?Ɲanmiɛn ti yɛ e wun ɲrɛnnɛn-ɔn?

Ndɛ nga Biblu’n kan’n

Biblu’n tɛ kosan sɔ’n su kɛ cɛcɛ! Ɲanmiɛn Zoova w’a yiman klɔ sran mun kɛ be wun ɲrɛnnɛn. Sanngɛ klɔ sran klikli’m be yoli ɲin kekle i su. I lɛ nun’n, be kleli kɛ be kunndɛ kɛ be bɔbɔ yɛ bé klé like ng’ɔ ti kpa’n nin ng’ɔ ti tɛ’n niɔn. Kɛ mɔ be kacili be sin sili Ɲanmiɛn’n ti’n, be wunnin be ɲrun kpa.

Sa tɛ nga be yoli’n, e te wun i su afɛ lele nin andɛ. Sanngɛ nán Ɲanmiɛn ti yɛ e wun ɲrɛnnɛn-ɔn.

Biblu’n se kɛ: “Sɛ sa o sran kun su’n, nán maan ɔ se kɛ: ‘Ɲanmiɛn yɛ ɔ su sa min nian-ɔn.’ Afin sran fi kwlá lakaman Ɲanmiɛn kɛ ɔ yo sa tɛ. Yɛ kusu Ɲanmiɛn faman sa tɛ saman sran fi nianman.” (Zaki 1:13) Ɲrɛnnɛn sa kwla ɲan sran kwlakwla. Be nga Ɲanmiɛn i klun jɔ be wun bɔbɔ’n, ɔ kwla ɲan be wie.