Nán aata diwlɛ’m be nun jasin fɛ’n bolɛ’n kun e srɛ
1. ?Sɛ amun sro aata diwlɛ’m be nun jasin bolɛ’n, ngue ti yɛ ɔ fataman kɛ amun sa sin bubu amun ɔn?
1 ?Amun sro aata diwlɛ’m be nun jasin bolɛ’n? Sɛ ɔ ti sɔ’n, nán amun sa sin bubu amun. Afin blɛ wie nun’n, Pɔlu bɔbɔ m’ɔ ti jasin bofuɛ yakpafuɛ’n, jasin bolɛ’n w’a yoman pɔpɔ i sa nun. Ɔ maan ɔ ‘trɛli i awlɛn’ naan w’a kwla bo. (1 Tɛs. 2:2) Ndɛ kpɔlɛ nga bé wá bá lɛ’n be nun’n, bé wá bóbó kosan wie mɔ jasin bofuɛ’m be fa usa be wun’n, be nun wie’m be su. Kpɛkun, ajalɛ nga amun kwla fa naan amun a wun be trawlɛ’n, bé kɛ́n i ndɛ wie.
2. ?Ngue ti yɛ ɔ fataman kɛ amun bu i kɛ aata diwlɛ’m be nun jasin fɛ’n bolɛ’n ti aata difuɛ’m be yalɛ klelɛ ɔ?
2 ?Kɔlɛ n su kleman ninnge atɛ yofuɛ’m be yalɛ? Sɛ aata difuɛ kun i sa o like nun naan sran kun ba like tolɛ’n, ɔ yia like nga ɔ su yo’n su, kpɛkun like nga sran’n bɛ i tolɛ’n, ɔ fa mɛn i. Ɔ faman sran’n i wun ya. Ɔ maan, sɛ amun su bo jasin fɛ’n aata diwlɛ’m be nun, naan be wun i kɛ amun su mantan be aata diwlɛ’n, bé bú i kɛ amun kunndɛ kɛ amún tó like ti ɔ. I ti’n, bé sɔ́ amun nun klanman. I sɔ’n ti’n, sɛ amun wlawla amun wun kpa naan kusu, amun yo be like juejue su’n, be su buman amun finfinfuɛ.
3. ?Ngue yɛ amun kwla yo naan ninnge atɛ yofuɛ’m b’a faman amun wun ya ɔ?
3 ?Kɛ sran kpanngban b’a ba ninnge tolɛ’n yɛ ɔ fata kɛ m bo jasin fɛ’n niɔn? Cɛcɛ. Sɛ amun ɲɛn i wun alaje’n, maan amun ko wun be wun blɛ nga sran’m b’a sɔnman be su’n, i nun. Ɔ kwla yo blɛ nga be su tike be aata diwlɛ’n i anuan’n annzɛ be su ɲannji be trɔ’n. Sɛ kusu kɛ amún jú lɔ’n, sran kpanngban be o lɛ’n, maan amun minndɛ kɛ sran nga ɔ nian aata diwlɛ’n su’n, ɔ ɲɛn i ti ka naan amun a ko wun i wun. Asa ekun’n, nán maan amun kan ndɛ kpanngban.
4. ?Sɛ e ju aata diwlɛ’m be nun lɔ’n, é sé sran’m be sɛ?
4 ?Sɛ n ju lɔ’n, ń sé be sɛ? Sɛ junman difuɛ’m be sɔnnin aata diwlɛ nun’n, maan amun nin sran nga ɔ nian lika’n su’n be ijɔ. Amun kwla se i kɛ: “Be toman aata difuɛ’m be awlo sa. I ti’n, e bali amun lika nun wa. Kɛ mɔ a su yo like’n, n su cɛman.” Sɛ b’a usaman wafa nga e ɲan sika naan y’a di e junman’n, nán amun kan be klunklo like nga be kwla man fa suan e junman’n bo’n i ndɛ. Ɔ timɛn i ti’n, bé bú amun ninnge atɛ yofuɛ. Aata diwlɛ ngba timan kun. I ti’n, maan amun srɛ sran ng’ɔ nian lika’n su’n i atin naan amun a kwla bo jasin’n b’a kle junman difuɛ onga mun. Maan amun kan ndɛ kunngba’n be kle be. Sɛ amun nian naan be nun kun su yo like’n, amun ijɔ kpe kan, kpɛkun amun mɛn i fluwa nɲa kun. Sɛ kusu amun nin be kwlá ijɔman’n, wie liɛ’n, be kwla kplin su kɛ amun yaci Biblu’n i akua wie, annzɛ periodiki wie kan be lo wunmiɛn lɔ’n.
5. ?Ngue ti yɛ ɔ fataman kɛ aata diwlɛ’m be nun jasin bolɛ’n kun amun srɛ ɔ?
5 Zezi nin Pɔlu be boli jasin fɛ’n be kleli sran mun be junman diwlɛ lɔ. I sɔ yolɛ nun’n, be klun w’a titiman be. Amun kusu, amun kwla yo kɛ be sa wie. (Mat. 4:18-21; 9:9; Yol. 17:17) Amun srɛ Zoova kɛ ɔ yo naan amun awlɛn’n yo wɛtɛɛ naan amun a yo yakpafuɛ. (Yol. 4:29) Kɛ mɔ blɛ kwlaa nun e to sran mun aata diwlɛ’m be nun’n, jasin bolɛ’n i wafa sɔ’n, ɔ ba nvlɛ. Ɔ maan é wlá amun fanngan kɛ amun yo kan be nian.