?Ngue ti yɛ be kunnin Zifu kaka-ɔ? ?Ngue ti yɛ Ɲanmiɛn w’a yoman like fi-ɔ?

Be nga be usa kosan sɔ’n, be nun sunman be sran kaka be wuli blɛ sɔ’n nun. Ɔ maan be su kunndɛ fɔnvɔlɛ. Wie mun ekun be liɛ’n, be bu i kɛ Zifu kaka mɔ be kunnin be’n, ɔ kle kɛ klɔ sran’m be klun yo wi dan. Yɛ sa sɔ’n ti’n be lafiman su kɛ Ɲanmiɛn o lɛ.

Ɲanmiɛn nin Zifu kaka nga be kunnin be’n be su ndɛ wie m’ɔ timan su’n

Ndɛ ng’ɔ timan su’n: Ɔ fataman kɛ e usa kɛ ngue ti yɛ Ɲanmiɛn kplinnin su kɛ be kun Zifu kaka-ɔ.

Ndɛ ng’ɔ ti nanwlɛ’n: Sran wie mɔ be lafi Ɲanmiɛn su kpa bɔbɔ’n, be usali be wun kɛ ngue ti yɛ Ɲanmiɛn yaci sran’m be lɛ mɔ be yo klunwi sa mun-ɔn. I wie yɛle kɛ Ɲanmiɛn nuan ijɔfuɛ Abakiki usali Ɲanmiɛn kɛ: “?Ngue ti yɛ a yaci sran’m be lɛ mɔ be kle be wiengu’m be ɲrɛnnɛn sɔ-ɔ?” (Abakiki 1:3) Sanngɛ Ɲanmiɛn w’a kputuman Abakiki. I kpa bɔbɔ’n, ɔ yoli maan be klɛli kosan ng’ɔ usali be’n Biblu’n nun naan e kwlaa e wun i.

Ndɛ ng’ɔ timan su’n: Kɛ sran’m be wun be ɲrun’n, ɔ yoman Ɲanmiɛn i like fi.

Ndɛ ng’ɔ ti nanwlɛ’n: Ɲanmiɛn kpɔ klunwi sa nga sran’m be yo’n. (Ɲanndra Mun 6:16-19) Nowe blɛ su’n, kɛ Ɲanmiɛn wunnin kɛ sran’m be klun w’a yo wi kpa asiɛ’n su’n, “ɔ yoli i ya dan.” (Bo Bolɛ 6:5, 6) I sɔ’n kle weiin kɛ, kɛ bé kún Zifu kaka sɔ mun’n, ɔ yoli i ya lele kpe nun.—Malasi 3:6.

Ndɛ ng’ɔ timan su’n: Ɲanmiɛn yɛ ɔ yoli maan be kunnin Zifu kaka sɔ-ɔ. Ɔ yoli sɔ naan ɔ́ fá tú be fɔ.

Ndɛ ng’ɔ ti nanwlɛ’n: Ɔ ti su kɛ Klisifuɛ klikli’m be blɛ su’n, Ɲanmiɛn kplinnin su kɛ Rɔmunfuɛ’m be saci Zerizalɛmun klɔ’n. (Matie 23:37–24:2) Sanngɛ kɛ ɔ fɛ i lɛ’n, Ɲanmiɛn w’a kpaman nvle kun kɛ ɔ yo i liɛ ngunmin kun naan se kɛ ɔ́ yó be ye annzɛ ɔ́ tú be fɔ. Dɔ nga su’n, Ɲanmiɛn ɲrun’n, ‘ngbaciɛ nunman Zifu nin nvle uflɛ nunfuɛ’m be afiɛn.’—Rɔmunfuɛ Mun 10:12.

Ndɛ ng’ɔ timan su’n: Be waan Ɲanmiɛn klo sran naan ɔ kwla sa kwlaa yo. Sɛ ɔ ti kɛ Ɲanmiɛn sɔ’n o lɛ sakpa’n, nn ɔ su kplinman su kɛ be kun Zifu sɔ mun.

Ndɛ ng’ɔ ti nanwlɛ’n: Nán Ɲanmiɛn yɛ ɔ yo maan sran’m be wun be ɲrun-ɔn. Sanngɛ ɔ ju wie’n, ɔ kplin su kɛ afɛ tɔ sran’m be su kan.—Zaki 1:13; 5:11.

?Ngue ti yɛ Ɲanmiɛn kplinnin su kɛ be kun Zifu kaka sɔ mun-ɔn?

Sa nga ti yɛ Ɲanmiɛn kplin su kɛ sran’m be wun be ɲrun’n, sa kunngba sɔ’n ti yɛ ɔ kplinnin su kɛ be kun Zifu kaka sɔ mun-ɔn. Yɛle kɛ i waan ɔ́ kpɛ́ ndɛ wie mɔ be tɔli i afuɛ kpanngban yɛ’n be nun. Biblu’n kle weiin kɛ dɔ nga su’n Satan yɛ ɔ sie mɛn’n niɔn, naan nán Ɲanmiɛn-ɔn. (Liki 4:1, 2, 6; Zan 12:31) Ndɛ cinnjin nɲɔn mɔ be o Biblu’n nun’n be kwla uka e naan y’a wun like nga ti yɛ Ɲanmiɛn kplinnin su kɛ be kun Zifu sɔ mun’n.

1. Ɲanmiɛn mannin sran’m be atin kɛ be fa be tiaun ajalɛ. Ɲanmiɛn kannin like ng’ɔ kunndɛ kɛ Adan nin Ɛvu be yo’n i ndɛ kleli be. Sanngɛ w’a mianman be kɛ be yo sɔ. Be kunndɛli kɛ be bɔbɔ bé klé like ng’ɔ ti kpa nin ng’ɔ ti tɛ man be’n. Sanngɛ be fali ajalɛ tɛ. Yɛ kɛ ɔ fɛ i lɛ’n, sran’m be fali ajalɛ tɛtɛ sunman. I sɔ ti’n, afɛ nin ɲrɛnnɛn o sran’m be su. (Bo Bolɛ 2:17; 3:6; Rɔmunfuɛ Mun 5:12) I sɔ yɛ fluwa Énoncé des principes du judaïsme conservateur ɔ kan-ɔn. Ɔ seli kɛ: “Ɲanmiɛn mannin e atin kɛ e fa e tiaun ajalɛ. Sanngɛ ajalɛ nga e fa be’n be ti tɛ ngunmin. I ti yɛ afɛ wo mɛn’n nun’n niɔn.” Ɲanmiɛn kwla se kɛ ɔ manman e atin kun kɛ e fa tiaun ajalɛ. Sanngɛ w’a yoman sɔ, ɔ mannin e blɛ naan e sie e bɔbɔ e wun.

2. Ɲanmiɛn núnnún Zifu nga be kunnin be’n i su afɛ nga sran’m be wun i’n. Ɲanmiɛn tali nda kɛ ɔ́ wá cɛ́n sran miliɔn kpanngban mɔ be wuli’n. Zifu kpanngban mɔ be kunnin be’n be o be nun wie. Asa’n be nga sa sɔ’n ti’n be wunnin ɲrɛnnɛn’n, ɔ́ núnnún be afɛ’n. (Ezai 65:17; Sa Nga Be Yoli’n 24:15) Klolɛ mɔ Ɲanmiɛn klo sran mun ti’n e kwla lafi su kɛ saan ɔ́ yía nda sɔ’m be nuan.—Zan 3:16.

Be nga sa sɔ’n ti’n be wunnin ɲrɛnnɛn’n, be nun kpanngban be wa lafili Ɲanmiɛn su yɛ be dili aklunjɔɛ ekun. Afin be wunnin sa nga ti yɛ Ɲanmiɛn kplin su kɛ sran’m be fɛ’n ɔ nin like ng’ɔ́ wá yó naan i sɔ liɛ’n w’a tranman lɛ kun’n be wlɛ.