Maan e ɲin yi e niaan oke mun

“Amun wun sran oke mun-ɔn, maan amun nyin yi be.”​—SAU. 19:32.

?AMÚN TƐ́ SU SƐ?

?Wafa sɛ yɛ Zoova bu i sufuɛ nanwlɛfuɛ nga b’a yo oke mun ɔn?

?Ngue yɛ ɔ fata kɛ ba’m be yo be man be si annzɛ be nin oke mun ɔn?

?Ngue yɛ asɔnun’n kwla yo naan w’a kle kɛ i ɲin yi i sran oke mun ɔn?

1. ?Sa benin yɛ ɔ o sran’m be su andɛ ɔ?

KƐ ZOOVA bó mɛn’n, w’a kunndɛman kɛ sran’m be wun ɲrɛnnɛn, be tɔ tukpacɛ yɛ be yo oke. Ɔ kunndɛli kɛ sran’m be tran asiɛ m’ɔ ti lika klanman’n su naan be yo juejue. Sanngɛ andɛ’n, “like nga Nyanmiɛn yili be’n, be kwlaa be oto, yɛ be wun nyrɛnnɛn.” (Rɔm. 8:22) Kɛ Ɲanmiɛn wun i sɔ liɛ’n, ɔ yo i ya kpa. Like ng’ɔ ti tɛ ekun’n yɛle kɛ, sran’m be nianman sran oke’m be lika. Kusu nn sran oke’m be kunndɛ kɛ be nian be lika.​—Jue. 39:6; 2 Tim. 3:3.

2. ?Ngue ti yɛ Klistfuɛ’m be klo be niaan oke mun kpa ɔ?

² E mɔ e ti Zoova i sufuɛ’n, e klo e asɔnun’m be nun sran oke mun kpa. Afin be kle e ngwlɛlɛ. Kpɛkun wafa nga be lafi Ɲanmiɛn su’n, e kunndɛ kɛ é láfi i su sɔ wie. Ɔ maan sɛ be ti e osufuɛ annzɛ be timan e osufuɛ o, e kunndɛ kɛ é nían be lika. (Gal. 6:10; 1 Piɛ. 1:22) Like suanlɛ nga nun’n, é wá wún wafa nga Ɲanmiɛn bu sran oke mun’n. Kpɛkun, wafa nga be osufuɛ mun nin asɔnun’n kwla nian be lika’n, é wún i wie.

“NÁN NIƐN I SƆ’N TI YI MIN BLO”

3, 4. (a) ?Ngue yɛ sran ng’ɔ toli Jue Mun 71 ɔ srɛli Zoova ɔ? (b) ?Ngue yɛ aniaan nga b’a yo oke’n be kwla srɛ Ɲanmiɛn ɔn?

³ Jue Mun 71:9 nun’n, jue tofuɛ’n seli kɛ: “Min yɛ m’an yo oke ndɛ yɛ, nán niɛn i sɔ’n ti yi min blo. Sɛ min fanngan’n wie min nun bɔbɔ’n, nán niɛn i sɔ’n ti yi min ase.” Davidi cɛ, yɛ ɔ kwla kannin ndɛ sɔ’n niɔn. Afin Jue Mun 71, ɔ sa Jue Mun 70 su. Yɛ Jue Mun 70 i su fitilɛ’n se kɛ: “Jue nga ti David liɛ.” Davidi tuli i klun suli Zoova i gbanflɛn nun lele. Zoova fɛli i yoli sa dandan wie mun. (1 Sam. 17:33-37, 50; 1 Fam. 2:1-3, 10) Kannzɛ w’a yo oke’n, ɔ srɛ Zoova kɛ nán ɔ yi i ase. Sanngɛ ɔ niɛn i lika titi.​—An kanngan Jue Mun 71:17, 18 nun.

⁴ Andɛ’n, aniaan sunman be ti kɛ Davidi sa. Yɛle kɛ b’a yo oke yɛ “nyrɛnnɛn blɛ’n” w’a ju be su. Sanngɛ, be te mian be ɲin su Ɲanmiɛn. (Aku. 12:1-7) Be nun wie’m be kwlá yoman ninnge mun kɛ nga be fa yo i laa’n sa. I wie yɛle kɛ, be kwlá boman jasin fɛ’n i kpa kun. Kɛ Davidi sa’n, be kwla srɛ Zoova kɛ nán ɔ yi be ase, naan ɔ nian be lika. Be srɛlɛ sɔ’n, be kwla lafi su kɛ Ɲanmiɛn tɛ́ su. Afin ndɛ kunngba’n yɛ kɛ Davidi srɛ́ Zoova’n, ɔ kannin ɔn.

5. ?Wafa sɛ yɛ Zoova bu i sufuɛ nanwlɛfuɛ oke mun ɔn?

⁵ Zoova kle weiin kɛ ɔ bu i sufuɛ nanwlɛfuɛ oke’m be sran. I sɔ wie yɛ ɔ kunndɛ kɛ i sufuɛ’m be kwlaa be yo ɔ. (Jue. 22:24-26; Nya. 16:31; 20:29) Saun Yolɛ 19:32 se kɛ: “Amun wun sran oke mun-ɔn, maan amun nyin yi be. Amun bu min sran titi. Min yɛ n ti Anannganman amun Nyanmiɛn nin-ɔn.” I nun nga bé klɛ́ ndɛ sɔ’n, Zoova bu sran oke’m be lika nianlɛ’n i like cinnjin kpa. Andɛ kusu’n, ɔ te bu i like cinnjin wie. ?Sanngɛ, wan yɛ ɔ fata kɛ ɔ nian sran oke’m be lika ɔ?

LIKE NGA SRAN OKE’N I OSUFUƐ’M BE KWLA YO’N

6. ?Siɛ nin niɛn’m be lika nianlɛ’n nun’n, ajalɛ kpa benin yɛ Zezi kleli ɔ?

⁶ Ɲanmiɛn Ndɛ’n se kɛ: “Bu ɔ si nin ɔ nin be sran.” (Tul. 20:12; Efɛ. 6:2) Zezi kleli kɛ mmla sɔ’n i su nantilɛ’n ti cinnjin kpa. Afin Farizifuɛ mun nin mmla klefuɛ mun mɔ be kunndɛman kɛ bé nían be si nin be nin’m be lika’n, ɔ buli be fɔ. (Mar. 7:5, 10-13) Kpɛkun, i bɔbɔ nantili mmla sɔ’n su. Yɛle kɛ, kɛ be boboli i waka’n su m’ɔ́ wá wú’n, ɔ fɛli i nin’n wlali i sɔnnzɔnfuɛ Zan i sa nun. I blɛ sɔ’n nun’n, nn atrɛkpa’n i nin’n ti angbeti.​—Zan 19:26, 27.

7. (a) ?Siɛ nin niɛn’m be lika nianlɛ’n i su ndɛ benin yɛ Pɔlu kannin ɔn? (b) ?Ngue ti yɛ Pɔlu klɛli ndɛ sɔ’n niɔn?

⁷ Fluwa klikli nga Pɔlu klɛli Timote’n i nun’n, ɔ kleli kɛ ɔ fata kɛ Klistfuɛ’m be nian be awlobo’m be lika. (An kanngan 1 Timote 5:4, 8, 16 nun.) Asɔnun nun’n, kɛ ɔ ko yo naan b’a wun sran ng’ɔ fata kɛ be niɛn i lika’n i wlɛ’n, i ti yɛ Ɲanmiɛn maan Pɔlu klɛli Timote i fluwa ɔ. Pɔlu kɛnnin i weiin kɛ sɛ angbeti bla kun le ba nin anunman mun’n, ba nin anunman sɔ mun annzɛ i osufuɛ mun yɛ ɔ fata kɛ be dun mmua niɛn i lika ɔ. I liɛ’n, be lika nianlɛ’n su tinman asɔnun’n su. Andɛ kusu’n, kɛ e mian e ɲin e nian e osufuɛ’m be lika’n, e kle kɛ e klo Ɲanmiɛn.

8. ?Ngue ti yɛ Biblu’n w’a kleman wafa trele ng’ɔ fata kɛ ba’m be nian be si nin be nin oke’m be lika’n niɔn?

⁸ Ndɛ nga Pɔlu kannin’n, ɔ kle kɛ ɔ fata kɛ ba’m be nian be si nin be nin oke’m be lika. Siɛ nin niɛn nga be ti ‘Klistfuɛ’n,’ be lika nianlɛ’n i ndɛ yɛ Pɔlu kannin ɔn. Sanngɛ, i sɔ’n kleman kɛ ba’m be ɲin kpa be si nin be nin nga be timan Klistfuɛ’n be su. Ajalɛ nga awlo kun i nunfuɛ’m be kwla fa naan b’a nian be si annzɛ be nin oke’n i lika’n, nɛ́n i kunngba’n yɛ awlo uflɛ nunfuɛ’m be kwla fa ɔ. Afin, ɔ le awlo kun nin i nun ndɛ. Yɛle kɛ sran oke wie’m be o lɛ’n, be le ba kunngba, sanngɛ wie’m be le ba kpanngban. Wie’m be liɛ’n, awa nian be lika. Sanngɛ wie’m be liɛ’n, ɔ timan sɔ. Asa ekun’n, ɔ le sran kun i like m’ɔ klo i ɔ. I kwlaa sɔ’n ti’n, ajalɛ nga awlo kun i nunfuɛ’m be fa naan b’a nian be sran oke’n i lika’n, ɔ fataman kɛ sran uflɛ kɛn i ndɛ tɛ. I sɔ yolɛ’n timan ngwlɛlɛ ayeliɛ. Yɛ ɔ kleman kɛ e klo e niaan mun. Ajalɛ kwlaa nga e fa naan é nían e osufuɛ oke’m be lika’n, sɛ ɔ taka Ɲanmiɛn Ndɛ’n su’n, Ɲanmiɛn yrá su. Kɛ nga Moizi blɛ su Ɲanmiɛn yoli’n sa’n, ɔ kwla yra ajalɛ nga e fa’n su wie.​—Kal. 11:23.

9-11. (a) ?Sa benin yɛ ɔ kwla mian aniaan wie’m be sa ɔ? (An nian foto ng’ɔ o kan like suanlɛ’n bo i bo lɛ’n.) (b) ?Ngue ti yɛ ɔ fataman kɛ Klistfuɛ kun kpli yaci i Ɲanmiɛn junman’n i dilɛ ɔ? An fa sa kun yiyi nun.

⁹ Kɛ ba’m be tranman be si nin be nin oke’m be wun koko’n, be lika nianlɛ’n kwla yo kekle. Ba’m be o lɔ kpɛkun wie liɛ’n, ngaliɛ w’a to be kɛ like yaya wie w’a yo be si annzɛ be nin oke’n. Wienun ɔn, ɔ tɔli yɛ i sa annzɛ i ja w’a bu. Kɛ ɔ ko yo sɔ’n, wie liɛ’n, ɔ fata kɛ be niɛn i lika le nɲɔn kun annzɛ kusu be niɛn i lika trilili.a

¹⁰ Be nga be ti blɛ kwlaa nun Ɲanmiɛn junman difuɛ’n, yɛ ɔ kwla yo kekle man be kpa ɔ. Wie’m be di junman Betɛli’m be nun. Wie mun ekun be ti ngaliɛ difuɛ, yɛ wie’m be ti akpasua sunianfuɛ annzɛ nvle sunianfuɛ. Be kwlakwla be klo be junman’n. Afin Zoova yɛ ɔ mannin be ɔ. Sanngɛ kɛ be ti i kɛ be si’n annzɛ be nin’n timan juejue’n, be kwla se kɛ bé yáci be junman’n i dilɛ naan bé kó níɛn i lika. Sɛ be yo sɔ’n, ɔ timan tɛ. Sanngɛ, ɔ fataman kɛ sran kun kpli yaci junman mɔ Zoova mɛnnin i’n i dilɛ. Ɔ fata kɛ ɔ usa nun kpa naan ɔ wun like nga i si’n, annzɛ i nin’n miɛn i wun sakpa’n i wlɛ. Afin atrɛkpa’n, tukpacɛ’n tinmɛn i su kekle sɔ liɛ. Wie liɛ kusu’n, i niaan Klistfuɛ wie’m be kwla se kɛ bé níɛn i lika. Ɔ maan, kwlaa naan sran kun w’a fa ajalɛ kɛ ɔ́ yáci i junman’n, ɔ fata kɛ ɔ fa sa’n wlɛ i srɛlɛ nun kpa.​—Nya. 21:5.

¹¹ I wie yɛle sran kun nin i niaan mɔ be ti blɛ kwlaa nun Ɲanmiɛn junman difuɛ’n be liɛ. Kun ti ngaliɛ difuɛ Amlɛnkɛn’m be akpasua’n i ngua lɔ lika’n nun. Yɛ kun di junman Zoova i Lalofuɛ’m be anuannzɛ’n i bo bia m’ɔ o Amlɛnkɛn’m be lɔ’n i nun. Be si nin be nin’n, be tran nvle nga be flɛ i Zapɔn’n i su lɔ. Cɛn kun’n, ba nɲɔn sɔ’m be tili i kɛ be si nin be nin oke’n, b’a mian ukalɛ wun kpa. Kɛ ɔ yoli sɔ’n, be nin be yi’m be ɔli ko niannin be osu naan bé nían like ng’ɔ fata kɛ be yo’n. Kɛ ngaliɛ difuɛ’n, ɔ nin i yi’n be buli i sin lele’n, be seli kɛ bé yáci be junman’n naan bé nían be si nin be nin oke’n, be lika. Kpɛkun cɛn kun’n, asɔnun kpɛnngbɛn’m b’a flɛ be telefɔnu nun. Be waan b’a koko be afiɛn yalɛ naan b’a fa ajalɛ kɛ asɔnun’n nían be si nin be nin’n be lika. Naan i ti’n, nán be se kɛ bé yáci be ngaliɛ difuɛ junman’n i dilɛ. Nanwlɛ, ajalɛ sɔ mɔ asɔnun kpɛnngbɛn’m be fali’n, ɔ yoli ba yasua nɲɔn’n ɔ nin be si nin be nin’n be fɛ dan.

12. ?Kɛ Klistfuɛ kun fá ajalɛ kɛ ɔ́ níɛn i si annzɛ i nin oke’n i lika’n, ngue yɛ ɔ fata kɛ ɔ bu i sin ɔn?

¹² Ajalɛ kwlaa nga Klistfuɛ kun klo kɛ ɔ́ fá naan ɔ́ níɛn i si annzɛ i nin oke’n i lika’n, ɔ kwla fa. Sanngɛ, ɔ fata kɛ ɔ bu i sin kpa naan w’a saciman Ɲanmiɛn dunman. E kunndɛman kɛ é yó kɛ Zezi blɛ su Zuifu’m be Ɲanmiɛn sulɛ wafa’n i kpɛnngbɛn mun sa. (Mat. 15:3-6) Afin e kloman kɛ sran fi kan e Ɲanmiɛn nin asɔnun’n be wun ndɛ tɛ.​—2 Kor. 6:3.

LIKE NGA ASƆNUN’N KWLA YO’N

13, 14. ?Ɲanmiɛn Ndɛ’n nun’n, ngue yɛ ɔ kle kɛ ɔ fata kɛ asɔnun’n nian aniaan oke’m be lika ɔ?

¹³ Ajalɛ nga asɔnun’n fɛli i kɛ ɔ́ súan ngaliɛ difuɛ’n i bo’n, nán asɔnun ngba yɛ ɔ kwla yo sɔ ɔ. Sanngɛ i kwlaa yoli o, Biblu’n kle kɛ ɔ fata kɛ asɔnun’m be nian aniaan oke’m be lika. Klistfuɛ klikli’m be blɛ su’n, Zerizalɛmu lɔ asɔnun nun’n, “be nun wie fi mian-man like fi wun.” Nán kɛ be kwlaa be ti aɲanbeunfuɛ ti ɔ. Sanngɛ like nga “sran kun sa miɛn i wun’n, ɔ ba, be fa mɛn i.” (Yol. 4:34, 35) Kɛ ɔ́ kɔ́ i ɲrun’n, sa kun wa juli. Yɛle kɛ ‘cɛn kwlaa kɛ bé cɛ́ aliɛ’n, be buman angbeti mmla wie’m be akunndan.’ I sɔ’n ti’n, akoto’m be kpali sran wie mɔ be ɲin w’a ti kpa’n. Kpɛkun, be fali angbeti bla’m be lika nianlɛ’n wlali be sa nun. (Yol. 6:1-5) Afuɛ nga be flɛ i 33 nun Pantekɔtu nun’n, sran’m be bali Zerizalɛmu cɛn dilɛ. Yɛ be nun kpanngban kpa be kacili Klistfuɛ. I sɔfuɛ’m be kali Zerizalɛmu lɛ naan bé tíe Ɲanmiɛn ndɛ’n. Kɛ ɔ ko yo naan be nun wie fi a mianman like’n, akoto’m be kpɛli aliɛ cɛlɛ’n i ba. Ajalɛ sɔ mɔ akoto’m be fali’n w’a kaman lɛ titi. Sanngɛ, i sɔ’n kle kɛ asɔnun’m be kwla fa ajalɛ wie mun naan b’a nian aniaan nga be leman wie’n be lika.

¹⁴ Fluwa nga Pɔlu klɛli Timote’n i nun’n, ɔ kannin angbeti bla ng’ɔ fata kɛ asɔnun’n nian be lika’n be ndɛ. (1 Tim. 5:3-16) Zezi i sɔnnzɔnfuɛ Zaki kusu seli kɛ, ɔ fata kɛ Klistfuɛ’m be nian aika ba nin angbeti bla mun, ɔ nin be kwlaa nga be leman wie’n be lika. (Zak 1:27; 2:15-17) Akoto Zan liɛ’n, ɔ seli kɛ: “?Sɛ sran kun ti anyanbeunfuɛ b’ɔ wun i niaan wie bɔ i sa a mian’n, b’ɔ ti-mɛn i wun nyanman nun’n, nzu yɛ ɔ kle kɛ ɔ klo Nyanmiɛn nin-ɔn?” (1 Zan 3:17) Sɛ ɔ fata kɛ Klistfuɛ’m be tinuntinun be nian be nga be leman wie’n be lika’n, nán asɔnun’n yɛ ɔ su yoman sɔ wie ɔ.

15. ?Ngue ti yɛ ajalɛ nga be kwla fa nian sran oke’m be lika’n, ɔ kwlá yoman kun lika kwlaa ɔ?

¹⁵ Nvle wie’m be nun’n, awa nian sran oke’m be lika. (Rɔm. 13:6) Nvle wie’m be nun kusu’n, ɔ timan sɔ. Ɔ maan ajalɛ nga sran kun annzɛ asɔnun kun kwla fa naan w’a niɛn i sran oke’m be lika’n, nɛ́n i kunngba’n yɛ be kwla fɛ i lika uflɛ ɔ. Wie liɛ’n, aniaan oke’n i wa’n tran lika uflɛ mmua. Kɛ ɔ yo sɔ’n, i lika nianlɛ’n kwla yo kekle man ba’n. I lɛ nun’n, ɔ fata kɛ ba’n nin asɔnun kpɛnngbɛn nga be o i si annzɛ i nin oke’n i asɔnun’n nun’n be koko yalɛ tikatika naan b’a kwla niɛn i lika kpa. I wie yɛle kɛ, sɛ ɔ fata kɛ sran oke’n yo ninnge wie mun naan awa w’a kwla niɛn i lika’n, asɔnun kpɛnngbɛn’m be kwla ukɛ i. Wie liɛ ekun’n, sɛ be klɛli i fluwa naan w’a kannganman nun, annzɛ be klɛli i ayre naan w’a nɔnman’n, be kwla bo su kle i wa’n. Sɛ ba’n nin asɔnun kpɛnngbɛn’m be ti be wun aniɛn’n, bé kwlá nían sran oke’n i lika kpa. Nanwlɛ, kɛ ba’m be tran lika mmua mɔ asɔnun’n uka be naan b’a nian be si annzɛ be nin oke’n i lika’n, be wun sa’m be trawlɛ. Ɔ maan be wla gua ase.

16. ?Ajalɛ kpa benin yɛ aniaan wie’m be fali naan b’a nian sran oke’m be lika ɔ?

¹⁶ Klistfuɛ’m be klo be niaan nga b’a yo oke mun kpa. I sɔ’n ti’n, aniaan wie’m be yo like kwlaa nga be kwla yo naan b’a nian sran oke sɔ’m be lika’n. Be nian be lika kɛ be bɔbɔ be awlofuɛ sa. Asɔnun wie’m be nun’n, aniaan wie’m be siesie be wun naan sran oke’n i lika nianlɛ’n w’a to be, w’a to be. Atrɛkpa’n aniaan sɔ’m be kwlá yoman blɛ kwlaa nun Ɲanmiɛn junman difuɛ. Sanngɛ kɛ be uka ba mun naan b’a nian be sran oke’n i lika’n, ɔ yo be fɛ. Afin kɛ be yo sɔ’n, ba sɔ’m be kwla di be blɛ kwlaa nun Ɲanmiɛn junman’n i titi. Nanwlɛ, aniaan nga be yo sɔ’n be kle ajalɛ kpa. Sanngɛ, ɔ fataman kɛ ba’m be niɛn i sɔ’n ti naan be ɲin kpa be sran oke’n i su.

MAAN E WLA SRAN OKE’M BE FANNGAN

17, 18. ?Ngue yɛ sran oke’n, ɔ nin i lika nianfuɛ’n be kwla yo naan w’a yo pɔpɔ w’a man be ɔ?

¹⁷ Kɛ sran oke mun nin sran ng’ɔ nian be lika’n be sa sin bubuman be’n, be wun sa’m be trawlɛ. Kpɛnngbɛn’n ti’n, wie liɛ’n, sran oke’m be sa sin bubu be annzɛ be wla bo be wun. I sɔ’n ti, sɛ e nian sran oke lika’n, nán e yo i kpokokpoko. Sanngɛ maan e nin i e koko yalɛ, e wlɛ i fanngan. E niaan sɔ mɔ be suli Zoova klanman lele b’a fa yo oke’n, be nin mo yolɛ fata. Zoova wla fiman junman nga be di be mɛnnin i’n su. E kusu’n, nán e wla fi su.​—An kanngan Malasi 3:16, ɔ nin Ebre Mun 6:10 be nun.

¹⁸ Sran oke’m be lika nianlɛ’n leman ba. Sanngɛ, sɛ be nin sran ng’ɔ nian be lika’n be fa sa wie mun yo aɲinsuɛ’n, ɔ́ yó pɔpɔ mán be. (Aku. 3:1, 4) Sran oke sunman be mianmianman be lika nianfuɛ’n. Afin be wun i wlɛ kɛ sɛ be like yolɛ yoman ya’n, be lika nianlɛ’n yó pɔpɔ. Kpɛkun, sran’m bé nían be osu kpa. Kɛ aniaan’m be kɔ sran oke wie osu nianlɛ’n, kpɛ sunman be se kɛ: “N ɔli aniaan oke’n i fanngan wlalɛ, sanngɛ min yɛ ɔ wlali min fanngan ɔn.”​—Nya. 15:13; 17:22.

19. ?Ngue yɛ ɔ kwla uka ba mun nin sran oke mun naan b’a jran sa ng’ɔ o be su’n i ɲrun kekle ɔ?

¹⁹ Cɛn wie lele’n, fɔ’n su tranman sran’m be nun kun. Yɛ oke yolɛ’n nin i su afɛ’n be su tranman lɛ kun. Sanngɛ lele nin i kɛ blɛ sɔ’n jú’n, ɔ fata kɛ e ɲin tran like kpa nga Ɲanmiɛn seli kɛ ɔ́ fá mán e’n i su titi. Ɲanmiɛn su mɔ e lafi’n ti’n, e jran sa nga be tɔ e su’n be ɲrun kekle. Nanwlɛ, “e sa sin bubu-man ye. Kannzɛ e wunnɛn ng’ɔ o yɛ’n ɔ saci’n, like nga bɔ maan be flɛ [e] sran’n, cɛn kwlaa Nyanmiɛn bo i mɔnnɛn.” (2 Kor. 4:16-18; Ebr. 6:18, 19) ?Sanngɛ, ngue ekun yɛ sran oke’m be lika nianfuɛ’m be kwla yo naan b’a nian be sran’n i lika kpa ɔ? Like suanlɛ ng’ɔ́ bá lɛ’n wá kán ninnge wie mɔ be kwla yo’n, be ndɛ.

[Ja ngua lɛ ndɛ’n]