Maan e fa fluwa A kwla di aklunjɔɛ tititi! e di junman naan sran’m be lafi Zoova nin Zezi be su

Kɛ ɔ ko yo naan Ɲanmiɛn i klun w’a jɔ Biblu’n nun like suanfuɛ’m be wun’n, ɔ fata kɛ be lafi i su kpa. (Ebr 11:6) I sɔ’n ti’n, ɔ fata kɛ e fa fluwa A kwla di aklunjɔɛ tititi! e uka be. Fluwa sɔ’n nun’n Biblu’n nun ndɛ mma cinnjin wie’m be o nun, yɛ be yiyili ndɛ wie’m be nun weiinweiin. Asa’n kosan nin video wie mɔ be wla fanngan’n ɔ nin desɛn nin foto nglanmannglanman wie’m be o nun. Sɛ e uka Biblu’n nun like suanfuɛ mun naan be yi nzuɛn kpa nglo’n, naan kusu be nin Ɲanmiɛn be afiɛn mantan’n be Ɲanmiɛn sulafilɛ’n i bo’n wlá ase kpa.—1Ko 3:12-15.

Kɛ mɔ sran wie’m be kwlá wunman Ɲanmiɛn ti’n be bu i kɛ be nin i kwlá traman janvuɛ. I sɔ’n ti’n ɔ fata kɛ e uka be naan be si Zoova kpa naan kusu be lafi i su.

AN NIAN VIDEO NGA BE FLƐ I KƐ MAAN E FA FLUWA “A KWLA DI AKLUNJƆƐ TITITI!” E DI JUNMAN NAAN SRAN’M BE LAFI ZOOVA SU. I SIN’N, AN TƐ KOSAN NGA’M BE SU:

• ?Ngue yɛ ɔ kle kɛ aniaan bla’n siesieli i wun kpa-ɔ?

• ?Kɛ be kanngannin Ezai 41:10, 13 nun’n, ngue yɛ ɔ yoli naan like suanfuɛ’n w’a kwla kɛn i klun ndɛ-ɔ?

• ?Wafa sɛ yɛ video’n nin Biblu’n nun ndɛ mma’m be ukali like suanfuɛ’n niɔn?

Kɛ be kan e ti kpɔlɛ tɛ’n ndɛ’n annzɛ kɛ be se kɛ e ti kpɔlɛ tɛ’n ti like kun yɛ Ɲanmiɛn fa cɛli e’n sran kpanngban be wunmɛn i wlɛ. (Gal 2:20) I lɛ nun’n, ɔ fata kɛ e uka be naan be lafi e ti kpɔlɛ tɛ nga Zezi yili’n su.

AN NIAN VIDEO NGA BE FLƐ I KƐ MAAN E FA FLUWA “A KWLA DI AKLUNJƆƐ TITITI!” E DI JUNMAN NAAN SRAN’M BE LAFI ZEZI SU. I SIN’N, AN TƐ KOSAN NGA’M BE SU:

• ?Ngue yɛ ɔ kle kɛ aniaan bian’n siesieli i wun kpa-ɔ?

• ?Wafa sɛ yɛ aniaan bian’n fali fluwa’n i bue ng’ɔ suan “Ndɛ wie mun ekun” ukali like suanfuɛ’n niɔn?

• ?Ngue ti yɛ ɔ ti cinnjin kɛ e srɛ Ɲanmiɛn e man like suanfuɛ mun-ɔn?