Sro Zoova naan di aklunjuɛ!

‘Sran nga i ɲin yi Anannganman’n i liɛ su ti ye.’—JUE MUN 112:1.

1, 2. ?Be ɲin m’ɔ yi Ɲanmiɛn’n i su mmlusuɛ’n mennin yɛ e kwla ɲɛn i ɔ?

BE TRANMAN sa ngbɛn yɛ be di aklunjuɛ ɔ. Sran ng’ɔ nian kan ɔ sie i ja’n, m’ɔ nanti atin kpa’n su’n, m’ɔ kpalo sa tɛ’n, sran sɔ’n yɛ ɔ di aklunjuɛ i kpafuɛ’n niɔn. I sɔ’n ti yɛ Zoova m’ɔ ti e Yifuɛ’n, ɔ fali Biblu’n mannin e ɔ. Ɔ fa mannin e naan ɔ́ klé e nantilɛ m’ɔ leman wunsu’n. Sɛ e kunndɛ Ɲanmiɛn i atin naan e fa su’n, é klé kɛ e ɲin yi i, é klun jɔ́ yɛ e tranlɛ’n yó fɛ.—Jue Mun 23:1; Nyanndra Mun 14:26.

² Like suanlɛ nga nun’n, é wá kán sran wie mɔ be ndɛ o Biblu’n nun’n, ɔ nin e blɛ liɛ nun sran wie mɔ be kle e ajalɛ kpa’n, be ndɛ. Be ajalɛ’n kle kɛ sran ng’ɔ sro Ɲanmiɛn sakpa’n, ɔ ɲan wunmiɛn kpalo sa tɛ’n yɛ ɔ yo sa kpa’n. É wá wún kɛ be ɲin m’ɔ yi Ɲanmiɛn’n, ɔ man aklunjuɛ yɛ ɔ su e bo maan sɛ e fali atin tɛ’n, e kaci e sa kɛ famiɛn Davidi fa yoli’n sa. Siɛ nin niɛn’m be kwla kle be mma mun kɛ be ɲin yi Ɲanmiɛn. É wá wún kɛ sɛ be yo sɔ’n nn bɛtrɔ kpa kun m’ɔ leman wunsu’n, yɛ b’a kpɛ b’a sie be ɔ. I kwlaa sɔ’n ti’n, Biblu’n se kɛ: ‘Sran nga i ɲin yi Anannganman’n i liɛ su ti ye.’—Jue Mun 112:1.

Aklunjuɛ nga be dili i laa’n, be kwla di i ekun

3. ?Kɛ Davidi yoli sa tɛ’n, ngue ti yɛ ɔ kwla kacili i sa ɔ?

³ Like suanlɛ ng’ɔ sinnin lɔ nun’n, e wunnin kɛ sa nsan nun’n, Davidi i ɲin w’a yiman Ɲanmiɛn. Ɔ maan ɔ yoli sa tɛ. Kpɔkun Zoova tuli i fɔ. Sanngɛ, wafa ng’ɔ sɔli fɔ tulɛ sɔ’n nun’n, ɔ kle kɛ kannzu Davidi ti sran m’ɔ sro Ɲanmiɛn sakpa ɔ. Afin, i ɲin m’ɔ yi Ɲanmiɛn ti’n, w’a fiaman i sa tɛ’m be su. Davidi tuli i klun kpatali Zoova yɛ ɔ kacili i sa. Ɔ maan, ɔ nin Zoova be wa nantili klanman ekun. Sa tɛ m’ɔ yoli be’n ti’n, i bɔbɔ ɔ nin sran uflɛ’m be wunnin i su afɛ. Sanngɛ Zoova w’a yiman Davidi blo. Ɔ jrɛnnin i sin, ɔ yrɛli i su. Andɛ’n, sɛ e nun kun yo sa tɛ’n, Davidi i su ndɛ’n kwla wlɛ i fanngan.

4. ?Ngue ti yɛ sɛ sran kun i ɲin yi Ɲanmiɛn’n, aklunjuɛ ng’ɔ dili i laa’n, ɔ kwla di i ekun ɔn?

⁴ Be flɛ e niaan bla kun kɛ Sonia.a Blɛ wie nun m’ɔ ti titi atin bofuɛ’n, ɔ nin sran tɛfuɛ’m be sannin nun, ɔ maan ɔ yoli sa tɛ. Kpɔkun, be tuli i asɔnun’n nun. Sanngɛ blɛ sɔ’n nun’n, i konvi w’a tuman Zoova i sulɛ’n su le. Kɛ i sin ɔ tran buli angunndan, mɔ i wla kpɛnnin wafa nga ɔ nin Zoova be nantili laa’n su’n, ɔ yoli like kwlaa ng’ɔ kwla yo naan be afiɛn’n w’a mantan kpa ekun. Be wa sɔli i nun asɔnun’n nun ekun. Kpɔkun ɔ wa yoli titi atin bofuɛ ekun. Kɛ ɔ́ kɔ́ i ɲrun’n, asɔnun kpɛnngbɛn kun jɛli i. Andɛ be sran nɲɔn’n be di junman kpa aklunjuɛ su. Kɛ Sonia i wla kpɛn sa tɛ ng’ɔ yoli i laa’n su’n, ɔ yo i nsisɔ dan. Sanngɛ i waan sɛ ɔ ti kɛ ɔ sroman Ɲanmiɛn sa’n nn w’a sɛmɛn i sin asɔnun’n nun. I sɔ m’ɔ yoli’n, ɔ yo i fɛ dan.

Sɛ e wun ɲrɛnnɛn’n, ɔ ti kpa tra kɛ e yo sa tɛ’n

5, 6. Saili tɔli Davidi sa nun kpɛ nɲɔn, sanngɛ w’a kunmɛn i. An yiyi nun, yɛ an kan like nga ti yɛ w’a kunmɛn i’n.

⁵ Sɛ e sro Zoova naan e yoman sa tɛ’n, ɔ ti kpa tra kɛ e yo sa tɛ naan i sin’n, y’a sa e sin y’a kpɛtɛ i’n. I sɔ yɛ blɛ wie nun’n, Davidi yoli ɔ. I nun mɔ Saili nin i sonja’m be nun sran akpi nsan be su Davidi su kɛ bé kún i’n, Saili ko wluli yɔbuɛ buɛ kun nun. Kannzu Davidi nin i sran’m be fia yɔbuɛ buɛ sɔ’n nun lɔ. Davidi i sran’m be seli i kɛ Zoova w’a yi Saili w’a mɛn i naan ɔ kun i. Davidi ɔli i ja bue su blɛblɛ ko kpɛli Saili i tralɛ’n i nuan njɔlɛ’n. Sanngɛ sa sɔ’n bɔɔ ti’n, i klun tili i tri. Davidi seli i sran’m be kɛ: ‘?Zoova i sran m’ɔ sieli i’n m’ɔ ti min min’n yɛ m bɔbɔ ń kún i ɔ? N sa su kanman Zoova i sran’n mlɔnmlɔn.’b I sɔ m’ɔ kannin’n ti’n, b’a kwlá kunman Saili.—1 Samiɛl 24:2-8.

⁶ Cɛn kun ekun’n, kɔnguɛ Davidi nin i aosua Abisai m’ɔ ti sran yakpa’n, be ɔli Saili nin i sonja’m be ngblaliɛ’n nun lɔ. Be nian ɔn, Saili nin i sran’m be kwlaa be su lafi. Afin ‘Anannganman maan lafilɛ’n kunnin be dan.’ Abisai waan ɔ́ ká lɛ kún Saili, sanngɛ Davidi w’a kpliman su. Ɔ usɛli i kɛ: ‘?Sɛ sran kun kun Zoova i sran m’ɔ fɛli i sieli famiɛn’n, bé yáci cɛ́?’—1 Samiɛl 26:9, 12.

7. ?Ngue ti yɛ Davidi w’a yoman sa tɛ ɔ?

⁷ ?Ngue ti yɛ kɛ Davidi ɲannin Saili i kunlɛ i wun atin kpɛ nɲɔn’n, w’a kunmɛn i ɔ? Like nga ti yɛ w’a kunmɛn i’n, yɛle kɛ srolɛ m’ɔ sro Saili’n, ɔ traman i ɲin m’ɔ yi Zoova’n. I sɔ’n ti’n, kannzɛ bɔbɔ ɔ fata kɛ ɔ wun ɲrɛnnɛn’n, ɔ ti kpa tra kɛ ɔ yo sa tɛ’n. (Ebre Mun 11:25) Davidi lafi su kpa kɛ Zoova sokpɛmɛn i gbaflɛn difuɛ. Ɔ si kɛ sran nga i ɲin yi Ɲanmiɛn m’ɔ fɛ i wla’n kwlaa guɛ i su’n, ɔ di aklunjuɛ yɛ Ɲanmiɛn yrɛ i su dan. Sanngɛ ɔ min kun nga a buman Ɲanmiɛn like fi’n, Ɲanmiɛn yi ɔ blo. (Jue Mun 65:5) Asa ekun’n, ɔ si kɛ cɛn nga Ɲanmiɛn i blɛ liɛ’n ju’n, ɔ́ tú Saili famiɛn bia’n su. Kpɔkun ɔ́ síe i bɔbɔ Davidi famiɛn kɛ nga Ɲanmiɛn bɔbɔ fa kannin’n sa.—1 Samiɛl 26:10.

Kɛ be sro Ɲanmiɛn’n be di aklunjuɛ

8. ?Wafa sɛ yɛ wafa nga Davidi nantili ɲrɛnnɛn blɛ nun’n, ɔ uka e ɔ?

⁸ Klistfuɛ mɔ e ti’n ti’n, saan bé yó e finfin, bé klé e yalɛ annzɛ bé yó e sa kekle wie mun ekun. (Matie 24:9; 2 Piɛr 3:3) Wie liɛ bɔbɔ’n, e niaan Klistfuɛ mun yɛ be kle e yalɛ ɔ. Sanngɛ e si kɛ like fi fiaman Zoova ɲrun naan kɛ e srɛ i’n, ɔ ti. Naan sɛ i blɛ liɛ’n ju’n, ɔ́ dí ndɛ sɔ’n kɛ nga i bɔbɔ klo’n sa. (Rɔmfuɛ Mun 12:17-21; Ebre Mun 4:16) I sɔ’n ti’n, nán maan e sro e kpɔfuɛ mun. Sanngɛ maan e lafi su kɛ Zoova dé e. Kpɔkun kɛ Davidi liɛ’n sa’n, nán maan e bɔbɔ e tu e klunngbɔ. Annzɛ nán maan e kpɛ Ɲanmiɛn i mmla’n wun naan y’a ɲan e ti. Sɛ e yo sɔ’n, i liɛ’n, é dí aklunjuɛ. ?Ngue ti ɔ?

9. Sa kun m’ɔ kle kɛ kannzɛ sran wun ɲrɛnnɛn sɛ’n, sanngɛ i ɲin m’ɔ yi Ɲanmiɛn ti’n ɔ di aklunjuɛ’n, an kɛn i ndɛ.

⁹ E niaan bian kun m’ɔ yoli ngaliɛ difuɛ afuɛ kpanngban kpa sran ble mɛn nun wa’n, ɔ kannin wafa nga e niaan bla kun ɔ nin i wa bla’n be ɲin yili Ɲanmiɛn’n, i ndɛ. Ɔ seli kɛ: “Be nga be jran politiki anuannzɛ’m be sin’n, be to fluwa m’ɔ kle kɛ be nin be o nun’n. Sanngɛ kɛ mɔ e niaan bla’n ɔ nin i wa’n be yoman politiki’n ti’n, b’a tomɛn i sɔ fluwa’n wie. I sɔ’n ti’n, be boli be tɛtɛ kpa, yɛ be seli be kɛ be ɔ be awlo. Kɛ bé kɔ́ mɔ ba’n sún afin ɔ wunman sa sɔ’n i ti nin i bo’n, nn i nin’n fɔnvɔ i. Kannzɛ bɔbɔ sa nga be yoli be’n w’a yoman be fɛ’n, sanngɛ be klun w’a titiman be kɛ be yoli sa tɛ. Be klun jɔli dan, afin be si kɛ be ɲin yili Ɲanmiɛn. Sɛ ɔ ti kɛ be toli politiki anuannzɛ’n fluwa sɔ’n, nn ɔ yoli be nga be boli be’n be fɛ. Nn be mannin be nzan, be sili i su able, yɛ be yili be ayɛ lele fa juli be awlo lɔ. Kɛ ɔ́ yó sɔ kusu’n nn Ɲanmiɛn mmla mɔ b’a fɔn’n ti’n, be awlabɔɛ’n su wieman le.” Nanwlɛ, e niaan bla’n ɔ nin i wa’n be ɲin m’ɔ yili Ɲanmiɛn’n, ɔ sasali be.

10, 11. ?Srolɛ mɔ bla kun sro Ɲanmiɛn ti’n, mmlusuɛ mennin yɛ ɔ ɲɛnnin ɔ?

¹⁰ Kɛ sran kun sro Ɲanmiɛn’n, ɔ bu nguan m’ɔ o sran nun’n i like dan. I sɔ’n ti bɔbɔ’n, ɔ kwla wun i su afɛ. Sanngɛ i agualiɛ su’n, ɔ di aklunjuɛ. Be flɛ bla kun kɛ Mali. Kɛ ɔ wunnzɛli i wa’n i nsan su’n, dɔɔtrɔ m’ɔ niɛn i su’n, ɔ seli i kɛ ɔ tu kuɛ’n. Afin, sɛ w’a yoman sɔ’n, ɔ nin ba’n be kwla ka lɛ be wu cɛn kunngba. Sɛ kusu i waan ɔ́ wú ba’n i kekle nun’n, ɔ lafiman su kɛ ba’n yó kpa. Blɛ sɔ’n nun’n nn Zoova i Lalofuɛ’m be kle Mali i Biblu’n nun like, yɛ be nin a yomɛn i batɛmu bɔbɔ. Sanngɛ Mali waan: “Sɛ bɔbɔ be nin a yoman min batɛmu’n, sanngɛ Zoova i klun sa’n yɛ min waan ń yó ɔ. I ti’n, kannzɛ ɔ́ yó sɛ o, ń nánti i mmla’n su.”—Ezipt Lɔ Tulɛ 21:22, 23.

¹¹ Mali w’a yacimɛn i awlo’n i lika nianlɛ, yɛ w’a yaciman Biblu’n nun like suanlɛ lelee ɔ fa wuli i wa’n. I waan: “Kannzɛ awuliɛ’n yoli kekle kan trali ba klikli nɲɔn’n be liɛ’n, sanngɛ n wuli ba’n.” Ɲanmiɛn mɔ Mali sro i’n ti’n, w’a yoman sa tɛ naan i klun w’a titi i. Kpɔkun w’a cɛman yɛ be yoli i batɛmu ɔ. Ba’n kusu kɛ ɔ́ ɲín kɔ́’n, be kleli i Zoova srolɛ wie. Kɛ é sé yɛ’n, ɔ di junman Zoova i Lalofuɛ’m be Betɛli kun nun.

‘E fa e wla gua Zoova su naan ɔ wla e fanngan’

12. ?Ɲanmiɛn mɔ Davidi sro i’n ti’n, wafa sɛ yɛ i sɔ’n wlɛli i fanngan ɔn?

¹² Kɛ mɔ Davidi sro Ɲanmiɛn ti’n, nán sa tɛ ngunmin yɛ w’a yoman ɔn. Sanngɛ blɛ kekle wie’m be nun’n, ɔ ɲannin wunmiɛn fali ajalɛ kpa. Kɛ Saili sú Davidi su’n, Davidi ko fiali Filistifuɛ’m be nvle nun lɔ lika nga be flɛ i Ziklag’n i nun lɔ. Ɔ trannin lɔ afuɛ kun anglo nnan. (1 Samiɛl 27:5-7) Cɛn kun mɔ Davidi nin i sran’m be nunman lɛ’n, Amalɛkifuɛ’m be wa sacili be klɔ’n, kpɔkun be wɔli nun. Be trali bla nin ba’m be lomuɛn, kpɔkun be wuali be nnɛn mun. Kɛ Davidi nin i sran’m be sali be sin mɔ be wunnin sa ng’ɔ juli’n, be sunnin lele. I sin’n, be fali ya Davidi i wun. Ɔ maan be waan bé kún i yɔbuɛ nun. Blɛ kekle sɔ’n nun’n, Davidi i wla boli i wun sanngɛ w’a boman w’a traman su. (Nyanndra Mun 24:10) Kɛ mɔ Davidi i ɲin yili Zoova m’ɔ fɛli i wla guɛli i su’n ti’n, ‘Zoova kusu wlɛli i fanngan.’ Ɔ jrannin Davidi nin i sran’m be sin. Ɔ maan be kwlali Amalɛkifuɛ mun, kpɔkun ninnge kwlaa nga be fali’n, be deli be sa nun.—1 Samiɛl 30:1-20.

13, 14. ?Wafa sɛ yɛ Ɲanmiɛn mɔ e niaan Klistfuɛ kun i ɲin yi i’n ti’n, ɔ kwla fali ajalɛ kpa ɔ?

¹³ Andɛ Zoova i sufuɛ’m be kusu sa kekle tɔ be su wie. I lɛ’n nun’n, saan bé fá be wla gúa Zoova su naan b’a fa ajalɛ kpa naan b’a fite nun. I wie yɛ bla kun mɔ be flɛ i Klistina’n yoli ɔ. I talua nun’n, Zoova i Lalofuɛ’m be kleli i Biblu’n nun like. Sanngɛ like nga i waan ɔ́ yó’n, yɛle kɛ ɔ́ súan blɔfuɛ’m be ngowa kanlɛ like nga be flɛ i kɛ piano’n naan cɛn wie lele’n, ɔ́ bó i nzra nun. Ɔ maan ɔ tu i klun suɛnnin i kpa yɛ ɔ ɔli i ɲrun. Batɛmu yolɛ’n, ɔ nin junman ng’ɔ o i sin’n w’a yomɛn i nnana, afin ɔ sro jasin fɛ’n bolɛ’n. Sanngɛ kɛ Klistina súan Biblu’n nun like’n kɔ́’n, nn ɔ́ wún kɛ Biblu’n nun ndɛ’n timan aɔwi like. Kɛ be se kɛ be sro Ɲanmiɛn’n, ɔ wunnin i bo kpa. Ɔ wunnin kɛ sran ng’ɔ su Zoova’n, Zoova kunndɛ kɛ sran sɔ’n klo i kpa, ɔ fɛ i wla’n kwlaa guɛ i su, yɛ maan i angunndan’n kwlaa trɛn i su yɛ ɔ fɛ i wunmiɛn’n kwlaa yo like ng’ɔ kle kɛ ɔ klo i’n. (Mark 12:30) I kwlaa sɔ’n mɔ Klistina wunnin i wlɛ’n ti’n, ɔ fɛli i wun mannin Zoova kpɔkun be yoli i batɛmu.

¹⁴ Klistina srɛli Zoova kɛ ɔ ukɛ i naan ɔ su i kpa. Ɔ seli kɛ: “Sran ng’ɔ bo piano nzra nun’n, ɔ tranman ase. Afuɛ kun nun sa’n, ɔ kwla kan ngowa sɔ’n lele kpɛ 400 likalika’m be nun. I sɔ’n ti’n, n seli kɛ n dimɛn i sɔ junman’n kun. Min waan ń yó titi atin bofuɛ. Yɛ kɛ ɔ ko yo naan m’an ɲan n sa ti like’n, n seli kɛ ń klé sran’m be piano bolɛ.” Kɛ ɔ́ yó sɔ’n, nn sran’m b’a dun mmua b’a se i kɛ ɔ wa bo piano be nvle’n nun lɔ ngowa kanlɛ lika dan kpafuɛ’n i nun. Klistina waan: “Kɛ n yoli i sɔ’n wieli’n, yɛ n wlali piano bolɛ nzra nun’n i ase ɔ.” Asɔnun kpɛnngbɛn kun wa jali Klistina. Kɛ é sé yɛ’n, be di junman Betɛli kun nun. Nanwlɛ, Zoova suannin Klistina bo. Ɔ maan ɔ kwla fali ajalɛ kpa. Kpɔkun andɛ’n, ɔ fɛ i blɛ nin i wunmiɛn’n su i. I sɔ’n m’ɔ yo’n, ɔ yo i fɛ dan.

Bɛtrɔ kpa kun m’ɔ leman wunsu’n

15. ?Bɛtrɔ kpa mɛnnin yɛ Davidi kunndɛli kɛ ɔ́ kpɛ́ síe i mma mun ɔn?

¹⁵ Davidi seli kɛ: ‘Min mma mun, amun bla maan n kan ndɛ n kle amun. Ń klé amun kɛ be ɲin fa yi Anannganman’n.’ (Jue Mun 34:12) Nanwlɛ, ɔ yoli Davidi i cinnjin kpa kɛ ɔ kle i mma’m be like naan be sro Ɲanmiɛn kɛ ɔ nin i fata’n sa. Sɛ ɔ yo sɔ’n, nn bɛtrɔ kpa kun m’ɔ leman wunsu’n yɛ w’a kpɛ w’a sie i mma mun ɔn. Davidi i ijɔlɛ’n nun o, i ayeliɛ’n nun o, ɔ kleli kɛ Zoova wlanwlanman sran, i like yolɛ yoman ya, yɛ ɔ niannianman sran’m be sa tɛ nga be yo naan w’a bu be fɔ. Sanngɛ ɔ kleli kɛ Ɲanmiɛn ti Siɛ kpa naan ɔ nian sran’m be lika yɛ ɔ yaci be wun sa cɛ. Davidi seli kɛ: ‘Kɛ sran yo sa’n, nɛ́n i ngba yɛ ɔ wun i kɛ nga w’a yoman kpa ɔ.’ Kpɔkun Davidi kan guali su kɛ ‘sa nga n yoli mɔ m’an wunmɛn i’n, yaci cɛ min.’ Ɔ kannin sɔ naan e wun kɛ Zoova niannianman sa nga e yo nun naan w’a wun kɛ y’a yoman sa kpa. Davidi lafi su kɛ sɛ ɔ miɛn i ɲin naan i ndɛ ng’ɔ kan’n, ɔ nin i klun angunndan’n be ti kpa’n, Zoova su yimɛn i blo.—Jue Mun 19:13, 15.

16, 17. ?Wafa sɛ yɛ siɛ nin niɛn’m be kwla ta be mma mun naan be ɲin w’a yi Zoova ɔ?

¹⁶ Andɛ siɛ nin niɛn’m be kwla nian Davidi i ajalɛ’n su. Rafu m’ɔ nin i niaan bian be di junman Betɛli kun nun’n, ɔ seli kɛ: “Wafa nga e si nin e nin be tali e’n yoli maan e wunnin kɛ atin kpafuɛ mɔ Zoova i Lalofuɛ’m be o su’n, i su nantilɛ’n yo fɛ. E wunnin kɛ e si nin e nin be bɔbɔ be su Zoova aklunjuɛ su. Yɛ kɛ be nin e koko asɔnun’n nun junman’n i su yalɛ’n, ɔ yo maan e kusu Zoova i junman dilɛ’n yo e fɛ wie. Be kleli e kɛ e kusu e kwla di junman kpa man Zoova. I li bɔɔ e kwlaa e tuli ajalɛ e ko trannin nvle kun mɔ be sa mian jasin fɛ’n bofuɛ’m be wun dan’n i nun lɔ. Ɔ maan e kwla takali asɔnun uflɛ wie mun. E dili i sɔ junman’n afuɛ kpanngban kpa.

¹⁷ “Sɛ e nantili klanman’n, nán kɛ like kwlaa ng’ɔ fata kɛ e yo, annzɛ ɔ fataman kɛ e yo’n, e si nin e nin be kpɛli be su mmla ti ɔ. Sanngɛ, wafa nga be nin Zoova be nantili kɛ sran nin i wiengu klun ufuefuɛ be nanti’n sa’n, yɛ ɔ ukali e ɔ. Be kunndɛ kɛ bé sí Zoova kpa naan bé yó i klun sa. Kɛ e wunnin wafa nga be klo Zoova kpa mɔ be ɲin yi i’n, e kusu e kunndɛli kɛ é nían be ajalɛ’n su. Kɛ e yo sa tɛ bɔbɔ’n, be yoman kɛ Zoova w’a yi e blo sa, yɛ be tuman e fɔ ya su. Sanngɛ be tran e ase kpɔkun be nin e ijɔ wɛtɛɛ su. Wie liɛ bɔbɔ’n kɛ e manmin tú e fɔ’n, sunlɛ o i ɲin bo. Kɛ ɔ yo sɔ’n, ɔ wluwlu e wun dan. Nanwlɛ i sɔ’n ukali e. E si nin e nin be nzuɛn’n ti’n, e sieli i nzɔliɛ kɛ, kɛ be ɲin yi Zoova’n ɔ yo ɲɛnmɛn, naan kɛ sran kun ti Zoova i Lalofuɛ’n, i sɔ’n yoman nɔnnin naan aklunjuɛ yɛ ɔ di ɔ.”—1 Zan 5:3.

18. ?Sɛ e ɲin yi Ɲanmiɛn’n, mmlusuɛ mennin yɛ é ɲɛ́n i?

¹⁸ Davidi ‘i nuan ndɛ kasiɛn’n’ i bue kun yɛ: ‘Sran ng’ɔ sie sran mun’n, sɛ ɔ ti nanwlɛfuɛ’n yɛ sɛ i ɲin yi Ɲanmiɛn’n, ɔ ti kɛ nglɛmun wia’n m’ɔ́ fíte’n, nn ɲanmiɛn ble’n nunman lɛ’n sa’n. Ɔ kpaja weiin.’ (2 Samiɛl 23:1, 3, 4) E kwla se kɛ Davidi i wa Salomɔn m’ɔ sinnin i ja nun’n, ɔ wunnin ndɛ sɔ’n i bo. Afin ɔ srɛli Ɲanmiɛn kɛ ‘ɔ mɛn i ngwlɛlɛ’ i liɛ’n, ‘ɔ́ sí like ng’ɔ ti kpa’n ɔ nin ng’ɔ timan kpa’n be ngbaciɛ.’ (1 Famiɛn Mun 3:9) Salomɔn si kɛ sran ng’ɔ sro Ɲanmiɛn’n, ɔ yo angunndanfuɛ yɛ ɔ di aklunjuɛ. I sin’n, i bɔbɔ klɛli Akunndanfuɛ’n fluwa’n nun kɛ: ‘E sie e su e tie ndɛ’n kwlaa ng’ɔ o lɛ’m be atabo’n: Maan ɔ ɲin yi Ɲanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ ɔ. Afin Ɲanmiɛn wá úsa e like nga e yoli’n i kwlaa i su ndɛ. Sa kwlaa ng’ɔ ti fiawa o, ng’ɔ ti kpa o, ng’ɔ ti tɛ o, ɔ́ dí be jɔlɛ.’ (Akunndanfuɛ’n 12:13, 14) Sɛ e nanti ndɛ sɔ’n su’n, é wún kɛ ‘sran ng’ɔ kɛn i wun ase mɔ i ɲin yi Zoova’n,’ ɔ di aklunjuɛ. Ɔ yo angunndanfuɛ. Kpɔkun i kunngba’n, ‘ɔ ɲɛn i wun. Sran wun i ɔ, i ɲin yi i. Ɔ cɛ.’—Nyanndra Mun 22:4.

19. ?Wafa sɛ yɛ e kwla wun ‘Ɲanmiɛn i aɲinyiɛ’n i wlɛ ɔ’?

¹⁹ Sran kwlaa nga e kannin be ndɛ like suanlɛ nga nun’n, be su ndɛ’n kle kɛ sran ng’ɔ sro Ɲanmiɛn’n, ɔ kwla su i kpa. Afin, sɛ sran kun sro Ɲanmiɛn’n, ɔ su yoman like ng’ɔ kwla saci i nin Ɲanmiɛn be afiɛn’n. Sanngɛ ɔ́ ɲán wunmiɛn jrán i kpɔfuɛ mun nin sa kekle kwlaa nga be kwla tɔ i su’n, be ɲrun kekle. I sɔ’n ti’n, i gbaflɛn o, i talua o, i kpɛnngbɛn o, maan e kwlaa e bo e ɲin ase e suan Ɲanmiɛn Ndɛ’n. Like nga e suan’n kusu’n, maan e bu su angunndan. Yɛ e tu e klun e srɛ Zoova titi naan e nin i e afiɛn mantan kpa. Sɛ e yo i kwlaa sɔ’n, nanwlɛ ‘é kwlá sí Ɲanmiɛn,’ yɛ é wún ‘i aɲinyiɛ’n i wlɛ.’—Nyanndra Mun 2:1-5.

[Ja ngua lɛ ndɛ mun]

?Amun kwla yiyi nun?

• Wafa sɛ yɛ srolɛ mɔ be sro Ɲanmiɛn’n, ɔ kwla uka sran kun naan sɛ ɔ yo sa tɛ’n w’a kaci i sa ɔ?

• ?Kannzɛ bɔbɔ kekle’n o e su’n, wafa sɛ yɛ srolɛ mɔ e sro Ɲanmiɛn’n ɔ kwla man e aklunjuɛ ɔ?

• ?Wafa sɛ yɛ srolɛ mɔ e sro Ɲanmiɛn’n, ɔ kwla man e wunmiɛn naan y’a yo Zoova klun sa ɔ?

• ?Wafa sɛ yɛ srolɛ mɔ be sro Ɲanmiɛn’n, ɔ kwla yo kɛ bɛtrɔ kpa kun mɔ siɛ nin niɛn’m be kwla kpɛ sie be mma mun sa ɔ?

[Foto, bue 28]

Kɛ mɔ Davidi sro Zoova ti’n, w’a kunman Famiɛn Saili.

[Foto, bue 31]

Ɲanmiɛn srolɛ’n ti bɛtrɔ kpa kun mɔ siɛ nin niɛn’m be kwla kpɛ sie be mma mun ɔn.