Zɔbu trɛli i awlɛn, b’a kwlá sacimɛn i wun
‘?A wunnin min sufuɛ Zɔbu i wafa ng’ɔ fa ti’n? Asiɛ’n su lɔ sran fi nin i sɛman. Ɔ ti sran mɔ be kwlá sacimɛn i wun bɔ kaan sa. Ɔ yo sa i nuan su. I ɲin yi min. Ɔ kloman kɛ ɔ́ yó sa tɛ.’—ZƆB 1:8.
1, 2. (a) ?Sanvuɛsa mennin yɛ ɔ tɔli Zɔbu su ɔ? (b) ?Sanngɛ Zɔbu i laa nun’n, ɔ ti sɛ?
LAA nun’n, bian kun o lɛ’n, like kwlaa ti sin yiɛ i kpan! Ɔ siman like nga be flɛ i afɛ’n. Bian’n ti juejue, ɔ di wlengbi, i awlo’n ti fɔuun. Kpɔkun cɛn kun ɔ o lɛ’n, sanvuɛsa wa tɔli i su gblu. Cɛn ba kunngba nun’n, i aɲanbeun’n kwlaa sacili. Aunmuan dan wie tuli, ɔ kunnin i mma’m be kwlaa. Kpɔkun, tukpaciɛ tɛ wie guɛli i wunnɛn wunmuan’n su. Ɔ yoli i ja’n bo lele fa juli i ti’n su. Atrɛkpa’n amun si bian sɔ’n. Ɔ suan Zɔbu. Biblu’n nun fluwa nga i dunman’n o su’n, ɔ kɛn i ndɛ kpa.—Zɔb ndɛ tre 1 nin 2.
2 Zɔbu fɛfɛli kɛ: ‘Nanwlɛ, n klo kɛ ń sín min osu laa nun.’ (Zɔb 3:3; 29:2) ?Wan yɛ kɛ ɲrɛnnɛn tɔ i su’n, ɔ kunndɛman kɛ ɔ́ sín i osu laa nun ɔn? Zɔbu nantili seiin. Kɛ a wun i sa’n, ɔ timan sran mɔ a kwla bu i kɛ cɛn kun yalɛ dí i ɔ. Sran dandan’m be wun i’n, be jaso jran nglo. Be fa be ndɛ’n kɔ i ja su. (Zɔb 29:5-11) Kannzɛ ɔ ti aɲanbeunfuɛ’n, sanngɛ nán sika yɛ ɔ sieli i ɔ. (Zɔb 31:24, 25, 28) Angbeti nin aika nga be leman sran’n, Zɔbu yoli be sran. (Zɔb 29:12-16) Bla uflɛ kunndɛlɛ angunndan kusu w’a kpɛnman Zɔbu klun le. Ɔ nin i yi’n ngunmin yɛ be o nun ɔn.—Zɔb 31:1, 9, 11.
3. ?Zoova ɲrun’n, sran’n i wafa sɛ yɛ Zɔbu ti ɔ?
3 Kɛ mɔ Zɔbu su Ɲanmiɛn ti’n, b’a kwlá sacimɛn i wun. Zoova bɔbɔ seli kɛ: ‘Bian sɔ’n, be kwlá sacimɛn i wun bɔ kaan sa, ɔ yo sa i nuan su. I ɲin yi min, ɔ kloman kɛ ɔ́ yó sa tɛ. Asiɛ’n su lɔ sran fi nin i sɛman.’ (Zɔb 1:1, 8) Ɔ nin i sɔ’n ngba’n, sa yalɛ’n w’a sɛnmɛn i wun. Ninnge kwlaa ng’ɔ miɛnnin i ɲin kunndɛli be’n, ɔ yoli ngbɛn. Sɛ ɲrɛnnɛn’n nin awlabɔɛ’n be ti sran’n, nn é sé kɛ be fali be sa kannin Zɔbu kekle kpa, be sɛli i niannin.
4. ?Ngue ti yɛ ɔ fata kɛ e fa e ɲin sie Zɔbu i ɲrɛnnɛn’n su ɔ?
4 Sanngɛ nán Zɔbu kunngba yɛ ɔ ti Ɲanmiɛn i sufuɛ m’ɔ wunnin i ɲrun kekle kpa ɔ. Afin, andɛ Klistfuɛ kpanngban be wun be ɲrun kɛ Zɔbu liɛ’n sa wie. I sɔ’n ti’n, kosan yɛ mun be ti cinnjin man e: ?Wafa sɛ yɛ Zɔbu i afɛ’n i nun yiyilɛ’n kwla uka e naan sɛ ɲrɛnnɛn tɔ e su’n, y’a jran kekle ɔ? ?Wafa sɛ yɛ i ndɛ sɔ’n kwla uka e naan y’a si be nga ɲrɛnnɛn o be su’n, be aunnvuɛ ɔ?
Be sɛli i niannin kpɔkun akplowa tɔli sran’m be seiin nantilɛ’n su
5. ?Satan waan ngue ti yɛ Zɔbu su Ɲanmiɛn ɔn?
5 Zɔbu i su sa liɛ’n ti liɛ ngunmin. ?Yɛle kɛ sɛ? Yɛle kɛ mmusu’m be si Satan seli kɛ kannzɛ Zɔbu su Ɲanmiɛn’n, sanngɛ nán sran kpa ɔ. Cɛn kun mɔ Zoova nin i mma’m be yiali’n, Zoova yili Zɔbu i ayɛ. Sanngɛ Satan seli Zoova kɛ: ‘A sɛsɛ i, a sɛsɛ i awlo’n nin i bo ninnge kwlaa. Junman ng’ɔ di’n kwlaa, a yo maan be yo ye. I nnɛn’m be tru mɛn wunmuan’n nun kpokpaa.’ Kɛ e fa wun i lɛ’n sa’n, Satan waan nán ngbɛn ti yɛ Zɔbu su Ɲanmiɛn ɔn, naan pɔɔ mɔ Zɔbu di’n ti ɔ. Zɔbu i suɛn tɔnlɛ sɔ’n, ɔ kan Ɲanmiɛn i sufuɛ’m be kwlaa kpan. Ɔ maan Satan seli Zoova kɛ: ‘Sɛ ɔ waan n bua ato’n, saci i sa nun ninnge mun naan nian, sɛ w’a kanman wɔ ndɛ tɛtɛ cɛ’n, a ko fa ko se.’ Kɛ Satan tɔ́n Zɔbu i suɛn sɔ’n, nn Zɔbu siman nun mlɔnmlɔn.—Zɔb 1:8-11.
6. ?Akplowa dan mennin yɛ Satan kpɛli ɔ?
6 Satan sili wafa nga Zoova sie nglo nin asiɛ’n i su akplowa. Akplowa sɔ’n timan aɔwi. ?Yɛle kɛ Ɲanmiɛn li, ɔ kwla sie nglo nin asiɛ’n i klolɛ su yɛ ɔ o lɛ? ?Yɛ kɛ nga Satan fa kannin’n sa’n, like kwlaa nga sran’m be yo’n, be bɔbɔ be wun angunndan mɔ be bu’n ti yɛ be yo ɔ? I sɔ’n ti’n, Zoova fali Zɔbu wlali Satan sa nun kɛ ɔ sɛ i nian. I liɛ’n, cɛn wie lele ɔ́ fɛ́ i sɔ liɛ’n dí jɔlɛ. Kɛ Zoova yó sɔ kusu’n, ɔ si kɛ i sufuɛ’n nánti seiin naan ɔ su kpɔcimɛn i le. Satan kusu fali sa yalɛ’n guali Zɔbu su kpɛ kunngba gblu. Sanngɛ w’a kwlá saciman Zɔbu wun. I kasiɛn su’n, ɔ fali tukpaciɛ tɛ wie yili i su. Afin i waan: ‘Sran i wunnɛn’n yɛ ɔ ti cinnjin i sa nun ɔn. Kannzɛ sran kun i aɲanbeun’n ɔ ti sɛ, sɛ sa’n tɔ cinnjin kpa’n, ɔ fɛ i aɲanbeun’n fa to i ti ɔ ɔ yo ye.’—Zɔb 2:4.
7. ?Andɛ Ɲanmiɛn i sufuɛ’m be ɲrɛnnɛn m’ɔ ti kɛ Zɔbu liɛ’n sa’n yɛle mennin?
7 Kannzɛ Klistfuɛ sunman be ɲrɛnnɛn’n juman Zɔbu liɛ’n nun’n, sanngɛ be fɛ wie. Be kle wie’m be yalɛ, annzɛ kusu sa kekle tɔ be awlo’n nun. Sika yalɛ’n nin tukpaciɛ kusu kwla tin be su. Be nun wie’m be bɔbɔ be Ɲanmiɛn sulafilɛ’n ti’n, be kun be. Sanngɛ nán maan e se kɛ Satan yɛ ɔ fa sa yalɛ’n kwlaa yi e su ɔ. Afin wie liɛ’n, tukpaciɛ ng’ɔ o e su’n, e nin i fin e nin klun. Wie liɛ kusu’n, e bɔbɔ e ayeliɛ’n yɛ ɔ nin sa’n bali ɔ. (Galasifuɛ Mun 6:7) Sɛ kusu e wun oke yolɛ’n i su afɛ’n, e si kɛ e lemɛn i yowlɛ. Sɛ asiɛ’n i kejelɛ m’ɔ keje’n, annzɛ aunmuan dan wie m’ɔ tu’n ti’n, ninnge’m be saci’n, e si kɛ nán e bɔbɔ yɛ e kunndɛli ɔ. Sa sɔ’m be kwla tɔ e kwlaa e su. I lɛ nun’n, Biblu’n w’a seman kɛ e blɛ nga nun’n, ɲrɛnnɛn sɔ’m bé tɔ́ be nga be timan Zoova i sufuɛ’n be su. Naan e mɔ e ti i sufuɛ’n, Zoova yó naan bé tó fúan e.—Akunndanfuɛ’n 9:11.
8. ?Wafa sɛ yɛ Satan kwla fɛ i sa wla sa nga be tɔ e su’n be nun ɔn?
8 Sanngɛ Satan kwla fɛ i sɔ ɲrɛnnɛn’n tin e su naan e yaci Ɲanmiɛn su lafilɛ. I wie yɛle sa ng’ɔ tɔli akoto Pɔlu su mɔ i bɔbɔ kɛnnin i ndɛ’n. I waan: ‘Tukpaciɛ wie tɔli n su ɔ kali min kplo’n nun. Ɔ ti kɛ Satan i anzi sa, ɔ ba m bolɛ.’ (2 Korɛntfuɛ Mun 12:7) Sɛ Pɔlu i ɲinma yɛ ɔ yoli i ya o, annzɛ sɛ tukpaciɛ uflɛ wie o, ɔ si kɛ Satan kwla fɛ i sa wla nun naan i wla’n bo i wun dan. Ɔ maan ɔ saci i wun ndɛ. (Nyanndra Mun 24:10) Andɛ kusu’n, Satan kwla sin Klistfuɛ kun i awlobofuɛ mun, annzɛ i wiengu suklu ba mun, annzɛ awa kun mɔ i like yolɛ yo ya’n i lika kle i yalɛ.
9. ?Ngue ti yɛ ɔ fataman kɛ sa nga be tɔ e su’n be bo e nuan lele ɔ?
9 ?Ngue yɛ e kwla yo naan sa kekle sɔ’m be nun’n, y’a kpɔnzɔman ɔn? Ɲrɛnnɛn nun’n, e kwla kle kɛ e klo Zoova. E kwla yi i nglo kɛ nán gblɛ nun yɛ e lo e wun e man Zoova m’ɔ sie nglo nin asiɛ’n niɔn. (Zak 1:2-4) Kannzɛ ɲrɛnnɛn’n ti sɛ ti sɛ’n, nán maan e ɲin kpa e nantilɛ seiin su le. Sɛ e yo sɔ’n, é sú Zoova lele gúɛ i ti nin i bo. Akoto Piɛli seli i niaan Klistfuɛ mun kɛ: “N sran kpa mun, nán maan sa ng’ɔ tɔ amun su amun sa nianlɛ’n ti’n, ɔ bo amun nuan. Nán an bu i kɛ ɔ ti sa tɛ.” (1 Piɛr 4:12) Akoto Pɔlu kusu seli kɛ: ‘Sran kwlaa nga i waan ɔ nin Klist Zezi bé káci sran wunmuan naan ɔ́ yó Ɲanmiɛn klun sa’n, saan bé klé i yalɛ.’ (2 Timote 3:12) Lele nin andɛ’n, Satan te tɔn Zoova i Lalofuɛ’m be suɛn kɛ Zɔbu liɛ’n sa. Yɛle kɛ i waan be su Zoova sɔ, sanngɛ be timan sran kpa. I lɛ nun’n, Biblu’n kle weiin kɛ mɛn nga w’a ju i bue nuan yɛ nun’n, Satan o Ɲanmiɛn i sufuɛ’m be su kekle kpa.—Sa Nglo Yilɛ 12:9, 17.
W’a wunmɛn i ɲrɛnnɛn’n i bo kpɔkun be mɛnnin i afɔtuɛ tɛ
10. ?Ngue yɛ Zɔbu w’a wunmɛn i wlɛ ɔ?
10 E liɛ’n, e kwla wun sa nga ti yɛ e wun ɲrɛnnɛn’n i bo. Sanngɛ Zɔbu liɛ’n, w’a wunmɛn i ɲrɛnnɛn’n i bo’n. I sɔ’n ti’n, ɔ seli kɛ: ‘Anannganman yɛ ɔ mannin ɔn, Anannganman yɛ w’a fa ɔ.’ (Zɔb 1:21) Atrɛkpa’n, Satan yɛ ɔ yoli maan Zɔbu buli i kɛ Ɲanmiɛn yɛ ɔ su kle i ɲrɛnnɛn ɔn.
11. ?Ɲrɛnnɛn m’ɔ o Zɔbu su’n ti’n, angunndan mennin yɛ ɔ buli ɔ?
11 Sɛ bɔbɔ Zɔbu w’a kpɛman Ɲanmiɛn i nzowa kɛ nga i yi’n seli kɛ ɔ yo’n sa’n, sanngɛ i wla’n boli i wun dan. (Zɔb 2:9, 10) Ɔ seli kɛ: ‘Sran nga be buman Ɲanmiɛn i like fi’n, be wunmiɛn kɔ i ɲrun. ?Ɔ yo sɛ ti yɛ min yɛ Ɲanmiɛn i ngble’n kan min ɔn?’ (Zɔb 21:7-9) Blɛ wie nun bɔbɔ’n, ɔ flɛli wie’n. Ɔ seli kɛ: ‘Ee! Min Ɲanmiɛn, sɛ ɔ ti kɛ a fa min fia blɔlɔ lɔ ɔ yo ye’n, nn ń fía lɔ cɛ, nn ń fía lɔ lele saan ɔ ya’n ɔ́ sín. I sin, á klé cɛn, sɛ ɔ ju’n, kpɔkun ɔ wla kpɛ́n min su.’—Zɔb 14:13.
12, 13. ?Zɔbu i janvuɛ nsan’n be ndɛ nga be kannin’n, ɔ yoli i sɛ?
12 Zɔbu i janvuɛ nsan be bɛli i osu nianlɛ naan ‘be fɔnvɔ i.’ (Zɔb 2:11) Sanngɛ be ‘sran fɔnvɔlɛ’n yoli kekle.’ (Zɔb 16:3) Sɛ ɔ ti kɛ be ti sran kpa’n, nn be fɔnvɔli Zɔbu kpa. Sanngɛ be kpɔtɔli i awlɛn’n lele kpeli nun.—Zɔb 19:2; 26:2.
13 Ɔ maan atrɛkpa’n, Zɔbu usɛli i wun kɛ: ‘?Ngue ti yɛ min yɛ n wun ɲrɛnnɛn sɔ ɔ? Ngue sa bɔbɔ cɛ yɛ n yoli ɔ?’ Sanngɛ, ndɛ kwlaa nga i janvuɛ’m be kan kleli i’n ti ato kpan. Be waan Zɔbu bɔbɔ yɛ ɔ kpɛli i wun saɛ ba ɔ. Elifazi usɛli i kɛ: ‘Kɛ be wuli wɔ lele’n, w’a wun sran kpa kun m’ɔ yoman sa tɛ’n kɛ ɲrɛnnɛn w’a kun i le? Nga m’an sie i nzɔliɛ kpa’n yɛle nga: sran nga sa tɛ’n yɛ ɔ ti be junman yɛ be di’n, mɔ sa ng’ɔ timan su’n yɛ ɔ ti kɛ be like sa yɛ be lua’n, saan bé tí i su mma’n.’—Zɔb 4:7, 8.
14. ?Sɛ sa tɔ e su’n, ngue ti yɛ ɔ fataman kɛ e ka lɛ e se kɛ sa tɛ wie mɔ e yoli’n, i ti yɛ e su fɛ ɔ?
14 Nanwlɛ, sɛ y’a luaman like nga Ɲanmiɛn wawɛ’n klo i’n naan e lua like nga e bɔbɔ e klun klo’n, sa’m be kwla tɔ e su. (Galasifuɛ Mun 6:7, 8) Sanngɛ dɔ nga su’n, sɛ sa yalɛ’n ti sran’n, nn é sé kɛ ɔ nianman sran’n i nzuɛn’n naan w’a sike i. Ɔ maan, sɛ e bu i kɛ sran kun i wun sanwun ti’n ɲrɛnnɛn’n tó fúɛn i’n, e su laka e wun. Afin Zezi bɔbɔ mɔ ‘sa tɛ kaan sa nunmɛn i wun, m’ɔ nin sa tɛ yofuɛ’m b’a sanman nun’n,’ ɔ wuli ɲrɛnnɛn wie. Akoto Zaki kusu’n, i like ng’ɔ lafi su’n ti’n, be kunnin i. (Ebre Mun 7:26; Sa Nga Be Yoli’n 12:1, 2) Elifazi nin i wiengu’m be ato ndɛ’n ti’n, Zɔbu kplili i ti kɛ ɔ ti sɛsɛ naan w’a yoman like fi. Sanngɛ kɛ e niɛn i kpa sa’n, sɛ Zɔbu buli i kɛ Ɲanmiɛn bu i ndɛ kwlɛ’n, ɔ fin sa tɛ mɔ i janvuɛ’m be waan saan fii ɔ yoli’n.—Zɔb 34:5; 35:2.
Ukalɛ nga e kwla ɲɛn i ɲrɛnnɛn blɛ’n nun’n
15. ?Kɛ sa’m be tɔ e su’n, angunndan mennin yɛ sɛ e bu’n ɔ kwla uka e ɔ?
15 ?Ngwlɛlɛ mennin yɛ Zɔbu i su sa kwlaa sɔ’n kle e ɔ? Wie liɛ’n, kɛ e tran e bu angunndan’n, e wunman like nga ti yɛ sa kekle’m be tɔ e su’n, annzɛ e tɔ tukpaciɛ’n. Annzɛ e wunman like nga ti yɛ sran’m be kle e yalɛ’n. Afin sran wie’m be liɛ’n, kɛ a wun be sa’n, be wunmiɛn’n kɔ i ɲrun. (Jue Mun 73:3-12) I sɔ’n ti’n, wie liɛ’n ɔ fata kɛ e usa e wun kosan cinnjin yɛ mun: ‘?Klolɛ mɔ n klo Ɲanmiɛn’n ti’n, ń kwlá sú i lele n gúɛ i ti nin i bo? ?N kunndɛ kɛ min nantilɛ’n ti’n, Zoova “sɔ sran ng’ɔ kɛn i wun ndɛ’n su?”’ (Nyanndra Mun 27:11; Matie 22:37) Nán e tran lɛ naan sran wie’m be sinnzin ijɔlɛ’n ti’n, e bu i kɛ Ɲanmiɛn w’a yi e blo. E niaan bla kun mɔ tukpaciɛ’n o i su cɔcɔcɔ w’a di afuɛ kpanngban kpa’n, ɔ seli kɛ: “I kwlaa nga Zoova yo min’n, ɔ́ sɔ́n min nun. N si kɛ ɔ́ súan min bo. Afin i fanngan nun ti yɛ n te o lɛ ɔ.”
16. ?Wafa sɛ yɛ Biblu’n uka e naan y’a jran kekle ɔ?
16 Wafa nga Satan yo m’ɔ ɲan sran mun’n, e si i tra Zɔbu. Afin “e si i nzuɛn’n.” Yɛle kɛ angunndan tɛ ng’ɔ bu i e lika’n, e si i. (2 Korɛntfuɛ Mun 2:11) Biblu’n kusu o lɛ, i nun ngwlɛlɛ’n sɔnnin. Ɔ kan sran wie mɔ be nin Ɲanmiɛn be nantili klanman, sanngɛ be wunnin be ɲrun wie’n, be ndɛ. Akoto Pɔlu i ɲrun liɛ ng’ɔ wunnin i’n, ɔ trali i wiengu Klistfuɛ be nun sunman. Ɔ seli kɛ: ‘Ndɛ nga be klɛli be laa’n, be klɛli i kwlaa sɔ’n kɛ bé fá klé e ngwlɛlɛ naan Ɲanmiɛn fɛ i ndɛ sɔ’n wla e fanngan, naan e tra e awlɛn e fa e wla’n guɛ i su.’ (Rɔmfuɛ Mun 15:4) Alɛ dan nɲɔn su nun’n, be wlali abloki lɔ Zoova i Lalofuɛ kun i bisua. Kɛ ɔ ko yo naan bian kun w’a fɛ i Biblu’n w’a mɛn i’n ti’n, ɔ fɛli i cɛn ba nsan aliɛ’n mannin bian sɔ’n. Ɔ seli kɛ: “Awe’n kunnin min sɔ. Sanngɛ Biblu’n yoli min ye dan. Afin, i nun ndɛ’n ti kɛ aliɛ sa. E nin min wiengu mun e dili. Ɔ maan ɲrɛnnɛn blɛ sɔ’n nun’n, e wunmiɛn bali nun. Lele nin andɛ’n, Biblu sɔ’n te o min sa nun.”
17. ?Wafa sɛ yɛ Ɲanmiɛn kwla uka e naan y’a kpɔnzɔman ɔn?
17 Be klɛli Biblu’n naan ɔ wla e fanngan. Sanngɛ Biblu’n i akua’m be kwla uka e wie kpa naan y’a wun e su sa’m be trawlɛ. Sɛ e nian fluwa Index des publications de la Société Watch Tower nun’n, é kwlá wún kɛ sa ng’ɔ tɔ e su’n, ɔ tɔli e niaan wie su. (1 Piɛr 5:9) Kusu’n, asɔnun kpɛnngbɛn nga e si kɛ ɔ si sran aunnvuɛ’n, annzɛ Klistfuɛ nga w’a tin Ɲanmiɛn sulɛ’n nun’n, e kwla bo sa ng’ɔ o e su’n i su kle i. Sanngɛ nán e wla fi Ɲanmiɛn srɛlɛ’n su. Afin, ɔ ti cinnjin tra like ngba. Sɛ e srɛ Zoova’n, ɔ́ úka e, yɛ ɔ́ fɛ́ i wawɛ’n súan e bo. ?Pɔlu bɔbɔ yoli sɛ yɛ w’a kpɔnzɔman ɔn? ?Nán Ɲanmiɛn su m’ɔ lafi kɛ ɔ́ dé i’n ti ɔ? (2 Korɛntfuɛ Mun 12:9, 10) Ɔ seli kɛ: ‘I m’ɔ wla n fanngan’n ti’n, n kwla like kwlaa yo.’—Filipfuɛ Mun 4:13, NW.
18. ?Wafa sɛ yɛ e niaan Klistfuɛ’m be kwla uka e kpa ɔ?
18 Sɛ ukalɛ kpanngban sɔ mɔ e le i’n ti aliɛ’n, nn é sé kɛ nán maan e minndɛ kɛ be kpɛ be wla e nuan’n nun. Nyanndra Mun 24:10 waan: ‘Sɛ sa kekle wie tɔ wɔ su naan ɔ sa sin bubu wɔ’n, nn a leman awlɛn.’ Maan e fa sunnzun ase kun. Nvɔlɛ’m be kwla di waka sua kun mlɔnmlɔn, ɔ maan ɔ bu gua. I sɔ kunngba’n, Klistfuɛ ng’ɔ nanti seiin mɔ i sa sin bubu i’n, ɔ kwla saci. I sɔ’n ti’n, Zoova sin e niaan nga e nin be e su i likawlɛ’n be lika ɔ suan e bo. I sɔ kunngba’n yɛ kɛ be trali Zezi kɔnguɛ kasiɛn nun’n, ɔ yoli ɔ. Yɛle kɛ, anzi kun wa “wlɛli i fanngan.” (Lik 22:43) Pɔlu kusu’n, i nun m’ɔ ti bisuafuɛ mɔ bé fɛ́ i kɔ́ Rɔmu’n, i niaan Klistfuɛ’m be bɛli i atin kpalɛ. Be juli klɔ nga be flɛ i Apiisi’n i gua’n bo, yɛ be juli lika nga Aofuɛ suan nsan be o lɛ’n. Kɛ ɔ wunnin be’n, i ‘wla guali ase naan w’a la Ɲanmiɛn ase.’ (Sa Nga Be Yoli’n 28:15) Alemaɲi lɔ’n, kɛ bé fá e niaan bla kun kɔ́ be sran ɲrɛnnɛn klelɛ lika ng’ɔ o Ravensbrück lɔ’n, nn ɔ ti talua kan, i awlɛn sɔnman. Lele nin andɛ’n, i wla te kpɛn ukalɛ nga i niaan’m be ukɛli i lika sɔ’n nun lɔ’n su. I waan: “Kɛ n juli lɔ cɛ’n, e niaan bla kun wa sɔli min nun kɛ ɔ si min laa sa. Aniaan bla kun ekun liɛ’n, ɔ fa min yoli i wa. Ɔ ukali min naan e nin Zoova e afiɛn’n mantan kpa titi.”
‘An tra amun awlɛn’
19. ?Ngue ti yɛ Zɔbu kwla jrannin kekle Satan ɲrun ɔn?
19 Zoova seli kɛ Zɔbu ti sran m’ɔ ‘jran cinnjin, be kwlá sacimɛn i wun bɔ kaan sa.’ (Zɔb 2:3) Zɔbu i wla boli i wun, w’a wunman like nga ti yɛ sa’m be tɔli i su gblu. Sanngɛ, akplowa nga Satan kpɛli kɛ sran fi kwlá suman Ɲanmiɛn guɛmɛn i ti nin i bo’n, Zɔbu kleli kɛ ɔ ti ato. Wafa nga Zɔbu miɛnnin i ɲin naan ɔ nin Ɲanmiɛn b’a nanti klanman’n, w’a kplinman su kɛ ɔ́ yí i blo. Ɔ seli kɛ: ‘N su yaciman kɛ: “M’an yoman sa’n” i selɛ le naan m’an fa wu.’—Zɔb 27:5.
20. ?Ngue ti yɛ sɛ e tra e awlɛn’n, ɔ ti like kpa ɔ?
20 Kannzɛ sa’n ti sɛ e su naan e fa Zɔbu i ajalɛ’n su naan e jran su kpa’n, maan be laka e o, annzɛ be kle e yalɛ o, é nánti seiin titi e su fɔnman. Zezi seli Smirni asɔnun’n kɛ: ‘Nán srɛ kun amun ɲrɛnnɛn nga an wá wún i’n ti. An nian, mmusu’m be si Satan’n ɔ́ wá wlá amun nun wie’m be bisua, ɔ́ sá amun nían. Amún wún ɲrɛnnɛn le blu. Sɛ kunlɛ bɔbɔ yɛ bé kún amun’n, an tra amun awlɛn, yɛ like nga ń fá yó amun mo’n yɛle nguan’n, ɔ ti kɛ famiɛn kle sa.’—Sa Nglo Yilɛ 2:10.
21, 22. ?Kɛ kekle’n o e su’n, ndɛ mennin yɛ ɔ kwla fɔnvɔ e ɔ?
21 Satan i mɛn nga nun’n, saan ɔ́ sá e awlɛn tralɛ’n ɔ nin e nantilɛ seiin níɛn titi. Sanngɛ kɛ nga Zezi fa kannin’n sa’n, nán maan e koko ainman liɛ ti. Like ng’ɔ ti cinnjin kpa kɛ e yo’n, yɛle kɛ nán maan e kpɔci Ɲanmiɛn le. Pɔlu seli kɛ: ‘Kɛ m bu aɲrunɲan like nga Ɲanmiɛn wá yí i nglo klé e’n i angunndan’n, m buman ɲrɛnnɛn nga e wun i ndɛ’n i like fi.’ (Rɔmfuɛ Mun 8:18) Sɛ é kwlá sé’n, ɲrɛnnɛn mɔ Zɔbu wunnin i’n yoli le nɲɔn kun like. Afin aklunjuɛ nga Zɔbu dili i klikli nun’n, ɔ nin ng’ɔ wa dili i kasiɛn su’n, ɔ yoli dan trali ɲrɛnnɛn sɔ’n.—1 Piɛr 1:6.
22 Ɔ ju cɛn wie’n, ɲrɛnnɛn m’ɔ tin sran kun su’n ti’n, ɔ kwla usɛ i wun kɛ: “?Cɛn onin ko yɛ ń fíte nun ɔn?” Like suanlɛ ng’ɔ́ bá lɔ’n nun’n, é wá wún wafa nga e kwla nian Zɔbu i awlɛn m’ɔ trali’n su’n. Asa ekun’n, é wá wún wafa nga blɛ kekle’n nun e kwla wla e wiengu’m be fanngan naan b’a kpɔnzɔman’n.
?Wafa sɛ yɛ amún tɛ́ kosan’m be su ɔ?
• ?Zɔbu i nantilɛ seiin ti’n, akplowa dan mennin yɛ Satan sili ɔ?
• ?Ngue ti yɛ ɔ fataman kɛ sa nga be o e su’n be bo e nuan lele ɔ?
• ?Wafa sɛ yɛ Zoova uka e naan y’a jran kekle ɔ?
[Foto, bue 15]
Kɛ e niannian Biblu’n i akua’m be nun’n, ɔ nin kɛ e nin Klistfuɛ nga i ɲin w’a ti’n e koko yalɛ’n, ɔ nin kɛ e fa e wun wla Zoova sa nun’n, i sɔ’n uka e maan e kwla jran kekle.