Maan e fa jw.org e bo jasin fɛ’n

E ɛntɛnɛti adrɛsi’n uka e maan e fa jasin fɛ’n e fa tru lele e “ju asiɛ’n i awieliɛ” lɔ. (Yol. 1:8) Kpɛ sunman’n, nán sran’m be bɔbɔ be ngunmin yɛ be wunnin jw.org ɔ. Jasin bofuɛ mun yɛ be kleli be ɔ.

Akpasua sunianfuɛ kun fali video ?Ngue ti yɛ Biblu’n nun like suanlɛ’n ti cinnjin ɔn? sieli i selilɛli’n nun. Kpɛkun kɛ ɔ ɲɛn i wun atin’n, ɔ fa kle sran mun. I wie yɛle kɛ, kɛ ɔ kɔ jasin fɛ’n i bolɛ awloawlo’m be nun’n, ɔ se sran mun kɛ: “M bali amun osu nianlɛ naan ń úka amun naan amun wun kosan cinnjin nsan be su tɛlɛ’n. Kosan sɔ mun yɛ: ?Ngue ti yɛ sa tɛtɛ’m b’a tru mɛn’n nun sɔ ɔ? ?Ɲanmiɛn yó sɛ naan w’a yi e su sa mun? ?Dɔ nga su’n, ngue yɛ e kwla yo naan y’a wun e su sa’m be trawlɛ ɔ? Video kpe kan nga tɛ kosan sɔ’m be su.” I sin’n, ɔ fɛ i selilɛli’n fite, kpɛkun ɔ bo video’n kle i. Yɛ ɔ nian sɛ i nun ndɛ’n yo sran’n i fɛ o. Nanwlɛ, video’n i ɲɛnmɛn m’ɔ yo’n ti’n, be nga be nian’n, be niɛn i lele guɛ i ti nin i bo. I sin’n, ɔ se kɛ: “A tili i kɛ a kwla kɔ ɛntɛnɛti su ko klɛ Zoova i Lalofuɛ’m be fluwa naan be w’a kle ɔ Biblu’n nun like. Kɛ mɔ m’an ju wa’n, n kwla kle ɔ wafa nga be suan Biblu’n nun like’n. Ɔ su cɛman.” Sɛ sran’n kplin su’n, ɔ fa e fluwa pɛplɛpɛ Jasin fɛ ɔ kle i wafa nga be suan Biblu’n nun like’n. Yɛ sɛ sran’n ɲɛnmɛn i ti’n, cɛn ng’ɔ kwla ko kle i’n, ɔ nin i be nuan sɛ su. Wie liɛ’n, sɛ ɔ kɔ kafe nɔnwlɛ wie nun’n, ɔ fa ijɔlɛ’n man sran ng’ɔ ti i wun lɛ’n. Kɛ bé bó nzɛmundɛ’n, ɔ kan ndɛ kunngba’n kle sran sɔ’n. ?Yɛ e li? ?E fa jw.org e bo jasin fɛ’n?