Afuɛ 2015 nun Ɲanmiɛn junman dilɛ suklu’n úka e maan é sí like kle kpa tra laa’n

¹ Jue tofuɛ Davidi seli kɛ: “Anannganman, wɔ bɔ a ti kɛ yɔbuɛ sa bɔ n talo wɔ’n, wɔ bɔ a ti min defuɛ’n, ndɛ ng’ɔ fin min nuan fite’n, ɔ nin akunndan nga m bu be min klun lɔ’n, maan be jɔ ɔ klun.” (Jue. 19:15) E kusu e kunndɛ kɛ ndɛ ng’ɔ fin e nuan fite’n, ɔ jɔ Zoova klun. Afin kɛ e kan Ɲanmiɛn i ndɛ e aɲia’m be bo ɔ nin jasin fɛ’n i bolɛ’n nun’n, i sɔ’n ti e cenjele like. Like kun mɔ Zoova fa kle e like naan y’a si jasin fɛ’n i bo kpa’n, yɛle Ɲanmiɛn junman dilɛ suklu’n. Asiɛ wunmuan’n su’n, Zoova i Lalofuɛ’m be yo suklu sɔ’n be asɔnun 111.000 tra su nun. Be yo i le mɔcuɛ kwlaa nun. Suklu sɔ’n ukali aniaan wafawafa kwlaa naan b’a si jasin fɛ’n i bo kpa. Ɔ maan be kle sran’m be like juejue su. Yɛ be yo i amaniɛn su.​—Yol. 19:8; Kol. 4:6.

² Afuɛ 2015 nun Ɲanmiɛn junman dilɛ suklu’n i nun ndɛ wie’m be fin e fluwa yɛ’m be su: Anannganman nguan’n i atin’n​—?Amun a wun i? nin Amun kwla yo Ɲanmiɛn i janvuɛ! ɔ nin Biblu’n nun ndɛ’m be kpɔlɛ bolɛ fluwa’n. Asa ekun’n, be siesieli Biblu’n nun ndɛ kpɔlɛ fɛ mun ɔ nin suklu ba klikli’n be dɔ’n i uflɛ. Ninnge nga be kacili be yolɛ wafa’n, ɔ nin wafa ng’ɔ fata kɛ be di junman fanunfanun mun’n, ndɛ kpɔlɛ nga be ba yɛ’n, be yiyi nun.

³ Biblu’n nun kannganlɛ’n nun ndɛ kpɔlɛ fɛ mun: Maan aniaan bian ng’ɔ́ dí junman sɔ’n fa miniti 2 yiyi le mɔcuɛ sɔ’n nun Biblu’n nun kannganlɛ’n, i nun ndɛ fɛ kun nun. Sɛ ɔ siesie i wun kpa’n, ɔ kwla fa dɔ kpe kan sɔ’n yiyi ndɛ cinnjin kun nun. I sin’n, miniti 6 ng’ɔ ka lɛ’n nun’n, maan ndɛ tiefuɛ’m be tinuntinun be fa segɔndu 30 cɛ be kan ndɛ fɛ nga be wunnin i Biblu’n nun kannganlɛ’n nun’n, i ndɛ. Sɛ be fa ijɔlɛ’n wla e nuan’n, maan e mian e ɲin naan y’a traman segɔndu 30 sɔ’n su. I liɛ’n, aniaan kpanngban be kwla bo be ndɛ fɛ liɛ nga be wunnin be’n, be su wie.

⁴ Ijɔlɛ 1 su: Be kpɛli dɔ ng’ɔ fata kɛ aniaan sɔ’n fa kanngan Biblu’n nun’n su. Ɔ maan siɛn’n, ɔ fataman kɛ ɔ tra miniti 3. Kpɛkun ndɛ ng’ɔ fata kɛ ɔ kanngan nun’n, ɔ su sɔnman. Maan aniaan nga be fa junman sɔ’n be mɛn i’n, ɔ siesie i wun kpa. Kɛ ɔ́ síesíe i wun’n, maan ɔ mɛn i nɛn’n su kanngan ndɛ kpɔlɛ’n nun kpɛ sunman. Nán maan ɔ sikposikpo ndɛ mma’m be su. Sanngɛ maan ndɛ’n i ɲin fite kpa naan be wun i wlɛ. Zoova sulɛ’n nun’n, fluwa kannganlɛ’n ti like cinnjin. I sɔ’n ti’n, ɔ fata kɛ e kwlakwla e mian e ɲin naan e si kanngan kpa. Nanwlɛ, kɛ e wun kɛ e mma’m be nun kpanngban be si fluwa nun kanngan kpa’n, ɔ yo e fɛ dan! Be si nin be nin mɔ be tu be klun be kle be kannganlɛ’n, be nin mo yolɛ fata.

⁵ Ijɔlɛ 2 su: Junman dí miniti 5, yɛ ɔ ti aniaan bla kun liɛ. Ijɔlɛ’n i flɛlɛ ng’ɔ klɛ fluwa’n su’n, yɛ ɔ fata kɛ ɔ nian su di i junman’n niɔn. Sɛ junman’n taka e fluwa Anannganman nguan’n i atin’n​—?Amun a wun i? su’n, annzɛ Amun kwla yo Ɲanmiɛn i janvuɛ! su’n, maan ɔ fa jasin fɛ’n bolɛ’n i wafa ng’ɔ nin i fata’n di i junman’n. Sɛ kusu ɔ taka Biblu’n nun ndɛ’m be kpɔlɛ bolɛ fluwa’n i nun sran kun i su ndɛ’n su’n, maan ɔ nian ijɔlɛ’n i flɛlɛ’n su di junman’n. Afɔtuɛ nga sran sɔ’n i su ndɛ’n man e’n, maan ɔ yiyi nun. Biblu’n i nun ndɛ mma nga be suan i ijɔlɛ’n i flɛlɛ’n i bo’n, maan ɔ fa be di i junman’n. Ɔ fata kɛ suklu sunianfuɛ’n kle sran nga aniaan bla’n nin i bé dí junman’n.

⁶ Ijɔlɛ 3 su: Junman sɔ’n dí miniti 5. Be kwla fa man aniaan bian, annzɛ aniaan bla kun. Sɛ be fa junman sɔ’n man aniaan bla kun’n, maan ɔ yo i kɛ ijɔlɛ 2 su’n sa. Sɛ aniaan bian kun kusu yɛ be fa mɛnnin i’n, naan ijɔlɛ’n taka Biblu’n nun ndɛ’m be kpɔlɛ bolɛ fluwa’n su’n, maan ɔ yo i kɛ nzra nun ijɔlɛ sa. Maan ɔ fa Biblu’n nun ndɛ mma mun naan ɔ nian ijɔlɛ’n i flɛlɛ’n su di junman’n. Sɛ i junman’n kan Biblu’n i nun sran kun i ndɛ’n, afɔtuɛ nga sran sɔ’n i su ndɛ’n man e’n, maan ɔ yiyi nun.

⁷ Ijɔlɛ 3 su’n i wun ajalɛ uflɛ m’ɔ ti aniaan bian’m be liɛ’n: Sɛ junman nga be fa mannin aniaan bian kun’n, ɔ taka fluwa Anannganman nguan’n i atin’n annzɛ Ɲanmiɛn i janvuɛ! su’n, maan ɔ yo i kɛ ninnge’m be nglo yilɛ sa. Ɔ kwla yo i kɛ ɔ nin i awlofuɛ’m be su su Ɲanmiɛn awlo lɔ sa, annzɛ ɔ kwla yo i kɛ ɔ su bo jasin fɛ’n sa. Sran ng’ɔ nin i bé dí junman sɔ’n, ɔ kwla yo i awlofuɛ kun, annzɛ aniaan uflɛ. Ɔ fata kɛ suklu sunianfuɛ’n kle sran nga aniaan’n nin i bé dí junman’n. Sɛ ɔ nin i fata’n, aniaan ng’ɔ́ dí junman’n kwla fa Biblu’n i nun ndɛ mma wie mun uka nga be o ndɛ kpɔlɛ’m be nun’n, be su. Ɔ ju wie’n, be kwla fɛ i sɔ junman’n man asɔnun kpɛnngbɛn kun. I lɛ’n nun’n, asɔnun kpɛnngbɛn’n bɔbɔ kwla fa sran kun naan ɔ nin i be di junman’n. Nanwlɛ, kɛ aniaan’m be wun asɔnun kpɛnngbɛn kun m’ɔ su yi wafa ng’ɔ fata kɛ be kle like’n i nglo’n, i sɔ’n wla be fanngan dan.

⁸ Afɔtuɛ manlɛ: Kɛ suklu ba kun ko wie i junman’n i di’n, maan suklu sunianfuɛ’n fa miniti 2 yo i mo kpɛkun ɔ mɛn i afɔtuɛ. I sɔ yolɛ’n nun’n, maan ɔ nian Ɲanmiɛn junman dilɛ suklu’n i su afɔtuɛ manlɛ fluwa’n nun. (Tirez profit de l’École du ministère théocratique) Kɛ suklu sunianfuɛ’n flɛ́ suklu ba kun’n, e afɔtuɛ manlɛ fluwa’n i bue nga i su yɛ aniaan’n i junman’n taka’n, nán maan ɔ dun mmua bo su kle nzrafuɛ mun. Sanngɛ kɛ suklu ba’n ko wie i junman’n i di’n, m’ɔ́ yó i mo’n, ɔ fata kɛ ɔ bo su. Kpɛkun sa nga ti yɛ junman sɔ’n dili kpa’n, man ɔ kan. Sɛ kusu ɔ fata kɛ ɔ di junman sɔ’n i kpa tra laa’n, maan ɔ kan kle i amaniɛn su.

⁹ E afɔtuɛ manlɛ fluwa’n i bue 79 lele 81 i nun yɛ afɔtuɛ’m be o ɔ. Kɛ aɲia’n ko wie’n, maan suklu sunianfuɛ’n klɛ ndɛ ng’ɔ nin i fata’n suklu ba’n i fluwa liɛ’n nun. Asa ekun’n, maan ɔ flɛ suklu ba’n aamiɛn naan ɔ usɛ i sɛ ɔ dili junman ng’ɔ o i afɔtuɛ manlɛ fluwa’n nun’n. Sɛ ɔ fata kɛ ɔ yo i mo annzɛ ɔ mɛn i afɔtuɛ uflɛ wie mun’n, ɔ kwla man. Annzɛ kusu ɔ kwla fa blɛ uflɛ ɔ yo i sɔ liɛ’n. Suklu sɔ’n, ɔ yo aniaan’m be tinuntinun be ye dan. Yɛle kɛ ɔ uka be maan Ɲanmiɛn i sulɛ’n nun’n, be yo kpa tra laa’n.​—1 Tim. 4:15.

¹⁰ Sɛ suklu ba’n su tra dɔ’n su’n, maan suklu sunianfuɛ’n annzɛ sran ng’ɔ man afɔtuɛ aamiɛn’n, ɔ ti i klɛ. Yɛle kɛ ɔ kwla fin like kun su naan ɔ tɛ kan. Ɔ fata kɛ suklu ba’n wun i wlɛ. Kpɛkun maan ɔ wie ndɛ nga i nuan o su’n i kan ndɛndɛ naan ɔ jra.​—Nian e afɔtuɛ manlɛ fluwa’n i bue 282 § 4 nun.

¹¹ É wlá aniaan kwlaa nga be kwla di Ɲanmiɛn junman dilɛ suklu’n be fanngan kɛ be klɛ be dunman naan be di wie. (Nian e afɔtuɛ manlɛ fluwa’n i bue 282 § 6 nun.) Like nga be kle i suklu sɔ’n i bo’n, ɔ ukali Zoova i Lalofuɛ mun maan be si ijɔ kpa. Kpɛkun kɛ bé bó Ɲanmiɛn Sielɛ’n i jasin fɛ’n, be wun usuman be, be klun titiman be, yɛ be bo i klolɛ su. Nanwlɛ, kɛ be nga Ɲanmiɛn junman dilɛ suklu’n yoli be ye’n be yi Zoova i ayɛ’n, ɔ yo i fɛ dan!​—Jue. 148:12, 13; Eza. 50:4.