“Jasin fɛ i kanlɛ m’ɔ ti ɔ junman’n, di”
1. ?Ajalɛ kpa benin yɛ Pɔlu kle e ɔ?
1 “Jasin fɛ i kanlɛ b’ɔ ti ɔ junman’n, di.” (2 Tim. 4:5) Sɛ Pɔlu mannin Timote i afɔtuɛ sɔ’n, i su ɔ. Afin kɛ ɔ fɛ i afuɛ nga be flɛ i 47 nun lele m’ɔ́ fá jú 56 nun Klistfuɛ klikli’m be blɛ su’n, nn i bɔbɔ Pɔlu w’a tu i ngaliɛ dilɛ junman’n i wun ajalɛ kpɛ nsan. Sa Nga Be Yoli’n fluwa’n kan flan nun kɛ Pɔlu “kannin Ɲanmiɛn ndɛ’n.” (Yol. 23:11; 28:23) ?Yɛ e li, wafa sɛ yɛ e kwla niɛn i ajalɛ’n su ɔ?
2. ?Kɛ é bó jasin fɛ’n awlo’m be nun’n, wafa sɛ e kwla kle kɛ e di junman sɔ’n i kpa ɔ?
2 Awlo’m be nun: Kɛ é bó jasin fɛ’n awlo’m be nun’n, e toman sran’m be ngba. I sɔfuɛ mun’n, ɔ fata kɛ e fa blɛ uflɛ e ko kunndɛ be. Wie liɛ’n, nnɔsua nun annzɛ Fue’n nin Mɔnnɛn cɛn yɛ e kwla to sran’n i awlo lɔ ɔ. Ɔ fata kɛ e mian e ɲin e bo jasin fɛ’n e kle sran mun, be tinuntinun be awlo’m be nun. Ɔ maan sɛ e toman be’n, maan e sa e sin e flan nun. ?Yɛ sɛ e yo sɔ lele naan ɔ yo ngbɛn’n nin? Atrɛkpa’n, like nga é yó i siɛn’n naan w’a yo ye’n, yɛle kɛ e klɛ be fluwa. Sɛ kusu e kwla flɛ be telefɔnun nun’n, maan e flɛ be.
3. ?Jasin fɛ’n bolɛ’n i wun atin benin yɛ e kwla ɲɛn i ɔ?
3 Lika nga sran’m be o lɛ’n, yɛ jasin fɛ’n bolɛ mɔ e ɲɛn i wun atin’n: Be nga andɛ be sie be su Zoova i sufuɛ’m be nuan bo’n, be kan ngwlɛlɛ ndɛ kle be. Wie liɛ’n, be kɛn i “mmuɛ’m be nun” nin “anyia lika” mun be nun. (Nya. 1:20, 21) ?Kɛ é fíte é kɔ́ e bɔbɔ e ninnge’m be yolɛ’n, e wun i wlɛ kɛ ɔ fata kɛ e bo jasin fɛ’n? ?E kwla se kɛ e fa e wun man “Nyanmiɛn ndɛ kanlɛ’n mlɔnmlɔn?” (Yol. 18:5) Sɛ e kwla tɛ su klanman’n, nn kɛ be se kɛ e ‘kan Ɲanmiɛn ndɛ’n,’ i sɔ yɛ e yo ɔ.—Yol. 10:42; 17:17; 20:20, 21, 24.
4. ?Ngue ti yɛ Ɲanmiɛn srɛlɛ’n nin i ndɛ’n i su akunndan bulɛ’n ti kpa ɔ?
4 Sanngɛ wie liɛ’n, ɲannzuɛn’n annzɛ tukpacɛ wie ti’n, jasin fɛ’n bolɛ’n kwla yo e kekle. I kwlaa yoli o, Zoova si e kpa yɛ ɔ kwlá seman kɛ e yo like ng’ɔ tra e kpɛn’n. (Jue. 103:14) Ɔ maan sɛ i sɔ sa o e su’n, e srɛ i naan e kɛn i ndɛ’n yakpa su. (Yol. 4:29, 31) Kpɛkun kɛ e ngunmin é súan Ɲanmiɛn Ndɛ’n, maan e bu jasin fɛ’n i like kpa m’ɔ ti’n i akunndan. (Fil. 3:8) Sɛ e yo sɔ’n, é kwlá bó i juejue su.
5. ?Ngue yɛ é yó m’ɔ́ klé kɛ Zoɛli i ndɛ’n su kpɛn su ɔ?
5 Ɲanmiɛn nuan ijɔfuɛ Zoɛl seli kɛ kwlaa naan Zoova i cɛn dan sroesroe’n w’a ju’n, lika nga be sin nun lɛ ɔ ɔ yoman ye’n, Ɲanmiɛn i sufuɛ’m bé ‘fá be wun bé tín lɛ fii bé sín’ bé bó jasin fɛ’n, naan like fi su kwlá jranman be. (Zoɛ. 2:2, 7-9) I sɔ’n ti’n, maan e yo like kwlaa nga e kwla yo’n naan jasin fɛ’n bolɛ junman mɔ e su ɲɛnmɛn i wunsu le kun’n, e di i kpa.