Sa ng’ɔ juli Jenvie Ɔkwlɛ’n i nuan lɔ’n

Kɛ Faraɔn tili i kɛ Izraɛlifuɛ mun b’a jaso Ezipti mɛn’n nun’n, ɔ yoli i nsisɔ. Ɔ seli i sonja’m be kɛ: ‘Amun fa min alɛ kunlɛ kakaklolo mun naan e su be su! E si sɔ’n nn y’a yaciman be nun.’ Kpɛkun Faraɔn nin i sonja mun be suli Izraɛlifuɛ’m be su.

Zoova fa ɲanmiɛn ble kun fa kle Izraɛlifuɛ mun be atin wia nun, sanngɛ kɔnguɛ’n ɔ fa sin. Ɔ fa be ɔli Jenvie Ɔkwlɛ’n i nuan lɔ, kpɛkun ɔ seli be kɛ be tran lɛ kan.

Izraɛlifuɛ mun be wunnin kɛ Faraɔn nin i sonja’m be su ba. Sanngɛ be wunman kɔwlɛ, afin Jenvie Ɔkwlɛ’n wo be ɲrun. Be kpan flɛli Moizi. Be seli i kɛ: ‘B’a wie e kun-o! Sɛ ɔ ti kɛ a yacili e Ezipti lɔ sa’n, ɔ ti kpa.’ Sanngɛ Moizi seli be kɛ: ‘Nán srɛ kun amun. Amun jran diin naan amun nian wafa nga Zoova wá dé amun’n.’ Nanwlɛ, Moizi lafi Zoova su sakpa. ?Nɛ́n i-ɔ?

Zoova seli Izraɛlifuɛ mun be kɛ be wɔ. Kɔnguɛ sɔ’n nun’n, Zoova yoli maan ɲanmiɛn ble’n ko jrannin Eziptifuɛ mun nin Izraɛlifuɛ mun be afiɛn. Ɔ maan Eziptifuɛ’m be bue liɛ’n su lɔ’n, lika’n dun. Sanngɛ Izraɛlifuɛ’m be bue liɛ’n su’n, lika’n kpaja.

Zoova seli Moizi kɛ ɔ tinngɛ i sa’n jenvie’n su. I sin’n, Zoova yoli maan kɔnguɛ sɔ nun’n aunmuan’n fitali dan kpa. Jenvie’n i nun kpacili nɲɔn. Kpɛkun Izraɛlifuɛ mun be sinnin i afiɛn asiɛ kee’n su be ɔli jenvie’n i bue kun’n su lɔ. Kɛ ɔ́ yó sɔ’n, nn jenvie’n w’a si ce be sa fama su nin be sa bɛ su kɛ talɛ sa.

Faraɔn nin i sonja’m be suli Izraɛlifuɛ mun be su jenvie’n i afiɛn. I sin’n, Zoova sanngannin Eziptifuɛ mun be nun. Be kakaklolo mun be ja’m be tutuli. Ɔ maan sonja’m be kpan seli kɛ: ‘Maan e wanndi! Zoova o be sin.’

Zoova seli Moizi kɛ: ‘Tinngɛ ɔ sa’n jenvie’n su.’ Yɛ jenvie’n ka lɛ katali Eziptifuɛ mun be su-ɔ. Faraɔn nin i sran mun be kwlaa be wuli. Be nun ba kun sa w’a fiteman nun.

Kɛ Izraɛlifuɛ mun be juli jenvie’n i bue kun lɔ’n, be toli jue manmannin Ɲanmiɛn. Be seli kɛ: ‘Amun to jue manman Zoova, afin kwlalɛ ng’ɔ kwlali yɛ’n, kwlalɛ sɔ’n ɔ yoli dan sakpa. Ɔ toli nnɛn kpanngɔ nin be su fufuɛ mun yili jenvie’n nun lɔ!’ Kɛ bé tó jue’n, nn bla mun bé sí su able, nn bé bó klɛn. Be kwlaa be klun jɔli. Siɛn’n, b’a ɲan be ti.