Wafa ng’ɔ fata kɛ amun siesie amun afiɛn ndɛ mun’n

Kɛ amun ko ja bla annzɛ bian mɔ amun nin i bé trán’n, ndɛ fanunfanun bé tɔ́ amun afiɛn. Afin amun akunndan bulɛ wafa’n timan kun. Asa’n, wafa nga amun wun fa yo amun’n nin wafa nga amun wun ninnge’m be wlɛ’n, be timan kun. Asa kusu’n, sa wie mɔ sran annzɛ like uflɛ kpɛ i ba’n, ɔ nin sa kekle wie mɔ amun a sunnzunman’n, be kwla tɔ amun su.

Ɔ kwla yo amun kɛ, sɛ amun yo kɛ sa fi nunman lɛ sa’n, ɔ ti kpa. Sanngɛ Biblu’n se e kɛ e kunndɛ e su sa’m be trawlɛ. (Matie 5:23, 24) Ɔ maan sɛ amun nian Biblu’n nun mmla’m be su nanti’n, amún wún amun su sa’m be trawlɛ.

1 AMUN KOKO SU YALƐ

NDƐ NGA BIBLU’N KAN’N: “Ɔ le blɛ kun mɔ be fa ijɔ-ɔ.” (Akunndanfuɛ’n 3:1, 7) I sɔ’n ti’n, amun tran ase be koko ndɛ’n su yalɛ. Wafa nga amun wun fa yo amun’n, ɔ nin akunndan nga amun bu i sa sɔ’n su’n, amun kɛn i nanwlɛ su kle amun wiengu. Blɛ kwlaa nun’n, amun “di nanwlɛ” kle amun wiengu. (Efɛzifuɛ Mun 4:25) Kannzɛ ndɛ’n yo amun ya’n, amun tra amun awlɛn kpa naan amun a kanman ndɛnngan. Sɛ amun kan ndɛ amanniɛn su’n, amun yalɛ kokolɛ’n su kaciman ndɛnngan.—Ɲanndra Mun 15:4; 26:20.

Kannzɛ amun nuan sɛman ndɛ wie su’n, maan amun ijɔlɛ wafa’n yo fɛ. Maan wafa nga amún kán ndɛ’n, ɔ kle amun wiengu kun’n i kɛ amun klo i naan amun ɲin yi i. (Kolɔsufuɛ Mun 4:6) Amun mian amun ɲin be siesie sa sɔ’n ndɛndɛ, nán amun tannin nvlɛ.—Efɛzifuɛ Mun 4:26.

LIKE NGA AMUN KWLA YO’N:

• Amun sie blɛ kun naan amun koko sa ng’ɔ tɔli’n su yalɛ.

• Sɛ amun wiengu kun’n su ijɔ’n, nán an kpɛ i nuan ndɛ. Amun minndɛ kɛ ɔ wie ijɔ ka naan amun a kan wie.

2 AN SIE AMUN SU NAAN AMUN A WUN NDƐ’N I BO

NDƐ NGA BIBLU’N KAN’N: “Maan amun klo amun wun kpa [...] Nán amun minndɛ kɛ amun wiengu bu amun sran ka naan amun a bu i sran.” (Rɔmunfuɛ Mun 12:10) Wafa nga amun sie amun su amun wiengu nuan bo’n, ɔ ti cinnjin kpa. Ɔ maan amun mian amun ɲin be wun ndɛ nga amun wiengu kun’n kan’n i bo. I sɔ yolɛ nun’n, “maan amun wiengu ndɛ lo amun [...] yɛ amun kan amun wun ase.” (1 Piɛli 3:8; Zaki 1:19) Nán amun yo kɛ amun su tie i ndɛ’n sa kusu nn amun tiemɛn i sakpa. Sɛ ɔ nin i fata bɔbɔ’n, amun yaci like nga amun su yo’n i yolɛ naan amun fa amun ɲin sie i amun yi’n annzɛ amun wun’n i su. Annzɛ kusu amun se i kɛ amun kunndɛ kɛ amun sie ndɛ sɔ’n i siɛn kan. Sɛ amun bu amun wiengu kun’n kɛ amun ukafuɛ sa’n, amun su ‘faman ya ndɛndɛ.’—Akunndanfuɛ’n 7:9.

LIKE NGA AMUN KWLA YO’N:

• Kannzɛ bɔbɔ ndɛ nga amun yi annzɛ amun wun su kan’n timan amun liɛ su’n, sanngɛ amun tie be guɛ i ti nin i bo yɛ amun bu i ndɛ.

• Akunndan ng’ɔ o i ndɛ’n i sin’n, i su yɛ ɔ fata kɛ amun fa amun ɲin sie-ɔ. An fa amun ɲin sie wafa nga ɔ yo i ɲrun’n ɔ nin wafa nga ɔ siesie i sa mun’n, ɔ nin wafa ng’ɔ fa kan ndɛ’n be su.

3 AMUN YO I NUAN SU SA

NDƐ NGA BIBLU’N KAN’N: “Junman kwlaa nga be mian be ɲin be di’n, be ɲan su ye, sanngɛ sran nga ijɔlɛ ngbɛn yɛ ɔ ijɔ’n, yalɛ’n dí i.” (Ɲanndra Mun 14:23) Sɛ amun nuan sɛli su kɛ amún yó like wie’n, ɔ ti kpa. Sanngɛ nán ɔ ka ngalɛ’n su. Ɔ fata kɛ amun yo i nuan su sa. I sɔ yolɛ’n kwla yo kekle kpa. Sanngɛ ɔ su yoman afɛ ngbɛn. (Ɲanndra Mun 10:4) Sɛ amun yo like likawlɛ’n, amún ɲán junman kekle nga amun di’n “i nuan like kpa.”—Akunndanfuɛ’n 4:9.

LIKE NGA AMUN KWLA YO’N:

• Amun kle like trele nga amun tinuntinun amún yó naan amun a siesie amun awlo’n nun ndɛ mun’n.

• Cɛn kunngun, amun nian sɛ amun nian ajalɛ sɔ’n su nanti-o.