Ɲrɛnnɛn nsiɛn ekun

Moizi nin Aarɔn be ɔli Faraɔn i sin, be ko seli i kɛ Ɲanmiɛn waan: ‘Sɛ w’a yaciman min sran’m be nun’n, ń má yó naan ngɔnsiɛn dandan mɔ be nuan yo ya’n be tru ɔ mɛn’n nun.’ Ngɔnsiɛn sɔ mun be wluli Eziptifuɛ’m be kwlaa be sua’m be nun, i sikafuɛ-o, i yalɛfuɛ-o. Be truli nvle wunmuan’n nun. Sanngɛ Gozɛnin mɔ lɔ yɛ Izraɛlifuɛ’m be tran’n, ngɔnsiɛn sɔ’m b’a juman lɔ. Kɛ ɲrɛnnɛn klikli nsan mun be sinnin’n, Eziptifuɛ’m be ngunmin be su yɛ ɲrɛnnɛn onga’m be tɔli-ɔ. Faraɔn seli kɛ: ‘Amun srɛ Zoova naan ngɔnsiɛn sɔ mun be wɔ. A nin ɔ sran mun amun kwla kɔ.’ Sanngɛ kɛ Zoova yoli maan ngɔnsiɛn’m be ɔli’n, Faraɔn w’a yaciman be nun. ?Faraɔn ɔ́ wá fá sa sɔ mun tú i wun fɔ cɛn kun?

Zoova seli kɛ: ‘Sɛ Faraɔn w’a yaciman min sran’m be nun naan b’a ɔman’n, tukpacɛ tɔ́ Eziptifuɛ mun be nnɛn’m be su, yɛ bé wú.’ Kɛ i aliɛ cɛnnin’n, nnɛn’m be boli wulɛ bo. Sanngɛ Izraɛlifuɛ’m be nnɛn mun b’a wuman wie. Ɔ nin i sɔ’n ngba’n, Faraɔn w’a kaciman.

I sin’n, Zoova seli Moizi kɛ ɔ wɔ Faraɔn sin naan ɔ fa nzuɛn ko sanndi nun nglo i ɲrun lɛ. Kɛ ɔ sanndili nzuɛn’n i nglo’n, ɔ kacili ndutre. Ɔ truli lika’n kwlaa nun, kpɛkun ɔ guali Eziptifuɛ’m be wun. Ndutre’n yoli maan like wie m’ɔ ti kɛ yra sa’n, ɔ fiteli Eziptifuɛ mun nin be nnɛn’m be wun. Ɔ nin i sɔ ngba’n, Faraɔn w’a yaciman Izraɛlifuɛ’m be nun.

Zoova sunmannin Moizi Faraɔn sin naan ɔ ko se i kɛ: ‘?Ɔ waan a yaciman min sran’m be nun? Ainman’n, nzraama mɔ kɛ nzue tɔ́’n ɔ gua’n, i wie wá gúa ɔ mɛn’n su.’ Kɛ aliɛ cɛnnin’n, Zoova yoli maan nzraama mɔ kɛ nzue tɔ́’n ɔ gua’n nin angblannan, ɔ nin sin be guali Ezipti mɛn’n su. I sɔ sa’n nin-a juman Ezipti mɛn’n nun le. Waka mun nin fie’m be su ninnge’m be kwlaa be sacili, saan Gozɛnin lɔ liɛ mun. Yɛ Faraɔn seli Moizi kɛ: ‘Kpata Zoova naan ninnge sɔ’m be jran. I liɛ’n, ń yáci amun nun.’ Kɛ nzraama mɔ kɛ nzue tɔ́’n ɔ gua’n ɔ yacili gualɛ mɔ nzue’n kpɛli’n, Faraɔn w’a yaciman be nun.

I sin’n, Moizi seli kɛ: ‘Lalo mun bé wá dí ninnge nga nzue’n nin nzraama mɔ kɛ nzue tɔ́’n ɔ gua’n b’a saciman be’n be kwlaa.’ Ɔ maan lalo mun be wa dili fie mun be su ninnge nga be kali lɛ’n, ɔ nin waka’m be nɲa’m be kwlaa. Faraɔn seli Moizi kɛ: ‘Kpata Zoova naan lalo’m be wɔ.’ Zoova yoli maan lalo mun be ɔli, sanngɛ Faraɔn w’a yaciman Izraɛlifuɛ’m be nun.

Zoova seli Moizi kɛ: ‘Man ɔ sa’n su nglo.’ Kɛ ɔ mɛnnin i sa’n su nglo’n, lika’n ka lɛ dunnin tuun kpa. Ɔ dunnin lele cɛn nsan. Eziptifuɛ mun be kwlá wunman like fi, be kwlá wunman be wiengu bɔbɔ. Sanngɛ Izraɛlifuɛ’m be lɔ’n, lika’n kpaja wauun.

Faraɔn seli Moizi kɛ: ‘A nin ɔ nvle’n nunfuɛ mun amun kwla kɔ. Sanngɛ amun yaci amun nnɛn mun wa.’ Moizi tɛli i su kɛ: ‘Ɔ fata kɛ e fa e nnɛn mun naan e ko yi tɛ e man e Ɲanmiɛn’n.’ Faraɔn fali ya kpa. Ɔ seli i kɛ: ‘Jaso min ɲrun lɛ. Sɛ n wun wɔ wa ekun’n, ń kún wɔ.’