Famiɛn diwlɛ’n i nun kpacilɛ

?AMUN si like nga ti yɛ bian nga su titi i tralɛ nun’n? Zoova yɛ ɔ seli i kɛ ɔ titi nun ɔn. Bian sɔ’n ti Ɲanmiɛn nuan ijɔfuɛ, be flɛ i kɛ Asiza. ?Amun si junman nga Ɲanmiɛn nuan ijɔfuɛ di’n? Ɲanmiɛn nuan ijɔfuɛ’n, yɛle sran nga Ɲanmiɛn dun mmua bo be ɲrun lɔ sa nga ɔ́ wá bá’n i jɔ kle i, lele naan sa sɔ’n w’a ju’n.

Wa nga, Asiza su kan ndɛ kle Zeroboamu. Salomɔn fali Zeroboamu sieli i junman difuɛ akpasua kun su kpɛn. Kɛ Asiza nin Zeroboamu be yiali nun atin afiɛn’n, Asiza yoli abonuan sa kun. Ɔ yili i tralɛ uflɛ’n m’ɔ wlɛ i wun’n, kpɛkun ɔ titili nun buebue blu nin nɲɔn (12). Ɔ seli Zeroboamu kɛ: ‘Fa tralɛ buebue’n nun blu.’ ?Amun si sa nga ti yɛ ɔ mɛnnin i tralɛ buebue’n i nun blu’n (10)?

Asiza yiyi nun kle i kɛ Zoova waan ɔ́ wá dé famiɛn diwlɛ’n Salomɔn sa nun. Ɔ se i kɛ Zoova waan ɔ́ fá akpasua blu (10) mán Zeroboamu. I bo’n yɛle kɛ akpasua nɲɔn cɛ yɛ ɔ́ ká Salomɔn i wa Rɔbɔamu i sa nun ɔn.

Kɛ Salomɔn tili ndɛ nga Asiza kan kleli Zeroboamu’n, ɔ fali ya dan kpa. Ɔ kunndɛli kɛ ɔ́ kún Zeroboamu bɔbɔ. Sanngɛ Zeroboamu wanndili ɔli Ezipti lɔ. I osu m’ɔ́ cɛ́ kan’n, yɛ Salomɔn wuli ɔ. Ɔ dili famiɛn afuɛ ablanan (40), sanngɛ siɛn’n i wa Rɔbɔamu yɛ ɔ́ wá yó i ja nun famiɛn ɔn. Zeroboamu tili i Ezipti lɔ kɛ Salomɔn wuli, ɔ maan ɔ sɛ i sin bali Izraɛli.

Rɔbɔamu timan famiɛn kpa. I klunwi liɛ nga ɔ yoli’n, ɔ trali i si Salomɔn liɛ’n nga ɔ fa yoli nvlefuɛ mun’n. Zeroboamu nin sran kaklaakla wie’m be ko toli Rɔbɔamu be seli i kɛ maan ɔ nin nvlefuɛ’m be tran klanman. Sanngɛ Rɔbɔamu w’a kplinman su. Ɔ maan sa tɛ nga ɔ wa yoli’n tra laa liɛ’n bɔbɔ. Nvlefuɛ be kusu be fali Zeroboamu yoli akpasua blu (10) be su famiɛn. Sanngɛ Bɛnzamɛn nin Zida be akpasua nɲɔn’n yɛ be kali Rɔbɔamu sa nun ɔn.

Zeroboamu kloman kɛ i nvlefuɛ’m be ɔ Zerizalɛmu be ko su Zoova i sua’n nun lɔ. I sɔ ti’n ɔ yoli sika ɔkwlɛ nannin ba nɲɔn kɛ akpasua blu’m (10) be nvlefuɛ’m be sɔ be. I osu m’ɔ́ cɛ́ kan’n yɛ sran kunlɛ’n nin nzaje sa’m be yolɛ’n be wa deli be lika wunmuan’n niɔn.