A NIN SRAN BO YALƐ KOKOLƐ BO
LIKE SUANLƐ 1
Kan like ng’ɔ ti sran’m be cinnjin’n i ndɛ
Ndɛ cinnjin’n: “Sran ng’ɔ klo sran’n […] ɔ bumɛn i ngunmin i wun akunndan.”—1 Kor. 13:4, 5.
Like nga Zezi yoli’n
1. Nian VIDEO’N, annzɛ kanngan Zan 4:6-9 nun. I sin’n, bu kosan nga’m be akunndan:
(1). ?Kwlaa naan Zezi nin bla’n b’a bo yalɛ kokolɛ bo’n ngue yɛ ɔ sieli i nzɔliɛ-ɔ?
(2). Zezi seli kɛ: “Man min nzue maan n nɔn.” ?Ngue ti yɛ wafa nga ɔ nin sran’n be boli yalɛ kokolɛ bo’n ɔ ti kpa-ɔ?
?Ngue yɛ like nga Zezi yoli’n kle e-ɔ?
2. Kɛ é bó yalɛ kokolɛ bo’n sɛ sa ng’ɔ ti sran’n i cinnjin’n yɛ e kɛn i ndɛ’n e nin i e kwla koko yalɛ kpa.
Sɔnnzɔn Zezi
3. Nian wafa nga sa’m be ti’n su naan w’a kan ndɛ’n. Nán se kɛ san fii á jrán ndɛ nga a siesieli’n su, á bó yalɛ kokolɛ bo. A kwla jran like ng’ɔ ti sran’m be cinnjin cɛn sɔ nun’n i su naan w’a bo yalɛ kokolɛ bo. Usa ɔ wun kɛ:
(1). ‘?Ngue yɛ sran’m be kɛn i ndɛ dan aladio nin televiziɔn nun-ɔn?’
(2). ‘?Ndɛ benin yɛ min mantanfuɛ mun annzɛ min wiengu junman difuɛ mun annzɛ min wiengu suklu ba’m be su kan-ɔn?’
4. Fa ɔ ɲin sie i ninnge’m be su. Usa ɔ wun kɛ:
(1). ‘?Ngue yɛ sran’n su yo-ɔ? ?Ngue yɛ atrɛkpa’n ɔ su bu i akunndan-ɔn?’
(2). ‘?Wafa sɛ yɛ sran’n i wun wlawlalɛ’n nin wafa ng’ɔ ti’n nin i awlo nun ninnge’m be kwla uka min naan m’an si like ng’ɔ lafi su’n annzɛ lika ng’ɔ fin’n niɔn?’
(3). ‘?Dɔ nga su’n e nin i e kwla koko yalɛ?’
5. Sie ɔ su.
(1). Nán ijɔ kaka.
(2). Yo maan sran’n kɛn i klun ndɛ. Yɛ sɛ a nian naan ɔ nin i fata’n usɛ i kosan.