Maan e bo jasin fɛ’n i kpa tra laa: Maan e kle sran’n kɛ i ndɛ lo e

?Ngue ti yɛ ɔ ti cinnjin ɔn? Kɛ Zezi fɛli i ɲin sieli i sran’m be su’n, ɔ kleli kɛ be tinuntinun be ndɛ lo i. I wie yɛle kɛ, cɛn kun’n, Zezi waan ɔ́ yó bian sutrefuɛ kun i juejue. Sanngɛ atrɛkpa’n, ɔ wunnin i wlɛ kɛ sran kpanngban’m be nun’n, bian’n wunmɛn i wun fɛ. I sɔ’n ti’n, ɔ fɛ i ɔli aamiɛn naan w’a yo i juejue. (Mar. 7:31-35) Zezi buli i sɔnnzɔnfuɛ’m be sran. Yɛle kɛ w’a kaman lɛ w’a kleman be like kpanngban, afin be ti kwlá sɔnmɛn i bo. (Zan 16:12) Kɛ é sé yɛ’n, Zezi o ɲanmiɛn su lɔ. Sanngɛ ɔ te kle kɛ e tinuntinun e ndɛ lo i. (2 Tim. 4:17) Kɛ mɔ e ti Zezi i sɔnnzɔnfuɛ’n ti’n, e kunndɛ kɛ é níɛn i ajalɛ’n su. (1 Piɛ. 2:21; 1 Zan 3:16, 18) Asa ekun’n, sɛ e kle sran kun kɛ i ndɛ lo e naan e bu i su sa’m be akunndan’n, ɔ́ fɛ́ i su síe e nuan bo. Afin ɔ́ wún i wlɛ kɛ i ndɛ lo e sakpasakpa naan nán jasin kun bolɛ ngunmin, annzɛ nán fluwa kun i fa manlɛ ngbɛn sa ti yɛ e bali ɔ.

?Wafa sɛ yɛ é yó i sɔ ɔ?

Maan e siesie e wun kpa. Yɛ maan e yo kɛ y’a wɔ e janvuɛ wie i osu nianlɛ sa.
Maan e fa e ɲin sie i i awlo lɔ ninnge wie’m be su. ?Kɛ e niɛn i sa’n, sran sɔ’n le ba? ?Ɔ klo flɛliflɛli mun annzɛ ɔ ta nnɛn wie mun? ?Ɔ le ninnge wie mɔ be kle kɛ ɔ kɔ Ɲanmiɛn sulɛ wafa kun nun ɔn? Atrɛkpa’n, i sɔ ninnge’m be kwla uka e naan y’a fiti e ndɛ’n su kɛ ɔ nin i fata’n sa.
Maan e usɛ i kosan naan ɔ tɛ su. Kɛ ɔ́ íjɔ’n, maan e sie e su kpa. Yɛ nán maan e kpɛ i nuan ndɛ. Maan e niɛn i ɲrun nun naan ɔ wun kɛ e sie e su i nuan bo sakpa. E kwla yo i mo nin ijɔlɛ. Nán e se kɛ é klé i kɛ i ndɛ liɛ’n timan su naan e liɛ’n yɛ ɔ ti su ɔ.
Sɛ ɔ nin i fata’n, maan e nian naan ndɛ ng’ɔ ti i cinnjin’n, e jran su e bo jasin fɛ’n. Nán maan e bu i kɛ i sɔ yolɛ’n ti kekle. Afin ndɛ nga be o e fluwa nɲa mun, nin e fluwa pɛplɛɛplɛ nin periodiki’m be nun’n, be diman be yalɛ. Sɛ kusu blɛ ng’ɔ ɲɛnmɛn i ti’n, i nun yɛ e toli i’n, maan e bu i sɔ liɛ’n i akunndan. Nán maan e ndɛ’n yo tɛnndɛn.

Anglo nga nun’n, maan e yo nga e nian:

Kɛ amún sú Ɲanmiɛn awlo lɔ’n, wafa nga amun kwla jran sran’n i ndɛ liɛ ng’ɔ kan’n su bo jasin fɛ’n, amun yi i nglo.
Kɛ amún yó jasin fɛ’n bolɛ’n aɲia’n, wafa nga amun kwla kle kɛ sran’n i ndɛ lo amun’n, aniaan ng’ɔ tinngɛ aɲia’n kwla yi i nglo, annzɛ amun kwla koko su yalɛ.