Asɔnun kpɛnngbɛn mɔ be ‘yo sa ng’ɔ ti kpa’n mɔ maan bua fa’n nian su’n’
‘An nian Ɲanmiɛn i bua fa m’ɔ fa be mannin amun’n be lika. An yo i kɛ Ɲanmiɛn klo kɛ an yo’n sa. An tu amun klun yo. An yo sa ng’ɔ ti kpa’n maan be nian su.’—1 PIƐR 5:2, 3.
1, 2. (a) ?Junman mennin yɛ Zezi fa mannin Piɛli ɔ? ?Ngue ti yɛ Zezi w’a lafiman Piɛli su ngbɛn ɔn? (b) ?Wafa sɛ yɛ Zoova bu sran ng’ɔ sieli be kɛ be niɛn i bua’m be lika’n niɔn?
KA NAAN afuɛ 33 nun Klistfuɛ klikli’m be blɛ su Pantekɔtu’n w’a ju’n, cɛn kun Piɛli nin i wiengu nsiɛn mɔ be ti Zezi i sɔnnzɔnfuɛ’n, be nin Zezi be trannin aliɛ kun mɔ Zezi bɔbɔ tɔnnin’n, i sin Galile fɛtɛ’n i nuan lɛ. Kɛ Ɲanmiɛn cɛnnin Zezi’n, Piɛli w’a dun mmua wun i le. Ɔ maan, i sɔ’n yoli i fɛ kpa liɛ su. Sanngɛ kusu’n, srɛ kan kunnin i wie. Afin ka naan b’a kun Zezi’n, Piɛli kɛnnin i sran’m be ɲrun kɛ ɔ simɛn i. (Lik 22:55-60; 24:34; Zan 18:25-27; 21:1-14) I lɛ nun’n, ɔ kleli kɛ ɔ lafiman Zezi su. Sanngɛ i sin’n, ɔ wa yoli Piɛli i nsisɔ dan. I sɔ’n ti’n, Zezi w’a ijɔmɛn i. I kpa bɔbɔ’n, ɔ mannin Piɛli i junman nanndoliɛ kun. Ɔ seli Piɛli kɛ ɔ niɛn i “bua mma’m be lika.” (Zan 21:15-17) Sa nga Klistfuɛ klikli’m be yoli mɔ Biblu’n kɛn i ndɛ’n, ɔ kle kɛ Zezi w’a lafiman Piɛli su ngbɛn. Afin, kɛ lika’n yoli kekle Klistfuɛ’m be su’n, mɔ asɔnun’n kusu trɛ́’n, Piɛli nin i wiengu akoto mun nin Zerizalɛmu lɔ kpɛnngbɛn’m be tuli ajalɛ be sinnin asɔnun’m be su, be niannin be lika.—Sa Nga Be Yoli’n 1:15-26; 2:14; 15:6-9.
2 Andɛ kusu’n, Zoova maan Zezi Klist sieli sran wie mun kɛ blɛ kekle kpa nga nun’n, be niɛn i bua’m be lika. (Efɛzfuɛ Mun 4:11, 12; 2 Timote 3:1) ?Zoova lafili sran sɔ’m be su ngbɛn? Cɛcɛ. Wafa nga mɛn wunmuan’n nun Klistfuɛ’m be di alaje’n, ɔ kle kɛ w’a lafiman be su ngbɛn. Kɛ Piɛli sa’n, sran sɔ’m be fɔn wie. (Galasifuɛ Mun 2:11-14; Zak 3:2) Ɔ nin i sɔ ngba’n, Zoova sie be kɛ be niɛn ‘i asɔnun’n m’ɔ fɛ i bɔbɔ wa’n toli’n,’ i lika. (Sa Nga Be Yoli’n 20:28) Zoova klo sran sɔ mun kpa. Kpɔkun, i waan ‘maan be bu be sran yɛ be yo be mo dan.’—1 Timote 5:17.
3. ?Ngue yɛ asɔnun kpɛnngbɛn’m be yo naan titi’n, b’a di be junman’n be klunklo su nin juejue su ɔ?
3 ?Ngue yɛ asɔnun kpɛnngbɛn’m be yo naan titi’n, b’a di be junman’n be klunklo su nin juejue su, naan bua fa’n w’a nian su ɔ? Kɛ nga Piɛli nin i wiengu’m be blɛ su be fa yoli’n sa’n, Klistfuɛ nga Ɲanmiɛn sieli be asɔnun kpɛnngbɛn’n be lafi Ɲanmiɛn i wawɛ’n su. Ɔ maan, be ɲan wunmiɛn be di junman nga Ɲanmiɛn fa man be’n. (2 Korɛntfuɛ Mun 4:7) Asa ekun’n, Ɲanmiɛn wawɛ’n yo maan be klo Ɲanmiɛn nin sran, be klun jɔ, be wla gua ase, be tra be awlɛn, be yo sran ye, be yo aklunye, be di nanwlɛ, be yo wɛtɛɛ, yɛ be yo sa i nuan su. (Galasifuɛ Mun 5:22, 23) Kɛ bé nían Ɲanmiɛn i bua fa’n i lika’n, wafa nga be kwla yi nzuɛn kpa sɔ’m be nglo naan bua’m b’a nian su’n, amun e fa ajalɛ trele wie mun naan e nian.
Be klo bua fa’n, kpɔkun be klo bua mun be tinuntinun
4, 5. (a) ?Ngue yɛ Zoova nin Zezi be yo m’ɔ kle kɛ be klo bua fa’n niɔn? (b) ?Ninnge mennin wie mun yɛ asɔnun kpɛnngbɛn’m be yo m’ɔ kle kɛ be klo Ɲanmiɛn i bua fa’n niɔn?
4 Sa nga Ɲanmiɛn wawɛ’n maan sran yo’n, be nun dan kpafuɛ’n yɛle sran klolɛ’n. Kɛ Zoova níɛn i sufuɛ’m be kwlaa be lika kɛ bua tafuɛ’n fa niɛn i bua fa’n i lika’n sa’n, ɔ yi klolɛ’n i nglo. (Ezai 65:13, 14; Matie 24:45-47) Asa ekun’n, ɔ klo be be tinuntinun. (1 Piɛr 5:6, 7) Zezi kusu klo bua fa’n wie. Afin ɔ si bua mun be tinuntinun, ɔ fa be “dunman’n flɛflɛ be.” Kpɔkun, bua’m be ti’n, ɔ fɛ i wun mannin.—Zan 10:3, 14-16.
5 Asɔnun kpɛnngbɛn’m be nian Zoova nin Zezi be ajalɛ’n su. Yɛle kɛ ‘be fa like klelɛ’n yo be junman’ asɔnun’n nun. Nzra nun ijɔlɛ nga be man’n, ɔ uka asɔnunfuɛ mun kpɔkun ɔ sasa be. Junman sɔ mɔ be tu be klun di’n, ɔ yo sran’m be kwlaa be ɲrun. (1 Timote 4:13, 16) Sanngɛ junman kpanngban wie ekun mɔ be di’n, sran ngba wunman nun. I wie yɛle kɛ, be fa blɛ be yia asɔnun’n i nun rapɔru’m be nuan, be klɛ fluwa mun, yɛ be siesie asɔnun aɲia mun. Kpɔkun, be di junman tɛkɛtɛkɛ wie mun ekun naan asɔnun aɲia nin ninnge uflɛ wie mun ekun’n, b’a yo be “kwlaa i nuan su sɛsɛsɛ.” (1 Korɛntfuɛ Mun 14:40) Junman kwlaa sɔ mɔ be di’n, e wunmɛn i ngba nun naan y’a yo be mo. Nanwlɛ, be di be junman’n i klolɛ su.—Galasifuɛ Mun 5:13.
6, 7. (a) ?Ajalɛ kpa mennin yɛ asɔnun kpɛnngbɛn’m be kwla fa naan b’a si Ɲanmiɛn i bua fa’n i kpa ɔ? (b) ?Ngue ti yɛ ɔ ti kpa kɛ e kan sa ng’ɔ o e su’n i ndɛ e kle asɔnun kpɛnngbɛn mun ɔn?
6 Asɔnun kpɛnngbɛn mɔ be ti bua tafuɛ kpa’n, be kle kɛ be niaan’m be ndɛ lo be be tinuntinun. (Filipfuɛ Mun 2:4) Ajalɛ kun nga be fa naan b’a si be niaan mun kpa’n, yɛle kɛ be nin be bo jasin fɛ’n be tinuntinun. Zezi nin i sɔnnzɔnfuɛ’m be boli jasin fɛ’n likawlɛ, kpɔkun ɔ fɛli i sɔ blɛ’n wlali be fanngan. (Lik 8:1) Asɔnun kpɛnngbɛn kun m’ɔ yo sɔ wie titi’n, ɔ seli kɛ: “N wunnin kɛ ajalɛ kpa kun nga n kwla fa naan m’an si aniaan bian kun, annzɛ aniaan bla kun naan m’an ukɛ i’n, yɛle kɛ e nin i e bo jasin fɛ’n likawlɛ.” Sɛ amun nin asɔnun kpɛnngbɛn kun be boli jasin fɛ’n likawlɛ w’a cɛ’n, naan amun siesie amun wun be fɛ i sɔ ajalɛ’n, ɔ ti kpa.
7 Kɛ mɔ Zezi kloli i sɔnnzɔnfuɛ mun’n ti’n, ɔ dili sa ng’ɔ man be aklunjuɛ’n i su aklunjuɛ wie. Kpɔkun sɛ sa ɲan be’n, ɔ suan be bo. Amun e fa sunnzun ase kun. Kɛ i sɔnnzɔnfuɛ 70 be ɔli jasin fɛ’n bolɛ mɔ bé bá be klun ti jɔwa’n, Zezi “klun jɔli dan kpa” wie. (Lik 10:17-21) Sanngɛ, kɛ Lazali sacili mɔ i niaan bla Mali nin i awlofuɛ’m bé sún’n, “Zezi sunnin” wie. (Zan 11:33-35) Andɛ kusu’n, kɛ sa ɲan asɔnunfuɛ kun’n, asɔnun kpɛnngbɛn’m be suɛn i bo. Klolɛ mɔ be klo be niaan mun’n ti’n, ‘sɛ sran kun i klun jɔ’n, ɔ yo be fɛ,’ kpɔkun ‘sɛ sran kun sún’n, ɔ yo be annvɔ.’ (Rɔmfuɛ Mun 12:15) I sɔ’n ti’n, sɛ sa kun jɔ amun klun’n, annzɛ ɔ yo amun ya’n, amun bo su kle asɔnun kpɛnngbɛn mun. Afin, kɛ be wun kɛ amun klun ti jɔwa’n, i sɔ’n wla be fanngan. (Rɔmfuɛ Mun 1:11, 12) Sɛ kusu afɛ yɛ ɔ o amun su’n, be kwla uka amun yɛ be fɔnvɔ amun.—1 Tɛsalonikfuɛ Mun 1:6; 3:1-3.
8, 9. (a) ?Wafa sɛ yɛ asɔnun kpɛnngbɛn kun kleli kɛ ɔ klo i yi’n niɔn? (b) ?Ngue ti yɛ ɔ ti cinnjin kpa kɛ asɔnun kpɛnngbɛn kun klo i bɔbɔ i awlo’n niɔn?
8 Sɛ asɔnun kpɛnngbɛn kun klo Ɲanmiɛn i bua fa’n, bé wún i sɔ liɛ’n wafa ng’ɔ niɛn i bɔbɔ i awlo’n i lika’n, i nun. (1 Timote 3:1, 4) Sɛ ɔ le bla naan ɔ klo i yi’n naan ɔ bu i sran’n, be nga be le bla’n bé níɛn i ajalɛ’n su wie. (Efɛzfuɛ Mun 5:25; 1 Piɛr 3:7) Linda ti Klistfuɛ, yɛ i wun yoli asɔnun kpɛnngbɛn lele afuɛ 20 trali su naan w’a saci. Amun nian ndɛ nga Linda kannin’n. I waan: “Cɛn kwlaa min wun’n i sa o asɔnun junman’n nun. Sanngɛ, ɔ bu min sran. Kɛ i sa nunman junman nun’n, ɔ nin min tran koko yalɛ, yɛ ɔ yo min mo. I sɔ m’ɔ yo’n ti’n, n si kɛ ɔ klo min. Ɔ maan kɛ ɔ́ dí i asɔnun junman’n, ɔ yoman min ya.”
9 Sɛ asɔnun kpɛnngbɛn kun le ba’n, wafa ng’ɔ tu be fɔ’n, mɔ ninnge kanngan be su bɔbɔ’n ɔ yo be mo’n, siɛ uflɛ’m be kwla nian su wie. (Efɛzfuɛ Mun 6:4) Nanwlɛ, kɛ asɔnun kpɛnngbɛn kun klo i awlofuɛ mun titi’n, ɔ kle kɛ i su mɔ Ɲanmiɛn lafili mɔ i ti yɛ ɔ sieli i asɔnun kpɛnngbɛn’n, w’a lafiman su ngbɛn.—1 Timote 3:4, 5.
Yalɛ kokolɛ’n man aklunjuɛ nin alaje
10. (a) ?Ngue yɛ ɔ kwla yo maan aklunjuɛ nin alaje’n be tu asɔnun’n nun ɔn? (b) ?Ngue sa yɛ Klistfuɛ klikli’m be blɛ su’n, ɔ kpɛli ndɛnngan asɔnun’m be nun ɔn? ?Yɛ wafa sɛ yɛ be kpɛli ndɛ sɔ’n nun ɔn?
10 Ɲanmiɛn wawɛ’n kwla yo maan Klistfuɛ’m be tinuntinun be di aklunjuɛ nin alaje. Asa ekun’n, ɔ kwla yo maan aklunjuɛ nin alaje tran asɔnun kpɛnngbɛn’m be afiɛn, ɔ nin asɔnun’n nun. Sanngɛ sɛ asɔnunfuɛ’m be nin be wiengu b’a tuman be klun b’a kokoman yalɛ’n, i sɔ’n kwlá yoman ye. Famiɛn Salomɔn seli kɛ: ‘Like nga bé yó ɔ be usaman ngwlɛlɛ afɛ’n, ɔ kpɛnman su.’ (Nyanndra Mun 15:22) Yɛle kɛ, kɛ e bu e wiengu’n i sran mɔ e nin i e koko yalɛ kpa sakpa’n, i sɔ’n man aklunjuɛ nin alaje. Amun e fa sunnzun ase kun. Kɛ Klistfuɛ klikli’m be blɛ su klɛn wlalɛ ndɛ’n tɔli’n, kpɛnngbɛn mɔ be o Zerizalɛmu lɔ’n be yiali be srɛli Ɲanmiɛn kɛ ɔ fɛ i wawɛ’n kle be atin ng’ɔ fata kɛ be fa’n. Asa ekun’n, be dili ndɛ sɔ’n. Kpɔkun, kɛ sran kun kɛnnin i ndɛ liɛ’n mɔ be sili akplowa lele’n, be nuan sɛli ajalɛ kun su. Kɛ be kannin ajalɛ mɔ be nuan sɛli su’n kleli asɔnun mun’n, aniaan’m be ‘klun jɔli be wla m’ɔ guali ase’n ti.’ (Sa Nga Be Yoli’n 15: 6-23, 25, 31; 16:4, 5) Ɔ maan, be dili aklunjuɛ nin alaje.
11. ?Wafa sɛ yɛ asɔnun kpɛnngbɛn’m be kwla yo naan aklunjuɛ nin alaje w’a tran asɔnun’n nun ɔn?
11 Andɛ kusu’n, kɛ asɔnun kpɛnngbɛn’m be nin be wiengu’m be koko yalɛ kpa’n, i sɔ’n man aklunjuɛ nin alaje asɔnun’n nun. Kɛ ndɛnngan tɔ asɔnun’n nun’n, be yia kpɔkun sran kun kan wafa ng’ɔ fa wun ndɛ’n. Kɛ ɔ́ yó sɔ’n, be sie be su kpa be wiengu asɔnun kpɛnngbɛn ng’ɔ su ijɔ’n, i nuan bo. (Nyanndra Mun 13:10; 18:13) Kɛ be ko srɛ Ɲanmiɛn kɛ ɔ fɛ i wawɛ’n uka be’n, ajalɛ kwlaa nga bé fá’n, be nian Biblu’n nin i akua nga ‘sran kpa nanwlɛfuɛ m’ɔ si ngwlɛlɛ’n’ yili be’n be nun naan b’a fa be. (Matie 24:45-47; 1 Korɛntfuɛ Mun 4:6) Ɔ maan kannzɛ ajalɛ nga be fali’n ɔ timan be nun kun liɛ’n su’n, sanngɛ be kwlaa be nanti su, Ɲanmiɛn i wawɛ’n m’ɔ sie be’n ti. Wun ase kanlɛ wafa sɔ’n, ɔ man aklunjuɛ nin alaje. Kpɔkun kɛ asɔnunfuɛ’m be onga’n be nin Ɲanmiɛn bé nánti’n, be kwla nian be ajalɛ kpa sɔ’n su. (Mise 6:8) ?Ajalɛ nga asɔnun kpɛnngbɛn’m be nian Biblu’n nun be fa’n, amun kan amun wun ase be nanti su?
Be tra be awlɛn kpɔkun be yo sran ye
12. ?Ngue ti yɛ Zezi trɛli i awlɛn kpɔkun ɔ yoli i akoto’m be ye ɔ?
12 Zezi i akoto’m be fɔnnin kpɛ sunman. Sanngɛ, Zezi trɛli i awlɛn be wun kpɔkun ɔ yoli be ye titi. I wie yɛle kɛ, ɔ seli be titi kɛ be yo wun ase kanfuɛ. (Matie 18:1-4; 20:25-27) Kɔnguɛ kasiɛn nga Zezi nin i sɔnnzɔnfuɛ’m be trannin’n, ɔ wunnzinnin be ja naan be si kɛ ɔ fata kɛ be yo wun ase kanfuɛ. Sanngɛ kɛ ɔ wieli be afɔtuɛ sɔ’n i man cɛ’n, ‘akplowa kun tɔli be afiɛn kɛ bé wún be nun sran nga be bu i sran tra be kwlaa’n.’ (Lik 22:24; Zan 13:1-5) ?Ɔ nin i sɔ ngba’n, Zezi fali be wun ya? Cɛcɛ, ɔ nin be kokoli yalɛ amanniɛn su. Ɔ seli be kɛ: “?Sran ng’ɔ ti aliɛ sin’n, ɔ nin sran ng’ɔ isa aliɛ’n, be nun onin yɛ ɔ ti dan ɔn? ?Nán sran ng’ɔ ti aliɛ’n sin yɛ ɔ ti dan ɔn? Sanngɛ n liɛ’n, n wo amun afiɛn kɛ junman difuɛ sa.” (Lik 22:27) Zezi i awlɛn tralɛ’n, ɔ nin i sran ye yolɛ’n, ɔ wluwluli akoto’m be wun.
13, 14. ?Blɛ mennin nun yɛ ɔ ti cinnjin kpa kɛ asɔnun kpɛnngbɛn’m be yo sran ye ɔ?
13 I sɔ kunngba’n, kɛ sran kun kacimɛn i nzuɛn’n, asɔnun kpɛnngbɛn kun kwla tu i fɔ titi. Wie liɛ’n, sran sɔ’n kwla fɔkɔ asɔnun kpɛnngbɛn’n i awlɛn. Sanngɛ, kɛ asɔnun kpɛnngbɛn’n si kɛ i bɔbɔ’n fɔn wie’n ti’n, kɛ ɔ́ ‘tú sran ng’ɔ yo sa sukusuku’n i fɔ’n,’ ɔ trɛ i awlɛn. Kpɔkun, ɔ yo i niaan’n i ye kɛ nga Zoova nin Zezi be fa yo asɔnun wunmuan’n i ye’n sa.—1 Tɛsalonikfuɛ Mun 5:14; Zak 2:13.
14 Sanngɛ wie liɛ’n, kɛ sran kun yo sa tɛ kpa’n, asɔnun kpɛnngbɛn’m be kwla tu i fɔ kekle. Sɛ sran’n tieman afɔtuɛ mɔ be mɛn i’n naan w’a kaci i nzuɛn’n, be tu i asɔnun’n nun. (1 Korɛntfuɛ Mun 5:11-13) Sanngɛ kɛ asɔnun kpɛnngbɛn’m bé yó sɔ bɔbɔ’n, be kle kɛ be kpɔman sran’n, naan sa tɛ m’ɔ yoli’n yɛ be kpɔ i ɔ. (Zid 23) Wafa nga blɛ sɔ’n nun be yo sran’n i ye’n, ɔ kwla ukɛ i maan ɔ sɛ i sin asɔnun’n nun ekun.—Lik 15:11-24.
Ɲanmiɛn sulafilɛ’n maan be yo sa ng’ɔ ti kpa’n
15. ?Wafa nga asɔnun kpɛnngbɛn’m be nian Zoova i sran ye yolɛ’n su’n, i nun kun yɛle mennin? ?Yɛ ngue ti yɛ be yo sɔ ɔ?
15 Kannzɛ bɔbɔ sran wie’m be siman ye’n, sanngɛ “Anannganman ti kpa man sran’m be kwlakwla.” (Jue Mun 145:9; Matie 5:45) Wafa dan kpa kun nga Zoova kle kɛ ɔ yo sran’m be kwlakwla be kpa’n, yɛle kɛ ɔ sunmɛn i sufuɛ mun naan be ‘kan Ɲanmiɛn sielɛ’n i jasin fɛ’n’ kle be. (Matie 24:14) Kɛ asɔnun kpɛnngbɛn’m be fa junman sɔ’n i nun ta’n, be yi Ɲanmiɛn i sran ye yolɛ’n i nglo. ?Sanngɛ, ngue ti yɛ be mian be ɲin be yo sɔ ɔ? ?Nán Zoova nin sa ng’ɔ seli kɛ ɔ́ yó be mɔ be lafi su’n, i ti ɔ?—Rɔmfuɛ Mun 10:10, 13, 14.
16. ?Wafa sɛ yɛ asɔnun kpɛnngbɛn’m be kwla ‘yo be niaan’m be ye’ ɔ?
16 Asɔnun kpɛnngbɛn’m be bo jasin fɛ’n be ‘yo sran’m be kwlakwla be ye.’ Sanngɛ be ‘dun mmua yo i sɔ man be niaan nga be nin be lafi Klist su’n.’ (Galasifuɛ Mun 6:10) Wafa kun nga be yo i sɔ liɛ’n, yɛle kɛ be ko nian be niaan’m be osu be wla be fanngan. Asɔnun kpɛnngbɛn kun seli kɛ: “Min niaan’m be osu nianlɛ’n yo n fɛ kpa. N fɛ i sɔ blɛ’n yo be mo, be ɲin mɔ be mian’n ti. Kpɔkun, n uka be naan be si kɛ e bu be junman mɔ be di’n i like dan.” Wie liɛ’n, asɔnun kpɛnngbɛn’m be kwla kle sran kun i wafa ng’ɔ kwla yo naan w’a su Zoova kpa’n. I sɔ yɛ akoto Pɔlu yoli ɔ. Ɔ seli Tɛsalonikfuɛ mun kɛ: ‘E Min’n maan e lafi amun su kɛ amún yó like nga e se amun kɛ an yo’n, yɛ an su yacimɛn i yolɛ.’ (2 Tɛsalonikfuɛ Mun 3:4) Sɛ asɔnun kpɛnngbɛn’m be nian akoto Pɔlu i ajalɛ’n su’n, ɔ ti kpa. Afin i sɔ’n wla aniaan’m be fanngan. Ɔ maan kɛ be se kɛ maan be ‘ɲin yi be kpɛnngbɛn mun’n,’ ɔ timan kekle be sa nun. (Ebre Mun 13:17) ?Kɛ asɔnun kpɛnngbɛn’m be nian amun osu be wla amun fanngan’n, amun kle kɛ i sɔ’n jɔ amun klun?
Ɔ fata kɛ be tra be awlɛn naan be yo wɛtɛɛfuɛ
17. ?Afɔtuɛ mennin yɛ Zezi i ayeliɛ’n mannin Piɛli ɔ?
17 Kɛ be klɔklɔli Zezi’n, ɔ yoli wɛtɛɛfuɛ. (Matie 11:29) I nun mɔ be yili i mannin mɔ sran’m bé trɛ́ i’n, ɔ yoli wɛtɛɛfuɛ, kpɔkun ɔ trɛli i awlɛn kekle kpa. Piɛli m’ɔ o lɛ’n, ɔ cuɛnnin i tokofi’n ndɛndɛ kpa naan ɔ́ fá kún. Sanngɛ Zezi seli i kɛ: ‘?A bui kɛ n kwlá flɛman n Si kɛ ɔ blɛ min anzi mɔ be tra akpi fa blu nin nɲɔn icra’n?’ (Matie 26:51-53; Zan 18:10) Piɛli i wla w’a fiman afɔtuɛ sɔ mɔ Zezi i ayeliɛ’n mɛnnin i’n su. Ɔ maan i sin’n, ɔ seli i niaan Klistfuɛ mun kɛ: ‘Amun ti, Klist bɔbɔ wunnin ɲrɛnnɛn. Ɔ yoli sɔ kɛ an nian su naan an nanti i ajalɛ liɛ’n su. Be kpɛli i nzowa, w’a yiman a manman be, be kleli i ɲrɛnnɛn, w’a fuaman be ti.’—1 Piɛr 2:21-23.
18, 19. (a) ?Blɛ mennin nun yɛ ɔ ti cinnjin kpa kɛ asɔnun kpɛnngbɛn’m be tra be awlɛn naan be yo wɛtɛɛfuɛ ɔ? (b) ?Kosan mennin mun yɛ like suanlɛ ng’ɔ́ bá lɔ’n wá yíyí be nun ɔn?
18 I sɔ kunngba’n, sɛ asɔnun kpɛnngbɛn’m be waan bé dí be junman’n i kpa’n, kannzɛ bɔbɔ be yo be tɛ’n, ɔ fata kɛ be yo wɛtɛɛfuɛ. Wie liɛ’n, Klistfuɛ wie mɔ be kunndɛ kɛ bé úkɛ i’n, ɔ kwla kan be ndɛ tɛtɛ. Kɛ Klistfuɛ kun yo sa tɛ’n, annzɛ ɔ timan juejue Ɲanmiɛn i sulɛ nun mɔ be waan bé úkɛ i’n, i ‘nuan nun ndɛ’n kwla yra fiaan kɛ kue yɛ b’a fa wɔ sran sa.’ (Nyanndra Mun 12:18) Sanngɛ ɔ nin i sɔ’n bɔbɔ’n, asɔnun kpɛnngbɛn’m be nian Zezi i ajalɛ’n su. Yɛle kɛ, be kanman sran’n i ndɛ tɛ wie. Kɛ be tra be awlɛn sɔ mɔ be kle kɛ be klo be niaan’n, i sɔ’n kwla ukɛ i kpa. (1 Piɛr 3:8, 9) ?Kɛ asɔnun kpɛnngbɛn’m be man amun afɔtuɛ’n, amun yo wɛtɛɛfuɛ yɛ amun tra amun awlɛn kɛ be sa?
19 Nanwlɛ, asɔnun kpɛnngbɛn kpanngban nga mɛn wunmuan’n nun be tu be klun be nian Ɲanmiɛn i bua fa’n i lika’n, Zoova nin Zezi be klun jɔ be wun dan. Asɔnunfuɛ’m be lika nianfuɛ kpanngban nga be uka asɔnun kpɛnngbɛn mun naan b’a ‘di be junman’n,’ Zoova nin i Wa’n be klo be dan wie. (Ebre Mun 6:10) ?Sanngɛ, ngue ti yɛ Klistfuɛ wie’m be kunndɛman kɛ bé dí i sɔ ‘junman m’ɔ ti kpa’n’ niɔn? (1 Timote 3:1) ?Yɛ wafa sɛ yɛ Zoova uka be nga ɔ sie be asɔnun kpɛnngbɛn mun ɔn? Like suanlɛ ng’ɔ́ bá lɔ’n wá yíyí nun.
?Amun wla kwla kpɛn su?
• ?Ninnge mennin wie mun yɛ asɔnun kpɛnngbɛn’m be yo m’ɔ kle kɛ be klo Ɲanmiɛn i bua fa’n niɔn?
• ?Wafa sɛ yɛ asɔnunfuɛ’m be kwlaa be kwla yo naan b’a di aklunjuɛ nin alaje ɔ?
• ?Kɛ asɔnun kpɛnngbɛn’m bé mán afɔtuɛ’n, ngue ti yɛ be tra be awlɛn kpɔkun be yo wɛtɛɛfuɛ ɔ?
• ?Wafa sɛ yɛ asɔnun kpɛnngbɛn’m be kle kɛ be yo sran’m be ye naan be lafi Ɲanmiɛn su ɔ?
[Foto, bue 19]
Asɔnun kpɛnngbɛn’m be nian asɔnun’n i lika klolɛ su.
[Foto, bue 19]
Be fa blɛ be nin be awlofuɛ’m be yiyi be ɲin su . . .
[Foto, bue 19]
. . . kpɔkun be bo jasin fɛ’n i likawlɛ.
[Foto, bue 20]
Kɛ asɔnun kpɛnngbɛn’m be koko be afiɛn yalɛ kpa’n, asɔnunfuɛ’m be di aklunjuɛ nin alaje.