Sran oke’m be lika nianlɛ’n ti Klistfuɛ’m be ti su trɔ
‘Kɛ amún yó oke’n, nn n te o n osu nun. Kɛ amún ti bó je’n, nn n te suan amun bo.’—EZAI 46:4.
1, 2. ?Wafa sɛ yɛ e Si m’ɔ o nglo lɔ’n i sran lika nianlɛ’n ɔ nin siɛ nin niɛn’m be liɛ’n, ɔ timan kun ɔn?
SIƐ nin niɛn kpa’m be nian be mma’m be lika be bakan nun lele be fa ɲin. Wie liɛ bɔbɔ’n, kannzɛ ba’m be ɲinnin naan be ko takali be awlo liɛ o, sanngɛ be si nin be nin’m be suan be bo titi.
2 Kannzɛ siɛ nin niɛn’m bé yó sɛ bé yó sɛ o, sanngɛ be kwlá nianman be mma’m be lika titi. Sanngɛ e Si m’ɔ o nglo lɔ’n i liɛ’n, klolɛ su ɔ niɛn i sufuɛ kpa’m be lika titi, kpɔkun ɔ suan be bo. Kɛ laa blɛ nun ɔ́ kán ndɛ klé i nvle nunfuɛ mun’n, ɔ seli be kɛ: ‘Kɛ amún yó oke’n, nn n te o n osu nun. Kɛ amún ti bó je’n, nn n te suan amun bo.’ (Ezai 46:4). Nanwlɛ, ndɛ sɔ’n gua Klistfuɛ nga b’a yo oke’n be awlɛn su nzue dan! Zoova sokpaman i gbaflɛn difuɛ’n le. I kpa bɔbɔ’n, ɔ seli kɛ kannzɛ be yo oke’n, ɔ́ nían be lika, ɔ́ súan be bo, kpɔkun ɔ́ dún mmua be ɲrun tititi.—Jue Mun 48:15.
3. ?Ngue yɛ like suanlɛ nga ɔ́ wá yíyí nun ɔn?
3 ?Wafa sɛ yɛ e kwla sɔnnzɔn wafa nga Zoova tu i klun nian sran oke’m be lika’n, i wie ɔ (Efɛzfuɛ Mun 5:1, 2)? Amun e nian wafa nga i ba mun o, i asɔnun kpɛnngbɛn mun o, i Klistfuɛ mun o, e tinuntinun e kwla nian e niaan nga b’a yo oke’n be lika’n.
Ba’m be ti su trɔ’n
4. ?Ba nga be ti Klistfuɛ’n, trɔ mennin yɛ ɔ o be ti su, be si nin be nin’m be lika ɔ?
4 ‘Bu ɔ si nin ɔ nin be sran.’ (Efɛzfuɛ Mun 6:2; Ezipt Lɔ Tulɛ 20:12). Ndɛ kpe kan sɔ m’ɔ o Biblu’n i lika nga be klɛli i Ebre aniɛn nun’n, i bo’n ti kploun. Akoto Pɔlu fa kpɛn ba’m be wla naan be si like ng’ɔ fata kɛ be yo be man be si nin be nin mun’n. ?Sanngɛ wafa sɛ yɛ ndɛ sɔ’n kan sran oke’m be lika nianlɛ’n niɔn? Ajalɛ nga Klistfuɛ klikli’m be blɛ su be tuli be klun be fali’n, ɔ tɛ kosan sɔ’n su.
5. (a) ?Ngue yɛ ɔ kle kɛ klolɛ nga sran kun fa klo i si’n ju lɛ’n, i sɔ wie yɛ Zozɛfu fa kloli i si ɔ? (b) ?Kɛ be se kɛ be bu be si nin be nin sran’n, i bo’n yɛle mennin? ?Yɛ ajalɛ kpa mennin yɛ Zozɛfu mannin e ɔ?
5 Zozɛfu nin i si oke Zakɔbu b’a wunman be wiengu wun lele afuɛ 20 trali su. Sanngɛ, klolɛ nga sran kun fa klo i si’n ju lɛ’n, yɛ Zozɛfu fa kloli i si Zakɔbu wie ɔ. Ɔ maan, kɛ ɔ yili i wun nglo kleli i niaan mun’n, ɔ usali be kɛ: ‘?Min si te o lɛ?’ (Bo Bolɛ 43:7, 27; 45:3). Blɛ sɔ nun’n, nn awe dan kpa w’a tɔ Kanaan mɛn’n nun. Ɔ maan, Zozɛfu toli i si ngaliɛ kɛ: ‘Nán sisi ɔ bo, bla. Ń síe wɔ Gozɛn nvle’n nun min wun koko wa. Sɛ a ba’n, ń mán wɔ aliɛ á dí.’ (Bo Bolɛ 45:9-11; 47:12). Ɛɛn, siɛ nin niɛn oke’m be sran bulɛ’n yɛle kɛ, kɛ be leman wunmiɛn kun naan b’a yo be bɔbɔ be ninnge mun’n, maan e nian be lika kpɔkun e man be aliɛ (1 Samiɛl 22:1-4; Zan 19:25-27). Zozɛfu tuli i klun suali trɔ sɔ’n.
6. ?Wafa sɛ yɛ Zozɛfu yili klolɛ ng’ɔ fa klo i si’n, i nglo ɔ? ?Yɛ wafa sɛ yɛ e kwla fɛ i ajalɛ’n su ɔ?
6 Zoova maan Zozɛfu yoli Ezipti mɛn wunmuan’n su sran dan (Bo Bolɛ 41:40). Sanngɛ, w’a yomɛn i wun dandan, annzɛ w’a seman kɛ i su junman sɔnnin ti naan ɔ kwlá niɛnmɛn i si oke m’ɔ le afuɛ 130 i lika. Kɛ Zakɔbu (annzɛ Izraɛli) juli klɔ’n i wun koko’n, ‘Zozɛfu siesieli i kakaklolo’n naan w’a fu nun w’a ɔ naan ɔ nin i si b’a yia Gozɛn. Kɛ ɔ juli lɛ cɛ’n yɛ ɔ tɔli i si nun ɔn, naan w’a sun kpa.’ (Bo Bolɛ 46:28, 29). Sran nun tɔlɛ sɔ’n tra titi sran je tralɛ’n. Zozɛfu klo i si’n i kpa. Ɔ maan klolɛ sɔ’n i nglo yilɛ nun’n, ɲannzuɛn w’a kunmɛn i. Sɛ e le e si nin e nin oke naan e kle kɛ e klo be sɔ wie’n, ɔ ti kpa. ?Nɛ́n i ɔ?
7. ?Ngue ti yɛ Zakɔbu seli kɛ maan be sie i Kanaan mɛn’n nun lɔ’n niɔn?
7 Zakɔbu suli Zoova tankaan lele guɛli i ti nin i bo (Ebre Mun 11:21). Kɛ mɔ Zakɔbu lafi Ɲanmiɛn su ti’n, ɔ seli kɛ sɛ ɔ wu’n, maan be sie i Kanaan mɛn’n nun lɔ. Kannzɛ bɔbɔ i sɔ yolɛ’n timan pɔpɔ’n, sanngɛ Zozɛfu buli i si’n i sran. Yɛle kɛ ɔ niannin ndɛ nga i si’n kannin’n su yoli.—Bo Bolɛ 47:29-31; 50:7-14.
8. (a) ?Sa klikli mennin yɛ ɔ su e bo maan e nian e si nin e nin be lika’n niɔn? (b) ?Ngue yɛ blɛ kwlaa nun Ɲanmiɛn junman difuɛ kun yoli naan w’a niɛn i si nin i nin’n, be lika ɔ? (An nian i bue 13 i kuku’n nun.)
8 ?Ngue yɛ ɔ suli Zozɛfu bo m’ɔ niɛnnin i si’n i lika’n niɔn? Kannzɛ bɔbɔ Zozɛfu si kɛ klolɛ nga i si fa kloli i’n, ɔ nin i lika ng’ɔ niannin ti’n, ɔ nin i fata kɛ ɔ yo i wunsu like mɛn i’n, sanngɛ ɔ kunndɛli kpa kɛ Zoova i klun jɔ i wun wie. Ɔ fata kɛ e kunndɛ kɛ Zoova i klun jɔ e wun sɔ wie. Pɔlu waan: ‘Angbeti ng’ɔ le ba annzɛ anunman’n, maan ba sɔ’m be si kɛ be Ɲanmiɛn sulɛ’n nun’n, sa nga bé dún mmua yó’n yɛle be awlo’n i lika nianlɛ, ɔ nin like nga be si nin be nin, ɔ nin be nannan’m be yo mannin be’n i wunsu yolɛ. I sɔ’n yo Ɲanmiɛn fɛ.’ (1 Timote 5:4). Ɔ maan sɛ e klo Zoova naan e sro i’n, i sɔ’n sú e bo maan kannzɛ e si nin e nin’n be lika nianlɛ’n timan pɔpɔ o, sanngɛ é nían be lika.a
Wafa nga asɔnun kpɛnngbɛn’m be kle kɛ be nian sran oke’m be lika’n
9. ?Wan sa nun yɛ Zoova fali i bua fa’n, ɔ nin i nun Klistfuɛ wie mun mɔ b’a yo oke’n, be lika nianlɛ’n wlali ɔ?
9 Kɛ Zakɔbu wá wú m’ɔ́ kán Zoova ndɛ’n, ɔ seli kɛ: ‘Ɲanmiɛn niannin min su kɛ bua kankanfuɛ fa niɛn i bua’m be su sa lele yɛ w’a fa ju yɛ.’ (Bo Bolɛ 48:15). E blɛ liɛ nun’n, Zoova i Wa Zezi Klist m’ɔ ti “bua tafuɛ dan’n” i dunman nun’n, ɔ fa asɔnun kpɛnngbɛn mun yɛ ɔ nian i bua’m be lika ɔ (1 Piɛr 5:2-4). ?Kɛ asɔnun kpɛnngbɛn’m bé nían Zoova i bua fa’n i nunfuɛ nga be ti oke’n be lika’n, wafa sɛ yɛ be kwla nian Zoova liɛ’n su be yo ɔ?
10. ?Ngue yɛ be yoli naan b’a nian Klistfuɛ nga b’a yo oke’n be lika ɔ? (An nian i bue 15 i kuku’n nun.)
10 Kɛ Klistfuɛ’m be asɔnun’n boli i bo cɛ’n, akoto’m be kpali ‘sran nso mɔ Ɲanmiɛn wawɛ’n sie be, mɔ be si ngwlɛlɛ kpa’n,’ naan cɛn kwlaa be “cɛ aliɛ’n” be man angbeti bla mun (Sa Nga Be Yoli’n 6:1-6). I sin’n, Pɔlu seli Timote m’ɔ ti asɔnun sunianfuɛ’n kɛ ɔ klɛ angbeti bla nga be ti oke mɔ be nzuɛn’n ti kpa’n be dunman, angbeti bla’m be fluwa’n nun naan b’a kwla nian be lika (1 Timote 5:3, 9, 10). I sɔ kunngba’n, sɛ ɔ nin i sɔ yolɛ’n fata’n, andɛ asɔnun sunianfuɛ’m be tu be klun be siesie be wun be nian Klistfuɛ nga b’a yo oke’n be lika. Sanngɛ, Klistfuɛ nga b’a yo oke’n, be lika nianlɛ timan pɔpɔ.
11. ?Angbeti bla oke yalɛfuɛ ng’ɔ yili sika kan’n, i ndɛ mennin yɛ Zezi kannin ɔn?
11 Kɛ ɔ ka kan Zezi ɔ́ wá wíe i junman’n dí asiɛ’n su wa’n, ɔ ko trannin Ɲanmiɛn i sua’n nun lɔ ‘sika guawlɛ’n i ɲrun ndɛnman su lɛ’n, yɛ ɔ nian wafa nga sran’m be yi sika be gua nun’n niɔn.’ Kpɔkun i ɲin ɔli sran kun su. Yɛle kɛ: ‘Angbeti bla yalɛfuɛ kun kusu fa jɛtɛ mma kanngan nɲɔn m’ɔ ju kɛ bablu kun sa’n ɔ fa guali nun.’ Zezi flɛli i sɔnnzɔnfuɛ mun naan w’a se be kɛ: ‘Nanwlɛ, angbeti bla yalɛfuɛ nga i sika liɛ’n m’ɔ yili’n ɔ tra be nga’m be liɛ nga be yi guali sika guawlɛ nun’n, afin be kwlaa nga’m be liɛ nga be yi’n, ɔ buman be kplɛ, sanngɛ bla nga liɛ’n, ɔ yili i yalɛ liɛ kan’n, i kwlaa ng’ɔ lɛ i m’ɔ fa di like’n yɛ ɔ fa mannin ɔn.’ (Mark 12:41-44). Sika nga angbeti bla’n mannin’n ɔ ti kaan sɔ. Sanngɛ, Zezi si kɛ like nga be tu be klun be man’n, ɔ ti i Si m’ɔ o nglo lɔ’n i ɲrun like dan kpa. Ɔ maan like nga angbeti bla oke yalɛfuɛ’n yoli’n, Zezi i wla w’a fiman su.
12. ?Wafa sɛ yɛ asɔnun kpɛnngbɛn’m be kwla kle kɛ be bu junman nga Klistfuɛ oke’m be di’n, i like dan ɔn?
12 Kɛ nga Zezi fa yoli’n sa’n, like nga sran oke’m be yo naan Ɲanmiɛn i sulɛ kpa’n w’a trɛ’n, ɔ fataman kɛ asɔnun sunianfuɛ’m be ɲin kpa su. Sran oke’m be jasin fɛ’n mɔ be bo’n, ɔ nin asɔnun aɲia’m be bo mɔ be kɔ’n, ɔ nin be nzuɛn kpa’n m’ɔ ɲan ta asɔnunfuɛ’m be su’n, ɔ nin be awlɛn mɔ be tra ti’n, ɔ fata kɛ asɔnun kpɛnngbɛn’m be yo be mo. Ndɛ nga amun tu amun klun kan fa wla sran oke’m be fanngan’n, ɔ kwla uka be maan bé wún kɛ Ɲanmiɛn i junman nga be di’n ‘ɔ ti kpa, ɔ́ yó be fɛ.’ I liɛ’n, be su faman be wiengu Klistfuɛ kun i junman liɛ ng’ɔ di’n sunnzunman be liɛ’n naan be wla’n w’a bo be wun ngbɛn. Annzɛ kusu be su faman junman nga be di’n i andɛ’n be sunnzunman nga be dili i laa nun’n.—Galasifuɛ Mun 6:4.
13. ?Ajalɛ mennin yɛ asɔnun kpɛnngbɛn’m be kwla fa naan Klistfuɛ oke’m b’a kle ninnge nga be suannin be laa’n, ɔ nin ninnge nga be si i yo’n niɔn?
13 Wafa nga asɔnun kpɛnngbɛn’m be kwla bu junman nga Klistfuɛ oke’m be di’n i like dan, yɛle kɛ be kwla yo maan sran oke’m be kle be ninnge nga be suannin be laa’n, ɔ nin nga be si i yo’n. I wie yɛle kɛ, cɛn kunngun be kwla fa ninnge’m be nglo yilɛ’n, annzɛ kosan usalɛ nin i su tɛlɛ’m be man sran oke nga be nzuɛn’n ti kpa’n. Asɔnun kpɛnngbɛn kun seli kɛ: “Kɛ ń úsa aniaan bian annzɛ aniaan bla oke ng’ɔ tali ba mun mɔ be ɲinnin nanwlɛ’n nun’n be kosan’n, sran’m be sie be su kpa liɛ su be tie.” Asɔnun kun ekun nun asɔnun kpɛnngbɛn’m be waan aniaan bla kun m’ɔ le afuɛ 71 m’ɔ ti atin bofuɛ’n, ɔ uka jasin bofuɛ mun maan be bo jasin fɛ’n i titi. Ɔ wla jasin bofuɛ sɔ’m be fanngan ekun kɛ be yo “ninnge’m be bo bolɛ like” kɛ Biblu’n nun kannganlɛ’n sa’n, ɔ nin Ɲanmiɛn Ndɛ nun nianlɛ cɛn kwlaa’n, yɛ Biblu’n i akua nga be kanngan be nun’n be su angunndan bulɛ’n.
14. ?Wafa sɛ yɛ asɔnun kpɛnngbɛn akpasua kun kleli kɛ be bu junman nga be wiengu asɔnun kpɛnngbɛn kun di’n i like dan ɔn?
14 Asɔnun kpɛnngbɛn’m be afiɛn lɔ’n, maan be bu junman nga be wiengu asɔnun kpɛnngbɛn nga be ti oke’n be di’n, i like dan wie. Jose le afuɛ 70, kpɔkun ɔ ti asɔnun kpɛnngbɛn w’a cɛ kpa. Koko nga nun’n, be kpacili i nun. Kɛ m’ɔ yoman juejue ndɛndɛ’n ti’n, ɔ seli kɛ ɔ́ yáci asɔnun sunianfuɛ’m be lika siesiefuɛ junman’n, i dilɛ. Jose waan: “Nanwlɛ, like nga n wiengu asɔnun kpɛnngbɛn’m be yoli’n, ɔ boli min nuan dan. Kɛ ɔ yo naan be kplin ndɛ nga n kannin’n su’n, b’a yoman sɔ. Sanngɛ be kunndɛli wafa trele kun nga be kwla uka min naan m’an sua min asɔnun kpɛnngbɛn trɔ mun titi’n.” Ukalɛ mɔ asɔnun kpɛnngbɛn gbaflɛn kun ukali Jose’n ti’n, ɔ kwla dili asɔnun sunianfuɛ’m be lika siesiefuɛ junman’n i aklunjuɛ nun titi. Kpɔkun asɔnun’n ɲannin i sɔ’n su mmlusuɛ. I wiengu asɔnun kpɛnngbɛn’n kun seli kɛ: “Aniaan’m be klun jɔ asɔnun kpɛnngbɛn junman mɔ Jose di’n, i su kpa. Be klo i sa, kpɔkun i Ɲanmiɛn sulafilɛ’n nin ninnge nga ɔ si be’n ti’n, be ɲin yi i. Ɔ ti e asɔnun’n i nun aɲanbeun like.”
Maan e uka e wun
15. ?Ngue ti yɛ ɔ fata kɛ e nun sran oke’m be lika nianlɛ’n, ɔ yo Klistfuɛ’m be kwlaa be ndɛ’n niɔn?
15 Nán sran oke’m be mma mun nin asɔnun kpɛnngbɛn’m be ngunmin yɛ ɔ fata kɛ be nian sran oke’m be lika ɔ. Kɛ Pɔlu fá asɔnun’n súnnzun klɔ sran wunnɛn’n, ɔ seli kɛ: ‘Kɛ Ɲanmiɛn yili sran’n, i wunnɛn lemɛn i bue nuan, ɔ maan i lika nga be bumɛn i like fi’n, i yɛ ɔ lo Ɲanmiɛn kpa ɔ. Ɔ yoli i sɔ naan be wunnɛn m’ɔ ti wunmuan kun’n w’a kpacimɛn i wun bue, sanngɛ i lika’n kwlaa be uka be wun.’ (1 Korɛntfuɛ Mun 12:24, 25). Kɛ ɔ ko yo naan asɔnun’n w’a kaci wunmuan kun’n, ɔ fata kɛ i nunfuɛ mun ɔ nin sran oke mun, be wiengu ndɛ lo be naan be uka be wun.—Galasifuɛ Mun 6:2.
16. ?Kɛ e kɔ asɔnun aɲia’m be bo’n, wafa sɛ yɛ e kwla kle kɛ e niaan oke’m be ndɛ lo e ɔ?
16 Lika kpa kun nun mɔ e kwla kle kɛ e niaan oke’m be ndɛ lo e’n, yɛle asɔnun aɲia’m be bo lɔ (Filipfuɛ Mun 2:4; Ebre Mun 10:24, 25). ?Aɲia’m be bo lɔ’n, e fa blɛ e nin sran oke mun e koko yalɛ? Kannzɛ bɔbɔ blɛ sɔ’n nun e kwla usa be wafa nga be kplo’n nun yo be’n i su kosan’n, sanngɛ ‘Ɲanmiɛn wawɛ’n i like nga e ɲɛnnin i’n,’ e kwla yo maan be ɲan wie. ?Nɛ́n i ɔ? Yɛle kɛ e nin be e kwla koko like nga e yoli i laa nun’n, annzɛ Biblu’n nun ndɛ kun mɔ e buli su angunndan’n, be su yalɛ. Kɛ mɔ sran oke wie’m be kwlá nantiman ti’n, ɔ flunman kɛ e bɔbɔ yɛ e jaso e ko to be ɔ. Nán e minndɛ kɛ be bla be wa to e. Sɛ e niaan oke’n timan sa kpa’n, kɛ é íjɔ’n, maan e man e nɛn’n su, yɛ e ijɔ weinwein. Kpɔkun sɛ ɔ ti e ‘wun fanngan wlalɛ’n,’ maan e sie e su kpa sran oke’n i nuan bo.—Rɔmfuɛ Mun 1:11, 12.
17. ?Wafa sɛ yɛ e kwla kle kɛ Klistfuɛ oke nga be o be awlo lɔ mɔ be kwlá fiteman’n, be ndɛ lo e ɔ?
17 ?Sɛ sran oke’n kun kwla baman asɔnun aɲia’m be bo’n, ngue yɛ é kwlá yó ɔ? Zak 1:27 kle kɛ ‘aika mun nin angbeti mmla mun mɔ be wun ɲrɛnnɛn’n be lika nianlɛ’n’ ti e ti su trɔ. Glɛki aniɛn’n nun ndɛ mma nga be kacili i kɛ be “lika nianlɛ’n,” i bo tulɛ’n kun yɛle be “osu nianlɛ.” (Sa Nga Be Yoli’n 15:36). Kɛ e ko nian sran oke’m be osu’n, nanwlɛ, ɔ yo be fɛ dan! Kɛ afuɛ 65 nun, E Blɛ liɛ Nun’n (E.B.N), Pɔlu m’ɔ ti ‘oke’n’ ɔ o bisua nun Rɔmu lɔ’n, i ɲrun yoli i koun. I wla m’ɔ loli i wiengu junman difuɛ Timote dan ti’n, ɔ seli i kɛ: “Bo manndrɛn to min wa icra’n.” (Filemɔn 9; 2 Timote 1:3, 4; 4:9). Kannzɛ bɔbɔ sran oke’m be nunman bisua nun sakpasakpa’n, sanngɛ kɛ mɔ be timan juejue’n ti’n, wie’m be o be awlo lɔ be kwlá fiteman. I lɛ nun’n, ɔ ti kɛ be se kɛ: ‘Amun yaci, amun wa nian e osu icra’n.’ ?É tɛ́ be flɛlɛ sɔ’n su?
18. ?Sran oke’m be osu nianlɛ’n i nun mmlusuɛ’n yɛle mennin?
18 Nán maan e bu mmlusuɛ ng’ɔ o e niaan oke’m be osu nianlɛ nun’n, i like kaan. Kɛ Klistfuɛ nga be flɛ i Onezifɔr ɔ wɔli Rɔmu lɔ’n, ɔ ko niannin Pɔlu osu, ɔ ‘guɛli i awlɛn su nzue kpalɛ sunman.’ (2 Timote 1:16, 17). Aniaan bla oke kun waan: “Kɛ n wo gbaflɛn nin talua’m be afiɛn’n, ɔ yo n fɛ. Kɛ be yo min kɛ be awlo’n nunfuɛ sa’n, ɔ yo n fɛ kpa. I sɔ yolɛ’n wla min fanngan dan.” Aniaan bla oke kun ekun waan: “Kɛ sran kun klɛ min fluwa’n, annzɛ ɔ flɛ min telefɔnu nun mɔ e ijɔ bɔbɔ kpe kan sa’n, annzɛ ɔ wa nian min osu’n, ɔ jɔ n klun kpa. Ɔ ti kɛ b’a man min wunmiɛn uflɛ sa.”
Be nga be uka be wiengu’n, Zoova yra be su
19. ?Mmlusuɛ mennin yɛ be ɲɛn i sran oke’m be lika nianlɛ’n nun ɔn?
19 Mmlusuɛ kpanngban o sran oke’m be lika nianlɛ’n nun. Kɛ e fa e wun e mantan sran oke mun’n, mɔ be kan be laa sa mun, ɔ nin sa nga be si be’n, be ndɛ kle e’n, nanwlɛ, i sɔ’n ti e cenjele like. Sran lika nianfuɛ’n, ɔ di aklunjuɛ nga be ɲɛn i sran like manlɛ nun’n. Afin, like nga Biblu’n se kɛ sɛ be yo ɔ ti kpa’n, yɛ ɔ yoli ɔ (Sa Nga Be Yoli’n 20:35). Asa ekun’n, be nga be nian sran oke’m be lika’n, srɛ kunman be kɛ sɛ be bɔbɔ be yo oke’n, be su ɲanman sran nianman be lika wie. Ɲanmiɛn Ndɛ’n gua e awlɛn su nzue se kɛ: ‘Sran nga mɔ i klun ti ufue’n, ɔ ɲɛn i klun ufue sɔ’n i su nvasuɛ. Sran nga m’ɔ mɛn i wiengu nzue’n i kusu ɔ ɲan nzue nɔn.’—Nyanndra Mun 11:25.
20, 21. ?Wafa sɛ yɛ Zoova bu be nga be nian sran oke’m be lika’n niɔn? ?Yɛ ngue yɛ ɔ fata kɛ e fua kɛ é yó i titi ɔ?
20 Ba nga be sro Ɲanmiɛn’n, ɔ nin asɔnun sunianfuɛ mun, yɛ Klistfuɛ nga be tu be klun be nian be niaan Klistfuɛ oke’m be lika klolɛ su’n, Zoova yra be su. I sɔ ndɛ yɛ ɲranndra’m be fluwa’n kan ɔn. I waan: ‘Like nga sran kun fa cɛ yalɛfuɛ’n, ɔ ti kɛ Anannganman yɛ w’a fa mɛn i sa. Ɔ man Anannganman ɔ́ yó i mo.’ (Nyanndra Mun 19:17). Sɛ e yo yalɛfuɛ’n i ye klolɛ su’n, ye sɔ mɔ e yoli’n, ɔ ti kɛ Ɲanmiɛn yɛ y’a fa yo i sa. Ɔ maan, ɔ́ yó e mo. I sɔ kunngba’n, e niaan Klistfuɛ oke’m be nun sunman be ti ‘mɛn nga nun yalɛfuɛ mɔ sanngɛ be ti aɲanbeunfuɛ Ɲanmiɛn su mɔ be lafi’n ti.’ E niaan sɔ’m be lika mɔ e niɛn i klolɛ su ti’n, Ɲanmiɛn yó e mo wie.—Zak 2:5.
21 Mo nga Ɲanmiɛn yó’n, nanwlɛ, ɔ ti dan! I wie yɛle anannganman nguan’n. Zoova i sufuɛ’m be nun sunman bé ɲán anannganman nguan asiɛ’n su wa. Kpɔkun, fɔ m’ɔ o be nun mɔ i ti yɛ be yo oke’n, ɔ́ wíe. Ɔ maan Ɲanmiɛn i sufuɛ kpa nga be ti oke’n, bé ɲán be gbaflɛn nin talua blɛ nun wunmiɛn’n ekun (Sa Nglo Yilɛ 21:3-5). Kɛ é mínndɛ blɛ klanman sɔ’n, maan e niaan sran oke’m be lika nianlɛ m’ɔ ti e ti su trɔ’n, e suɛ i titi.
[Ja ngua lɛ ndɛ’n]
a Sɛ amún kúnndɛ wafa nga amun kwla nian amun si nin amun nin oke’m be lika’n, amun nian Réveillez-vous! 8 fevrier 1994 i bue 3-10 nun.
?Wafa sɛ yɛ amún tɛ́ su ɔ?
• ?Wafa sɛ yɛ ba’m be kwla bu be si nin be nin’m be sran ɔn?
• ?Wafa sɛ yɛ asɔnun kpɛnngbɛn’m be kwla kle kɛ be bu Ɲanmiɛn i bua fa’n i nun sran oke’m be sran ɔn?
• ?Ngue yɛ Klistfuɛ’m be tinuntinun be kwla yo naan b’a kle kɛ sran oke’m be ndɛ lo be ɔ?
• ?Mmlusuɛ nga be ɲɛn i Klistfuɛ oke’m be lika nianlɛ nun’n, yɛle mennin?
[Kuku, bue 13]
Kɛ be si nin be nin’m be sa mian ukalɛ wun’n
Kɛ afuɛ 1999 nun Filipu ɔ o Libelia lɔ ɔ́ dí Ɲanmiɛn Sielɛ Blɛ Sua kpanlɛ junman’n, be wa seli i kɛ i si’n i wunnɛn yo i ya kpa. Kɛ m’ɔ si kɛ i nin’n i kunngba ɔ kwlá niɛnmɛn i si lika’n ti’n, ɔ kplinnin su kɛ ɔ́ sɛ́ i sin be klɔ naan ɔ́ kó níɛn i si lika.
Kɛ Filipu ɔ́ kán i sin salɛ klɔ lɔ’n i ndɛ’n, ɔ seli kɛ: “Min sin salɛ ajalɛ’n i falɛ’n w’a yoman pɔpɔ. Sanngɛ, n buli angunndan kɛ min su trɔ klikli’n yɛle min si nin min nin be lika nianlɛ’n.” Afuɛ nsan ng’ɔ sinnin’n i nun’n, Filipu nin i si nin i nin be ko fali sua uflɛ. Kpɔkun, i niaan Klistfuɛ nga be o lika sɔ’n nun lɔ’n, be ukɛli i maan ninnge nga i si kwla miɛn i wun’n, be siesieli be sua’n nun be mɛnnin i.
Ɔ maan, Filipu i nin’n kwla niɛn i si’n su kpa siɛn’n. Koko nga nun’n, Filipu wa ɔli Maseduani lɔ Zoova i Lalofuɛ’m be Betɛli sua kplanlɛ’n i junman dilɛ.
[Kuku, bue 15]
Be wla w’a fimɛn i lika nianlɛ’n su
Ada ti e Australi (amun kɛnngɛn i kɛ Ɔstrali) lɔ aniaan bla kun, yɛ ɔ le afuɛ 85. Kɛ i wunnɛn ya’n ti w’a kwlɛmɛn i bo tu kun’n, asɔnun kpɛnngbɛn’m be siesieli i lika nianlɛ ajalɛ. Aniaan nga be kwla nian aniaan bla’n i lika’n, asɔnun kpɛnngbɛn’m be siesieli be akpasua kunngun. Aniaan’m be dili junman nga be fa mannin be’n i aklunjuɛ su. Yɛle kɛ, be nunnun aniaan bla’n i sua’n nun, be kpu i ninnge mun, be tɔn aliɛ be mɛn i, kpɔkun be ko di i gua’n be mɛn i.
Kɛ asɔnun kpɛnngbɛn’m be siesieli aniaan bla’n i lika nianlɛ sɔ’n, w’a di afuɛ 10. Lele m’ɔ́ fá jú andɛ’n, Zoova i Lalofuɛ yasua nin bla 30 tra su b’a uka Ada. Be ko niɛn i osu cɛn kwlaa. Be kanngan Biblu’n nin Biblu’n i akua’m be nun kle i. Sran nga asɔnun’n nun be su yo kpa Ɲanmiɛn ninnge’m be nun trá laa’n, be kan be ndɛ kle i. Kpɔkun, be nin i be srɛ Ɲanmiɛn tititi.
Asɔnun kpɛnngbɛn’m be nun kun waan: “Be nga be ko nian Ada lika’n, be yo i aklunjuɛ su. Be nun sunman be buli Ada i Zoova sulɛ tantrantan afuɛ kpanngban nun’n, i angunndan. Ɔ maan, ɔ timan su kɛ like nga Ada sa miɛn i wun’n, be wla fi su.”