Maan e bo jasin fɛ’n i kpa tra laa: Kɛ sran’n fa ya’n, like nga e kwla yo’n

?Ngue ti yɛ ɔ ti cinnjin ɔn? Kɛ é bó jasin fɛ’n, sran nga e to be’n be nun sunman be ti aɲinyiɛfuɛ. Sanngɛ Zezi seli kɛ sran wie’m bé kpɔ́ e. (Zan 17:14) Ɔ maan, sɛ e to sran kun naan ɔ fa e wun ya’n, nán maan i sɔ’n bo e nuan. Kɛ i sɔ sa’n ju’n, maan e yo like nga e ko yo naan Zoova i klun w’a jɔ e wun’n. I liɛ’n, e nin sran mun e su kacikaciman e nuan. (Rɔm. 12:17-21; 1 Piɛr 3:15) Asa ekun’n, e ndɛ tiefuɛ’n bɔbɔ ɔ nin be nga be o lɛ’n, bé wún kɛ e timan sran tɛ. Ɔ maan, sɛ Zoova i Lalofuɛ wie to be cɛn uflɛ’n, bé kwlá sɔ́ i nun klanman.—2 Kor. 6:3.

?Wafa sɛ yɛ é yó i sɔ ɔ?

Sɛ sran’n su ijɔ’n, nán maan e kpɛ i nuan ndɛ. I sɔ’n kwla yo maan i ya’n kan ase. Sɛ ndɛ tiefuɛ’n su kan ndɛ tɛtɛ kle e’n, nán maan ɔ lo e ngasi. (Aku. 7:9) Atrɛkpa’n, sa wie m’ɔ o i su’n, i ti yɛ ɔ fali ya ɔ. Annzɛ kusu i akunndan’n w’a sanngan. Kannzɛ bɔbɔ ndɛ nga e kannin’n ɔ loli i ngasi’n, kpɛ sunman’n e suɛn mɔ sran’m be tɔnnin kleli i’n ti ɔ.—2 Kor. 4:4.
Maan e tɛ sran’n su amanniɛn su. (Nya. 15:1) Afin kɛ é bóbó sran’n i anuan’n, nn atrɛkpa’n ɔ su lafi kan. Annzɛ kusu’n i sa o junman wie nun. Sɛ ɔ ti sɔ’n, maan e se i yaci. Wienun ɔn, e wun ndɛ tɛtɛ wie m’ɔ tili’n, i ti yɛ ɔ fali ya ɔ. Sɛ ɔ ti sɔ’n, e kwla se i kɛ: “N wun wɔ ndɛ’n i wlɛ. Sanngɛ e wun ndɛ nga a tili be’n, be timan nanwlɛ. Sɛ a klo’n, n kwla yiyi nun kpa n kle wɔ.” Wie liɛ’n, like nga e lafi su’n, ɔ timan sran’n i liɛ su. Atrɛkpa’n, ɔ wunman sa nga ti yɛ be kwla tu aniaan kun asɔnun’n nun’n, i wlɛ. Annzɛ kusu sa nga ti yɛ e faman mmoja’n, ɔ wunmɛn i wlɛ. Sɛ ɔ ti sɔ’n, e kwla se i kɛ: “Mo nin wɔ klun ndɛ kanlɛ. Sran uflɛ kannin ndɛ kunngba sɔ’n kleli e. Sɛ a klo’n, n kwla kle wɔ Biblu’n nun ndɛ mma nga ajalɛ sɔ’m be taka su’n.”
Sɛ e ndɛ tiefuɛ’n fa ya dan kpa’n, ɔ flunman kɛ e srɛ atin. Nán maan e tɛ i su. Sɛ ɔ se e kɛ ɔ kloman kɛ Zoova i Lalofuɛ’m be ju i awlo lɔ ekun’n, maan e se i kɛ e tili.

Anglo nga nun’n, maan e yo nga e nian:

Kɛ é sú Ɲanmiɛn awlo lɔ’n, wafa nga e kwla tɛ sran ng’ɔ fa e wun ya’n i su’n, maan e yi i nglo.
Sɛ sran wie fali e wun ya awlo kun nun’n, wafa nga e tɛli sran sɔ’n su’n, maan e nin aniaan nga e nin i e bo jasin fɛ’n e koko su yalɛ.