Ɲanmiɛn i manmanlɛ jue uflɛuflɛ mun!
1 Afuɛ 2014 nun’n, Ɔktɔblu i le 4 su’n, anuannzɛ’n yoli i afuɛ nuan aɲia’n. Aɲia sɔ’n i bo’n, e anuannzɛ’n i Ɲrun dinfuɛ’m be seli kɛ bé wá káci e jue fluwa’n i nun ndɛ wie mun. Nanwlɛ, ndɛ sɔ’n yoli aniaan’m be fɛ dan! Asa ekun’n, sa nga ti yɛ jue tolɛ’n ti cinnjin Ɲanmiɛn sulɛ’n nun’n, be yiyili nun fa kpɛnnin aniaan’m be wla.—Jue. 96:2.
2 Atrɛkpa’n, amun usa amun wun kɛ: ‘?Ngue ti yɛ ɔ ti cinnjin kɛ be kaci e jue fluwa’n i nun ndɛ mun ekun ɔn?’ Sa sunman ti ɔ. I klikli’n yɛle kɛ, e wun Ɲanmiɛn Ndɛ’n i wlɛ kpa tra laa’n. I sɔ’n ti’n, ɔ fata kɛ e kaci e jue’m be nun ndɛ wie mun. (Nya. 4:18) I nɲɔn su’n, yɛle kɛ aniɛn sunman nun’n, e jue fluwa’n i nun ndɛ’m be fin e Biblu Traduction du monde nouveau laa liɛ’n nun. Kɛ mɔ b’a yi Biblu’n i uflɛuflɛ kun ti’n, ɔ fata kɛ e jue’m be nun ndɛ’m be fin i lifuɛ’n nun. Ninnge nga bé káci be jue fluwa’n nun’n be sɔnnin. I sɔ’n ti’n, anuannzɛ’n fali ajalɛ kɛ bé kpɛ́ jue uflɛuflɛ wie mun bé fá úka laa liɛ’m be su kpɛkun.
3 ?É mínndɛ lele naan be yi e jue fluwa uflɛuflɛ kun ka naan y’a bo jue uflɛ’m be tolɛ bo? Cɛcɛ. I sɔ’n ti’n, e waan é bó su é klé amun kɛ anglo nga bé bá lɛ’n be nun’n, é wá fá jue uflɛuflɛ sɔ’m be nun wie é síe i e ɛntɛnɛti adrɛsi jw.org su. Kɛ jue uflɛ kun ko fite’n, é tó i junman dilɛ aɲia kun i awieliɛ. E fluwa Ɲanmiɛn Sielɛ blɛ junman’n nun’n, lika nga be klɛ jue’n i nimielo i lɛ’n, é klɛ́ lɛ kɛ “jue uflɛuflɛ.”
4 ?É yó sɛ naan y’a si jue uflɛuflɛ sɔ’m be to? Jue uflɛ kun i suanlɛ’n leman ba. Sanngɛ maan e yo kɛ jue tofuɛ’n sa. E aɲia’m be bo’n nán maan e ‘muan e nuan.’ Maan e to jue. (Jue. 30:13) Sɛ e waan é sí jue sɔ’m be tó’n, maan e nian ajalɛ nga’m be su.
Anuannzɛ’n wá fá jue sɔ’m be su miziki mun síe i e ɛntɛnɛti adrɛsi’n su. Maan e tie be e flan nun. I liɛ’n, bé ká e klun.
Maan e suan jue’m be nun ndɛ mun kpa naan e si be.
Kpɛkun maan e bo be su miziki’n naan e to. Maan e yo i sɔ lele naan e si jue’n i to kpa.
Kɛ é sú Ɲanmiɛn awlo lɔ’n, maan e nin e awlofuɛ mun e suan be tolɛ naan e ngba e si be to.
5 Sɛ ɔ fata kɛ e to jue uflɛuflɛ kun e fa gua junman dilɛ aɲia’n i bo’n, bé dún mmua bó i su miziki’n klé e naan e tie. I sin’n, kɛ bé bó i ekun’n, e kwlaa é tó jue’n likawlɛ kɛ nga e fa yo i titi’n sa.
6 E aɲia’m be bo’n, kɛ e kwlaa e bo yo kun e to jue likawlɛ’n, i sɔ’n manman Zoova. I sɔ’n ti’n, kɛ e bo jue’m be tolɛ bo’n, sɛ ɔ timan cinnjin’n, ɔ fataman kɛ e fite e ko yo like uflɛ.
7 E kwla yo like uflɛ ekun e kle kɛ e jue’m be ti e cinnjin kpa. Yɛle kɛ ka naan y’a bo e aɲia dandan’m be yolɛ bo’n, be bo miziki. Miziki fɛfɛ sɔ mun’n, Amlɛnkɛn’m be klɔ nga be flɛ i Patɛrsɔnu’n, i su lɔ yɛ be siesie be ɔ. Aniaan nga be yia lɔ be di junman sɔ’n be fin nvle kpanngban nun yɛ be ba ɔ. Afuɛ kun nun sa’n, be tu ajalɛ kpɛ nɲɔn be ko di i sɔ junman’n. Be bɔbɔ yɛ be tua loto kpa ɔ. I kwlaa sɔ’n ti’n, sɛ aɲia’n i siesiefuɛ’n yia e kɛ e tran ase naan e tie miziki nga be siesie mannin e’n, nán maan e sisi e bo. Kɛ e yo sɔ’n, e wla gua ase naan e ɲin w’a tran aɲia’n i nun ndɛ’m be su kpa.—Ɛsd. 7:10.
8 Andɛ’n, é wá tó e jue uflɛuflɛ’m be nun kun é fá gúa e aɲia’n i bo. Jue sɔ’n i flɛlɛ’n yɛ: “Maan Ɲanmiɛn i Sielɛ blɛ’n ju!” Ɲanmiɛn i Sielɛ mɔ w’a di afuɛ 100, i ti jue yɛ be siesieli ɔ. Be yili i nglo anuannzɛ’n i afuɛ nuan aɲia nga be yoli i koko nun wa’n i bo.
9 Jue uflɛuflɛ sɔ’m be o ‘ninnge kpakpa’ nga Zoova man e’n, be nun wie. (Mat. 12:35a) I sɔ’n ti’n, maan e fua kɛ é súan be tolɛ naan é fá mánmán Zoova, é yí i ayɛ kɛ ɔ nin i fata’n sa.—Jue. 147:1.