Be tuli Famiɛn Bla klunwifuɛ kun i fɔ

Kɛ Famiɛn Akabu o i famiɛn sua m’ɔ o Zizreɛli lɔ’n nun m’ɔ niɛn i fenɛtri’n nun’n, ɔ wun viɲin fie kun. Fie sɔ’n ti bian kun mɔ be flɛ i Nabɔtu’n i liɛ. Akabu kunndɛli kɛ fie sɔ’n yo i liɛ. I sɔ’n ti’n, ɔ seli Nabɔtu kɛ ɔ yo i atɛ i sa nun. Sanngɛ Nabɔtu w’a kplinman su, afin Zoova ɲrun’n ɔ timan su kɛ be yo asiɛ ng’ɔ ti be aja like’n i atɛ. ?I sɔ mɔ Nabɔtu yoli’n, ɔ yoli Akabu i fɛ? Cɛcɛ! Ɔ fali ya dan. Ɔ maan i waan ɔ diman like. Ɔ lɛ i sua’n nun lɔ.

Akabu i yi Zezabɛli m’ɔ ti klunwifuɛ kpa’n, ɔ seli i kɛ: ‘Wɔ yɛ a ti Izraɛli famiɛn’n niɔn. A kwla ɲan like kwlaa nga a klo’n. Ń má kó fá asiɛ sɔ’n ń mán wɔ.’ Ɔ klɛli klɔ’n su kpɛnngbɛn mun be fluwa. Ɔ seli be kɛ be tɔn Nabɔtu i suɛn kɛ ɔ kpɛli Ɲanmiɛn i nzowa naan be finfin i yɔbuɛ be kun i. Kpɛnngbɛn mun be yoli like nga Zezabɛli waan be yo’n. Yɛ Zezabɛli seli Akabu kɛ: ‘Nabɔtu w’a wu. Fie’n ti ɔ liɛ siɛn’n.’

Nán Nabɔtu kunngba yɛ Zezabɛli yoli maan be kunnin i-ɔ. Ɔ yoli maan be kunnin sran kpanngban wie mun ekun mɔ be klo Zoova’n. Zezabɛli sɔli amuin mun, kpɛkun ɔ yoli sa tɛtɛ kpanngban. Zoova wunnin sa sɔ’m be kwlaa be nun. ?Ngue yɛ ɔ́ wá yó-ɔ?

Kɛ Akabu wuli’n, i wa Zoramun kacili famiɛn. Zoova sunmannin sran kun mɔ be flɛ i kɛ Zei’n, naan ɔ ko tu Zezabɛli nin i awlofuɛ’m be fɔ.

Zei fɛli i kakaklolo’n, ɔ fali Zizreɛli atin’n. Lɔ yɛ Zezabɛli tran-ɔn. Zoramun fɛli i kakaklolo’n ɔli Zei i atin kpalɛ, kpɛkun ɔ usɛli i kɛ: ‘?Wɛtɛɛ su-ɔ?’ Zei tɛli i su kɛ: ‘Sa tɛtɛ nga ɔ nin Zezabɛli yo be’n ti’n, e kwlá tranman fɔuun.’ Zoramun waan ɔ́ wánndi. Yɛ Zei cuɛnnin i ta’n nun fa wɔli i-ɔ, kpɛkun ɔ wuli.

I sin’n, Zei ɔli Zezabɛli i awlo lɔ. Kɛ Zezabɛli tili i kɛ Zei su ba’n, ɔ dili talua klanman kpa, ɔ ko minndɛli i i nglo sua’n nun, ɔ jin lɛ nían fenɛtri’n nun. Kɛ Zei juli lɛ’n, Zezabɛli kɛnnin i ndɛ tɛtɛ. Zei kpan seli Zezabɛli i sufuɛ nga be jinjin i wun lɛ’n be kɛ: “Amun su i bo maan ɔ fin fenɛtri’n nun lɔ tɔ!” Be suli Zezabɛli bo. Ɔ fin fenɛtri’n nun tɔli, kpɛkun ɔ wuli.

I sin’n, Zei kunnin Akabu i mma ableso mun (70) , yɛ ɔ yoli maan b’a sɔman Baali nvle’n nun kun. ?Ndɛ sɔ’n kleman kɛ Zoova wun sa kwlaa naan blɛ ng’ɔ ti su’n nun’n, ɔ tu be nga be yo sa tɛ’n be fɔ?