?Ngue yɛle awlobofuɛ’m be Ɲanmiɛn sulɛ’n?

Kɛ ɔ fɛ i laa lele andɛ’n, Zoova waan awlobofuɛ’m be su i awlo lɔ, naan be nin i be afiɛn’n mantan kpa naan awlobo’n nunfuɛ’m be bɔbɔ be afiɛn’n mantan kpa wie. (Mmla’n 6:6, 7) I sɔ’n ti yɛ lemɔcuɛ kwlaa nun’n, Zoova i Lalofuɛ’m be fa blɛ be su Ɲanmiɛn awlo lɔ’n niɔn. Blɛ fɛfɛ sɔ’n nun’n, be koko Biblu’n nun ndɛ wie m’ɔ kwla uka be’n, be su yalɛ. Kannzɛ bɔbɔ ɔ ngunmin yɛ a tran’n, sanngɛ a kwla sie blɛ suan Biblu’n nun like lemɔcuɛ kwlaa.

Ɔ ti blɛ kun mɔ be fa be wun mantan Ɲanmiɛn kpa ɔ. “An fa amun wun mantan Nyanmiɛn, yɛ i kusu fɛ́ i wun mántan amun-ɔn.” (Zak 4:8) Sɛ e suan Zoova i sran’n i wafa nga ɔ ti’n, ɔ nin ninnge nga ɔ yo be’n, be su like Biblu’n nun’n, é sí i kpa. Like nga awlobofuɛ’m be kwla fa bo be awlo lɔ Ɲanmiɛn sulɛ’n i bo’n, yɛle Biblu’n nun kannganlɛ likawlɛ’n. Ɔ kwla yo lemɔcuɛ’n nun Biblu’n i bue nga bé kókó su yalɛ Klistfuɛ mun nin be junman aɲia’n i bo lɔ’n, i nun kannganlɛ. Be kwla cɛcɛ nun man awlobofuɛ’m be tinuntinun, kpɛkun be kwla koko i nun afɔtuɛ’m be su yalɛ.

Ɔ ti blɛ kun mɔ awlobofuɛ’m be afiɛn’n mantan kpa ɔ. Sɛ yasua kun nin i yi, annzɛ siɛ nin niɛn ɔ nin ba’m be suan Biblu’n nun like likawlɛ’n, be afiɛn’n mántan kpa trá laa’n. Ɔ fata kɛ blɛ sɔ’n yo fɛ naan lemɔcuɛ kwlaa nun’n, be ɲin trɛn i sin titi. Siɛ nin niɛn’m be kwla fa Sasafuɛ Tranwlɛ’n nin fluwa uflɛ, ɔ nin e ɛntɛnɛti adrɛsi’n be nun ndɛ wie mun naan be nin be mma’m b’a koko su yalɛ. I sɔ yolɛ nun’n, maan be bu be mma’m be afuɛ’n i akunndan. Asa ekun’n, be kwla kan sa nga be tɔli be mma’m be su suklu lɔ’n, ɔ nin wafa nga be kwla jran be ɲrun kekle’n be ndɛ. Amun kwla nian televiziɔn (tv.jw.org) i nun like kun, kpɛkun amun koko su yalɛ. Lemɔcuɛ’n nun jue nga amún tó be aɲia’m be bo lɔ’n, amun kwla suan be tolɛ likawlɛ wie. Kɛ be ko wie like suan’n, be kwla kunndɛ like kan be nɔn.

Blɛ ngunmin kun sɔ’n, mɔ awlobofuɛ’m be fa su Zoova likawlɛ’n awlo lɔ’n, ɔ́ úka be naan b’a klo Ɲanmiɛn Ndɛ’n i suanlɛ. Yɛ Ɲanmiɛn kusu yrá be ɲin mianlɛ sɔ’n su dan.​—Jue Mun 1:1-3.

• ?Ngue ti yɛ ɔ fata kɛ e sie blɛ e su Ɲanmiɛn awlo lɔ ɔ?

• ?Wafa sɛ yɛ siɛ nin niɛn’m be kwla yo naan blɛ sɔ’n nun’n awlobofuɛ’m b’a di aklunjuɛ ɔ?