Fluwa’n nun kannganfuɛ’m be kosan mun

?Yɔbuɛ paplaapla nɲɔn’n be ngunmin cɛ yɛ be o Ɲanmiɛn i alaka’n nun, annzɛ ninnge uflɛ’m be o nun?

Afuɛ 1026 nun naan y’a ju Zezi blɛ su’n, kɛ bé yí Ɲanmiɛn i sua’n mɔ Salomɔn kplannin’n i nglo’n, nn ‘like ng’ɔ o alaka nun yɛle yɔbuɛ paplaapla nɲɔn nga Moizi fali be sieli nun Orɛbu lɔ’n. Be ngunmin cɛ yɛ be o nun ɔn. Kɛ be fin Ezipti mɛn’n nun fiteli’n yɛ Anannganman fali yɔbuɛ paplaapla sɔ mun mannin be ɔ. I blɛ sɔ’n nun yɛ Anannganman nin be trali aenguɛ’n niɔn.’ (2 Be Nyoliɛ 5:10) Sanngɛ, nán yɔbuɛ sɔ’m be ngunmin yɛ be kali alaka’n nun titi ɔ.

‘Kɛ Izraɛlifuɛ’m be tuli Ezipti lɔ’n, be anglo nsan su’n,’ be juli Sinai aawlɛ flɛnnɛn’n nun. (Ezipt Lɔ Tulɛ 19:1, 2) I sin’n, Moizi fuli Sinai oka’n su lɔ. Kpɔkun Ɲanmiɛn klɛli mmla yɔbuɛ paplaapla nɲɔn su fa mɛnnin i. Moizi waan: ‘N fin oka’n su lɔ n jrali naan m’an fa yɔbuɛ paplaapla nɲɔn mun m’an sie be alaka’n nun. Be kali alaka’n nun lɛ kɛ Anannganman kan kleli min’n sa.’ (Mmla’n 10:5) Alaka sɔ’n, ɔ timan like m’ɔ́ ká lɛ titi ɔ. (Mmla’n 10:1) Sanngɛ lele nin kɛ é fá jú afuɛ 1513 nun naan y’a ju Zezi blɛ su’n i awieliɛ’n, nn be nin a yoman Ɲanmiɛn i alaka m’ɔ́ ká lɛ titi’n.

Kɛ Izraɛlifuɛ’m be tuli Ezipti lɔ mɔ be juli aawlɛ flɛnnɛn nun’n, aliɛ ti be plannin. I sɔ’n ti’n, Zoova tali be nin mani. (Ezipt Lɔ Tulɛ 12:17, 18; 16:1-5) Kɛ ɔ yoli sɔ’n, Moizi seli Aarɔn kɛ: ‘Fa sɛma conjronjo kun naan fa mani’n i cɛn kun dilɛ liɛ’n fa gua nun. Fa sie i Ɲanmiɛn ɲrun kɛ ɔ́ yó naan mani’n wie w’a ka lɛ naan amun mma nin amun anunman’m b’a kwla wun i’n ti. Aarɔn yoli i kɛ Anannganman kan kleli Moizi’n sa. Ɔ jinnin sɛma’n nin i nun mani’n Anannganman i alaka’n i ɲrun lɛ, naan ɔ́ ká lɛ titi.’ (Ezipt Lɔ Tulɛ 16:33, 34) Kannzɛ bɔbɔ Aarɔn fali mani’n guɛli i sɛma’n nun’n, sanngɛ ɔ fa sieli i Ɲanmiɛn i ɲrun lɛ lele ka naan Moizi w’a wie Ɲanmiɛn i alaka’n yo naan w’a fa yɔbuɛ paplaapla nɲɔn mɔ mmla klɛ be su’n w’a sie nun.

Afuɛ 1513 nun naan y’a ju Zezi blɛ su’n i awieliɛ’n nun’n, yɛ be yoli Ɲanmiɛn i alaka’n niɔn. Kpɔkun kɛ Kɔre nin i minniɛn’m be yoli ɲin kekle Ɲanmiɛn su’n, Ɲanmiɛn maan be fali Aarɔn i kpɔnman’n sieli i Alaka’n nun. Kalɛ 17:25 waan: ‘Anannganman seli Moizi ekun kɛ: “Fa Aarɔn i kpɔnman liɛ’n sa ɔ sin, fa ko sie i min alaka’n i wun lɔ. Maan be fa sie i lɛ naan kɛ Izraɛlifuɛ’m be wun i’n, bé wla kpɛ́n su kɛ be ɲin ti kekle. Kɛ a ko yo i sɔ’n, kpɔkun be ijɔlɛ tɛtɛ nga be ijɔ min’n ɔ́ wíe, yɛ be su wuman kun.”’ I blɛ sɔ nun’n, nn ninnge kwlaa nga Akoto Pɔlu kannin be ndɛ’n be o alaka’n nun. I waan: ‘Sika ɔkwlɛ sɛma’n mɔ mani’n wo nun’n, nin Aarɔn kpɔnman m’ɔ fɛfɛli’n, ɔ nin yɔbuɛ paplaapla mɔ be klɛ aenguɛ nga Ɲanmiɛn waan ɔ nin sran’m bé trá be su’n, be wo alaka sɔ’n nun.’—Ebre Mun 9:4.

Afuɛ 40 nga Izraɛlifuɛ’m be dili i aawlɛ flɛnnɛn’n nun lɔ’n, mani yɛ Ɲanmiɛn fa tali be ɔ. Sanngɛ kɛ be juli mɛn mɔ Ɲanmiɛn seli kɛ ɔ́ fá mán be’n i nun lɔ mɔ ‘be dili Kanaan mɛn’n nun lɔ like’n,’ Ɲanmiɛn yacili be mani manlɛ. (Zozie 5:11, 12) Be fali Aarɔn i kpɔnman’n sieli i alaka’n nun naan i liɛ’n, Izraɛlifuɛ’m bé wla kpɛ́n su kɛ be ɲin ti kekle. I sɔ’n kle kɛ blɛ kwlaa nga be dili i aawlɛ flɛnnɛn’n nun lɔ’n, alaka’n i wun lɛ yɛ Aarɔn i kpɔnman kali ɔ. Ɔ maan e kwla se kɛ, kɛ Izraɛlifuɛ’m be juli mɛn nga Ɲanmiɛn seli kɛ ɔ́ fá mán be’n i nun lɔ’n, lele m’ɔ́ é fá jú Ɲanmiɛn i sua mɔ Salomɔn kplannin’n i nglo yilɛ nun’n, be yili Aarɔn i kpɔnman’n nin sika ɔkwlɛ sɛma’n mɔ mani o nun’n mɔ be o alaka’n nun’n.