Maan e bo e wun siesielɛ bo ikisa!
1. ?Afuɛ kwlaa nun’n, ngue yɛ e yo i anglo nga e yo E wla kpɛnlɛ cɛn aɲia’n ɔ nin nga be mɛntɛn i’n be nun ɔn? ?Yɛ ngue yɛ é yó naan i sɔ’n w’a yo ye ɔ?
1 Afuɛ kwlaa’n, anglo nga e yo E wla kpɛnlɛ cɛn aɲia’n ɔ nin nga be mɛntɛn i’n be nun’n, e kwla se kɛ e ‘kpan kekle e yi Anannganman i ayɛ.’ (Jue. 109:30) ?Ɔ maan Marsi nun’n, amún úka amun jasin fɛ’n bolɛ junman’n su? Sɛ amun yo sɔ’n, ɔ́ klé kɛ amun wla w’a fiman Ɲanmiɛn m’ɔ fɛli i Wa’n yili e ti tɛ’n. Sanngɛ, kɛ ɔ ko yo naan i sɔ’n w’a yo ye’n, ikisa yɛ ɔ fata kɛ amun bu amun wun siesielɛ’n i akunndan ɔn.—Nya. 21:5.
2. ?Kɛ afuɛ sin’n, be tili cɛn kunngun atin bofuɛ’m be junman dilɛ dɔ’n su’n, ɔ yoli amun sɛ, yɛ ngue yɛ amun yoli ɔ? ?Ajalɛ benin yɛ aniaan wie’m be fali ɔ?
2 Maan e kaci cɛn kunngun atin bofuɛ: Afuɛ sin’n, kɛ aniaan’m be tili i kɛ Avrili nun’n, bé tí cɛn kunngun atin bofuɛ’m be junman dilɛ dɔ’n su’n, ɔ yoli be fɛ dan kpa. Ndɛ nga aniaan kun kannin’n yɛ: “Dɔ nga su’n, n kɔ kolɛzi. Kusu n nin a wunman kɛ n ko yo naan m’an yo titi atin bofuɛ’n. Sanngɛ Avrili anglo’n nun’n, ḿ má fá min wun ń wlá cɛn kunngun atin bolɛ junman’n nun. Kannzɛ bɔbɔ n klɛli i fluwa’n su kɛ ń dí dɔ 30, sanngɛ ḿ má mían min ɲin ń dí dɔ 50.” Kɛ aniaan bla kun m’ɔ di junman’n ɔ tili i kɛ b’a sie i dɔ 30 siɛn’n, ɔ seli kɛ: “?Mɔ b’a ti su kɛ nga sa niɔn’n, wan yɛ ɔ kwlá diman ɔn?” Aniaan bla kun le afuɛ 80. Ɔ ti titi atin bofuɛ laa. Kɛ ɔ tili ndɛ sɔ’n, i waan: “Nga liɛ’n, flɛlɛ nin srolɛ yɛ b’a yia nun ɔn. Zoova bɔbɔ si kɛ i nun nga mɔ n ti atin bofuɛ’n, n dili aklunjuɛ dan.” Aniaan nga b’a kwlá kaciman cɛn kunngun atin bofuɛ blɛ sɔ nun’n, jasin nga be bo i titi’n i su ukalɛ’n, i su yɛ be fali be ɲin sieli ɔ.
3. ?Ngue ti yɛ maan cɛn kunngun atin bolɛ junman’n wá yó fɛ kpa Marsi nin Avrili nin Mɛ anglo’m be nun ɔn?
3 Afuɛ’n, Marsi anglo’n nun’n, cɛn kunngun atin bolɛ’n junman’n wá yó fɛ kpa. Afin, bé mán e atin ekun naan e di dɔ 30 annzɛ dɔ 50 kɛ afuɛ sin liɛ’n sa. Asa’n, kɛ ɔ́ fɛ́ i Fue m’ɔ ti Marsi i le 17 su’n, é wá yía sran mun naan e ngba e tran E wla kpɛnlɛ cɛn aɲia’n i bo. Bé yó aɲia sɔ’n Avrili i le 5 su. Be waan tro fɛ’n yɛ ɔ cuɛn janda’n niɔn. Yɛle kɛ, kɛ Marsi nun’n aniaan’m bé fá be wun wlɛ́ i cɛn kunngun atin bolɛ junman’n nun’n, i fɛ ng’ɔ́ yó be ti’n, bé kúnndɛ kɛ bé dí i ekun Avrili nin Mɛ nun naan bé dí dɔ 50.
4. ?Ngue yɛ e kwla yo naan y’a kwla uka e jasin fɛ’n bolɛ junman’n su ɔ? ?Yɛ sɛ e yo sɔ’n, i bo guá sɛ?
4 Cɛn uflɛ nga amún sú Ɲanmiɛn awlo lɔ ekun’n, wafa nga awlobofuɛ’m be tinuntinun be kwla uka be jasin bolɛ junman’n su’n Marsi nin Avrili ɔ nin Mɛ nun’n, amun koko su yalɛ. (Nya. 15:22) Asa ekun’n, ajalɛ nga amún fá’n, amun fa wlɛ i Zoova sa nun naan ɔ ra su. (1 Zan 3:22) Anglo sɔ’m be nun’n, kɛ é úka é jasin fɛ’n bolɛ junman’n su’n, é mánmán Zoova kpa trá laa’n. Sanngɛ nɛ́n i ngba ɔ. Yɛle kɛ, é dí aklunjuɛ kpa ekun.—2 Kor. 9:6.