?Wafa sɛ yɛ Zezi de e-ɔ?
Ndɛ nga Biblu’n kan’n
Kɛ Zezi fɛli i wun kpɔli sran’m be ti’n, yɛ ɔ deli e-ɔ. (Matie 20:28) Biblu’n se kɛ Zezi “de asiɛ’n sufuɛ mun.” (1 Zan 4:14) Ɔ se ekun kɛ: “Sran uflɛ fi kwlá deman sran mun. Afin sran fi nunman ɲanmiɛn’n i bo wa mɔ i dunman nun’n, klɔ sran kwla fite nun-ɔn.”—Sa Nga Be Yoli’n 4:12.
Be kwlaa nga be lafi Zezi su’n, be ti’n, ‘ɔ sili like nga be flɛ i wie’n.’ (Ebre Mun 2:9; Zan 3:16) I sin’n, “Ɲanmiɛn cɛnnin i.” Ɔ kacili aolia nun sran yɛ ɔ sɛli i sin ɲanmiɛn su lɔ. (Sa Nga Be Yoli’n 3:15) Siɛn’n, “be nga be sin i lika be fa be wun mantan Ɲanmiɛn’n, ɔ kwla de be mlɔnmlɔnmlɔn. Yɛ ɔ kwla kpata be ti, afin ɔ su wuman le.”—Ebre Mun 7:25.
?Ngue ti yɛ ɔ fata kɛ Zezi kpata e ti-ɔ?
E kwlakwla e yo sa tɛ. (Rɔmunfuɛ Mun 3:23) Sa tɛ’n ti kɛ talɛ sa yɛ ɔ o e nin Ɲanmiɛn e afiɛn-ɔn. Sa tɛ mɔ e yo’n i ti yɛ e wu-ɔ. (Rɔmunfuɛ Mun 6:23) Sanngɛ, be kwlaa nga be lafi e ti kpɔlɛ tɛ’n su’n, Zezi ti be “ti ndɛ kanfuɛ.” (1 Zan 2:1, ndɛ ng’ɔ o ja ngua lɔ’n.) Ɔ kan e ti ndɛ kle Ɲanmiɛn, ɔ kpɛtɛ i kɛ ɔ tie e srɛlɛ mun naan ɔ yaci sa tɛ nga e yo’n ɔ cɛ e, e ti kpɔlɛ tɛ’n ti. (Matie 1:21; Rɔmunfuɛ Mun 8:34) Ɲanmiɛn kusu kplin su, yɛ ɔ yaci e wun sa mun cɛ e. Afin, i sɔ bɔbɔ ti yɛ ɔ sunmannin Zezi asiɛ’n su-ɔ. Ɔ sunmɛnnin i naan “mɛn’n nunfuɛ’m be ɲan be ti.”—Zan 3:17.
?Sɛ e lafi Zezi su nn y’a fite nun?
Cɛcɛ. Ɔ fata kɛ e lafi Zezi su naan y’a kwla fite nun. Sanngɛ, nɛ́n i sɔ ngunmin yɛ ɔ fata kɛ e yo-ɔ. (Sa Nga Be Yoli’n 16:30, 31) Biblu’n se kɛ: “Sɛ sran kun loman wunmiɛn’n, nn w’a wu. I wafa kunngba’n, sɛ sran kun se kɛ ɔ lafi Ɲanmiɛn su naan be wunmɛn i sɔ’n i nzuɛn’n nun’n, i Ɲanmiɛn sulafilɛ sɔ’n ti ngbɛn.” (Zaki 2:26) Sɛ e kunndɛ kɛ é fíte nun’n, ɔ fata kɛ:
E suan Zezi nin i Si Zoova be su like naan e si be.—Zan 17:3.
E lafi be su.—Zan 12:44; 14:1.
E yo like nga be se e kɛ e yo’n. (Liki 6:46; 1 Zan 2:17) Zezi seli kɛ nán be kwlaa nga be flɛ i kɛ “Min Min” yɛ bé fíte nun-ɔn. Sanngɛ sran ng’ɔ ‘yo [i] Si m’ɔ o ɲanmiɛn su lɔ’n i klun sa’n,’ yɛ ɔ́ fíte nun-ɔn.—Matie 7:21.
Blɛ kekle nun bɔbɔ’n, maan e kle kɛ e lafi Ɲanmiɛn nin Zezi be su. I sɔ yɛ Zezi kannin-ɔn. Ɔ seli kɛ: “Sran ng’ɔ jran kekle lele ju i awieliɛ’n, ɔ́ fíte nun.”—Matie 24:13.