ti e Atin Klefuɛ’n, i wun kpɛjɛli i kpa i Si’n i klun sa yolɛ nun. (Zan 4:34) Ɔ maan, kɛ Zezi seli i sɔnnzɔnfuɛ be kɛ, Ɲanmiɛn junman nga be di’n ɔ man aklunjuɛ kpa’n, i bɔbɔ wunnin ndɛ sɔ’n i nanwlɛ’n i ti yɛ ɔ seli be sɔ ɔ. Kɛ e fa ninnge nga Zoova klun jɔ su’n be yolɛ’n cici e ti’n, i sɔ’n yo maan e bɔbɔ e wun kpaja e. Asa kusu’n, kɛ e fa e blɛ nin e wunmiɛn nin e sa nun like’n e fa uka e wiengu’n, i sɔ’n yo maan aklunjuɛ nga e di’n, ɔ yo dan ekun.—Yol. 20:31, 35.
3. ?Kɛ é úka blɛ nga e fa bo jasin fɛ’n su’n é kɔ́’n, ye benin yɛ é kwlá dí ɔ?
3 Sɛ e fa blɛ kpanngban e bo jasin fɛ’n, é kwlá bó sran kpanngban be Biblu’n nun like klelɛ bo. Kɛ ɔ́ yó sɔ’n nn e aklunjuɛ’n yó dan kɔ́. Wie liɛ’n, ɔ kwla yo e kɛ sran nga be o e jasin bowlɛ nun’n, Ɲanmiɛn ndɛ’n timan be cinnjin. Sanngɛ kɛ é cɛ́ jasin fɛ’n bolɛ nun kɔ́ mɔ e sa’n tɔ́ nun nn e bɔbɔ é wún i kɛ e junman’n ba nvlɛ. Kɛ atin bofuɛ’m be di afuɛ kun junman’n nun’n, be ko di atin bofuɛ’m be suklu be ko suan like kaka. Kɛ ɔ ko yo sɔ’n, ninnge kpanngban nga be suɛnnin i lɔ’n, be kwla fa di junman kpa. (2 Tim. 2:15) Ndɛ nanwlɛ nga e kan kle sran mun’n, ɔ ti kɛ like yɛ e su lua sa. Sɛ e luɛ i lele naan e sa’n kanman ase’n, cɛn wie lele’n, ng’ɔ́ yó kpa’n, ɔ́ sɔ́n.—Aku. 11:6.
4. ?Gbanflɛn nin talua nga be su wa wie kolɛzi di mɔ bé ɲán be diplɔmu’n, ngue yɛ ɔ fata kɛ be bu i akunndan sie ɔ?
4 Gbanflɛn nin talua mun: ?Sɛ amun kɔ kolɛzi naan ɔ cɛ kan’n, amún wíe i dí’n, like nga amún yó’n, amun a bu i akunndan b’a sie? Yɛle kɛ, kɛ amun te kɔ kɔlɛzi’n, suklu lɔ junman’n ti’n, kɛ ɔ ko yo naan amun a ɲan amun ti b’a yo like uflɛ’n, ɔ timan blɛblɛ. Sanngɛ, kɛ amún wá wíe kɔlɛzi dí mɔ amun ɲán diplɔmu’n, amún ɲán amun ti siɛn’n. ?Ɔ maan, like nga amun fá amun blɛ’n bé yó’n, amun a bu i akunndan? Kɛ ɔ yo naan an fa mɛn’n nun junman dilɛ’n cici amun ti’n, sɛ an kan kle Ɲanmiɛn kɛ amun kunndɛ kɛ amún yó atin bofuɛ’n, ɔ ti kpa. Ngwlɛlɛ nga junman sɔ’n mán amun’n, ɔ́ úka amun tititi. Afin, kannzɛ sran’m be ti sɛ be ti sɛ’n, amún súan wafa nga an kwla bo jasin fɛ’n kle be’n. Sɛ like wie kle amun yalɛ’n, amún súan i trawlɛ’n. Amún súan amun wun su nianlɛ nin sran like klelɛ.
5. ?Wafa sɛ yɛ siɛ nin niɛn mun nin asɔnun’n be kwla yo naan atin bolɛ junman’n w’a yo aniaan’m be cinnjin ɔn?
5 ?Siɛ nin niɛn mun’n, blɛ kwlaa nun Ɲanmiɛn junman dilɛ’n, i su yɛ an fa amun mma’m be ɲin sie ɔ? Wafa nga amun kan junman sɔ’n i ndɛ kpa ɔ nin wafa nga amun bɔbɔ amun fa amun wun wla nun’n, ɔ maan ba’m be kwla fa Ɲanmiɛn Sielɛ junman’n sie like kwlaa ɲrun. (Mat. 6:33) Aniaan kun suan Ray. I nun m’ɔ o kolɛzi’n m’ɔ su wa wie i di’n, ɔ boli atin bolɛ junman’n i dilɛ bo. Ɔ kɛnnin i nin’n ndɛ seli kɛ: “Min nin i akunndan ng’ɔ buli’n m’ɔ jrannin su kpa titi’n yɛle kɛ atin bolɛ junman nun aklunjuɛ nga be di’n, junman wie fi liɛ’n tomɛn i.” Asɔnun’n nun’n, e kwlaa e kwla yɛyɛ atin bolɛ junman’n annzɛ e kwla suan atin bofuɛ’m be bo naan junman’n w’a yo aniaan nga’m be cinnjin. I lɛ nun’n, aniaan bian kun mɔ be flɛ i kɛ Jose m’ɔ fin Ɛspaɲi’n, ɔ seli kɛ: “Min asɔnun nun’n, aniaan’m be kwlaa be kan kɛ junman nga gbanflɛn nin talua’m be kwla di m’ɔ lemɛn i wunsu’n, yɛle atin bolɛ junman’n. Wafa nga be manman junman sɔ’n nin ukalɛ trele nga be ukali min’n ti’n, n fali min wun wlali nun wie.”
6. ?Kɛ é sé yɛ’n, sɛ atin bolɛ junman’n yoman aniaan kun i fɛ’n, ngue yɛ ɔ kwla yo ɔ?
6 Wafa nga é kpálo sa nga be tanndan e ɲrun’n: ?Yɛ sɛ aniaan kun se kɛ atin bolɛ junman’n timɛn i nnana nin? Sɛ i sɔ akunndan yɛ an bu’n, an kan kle Zoova, an srɛ i, an se i kɛ: ‘Ɲanmiɛn, sɛ atin bolɛ junman’n ti min liɛ’n annzɛ ɔ timan min liɛ’n, n wunmɛn i wlɛ. Sanngɛ like nga ɔ ko jɔ ɔ klun’n yɛ n kunndɛ kɛ ń yó ɔ.’ (Jue. 62:9; Nya. 23:26) I sin’n, amun nian Ɲanmiɛn Ndɛ’n nun yɛ amun kunndɛ atin nga i anuannzɛ’n kle’n naan amun a wun like nga Ɲanmiɛn kunndɛ kɛ amun yo’n. Be nga andɛ be ti titi atin bofuɛ’n, be dun mmua yoli cɛn kunngun atin bofuɛ ‘be niannin.’ Ye nga be dili’n maan be fali be wun wlɛli i blɛ kwlaa nun Ɲanmiɛn junman dilɛ nun mlɔnmlɔnmlɔn.—Jue. 34:9.
7. ?Sɛ e bu i kɛ dɔ 70 i ɲanlɛ’n kwla mian e sa’n, ngue yɛ e kwla yo ɔ?
7 ?Yɛ sɛ e bu i kɛ anglo kwlaa nun’n, e su kwlá boman jasin fɛ’n dɔ 70 kɛ ng’ɔ fata kɛ atin bofuɛ’m be yo’n sa nin? Sɛ ɔ ti sɔ’n, e kwla bo su kle atin bofuɛ nga be su sa’n nin e liɛ’n ti kun’n. (Nya. 15:22) Kpɛkun, ajalɛ fanunfanun nga e kwla fa naan y’a ɲan dɔ’n, maan e klɛ. Atrɛkpa’n, ninnge nga be timan cinnjin mɔ i klikli nun’n, e buli i kɛ be kpalolɛ’n kwla yo kekle’n, é wún kɛ be kpalolɛ timan kekle sɔ liɛ. Naan siɛn’n, e kwla ɲan blɛ e bo jasin fɛ’n.—Efɛ. 5:15, 16.
8. ?Sɛ ninnge wie’m be o lɛ mɔ laa’n e kwlá yoman’n, ngue ti yɛ ɔ ti kpa kɛ ɔ ju blɛ wie’n, e nian sɛ e kwla yo o?
8 Maan e bu i akunndan ekun e nian: Ninnge nga e kwlá yoman’n, atrɛkpa kɛ ɔ́ kɔ́ i ɲrun’n e kwla yo. Ɔ maan, kɛ ɔ ju blɛ wie’n, sɛ e tran e bu ninnge e kwla yo’n be akunndan’n, i sɔ’n kwla uka e. Be nga be antrɛti’n w’a mantan koko’n be kwla yo i sɔ. E niaan kun m’ɔ suan Randy, i liɛ’n ɔ fali i antrɛti ka naan i antrɛti blɛ’n w’a ju. Ɔ seli kɛ: “Kɛ n yoli i sɔ’n, min nin min yi e kacili titi atin bofuɛ. Ɔ maan, lika nga be sa mian jasin bofuɛ wun lɔ’n, e ɔli lɔ ko ukali aniaan mun. Ajalɛ nga n fali’n ti’n, suralɛ nga n ɲɛnnin i’n sɔnnin. Be nun danfuɛ’n yɛle kɛ min klun akunndan’n buman n fɔ kun.”
9. ?Ngue like yɛ ɔ fata kɛ yasua kun nin i yi’n be tran be bu i akunndan kpa ɔ?
9 Be nga be o aja nun’n, be nun wie mun kɛ be niannin nun kpa’n, be wunnin kɛ ɔ timan cinnjin sɔ liɛ kɛ be sran nɲɔn’n be di junman blɛ kwlaa nun. I yo, kɛ be fɛ i sɔ ajalɛ’n, ɔ fata kɛ be yo be sika’n i cɛcɛ. Sanngɛ i sin mmlusuɛ nga be ɲɛn i’n timan kaan. Be flɛ aniaan kun kɛ Zan. Koko nga nun’n, junman nga i yi’n di i blɛ kwlaa nun’n, ɔ yacili i dilɛ naan w’a kwla bo jasin fɛ’n kpa w’a tra laa’n. I waan: “Kɛ n wun kɛ aliɛ ba kwlaa nun’n, Zoova junman’n yɛ min yi’n i sa o nun’n, i fɛ ng’ɔ yo min’n be kanman.”
10. ?Sa benin ti yɛ Klistfuɛ’m be bu atin bolɛ junman i dilɛ’n i akunndan ɔn?
10 Ɔ kle kɛ e klo Zoova yɛ e lafi i su: Junman cinnjin kpafuɛ nga Zoova fa mannin e kɛ e di’n yɛle jasin fɛ’n bolɛ. Ɔ ka kaan mɛn’n nga wíe. Yɛ, be nga be bo Zoova i dunman fɛ’n, be yɛ bé fíte nun ɔn. (Rɔm. 10:13) Sɛ e klo Zoova kpa yɛ sɛ e si like kwlaa ng’ɔ yoli mannin e’n i su ye dan’n, é bó jasin fɛ’n juejue su kɛ nga i Wa’n waan e yo’n sa. (Mat. 28:19, 20; 1 Zan 5:3) Asa kusu’n, sɛ e lafi su kɛ mɛn’n nga e o nun yɛ’n su kɔ i bue nuan’n, bikisa mɔ e te le i wun blɛ’n, é tú e klun é bó jasin fɛ’n. E su yoman kɛ be nga be fa mɛn’n nun ninnge’n yo be wun sa ye’n mɔ be nyin blo i kunndɛlɛ su ngboko’n sa.—1 Kor. 7:29-31.
11. ?Sɛ aniaan kun se e kɛ kɛ ɔ nian e sa’n, e nin atin bolɛ junman’n fata’n, wafa se yɛ ɔ fata kɛ e wun yo e ɔ?
11 Atin bolɛ junman nga be di’n, nán dɔ kunndɛlɛ ti ɔ sanngɛ be wun mɔ be fa mannin Ɲanmiɛn ti ɔ. I sɔ’n ti’n, sɛ aniaan kun se e kɛ, kɛ ɔ nian e sa’n, e nin atin bolɛ junman’n fata’n, maan e si kɛ e sran m’ɔ bu e’n ti yɛ ɔ seli e sɔ ɔ. I sin’n, maan e nian sɛ e kwla fa e wun wla nun o. Kpɛkun maan e kan kle Ɲanmiɛn srɛlɛ nun.
[Ndɛ kwle, bue 4]
?Siɛ nin niɛn mun’n, an fa amun mma’m be ɲin sie i blɛ kwlaa nun Ɲanmiɛn junman dilɛ’n su?
[Ndɛ kwle, bue 5]
Junman cinnjin kpafuɛ nga Zoova fa mannin e kɛ e di’n yɛle jasin fɛ’n bolɛ