Maan e si ndɛ’n nun kpa

Like nga ti yɛ sran’m be kpli be di be wiengu’m be jɔlɛ’n

Ɔ ju wie’n, sran’m be jran be wiengu’m be su ato ndɛ wie’m be su be di be jɔlɛ. Maan e fa e ɲin e sie i ndɛ nga’m be su.

Junman su kpɛn sunman be bu i kɛ bla’m be kwlá diman junman nga be dilɛ’n nun’n, ɔ fata kɛ be si ninnge wie’m be yo annzɛ be ɲan wunmiɛn annzɛ be si ngwlɛlɛ kpa’n.
Blɛ wie nun’n, Abloki lɔ’n sran’m be tɔnnin Zifu’m be suɛn kɛ be guali gbo’m be nun ayre naan sran’m be nɔn naan be tɔ tukpacɛ. I sin’n, kɛ Itilɛɛ nin i sran’m be wa sieli Alemaɲin nvle’n, be tɔnnin Zifu’m be suɛn ekun. Be waan be dunman nun ti yɛ be su di yalɛ be nvle’n nun-ɔn. Ndɛ sɔ’m be ti’n, sran’m be kpɔli Zifu mun yɛ andɛ nin andɛ be te wun i su afɛ’n.
Sran kaka be bu i kɛ be nga be wunman ase annzɛ be timan sa annzɛ be o bubuwafuɛ’m be bia’n nun’n, be diman aklunjuɛ naan ya o be klun titi.

Be nga be lafi ndɛ kɛ ngalɛ sa’m be su’n, be jran ndɛ wie’m be su be se kɛ akunndan nga be bu’n ti nanwlɛ. Kpɛkun be bu i kɛ be nga be buman akunndan kɛ be sa wie’n be wunman sa wlɛ.

Ndɛ nga Biblu’n kan’n

“Sɛ á yó like wie bɔ a lɛmɛn i wun akunndan mlɔnmlɔn’n, ɔ ti tɛ man wɔ.”—NYANNDRA MUN 19:2.

Like nga ndɛ sɔ’n kle e’n. Sɛ e siman ndɛ kun nun kpa’n e su faman ajalɛ kpa. Sɛ e mianman e ɲin e siman sran’m be su ndɛ’n nun kpa naan e fa be su ato ndɛ’m be su’n, e su yaciman sran’m be jɔlɛ dilɛ le.

?Ngue ti yɛ sɛ e si sran’m be su ndɛ nanwlɛ’n ɔ ti kpa-ɔ?

Sɛ e si sran’m be su ndɛ nanwlɛ’n, e su faman be su ato ndɛ nga sran’m be kan’n su kun. Kɛ e wun i wlɛ kɛ sran akpasua kun i su ndɛ nga sran’m be kan’n timan nanwlɛ’n, siɛn’n sɛ e ti sran akpasua uflɛ be su ndɛ wie’n, e su kaman lɛ e faman su.

Sran kun i su ndɛ: Yovika (Ɔ fin Abloki)

Yovika mɔ e kɛnnin i ndɛ, ndɛ akpasua ng’ɔ sinnin lɛ’n nun’n ɔ seli kɛ, kɛ ɔ́ ɲín’n ɔ tili be nvle’n nun sran akpasua kun be wun ndɛ tɛtɛ nga sran’m be kɛn i televiziɔn nin zronali’m be nun’n. Ɔ seli kɛ: “N ma buli sran sɔ’m be wun akunndan tɛ wie. I kpa bɔbɔ’n n kpɔli be, yɛ n seli min wun kɛ nán like tɛ yɛ n su yo.”

“Sanngɛ kɛ n ɔli sonja dilɛ’n m’an ɲɛnmɛn i yowlɛ. Yɛle kɛ ɔ fata kɛ e nin sran akpasua sɔ’n be nun wie mun e tran yɛ e di junman likawlɛ. Kɛ ɔ yoli sɔ’n n ma sili be su ninnge kpanngban. I kpa bɔbɔ’n, n boli be aniɛn’n i suanlɛ bo kpɛkun n tieli be klɔ jue wie mun. Sran sɔ’m be wun wa yoli min fɛ kpɛkun n kacili be wun akunndan nga n bu i laa’n. Sanngɛ n si kɛ n kwla sa min sin n bu be wun akunndan tɛ ekun. I sɔ’n ti’n, m’an sieman min su ndɛ tɛtɛ nga be kɛn i sran sɔ’m be su’n i bo kun. M’an nianman flimun nga be yo sran sɔ’m be finfin nun’n be kun. Asa’n be su ndɛ nga sran’m be fa yi aɲinsuɛ’n m’an tieman be kun. N si kɛ sɛ sran kun di i wiengu kun i jɔlɛ’n, kɛ ɔ́ kɔ́ i ɲrun’n ɔ kwla kpɔ sran sɔ’n.”

?Ngue yɛ e kwla yo-ɔ?

Sran’m be kwla se kɛ sran akpasua kun be ayeliɛ’n annzɛ be nzuɛn’n timan kpa. Sanngɛ nán e wla fi su kɛ i sɔ’n kleman kɛ be kwlaa be ayeliɛ’n ti sɔ.
Nán e wla fi su kɛ be nga be kan sran akpasua kun i wun ndɛ’n, blɛ wie nun’n be siman sran akpasua sɔ’n be su ndɛ kpanngban.
Sɛ fluwa wie nun annzɛ like uflɛ nun yɛ e waan é nían naan y’a si sran’m be su ndɛ’n, maan be kwla lafi ninnge sɔ’m be nun ndɛ’m be su.