Ɲrɛnnɛn blu su’n

Moizi seli Faraɔn kɛ ɔ su kɔmɛn i wun lɔ kun. Sanngɛ ka naan w’a jaso Faraɔn i ɲrun lɛ’n, ɔ seli i kɛ: ‘Kɔnguɛ afiɛn’n, Ezipti mɛn’n nun ba klikli’m be kwlaa bé wú. Faraɔn bɔbɔ nin i kanga’m be mma klikli mun bé wú wie.’

Zoova seli Izraɛlifuɛ mun kɛ be di aliɛ kun m’ɔ ti i liɛ ngunmin’n. Ɔ seli be kɛ: ‘Amun kun bua annzɛ boli nga w’a di afuɛ kun’n, yɛ amun fɛ i mmoja’n wie fa klikli amun anuan’m be kadri’m be su. Amun ɲintɔn nnɛn’n, yɛ amun di nnɛn sɔ’n nin kpanwun mɔ levii nunman nun’n. Amun wlawla amun wun, yɛ amun wla ngbabua kɛ amun su wa kɔ lika sa. Andɛ kɔnguɛ’n, ń dé amun.’ ?Kɛ Izraɛlifuɛ’m be tili ndɛ sɔ’n, ɔ yoli be sɛ?

Kɔnguɛ afiɛn’n, Zoova i anzi’n sinnin awlo’m be nun Ezipti mɛn’n nun. Awlo kwlaa nga i nunfuɛ mun b’a faman mmoja b’a klikliman be anuan’n i kadri’n su’n, be mma klikli’m be wuli. Sanngɛ sua nga mmoja o be su’n anzi’n tu trali be. Eziptifuɛ mun be awlo kwlaa nun’n, i sikafuɛ-o, i yalɛfuɛ-o, be mma klikli’m be wuli. Sanngɛ Izraɛlifuɛ’m be mma mun be nun wie fi w’a wuman.

Faraɔn i wa klikli’n bɔbɔ wuli wie. Ɔ yoli i ya dan trali su. I sɔ’n ti’n, ɔ seli Moizi nin Aarɔn be kɛ: ‘Amun jaso min mɛn’n nun. Amun wɔ be ko su amun Ɲanmiɛn’n. Amun fa amun nnɛn mun naan amun wɔ.’

Kɔnguɛ mɔ anglo’n ta kpa’n, Izraɛlifuɛ mun be fin Ezipti mɛn’n nun be fiteli. Kɛ bé kɔ́’n, be awloboawlobo mun nin be akpasuaakpasua mun be lɔngɔ su sɛsɛsɛ. Be nun yasua mun be ti akpiakpi ya nsiɛn (600.000), yɛ bla nin bakanngan mun be sɔnnin kpa wie. Sran kpanngban wie mun ekun be suli be su naan bé kó sú Zoova wie. Siɛn’n, Izraɛlifuɛ mun b’a ɲan be ti.

Kɛ ɔ ko yo naan Izraɛlifuɛ mun be wla w’a kpɛn wafa nga Zoova deli be’n su’n, afuɛ kwlakwla’n be di aliɛ ngunmin kun sɔ’n. Be flɛ i kɛ Delɛ Cɛn aliɛ.