Maan e fa jw.org nun ndɛ ce nga be flɛ i “ Questions bibliques ” e bo jasin fɛ’n

Kɛ e kɔ jw.org/fr su mɔ e tin “ La Bible et vous ” su’n, e wun ndɛ ce nga be flɛ i “ Questions bibliques. ” Kosan nga be o lɔ’n, sran’m be ta be usa. Sɛ e si kosan sɔ mun’n, ɔ ti kpa. Afin e kwla fa sran’m be ɲin sie i jw.org su naan be wun wafa nga Biblu’n tɛ be su’n. E bɔbɔ e kwla fa kosan sɔ mun e usa sran mun naan e nin be e koko yalɛ. I wie yɛle kɛ, kɛ e to sran kun’n, e kwla fa kosan ng’ɔ ti sran’m be cinnjin e jasin bowlɛ’n nun’n, e usɛ i. Kɛ ɔ ko tɛ su’n, wafa nga be tɛli su jw.org su’n, maan e yiyi nun sɔ e kle i. I sin’n, e kwla se i kɛ ndɛ’n i nun yiyilɛ sɔ’n o jw.org su. Sɛ e klo kusu’n, kɛ ɔ ko tɛ su’n, e kwla fa wafa nga jw.org yiyi ndɛ sɔ’n nun’n e kle i trele naan ɔ kanngan nun. Ajalɛ nga akpasua sunianfuɛ kun i yi’n fa’n, i bo’n gua kpa. Ɔ se sran’n kɛ: “Sran kpanngban be usa be wun sɛ ɲrɛnnɛn sa’m be fin Ɲanmiɛn o. ?A klo kɛ n fa segɔndu 51 n kle wɔ i su tɛlɛ’n?” I sin’n, kosan sɔ’n i su tɛlɛ ng’ɔ fa sieli i telefɔnu nun’n, ɔ bo kle i. Kpɛkun i agualiɛ su’n, ɔ fa fluwa Biblu’n kle i ndɛ tre 11 fa kle sran’n.