Maan gbanflɛn nin talua’m ‘be tu be klun be yo sa kpa’

Lɛtri nga akoto Pɔlu klɛli ko mannin Titi’n nun’n, ɔ seli kɛ ɔ fata kɛ gbanflɛn’m be mian be ɲin naan ‘sa kwlaa nun’n, be yo like ng’ɔ ti kpa’n naan sran’m be nian su be yo wie.’ I sɔ kusu yɛ ɔ fata kɛ Titi yo-ɔ. (Tit 2:6, 7) I ndɛ tre kunngba’n nun’n, ɔ kleli kɛ Zezi yó Zoova i sufuɛ’m be sanwun naan ‘be tu be klun be yo sa kpa.’ (Tit 2:14) Sa kpa nga be kwla yo’n be nun kun yɛle Ɲanmiɛn i Famiɛn dilɛ’n i jasin fɛ’n i bolɛ ɔ nin sran’m be like klelɛ. ?Gbanflɛn nin talua mun, amun kwla fa amun wun wla atin bolɛ junman’n nun?​—Nya 20:29.

Sɛ an klo kɛ amún yó atin bofuɛ’n, ɔ fata kɛ amun bu like nga amun kwla yo naan i sɔ liɛ’n w’a yo ye’n, i akunndan. (Lik 14:28-30) I wie yɛle kɛ amun kwla usa amun wun kɛ: ?Ń yó sɛ naan m’an ɲan sika kan m’an fa nian min wun lika? ?Wafa sɛ yɛ ń síesíe min wun naan m’an kwla di dɔ ng’ɔ fata kɛ n di’n niɔn? Kpɛkun an srɛ Zoova kɛ ɔ uka amun. (Ju 37:5) Asa ekun’n, maan amun bo su kle amun si nin amun nin ɔ nin be nga be sa w’a tɔ atin bolɛ junman’n nun’n. I sin’n, an fa ajalɛ naan amun kaci atin bofuɛ. Sɛ an yo sɔ’n, amun ɲin mɔ amun mian di junman sɔ’n, Zoova yrá su!

AN NIAN VIDEO NGA BE FLƐ I KƐ GBANFLƐN NIN TALUA WIE’M BE MANMAN ZOOVA. I SIN’N, AN TƐ KOSAN NGA’M BE SU:

• ?Ngue ti yɛ atin bolɛ junman’n i dilɛ’n yoli kekle mannin aniaan wie mun-ɔn? ?Yɛ ngue yɛ be yoli-ɔ?

• ?Wafa sɛ yɛ siɛ nin niɛn’m be kwla uka be mma mun naan b’a yo titi atin bofuɛ-ɔ?

• ?Ngue ti yɛ ɔ ti cinnjin kɛ e sie cɛn wie mun kɛ é fá bó jasin fɛ-ɔ?

• ?Wafa sɛ yɛ asɔnun’n i nunfuɛ’m be kwla suan atin bofuɛ’m be bo-ɔ?

• ?Mmlusuɛ benin yɛ atin bofuɛ’m be ɲɛn i-ɔ?