Sran oke nga be su Zoova’n, ɔ nian be lika klanman

‘Ɲanmiɛn yoman sa m’ɔ timɛn i su’n, i wla fiman junman nga an dili nin klolɛ nga an fa klo i’n su.’—EBR. 6:10.

1, 2. (a) ?Kɛ e wun sran mɔ i timuɛn’n w’a fɛn fitafita’n, ngue yɛ e wla kwla kpɛn su ɔ? (b) ?Wafa sɛ yɛ Zoova bu sran oke mun ɔn?

AOLIA nun sa kun mɔ Zoova fa kleli Daniɛli’n i nun’n, Zoova seli kɛ i bɔbɔ i timuɛn’n ti ufue. Daniɛli waan: ‘N te nian, kpɛkun ń wún i ɔ, b’a siesie famiɛn bia mun. Kpɛkun sran oke kun wa trannin ase su. I wun tralɛ’n fɛn fitafita kɛ jese fɔkɔ sa, yɛ i timuɛn’n ti ufue kɛ bua ndrɛ mɔ like fi sannganman nun’n sa.’ (Dan. 7:9) ?Kɛ asɔnun’m be nun’n e wun sran oke mɔ be timuɛn’n fɛn fitafita’n, e wla kpɛnman Daniɛli i ndɛ sɔ’n su?

² Kɛ Daniɛli seli kɛ Ɲanmiɛn i timuɛn’n ti ufue’n, naan be flɛ i ‘Sran Oke’n,’ i sɔ’n kle kɛ Zoova si ngwlɛlɛ tra e kpɛ blu. Ɔ maan, ɔ fata kɛ e ɲin yi i kpa. ?Sanngɛ, Zoova m’ɔ ti Sran Oke’n, i sufuɛ nanwlɛfuɛ mɔ be su i w’a cɛ’n, wafa sɛ yɛ ɔ bu be ɔ? Ɲanmiɛn bɔbɔ tɛ kosan sɔ’n su kɛ: “Be ti je’n ti kɛ famiɛn kle sa, afin nguan tɛnndɛn’n ti sran kpa’m be nvasuɛ.” (Nya. 16:31) Ɔ maan, sɛ aniaan kun w’a su Ɲanmiɛn nanwlɛ su lele naan i ti w’a bo je’n, Ɲanmiɛn ɲrun’n, like klanman yɛle i sɔ’n. ?Sanngɛ, wafa nga Ɲanmiɛn fa bu sran kpɛnngbɛn mun’n, i sɔ yɛ e bu be wie ɔ?

Sa nga ti yɛ be ti e nanndoliɛ sran’n

3. ?Ngue ti yɛ sran oke’m be ti e nanndoliɛ sran ɔn?

³ E niaan sɔ mɔ be ti w’a bo je’n, wie’m be ti e Ɲrun dinfuɛ’m be anuannzɛ’n i nunfuɛ, wie’m be ti akpasua annzɛ nvle sunianfuɛ laa, annzɛ be te di i sɔ junman’n. Wie mun ekun be ti juejue su atin bofuɛ. Kpɛkun, be nun wie’m be ti jasin bofuɛ w’a cɛ. Be su Ɲanmiɛn ndɛnman su e asɔnun’m be nun. Atrɛkpa’n, amun si be nun wie mɔ be bo jasin fɛ’n nán andɛ sa’n, mɔ be ajalɛ kpa’n ukali gbanflɛn nin talua mun naan b’a kaci’n. Aniaan oke wie’m be dili junman cinnjin kpa anuannzɛ’n nun. Yɛ jasin fɛ’n ti be trali be awlɛn ɲrɛnnɛn’n nun. Junman nga be dili i laa’n nin nga be te di i andɛ’n, ɔ yo Zoova nin ‘sran kpa nanwlɛfuɛ m’ɔ si ngwlɛlɛ’n’ be fɛ kpa.—Mat. 24:45.

4. ?Ngue ti yɛ ɔ fata kɛ e ɲin yi e niaan kpɛnngbɛn mun naan e srɛ Ɲanmiɛn man be ɔ?

⁴ E awlɛn su sran sɔ mɔ be te su Zoova’n, ɔ fata kɛ e yo be mo naan e ɲin yi be. I kpa’n, mmla nga Zoova fa mannin Moizi i nun’n, Zoova kleli kɛ sɛ e ɲin yiman sran oke mun’n, nn e ɲin yimɛn i bɔbɔ’n. (Sau. 19:32) Ɔ fata kɛ e srɛ Ɲanmiɛn titi naan ɔ nian be lika. Yɛ be junman mɔ klolɛ mɔ be klo Ɲanmiɛn nin sran’n ti be di’n i ti’n, ɔ fata kɛ e la Ɲanmiɛn ase. Be mɔ akoto Pɔlu nin be dili junman’n, i kpɛnngbɛn o, i bakan o, ɔ srɛli Ɲanmiɛn mannin be.—An kanngan 1 Tɛsalonikfuɛ Mun 1:2, 3 nun.

5. ?Kɛ e fa e wun mantan sran kpɛnngbɛn mɔ be su Zoova’n, mmlusuɛ benin yɛ e ɲɛn i ɔ?

⁵ Asa ekun’n, sɛ e fa e wun mantan sran oke mɔ be o asɔnun’n nun’n, ɔ yo e kwlakwla e ye. Afin sran oke’m be suannin ninnge kpakpa kpanngban mɛn’n nun. Be suannin be awlɛn tralɛ, kpɛkun be suannin wafa nga be kwla tu be klun yo sran ye’n. Ɔ maan, kɛ be kle sran’m be ngwlɛlɛ’n, ɔ man sran oke’m be aklunjuɛ. (Jue. 71:18) Sran oke’m be nuan nun ndɛ’n ti kɛ nzue m’ɔ o asiɛ’n i bo lɔ’n sa. Be nga be ti ngwlɛlɛfuɛ mɔ be ko usa be ngwlɛlɛ afɛ’n, ɔ ti kɛ be su sa nzue sɔ’n m’ɔ o asiɛ’n i bo lɔ’n sa.—Nya. 18:4.

6. ?Wafa sɛ yɛ e kwla kle sran oke’m be kɛ be ti e cinnjin sakpa ɔ?

⁶ ?Amun kan kle sran kpɛnngbɛn’m be kɛ an klo be kɛ Zoova fa klo be’n sa? Yɛle kɛ e kwla kan kle be kɛ Ɲanmiɛn mɔ be su i nanwlɛ su ti’n, e klo be. Yɛ maan e kan kle be kɛ be ndɛ nga be kan’n ti e cinnjin. Asa ekun’n, sɛ e fa ndɛ nga be kan’n su’n, be kwla wun i kɛ e ɲin yi be sakpa. Andɛ nin andɛ’n asɔnun nun sran kpɛnngbɛn kpanngban be ɲin te kpɛn afɔtuɛ kpakpa nga sran oke’m be mannin be’n su. Wafa nga kɛ be fali afɔtuɛ sɔ’n su’n, ɔ ukali be’n, be wla nin a fiman su wie.a

Maan e kle kɛ e klo be

7. ?Wan mun yɛ Zoova fa sran oke’m be lika nianlɛ’n wlali be sa nun ɔn?

⁷ Ɲanmiɛn fali sran oke’m be lika nianlɛ’n wlali be osufuɛ’m be sa nun. (An kanngan 1 Timote 5:4, 8 nun.) Kɛ awlobofuɛ’m be nian nun be di junman sɔ’n, mɔ be kle kɛ be si nin be nin oke’m be lika nianlɛ’n ti be cinnjin kɛ be fa nian be bɔbɔ be lika sa’n, nanwlɛ ɔ yo Zoova fɛ kpa. Be ɲin mɔ be mian di junman sɔ’n ti’n, Zoova suan awlobo sɔ’n i nunfuɛ’m be bo, kpɛkun ɔ ra be su.b

8. ?Ngue ti yɛ ɔ fata kɛ asɔnun’n i nunfuɛ’m be uka aniaan oke mun ɔn?

⁸ Aniaan oke wie’m be o lɛ’n, be sa mian ukalɛ wun, sanngɛ be leman be awlobofuɛ m’ɔ su Zoova naan w’a nian be lika ɔ. Ɔ maan kɛ asɔnunfuɛ’m be nian be lika’n, ɔ yo Zoova fɛ wie. (1 Tim. 5:3, 5, 9, 10) I sɔ yolɛ’n kle kɛ be ‘klo be wiengu kɛ be niaan sa, be si i aunnvuɛ.’ (1 Piɛ. 3:8) Kɛ asɔnun’n nun sran oke’m be lika nianlɛ’n ti asɔnunfuɛ’m be nnana sɔ’n, ɔ ti kɛ ndɛ nga Pɔlu kannin’n i su yɛ be nanti ɔ. I waan: ‘Sɛ e lika kun yo e ya’n, kpɛkun e wunnɛn’n kwlaa yo e ya.’ (1 Kor. 12:26) Kɛ e si e niaan kpɛnngbɛn’m be aunnvuɛ mɔ e uka be sɔ’n, ɔ kle kɛ e nanti Pɔlu i afɔtuɛ nga su. I waan: ‘Sɛ an wun amun niaan kun mɔ i trɔ’n su ti i’n, an ukɛ i. Sɛ an yo i sɔ’n, nn amun a wie Klist mmla’n su fa.’—Gal. 6:2.

9. ?Afɛ benin yɛ ɔ o sran kpɛnngbɛn’m be su ɔ?

⁹ ?Afɛ benin yɛ ɔ o aniaan oke’m be su ɔ? Aniaan oke’m be fɛ ndɛndɛ kpa. Wie liɛ’n, ninnge cinnjin kɛ dɔɔtrɔ kɔlɛ sa’n, ɔ nin ninnge tɛkɛtɛkɛ kɛ nzue kalɛ tualɛ nin alapɔsu fluwa’m be falɛ’n, nin sua nun nunnunlɛ’n, nin aliɛ tɔnlɛ’n kwla yo kekle man be. Kɛ sran oke’m bé yó kpɛnngbɛn kɔ́’n, awe nin nzue wue kunman be kɛ laa’n sa kun. Ɔ maan be kwla bu i kɛ like kan nga be di’n, ɔ ju be, sanngɛ nn nɛ́n i su ɔ. I kunngba’n yɛle Biblu’n nun ninnge suanlɛ’n nin aɲia’m be bo kɔlɛ’n. Sran oke’m be wunman ase kpa, yɛ be timan sa kpa kun. I sɔ’n ti’n, asɔnun aɲia’m be bo lɔ’n, be kwlá nianman fluwa nun, annzɛ be timan ndɛ nga be kan’n kpa. I li kɛ ɔ yo naan be siesie be wun naan b’a wɔ aɲia’m be bo’n, ɔ ti kekle kpa man be. ?Ɔ maan, ngue yɛ e kwla yo e man be ɔ?

Wafa nga e kwla uka be’n

10. ?Ngue like yɛ asɔnun kpɛnngbɛn’m be kwla yo naan like fi w’a mianman sran oke mun ɔn?

¹⁰ Asɔnun kpanngban nun’n, be nian sran oke’m be su klanman. E niaan klun ufuefuɛ wie’m be ko di sran oke’m be gua’n, be tɔn be like mun kpɛkun be nunnun be sua’m be nun man be. Biblu’n nun like suanlɛ nun o, annzɛ kɛ ɔ ko yo naan b’a kwla siesie be wun naan b’a ɔ asɔnun aɲia’m be bo’n nin o, annzɛ jasin fɛ’n i bolɛ’n nun o, aniaan’m be uka be i kwlaa sɔ’n nun. Aniaan nga be te le wunmiɛn’n be ko sunman sran oke mun naan b’a fa loto b’a ɔ aɲia’m be bo. Sɛ be kwlá tuman be bo’n, be fa aɲia’n i kasɛti su kpɛkun be fa blɛ be naan be tie. Sɛ asɔnun kpɛnngbɛn’m be ɲɛn i wun alaje’n, be fa ajalɛ naan like fi w’a mianman sran oke mun asɔnun’n nun.c

11. An kan wafa nga awlobo kun nunfuɛ’m be ukali aniaan oke kun’n i ndɛ.

¹¹ Klistfuɛ’m be tinuntinun be kwla yo aklunye. Kɛ aniaan kpɛnngbɛn kun i yi’n sacili’n, i kunngba i sika liɛ’n nga awa tuɛ i’n kwlá tuɛmɛn i sua’n i kalɛ kun. Sanngɛ i nun mɔ i yi’n i ɲin o su’n, be kleli siɛ kun nin niɛn kun nin be wa talua nɲɔn’n be Biblu’n nun like. Awlobofuɛ sɔ’m be sua’n ti dan kpa. Ɔ maan be mannin aniaan’n i sua ba nɲɔn kɛ ɔ tran be wun lɛ. Be nin i be trannin aniaan tranlɛ. Be niɛnnin i lika lele afuɛ 15. Ɔ ɲannin afuɛ 89 naan w’a wu. Aniaan oke’n i ninnge ng’ɔ si be lele’n, ɔ nin i Ɲanmiɛn sulafilɛ tankaan’n, ɔ ukali awlobo sɔ’n i nunfuɛ mun kpa. Awlobo sɔ’n i nunfuɛ’m be te la Ɲanmiɛn ase, tranlɛ mɔ be ɲɛnnin i wun atin be nin aniaan oke’n be trannin klanman’n ti. Ukalɛ mɔ be ukali sran kun m’ɔ ti Zezi i sɔnnzɔnfuɛ kɛ be sa’n ti’n, be ‘mo yolɛ’n su kaman mlɔnmlɔn.’—Mat. 10:42.d

12. ?Ngue like yɛ e kwla yo naan y’a kle kɛ e klo e niaan mɔ b’a yo oke’n mun ɔn?

¹² Atrɛkpa’n, e leman alaje e ukaman sran oke kun kɛ nga awlobo sɔ’n i nunfuɛ’m be yoli’n sa. Sanngɛ, e kwla uka be naan b’a siesie be wun b’a ɔ asɔnun aɲia’m be bo, annzɛ naan b’a kwla bo jasin fɛ’n. Sɛ é kɔ́ lika wie é kó yíyí e ɲin su kan’n, e kwla flɛ be. E kwla ko nian be osu. Sɛ be wunnɛn yo be ya’n, annzɛ be kwlá tuman be bo’n, i lɛ nun li yɛ ɔ ti cinnjin kpa kɛ e ko nian be osu ɔ. Asa ekun’n, kɛ mɔ be ti sran kpɛnngbɛn ti’n, ɔ fata kɛ e bu be sran. Sɛ be te wun sa wlɛ’n, sɛ é yó like wie é mán be’n, ɔ fata kɛ e usa be naan be kan wafa nga be klo kɛ e yo like sɔ’n. Kannzɛ be wunman sa wlɛ kun’n, sanngɛ sɛ sran’m be ɲin yiman be’n, be wun i wlɛ kpa.

Zoova i wla su fiman junman nga amun dili’n su

13. ?Ngue ti yɛ ɔ ti cinnjin kɛ e bu sran oke’m be sran ɔn?

¹³ Ɔ ti cinnjin kpa kɛ e bu sran oke’m be sran. Ɔ ju blɛ wie’n, sran oke’m be wla bo be wun, afin ninnge nga be kwlɛ i yo laa’n, be leman wunmiɛn be yomɛn i kun. I wie yɛle aniaan bla kun m’ɔ suli Zoova juejue su lele afuɛ ko ju 50 i liɛ’n. Ɔ yoli titi atin bofuɛ laa. Siɛn’n, tukpacɛ wie m’ɔ wa yoli i’n ti’n, asɔnun aɲia’m be bo kɔlɛ’n ti kekle mɛn i. Kɛ ɔ buli junman ng’ɔ dili i asɔnun’n nun laa’n i akunndan m’ɔ niannin wafa nga siɛn’n, ɔ kwlɛmɛn i wun kan kun’n, ɔ sunnin. Kɛ ɔ kɛnnin i ti’n ase’n, i ɲinmuɛn nzue’n buli sa pɔɔ. Kpɛkun ɔ seli kɛ: “N kwlaman like fi yo kun.”

14. ?Wafa sɛ yɛ ndɛ ng’ɔ o jue’m be nun’n, ɔ kwla fɔnvɔ sran oke mun ɔn?

¹⁴ ?Sɛ amun ti sran oke’n, kɛ ɔ yo amun sɔ wie ɔ? ?Ɔ ju blɛ wie’n, amun bu i kɛ Zoova w’a yi amun ase? Kɛ famiɛn Davidi yoli kpɛnngbɛn’n, ɔ buli i sɔ wie, afin ɔ srɛli Zoova kɛ: ‘Ee Ɲanmiɛn, siɛn’n mɔ m’an yo oke mɔ min ti’n w’a bo je yɛ’n, nán yi min ase.’ (Jue. 71:9, 18) E si kɛ Zoova w’a yiman Davidi m’ɔ klɛli jue sɔ’n i ase, yɛ kusu ɔ su yiman amun ase wie. Jue uflɛ kun mɔ Davidi toli’n, i nun’n ɔ kleli kɛ ɔ fɛ i wla’n gua Zoova su. (An kanngan Jue Mun 68:20 nun.) I sɔ’n ti’n, sɛ amun ti sran oke naan amun suli Zoova nanwlɛ su’n, maan amun si weiin kɛ Zoova nin amun o nun naan aliɛ ba blu nin nso nun’n, ɔ́ súan amun bo.

15. ?Ngue yɛ ɔ kwla uka sran oke mun naan be akunndan’n w’a yo kpa titi ɔ?

¹⁵ Junman nga amun mɔ an ti sran oke’n amun dili i laa’n nin nga amun te di i Zoova dunman nun’n, Zoova wla su fiman su le. Ɲanmiɛn Ndɛ’n se kɛ: ‘Ɲanmiɛn yoman sa m’ɔ timɛn i su’n, i wla fiman junman nga an dili nin klolɛ nga an fa klo i’n su.’ (Ebr. 6:10) Ɔ maan, nán an bu akunndan tɛ. Nán maan amun bu i kɛ oke mɔ amun a yo’n ti’n, amun bɔnman like fi kun. An yaci akunndan wafa sɔ’n i bulɛ. Sanngɛ ninnge nga Zoova yo mannin amun laa’n nin ng’ɔ́ wá yó be cɛn wie lele’n ti’n, maan amun klun jɔ! Ɲanmiɛn m’ɔ yili e’n, ɔ kunndɛ kɛ ‘e ɲrun atin’n yo weiin.’ (Zer. 29:11, 12; Yol. 17:31; 1 Tim. 6:19) Maan amun bu ninnge nga Ɲanmiɛn waan ɔ́ fá mán amun be akunndan. Nán maan amun sa sin bubu amun naan amun bu i kɛ kpɛnngbɛn mɔ amun a yo ti’n amun kwlaman like fi yo kun. Yɛ nán maan amun bu i le kɛ amun yoman like fi asɔnun’n nun!e

16. ?Ngue ti yɛ aniaan kpɛnngbɛn kun buli i kɛ ɔ fata kɛ ɔ yaci asɔnun kpɛnngbɛn yolɛ ɔ? ?Yɛ wafa sɛ yɛ asɔnun kpɛnngbɛn onga’m be wlɛli i fanngan ɔn?

¹⁶ Amun e fa aniaan bian kun m’ɔ le afuɛ 80 i ndɛ’n e nian. Be flɛ i Johan. I yi Sannie suli Zoova nanwlɛ su. Sanngɛ siɛn’n, bla’n kwlɛmɛn i wun kan kun ti’n Johan niɛn i lika sa trilili.f Sɛ ɔ́ kɔ́ asɔnun aɲia’m be bo’n, aniaan bla’m be kacikaci be wun yɛ be nian Sannie su ɔ. Sanngɛ koko nga nun’n, Johan wa fɛli dan. I sɔ’n ti’n, ɔ buli i kɛ ɔ su kwlá yoman asɔnun kpɛnngbɛn kun. I waan: “?Ngue ti yɛ n te yo asɔnun kpɛnngbɛn ɔn? Afin n si kɛ n diman asɔnun kpɛnngbɛn junman kun.” Kɛ ɔ́ yó sɔ’n, nn i ɲinmuɛn’n bú. Asɔnun kpɛnngbɛn onga’m be seli i kɛ, kɛ ɔ ti asɔnun kpɛnngbɛn’n, ngwlɛlɛ ng’ɔ si i’n, ɔ uka be kpa liɛ su. Be wlɛli i fanngan kɛ kannzɛ ɔ kwlaman like kaka yo kun’n, sanngɛ nán maan ɔ yaci asɔnun kpɛnngbɛn yolɛ. Aniaan’n fali afɔtuɛ’n su. I sɔ’n yoli asɔnun nunfuɛ’m be kwlaa be ye.

Zoova nian amun lika

17. ?Ngue ndɛ yɛ Biblu’n kan kle sran oke mun ɔn?

¹⁷ Ɲanmiɛn Ndɛ’n kle kɛ kannzɛ kpɛnngbɛn yolɛ’n i su afɛ’n wo sran oke’m be su’n, sanngɛ be kɔ be ɲrun titi i sulɛ’n nun. Jue tofuɛ’n seli kɛ: ‘Be ti kɛ waka mɔ b’a ta be Anannganman i awlo’n nun’n sa. Kannzɛ bé yó kpɛnngbɛn o, be te su mma, nzue te o be nun, yɛ be te yo mlanmlanmlan.’ (Jue. 92:14, 15) Akoto Pɔlu mɔ atrɛkpa’n, ɔ wunnin i kplo nun afɛ’n, ɔ seli kɛ ‘kannzɛ i wunnɛn ng’ɔ o yɛ’n ɔ saci’n, sanngɛ i sa sin bubumɛn i.’—An kanngan 2 Korɛntfuɛ Mun 4:16-18 nun.

18. ?Ngue ti yɛ ɔ fata kɛ e uka sran oke nin be nga be nian be lika’n mun ɔn?

¹⁸ E blɛ liɛ nun’n sa kpanngban kle kɛ sran oke’m be “te su mma.” Kannzɛ bɔbɔ sɛ sran oke’m be le sran nian be lika’n, sanngɛ kpɛnngbɛn yolɛ’n nin i sin tukpacɛ’n kwla bo be wla. Be nga be nian kpɛnngbɛn’m be lika’n be kusu be kwla fɛ wie. Ɔ maan, ɔ ti asɔnunfuɛ’m be cenjele like nin be trɔ. Yɛle kɛ ɔ fata kɛ be aeliɛ’n kle kɛ be klo sran oke nin be nga be nian be su mun. (Gal. 6:10) Kɛ e yo sɔ’n, e seman be kɛ ‘maan amun ɲan tannin kla, yɛ maan amun ku yi,’ sanngɛ nn e ukaman be.—Zak 2:15-17.

19. ?Ngue su yɛ Ɲanmiɛn i sufuɛ kpa’m be kwla lafi ɔ?

¹⁹ Kpɛnngbɛn yolɛ’n ti’n, ɔ le ninnge wie mun mɔ amun kwlá yomɛn i kun ɔn. Sanngɛ nɛ́n i sɔ’n ti yɛ Zoova yáci amun klolɛ ɔ. Zoova klo i sufuɛ nanwlɛfuɛ mun kpa liɛ su. Ɔ maan, ɔ su yiman amun ase le. (Jue. 37:28; Eza. 46:4) Zoova súan amun bo, ɔ́ klé amun atin tititi.—Jue. 48:15.

[Ja ngua lɛ ndɛ mun]

?Wafa sɛ yɛ amún tɛ́ kosan’m be su ɔ?

• ?Ngue ti yɛ Klistfuɛ mɔ be suli Ɲanmiɛn nanwlɛ su’n be ti e nanndoliɛ sran ɔn?

• ?Wafa sɛ yɛ e kwla kle kɛ e ɲin yi Klistfuɛ mɔ b’a yo oke’n naan e klo be ɔ?

• ?Ngue yɛ ɔ kwla uka sran oke mun naan be akunndan’n w’a yo kpa ɔ?

[Foto, bue 23]

Asɔnunfuɛ’m be bu sran oke’m be sran.