Zɔbu manmannin Zoova dunman’n kpa
“Maan manmanlɛ’n ɔ yo i [Zoova] liɛ!”—ZƆB 1:21.
1. ?Wan yɛ atrɛkpa’n ɔ klɛli Zɔb fluwa’n niɔn? ?Yɛ blɛ benin nun yɛ ɔ klɛli ɔ?
FARAƆN fali Moizi i wun ya. Kɛ ɔ ko yo naan Moizi w’a wuman ti’n, ɔ wanndili Ezipti lɔ, ɔ ko trannin Madian. Blɛ sɔ’n nun’n, nn ɔ le afuɛ 40. (Sa Nga Be Yoli’n 7:23) I nun m’ɔ o lika sɔ’n nun lɔ’n, atrɛkpa’n, ɔ tili sa ng’ɔ juli Zɔbu su’n. Afin, Izi mɛn’n ɔ nin Madian be afiɛn’n w’a waman. Kɛ ɔ cɛli lele mɔ Moizi nin Izraɛlifuɛ’m bé wá wíe aawlɛ flɛnnɛn’n i kpɛ́’n, mɔ be mantannin Izi i wun koko lɔ’n, Moizi wa tili wafa nga Zɔbu i ndɛ’n fa guɛli i bo’n. Zuifu’m be waan kɛ Moizi klɛ́ Zɔb fluwa’n nn Zɔbu wuli ɔ nin a cɛman.
2. ?Wafa sɛ yɛ Zɔb fluwa’n uka Zoova i sufuɛ mun andɛ naan b’a lafi Ɲanmiɛn su kpa ekun ɔn?
2 Zɔb fluwa’n uka Ɲanmiɛn i sufuɛ mun andɛ naan b’a lafi Ɲanmiɛn su kpa ekun. ?Wafa sɛ? Yɛle kɛ Zɔbu i ndɛ’n yo maan sa cinnjin wie mɔ be juli ɲanmiɛn su lɔ’n mɔ be kan sran kpanngban’n e wun be wlɛ. Yɛ ɔ kle kɛ nglo nin asiɛ’n mɔ Ɲanmiɛn sie’n i su akplowa ng’ɔ tɔli’n, ɔ ti cinnjin kpa. Zɔbu i ndɛ’n yo ekun maan kɛ be se kɛ sran kun nin Ɲanmiɛn be nanti klanman’n, e wun i wlɛ. Asa ekun’n, like nga ti yɛ ɔ ju blɛ wie’n, Zoova yaci i sufuɛ’m be lɛ naan be wun ɲrɛnnɛn’n, ɔ uka e naan y’a wun i wlɛ wie. Asa kusu’n, Zɔb fluwa’n kle kɛ mmusu’m be si Satan yɛ ɔ ti Zoova i kpɔfuɛ dan’n niɔn, naan ɔ ti klɔ sran’m be kpɔfuɛ wie. Fluwa sɔ’n kle ekun kɛ, kɛ Zɔbu sa’n kannzɛ be kle klɔ sran mɔ fɔ o be nun’n be ɲrɛnnɛn sɛ, sanngɛ be kwla nanti seiin Zoova ɲrun. Siɛn’n, sa nga be kannin be ndɛ Zɔb fluwa nun’n, maan e fa e ɲin e sie i be nun wie’m be su.
Satan sali Zɔbu niannin
3. ?Zɔbu i su ndɛ benin yɛ e si i ɔ? ?Yɛ ngue ti yɛ Satan kleli i ɲrɛnnɛn ɔn?
3 Zɔbu ti aɲanbeunfuɛ yɛ ɔ le ɲrun. Ɔ ti awlobo kpɛnngbɛn yɛ ɔ niɛnnin i awlofuɛ’m be lika klanman. Ɔ ti weiin kɛ Zɔbu mannin sran’m be afɔtuɛ kpakpa kpɛkun ɔ niannin be nga be leman wie’n be lika. I cinnjin kpa’n yɛle kɛ Zɔbu ɲin yili Ɲanmiɛn. Kɛ bé kán Zɔbu ndɛ’n, be se kɛ “be kwlá saci-mɛn i wun bɔ kaan sa, ɔ yo sa i nuan su. I nyin yi Nyanmiɛn, ɔ klo-man kɛ ɔ yo sa tɛ.” Zɔbu i wun m’ɔ fa mantannin Ɲanmiɛn’n, i ti yɛ mmusu’m be si Satan kleli i ɲrɛnnɛn ɔn. Nɛ́n i wun m’ɔ ɲɛnnin i’n, annzɛ i ɲrun m’ɔ le i’n ti ɔ.—Zɔb 1:1; 29:7-16; 31:1.
4. ?Ngue yɛle seiin nantilɛ’n?
4 Zɔb fluwa’n i su fitilɛ nun’n, be kannin kɛ ɲanmiɛn su lɔ’n anzi kpanngban kpa be ɔli Zoova ɲrun lɔ. Satan ɔli lɔ wie. Ɔ ko sanmannin Zɔbu. (An kanngan Zɔb 1:6-11 nun.) Satan kannin Zɔbu i aɲanbeun’n i ndɛ, sanngɛ like ng’ɔ fɛli i ɲin sieli su kpa’n yɛle i seiin nantilɛ’n. Kɛ be se kɛ sran kun nanti seiin’n, yɛle kɛ be kwlá saciman sran sɔ’n i wun, yɛ ɔ yo sa i nuan su. Kɛ Biblu’n se kɛ sran kun nanti seiin’n, ɔ kle kɛ sran sɔ’n i Zoova sulɛ timan kun nin bue.
5. ?Ngue ndɛ yɛ Satan kɛnnin i Zɔbu su ɔ?
5 Satan seli kɛ nán klolɛ su yɛ Zɔbu su Ɲanmiɛn ɔ, naan i bɔbɔ i wun akunndan m’ɔ bu’n ti ɔ. Satan waan sɛ Zoova yaci Zɔbu i suralɛ naan w’a sɛsɛmɛn i kun’n, Zɔbu yáci i sulɛ. Kɛ mɔ Zoova kunndɛli kɛ ɔ́ kpɛ́ ndɛ sɔ’n nun ti’n, ɔ mannin Satan i atin kɛ ɔ kle Zɔbu m’ɔ ti sɛsɛfuɛ’n i ɲrɛnnɛn. Kɛ ɔ yoli sɔ’n, cɛn ba kunngba nun’n, be wa seli Zɔbu kɛ b’a wuɛ i nnɛn’m be kwlaa, annzɛ b’a wie wu. Naan be kunnin i junman difuɛ mun, yɛ i mma blu’m be wuli. (Zɔb 1:13-19) ?I sɔ mɔ Satan yoli’n ti’n Zɔbu yacili Zoova sulɛ? Ɲanmiɛn Ndɛ’n waan Zɔbu seli kɛ: “Anannganman yɛ ɔ mannin-ɔn, Anannganman yɛ w’a fa-a. Maan manmanlɛ’n ɔ yo i liɛ!”—Zɔb 1:21.
6. (a) ?Kɛ be yiali ɲanmiɛn su lɔ ekun’n, ngue sa yɛ ɔ juli ɔ? (b) ?Kɛ Satan kán kɛ Zɔbu suman Zoova klolɛ su’n, wan akunndan yɛ ɔ buli ɔ?
6 I sin’n, be yiali ɲanmiɛn su lɔ ekun. Satan kunngba’n sanmannin Zɔbu. Ɔ seli kɛ: “Sran i wunnɛn’n yɛ ɔ ti cinnjin i sa nun-ɔn. Kannzɛ sran kun i anyanbeun’n ɔ ti sɛ, sɛ sa’n tɔ cinnjin’n kpa’n, ɔ fɛ i anyanbeun’n fa to i ti-ɔ ɔ yo ye. Ɔ li maan ɔ sa kɛn i wunnɛn’n bɔ kaan sa naan nian, sɛ w’a kan-man wɔ wun ndɛ tɛtɛ cɛ’n, a ko fa ko se.” Maan e sie i nzɔliɛ kɛ Satan w’a kɛnmɛn i ndɛ’n w’a manman sran kunngba. Kɛ ɔ seli kɛ ‘kannzɛ sran kun i anyanbeun’n ɔ ti sɛ, sɛ sa’n tɔ cinnjin’n kpa’n, ɔ fɛ i anyanbeun’n fa to i ti-ɔ ɔ yo ye’n,’ nán Zɔbu i kunngba i seiin nantilɛ ndɛ yɛ ɔ kan ɔn. Sanngɛ “sran” kwlaa ng’ɔ su Zoova’n, ɔ wo nun wie. Kɛ ɔ yoli sɔ’n, Ɲanmiɛn mannin Satan i atin ekun kɛ ɔ fa tukpacɛ kain kun yi i Zɔbu su. (Zɔb 2:1-8) Sanngɛ nán Zɔbu i ɲrɛnnɛn’n i ngba yɛle ngalɛ’n.
Afɔtuɛ nga Zɔbu i aeliɛ’n man e’n
7. ?Wafa sɛ yɛ Zɔbu i yi’n nin sran nga be bɛli i nianlɛ’n be ukali Zɔbu i afɛ’n su ɔ?
7 I klikli nun’n, kɛ Zɔbu wún ɲrɛnnɛn’n, i yi wunnin wie. Afin i mma’m be wie ndɛ’n ɔ nin be aɲanbeun m’ɔ fili be sa’n, ɔ wluwluli i wun kpa. Kɛ ɔ wun i kɛ i wun su fɛ’n, ɔ kwla yoli i ya. Ɔ kpan seli Zɔbu kɛ: “?Kɛ ɔ o yɛ’n, a tɛ o wɔ osu kunngba’n nun? ?Sɛ b’a seman ɔ kɛ a ti kpa’n, ɔ yo sɛ li? Nán kpɛ Nyanmiɛn i nzowa naan wu fi.” I sin’n sran nsan be bali Zɔbu i wun wunlɛ. Be flɛ kun Elifazi yɛ be flɛ kun Bildadi yɛ kun ekun suan Zofar. Be yoli be wun kɛ be su wa koko Zɔbu naan bé fɔ́nvɔ i sa. Sanngɛ be timɛn i sɔfuɛ. Be ti gblɛfuɛ, yɛ be “sran fɔnvɔlɛ’n ɔ ti kekle.” I wie yɛle kɛ Bildadi seli Zɔbu kɛ i mma’m be yoli sa tɛ ti yɛ be ɲɛnnin i nuan su sa ɔ. Elifazi waan Zɔbu i sa tɛ m’ɔ yoli be laa’n be nuan akatua yɛ w’a ɲɛn i ɔ. Ɔ seli bɔbɔ kɛ Ɲanmiɛn buman sran’m be seiin nantilɛ’n i like fi! (Zɔb 2:9, 11; 4:8; 8:4; 16:2; 22:2, 3) Ɔ nin i sɔ ngba’n, Zɔbu w’a yaciman seiin nantilɛ. Kɛ ɔ ‘jran sili i we’n nun seli kɛ ɔ ti sɛsɛ Nyanmiɛn nyrun’n,’ ɔ ti su kɛ w’a yomɛn i kpa. (Zɔb 32:2) Sanngɛ, i kwlaa sɔ’n nun’n, w’a yaciman seiin nantilɛ le.
8. ?Ajalɛ kpa benin yɛ Elii kleli be nga be man sran’m be afɔtuɛ andɛ’n niɔn?
8 I sin’n, be kannin Elii m’ɔ bali Zɔbu osu nianlɛ wie’n i ndɛ. Ɔ sieli i su tieli ndɛ nga Zɔbu nin i janvuɛ nsan’m be kannin’n. Kannzɛ be sran nnan sɔ’m be ti kpɛnngbɛn trɛ i’n, sanngɛ ɔ kleli kɛ ɔ si ngwlɛlɛ tra be. Ɔ kannin ndɛ kleli Zɔbu aɲinyiɛ su. Seiin mɔ Zɔbu nantili ti’n, ɔ yoli i mo. Sanngɛ i waan Zɔbu kɛnnin i ngboko kɛ w’a yoman like fi. Kpɛkun Elii seli Zɔbu kɛ sɛ be nin Ɲanmiɛn be nanti klanman’n, ɔ ti kpa titi. (An kanngan Zɔb 36:1, 11 nun.) Be ng’ɔ fata kɛ be man sran’m be afɔtuɛ andɛ’n, nanwlɛ, ɔ kleli be ajalɛ kpa! Elii w’a kpliman w’a kanman ndɛ, ɔ sieli i su kpa, kɛ ng’ɔ fata kɛ ɔ yo be mo lɛ’n ɔ yoli sɔ, kpɛkun ɔ mannin afɔtuɛ kpakpa.—Zɔb 32:6; 33:32.
9. ?Wafa sɛ yɛ Zoova ukali Zɔbu ɔ?
9 I agualiɛ su’n, Zoova bɔbɔ yɛ ɔ nin Zɔbu be wa ijɔli ɔ. Ɲanmiɛn Ndɛ’n waan: “Anannganman wo aunngban dan’n i afiɛn lɔ, ɔ tɛli Zɔb su.” Ɔ fali kosan kpanngban usali Zɔbu. Ɔ yoli i sɔ liɛ’n amanniɛn su sanngɛ ɔ jrannin su kpa naan Zɔbu kaci i akunndan’n. Zɔbu tɛli su klanman, ɔ maan ɔ seli kɛ: “N timan like fi. [...] Ń trán ndutre nin nzuɛn’n nun, ń kán min wun ase.” Kɛ Zoova nin Zɔbu be wieli ijɔ’n, ndɛ ng’ɔ kan kleli Zɔbu i janvuɛ nsan mun’n, ɔ kleli kɛ ɔ fali be wun ya. Afin b’a ‘kɛn-mɛn i wun ndɛ kpa.’ Ɔ fata kɛ Zɔbu srɛ Ɲanmiɛn man be. Kɛ ɔ yoli sɔ’n, “Anannganman yoli maan ɔ [Zɔbu] sinnin i osu laa’n nun. Anannganman yoli maan i ninnge ng’ɔ lɛ i laa’n, ɔ wa nyɛnnin i sɔ kpɛ nnyɔn.”—Zɔb 38:1; 40:4; 42:6-10.
?E klo Zoova kpa?
10. ?Ngue ti yɛ Zoova buli ndɛ nga Satan kannin’n i ndɛ ɔ, annzɛ ngue ti yɛ w’a nunnunmɛn i ɔ?
10 Zoova yɛ ɔ ti like kwlaa Yifuɛ ɔ, yɛ i yɛ ɔ ti be Siefuɛ ɔ. ?Yɛ ngue ti yɛ ɔ buli ndɛ nga Satan kannin’n i ndɛ ɔ? Afin Ɲanmiɛn si kɛ sɛ w’a tɛman su’n, annzɛ sɛ ɔ nunnun Satan’n, nɛ́n i sɔ’n yɛ ɔ́ kpɛ́ ndɛ nga Satan kannin’n nun ɔn. Zɔbu m’ɔ ti Zoova i sufuɛ kpa’n, Satan seli kɛ sɛ i aɲanbeun ninnge’m be fi i sa’n, ɔ su nantiman seiin kun. Kɛ Satan kleli Zɔbu ɲrɛnnɛn’n, w’a yaciman seiin nantilɛ. I sin’n, Satan waan ɔ leman sran kun mɔ sɛ i wunnɛn yo i ya’n, ɔ su kacimɛn i sin siman Ɲanmiɛn ɔn. Zɔbu fɛli, sanngɛ w’a kacimɛn i sin w’a siman Ɲanmiɛn. Ɔ maan, kannzɛ fɔ o sran kpa sɔ’n nun’n, sanngɛ i ndɛ’n kleli kɛ Satan ti ato buafuɛ. ?Yɛ Ɲanmiɛn i sufuɛ onga’m be li?
11. ?Wafa sɛ yɛ Zezi kleli weiin kɛ Satan ti ato buafuɛ ɔ?
11 Kannzɛ Satan kle Ɲanmiɛn i sufuɛ kun i yalɛ sɛ, sanngɛ sɛ ɔ nanti seiin’n, ɔ yi i nglo kɛ, Satan m’ɔ ti e kpɔfuɛ m’ɔ siman aunnvuɛ’n, ɔ ti ato buafuɛ. Kɛ Zezi bali asiɛ’n su wa’n, ɔ wa kleli weiin kɛ Satan bua ato. Fɔ w’a tranman Zezi nun kɛ e si klikli Adam sa. Zezi nantili seiin lele ɔ fa wuli, ɔ maan ndɛ ti kpɛli. Afin ɔ kleli weiin kɛ suɛn ngbɛn yɛ Satan tɔnnin sran mun ɔn.—Sa Nglo Yilɛ 12:10.
12. ?Zoova i sufuɛ’m be tinuntinun’n, ngue yɛ be kwla yo m’ɔ ti be ti su trɔ ɔ?
12 Kannzɛ bɔbɔ ɔ ti sɔ’n, Satan yaciman Zoova i sufuɛ’m be sa nianlɛ. E tinuntinun e kwla nanti seiin e fa kle kɛ klolɛ mɔ e klo Zoova’n i ti yɛ e su i ɔ, naan nán e bɔbɔ e ninnge’m be ɲanlɛ ti ɔ. I sɔ yolɛ’n ti e kwlaa e ti su trɔ. ?Wafa sɛ yɛ e bu i sɔ liɛ’n niɔn? Kɛ e nanti seiin Zoova i sulɛ nun’n, ɔ ti e cenjele like. Asa ekun’n, Zoova man e wunmiɛn naan y’a kwla tra e awlɛn. Kpɛkun kɛ ng’ɔ fa yoli i Zɔbu liɛ’n nun sa’n, sa ng’ɔ sɔnman e nun’n, ɔ kplinman su kɛ ɔ tɔ e su. Kɛ mɔ e si sɔ’n, ɔ fɔnvɔ e.—1 Korɛntfuɛ Mun 10:13.
Satan ti Ɲanmiɛn i kpɔfuɛ, yɛ ɔ bumɛn i like fi
13. ?Ngue ndɛ wie mun ekun yɛ Zɔb fluwa’n yi be nglo Satan su ɔ?
13 Wafa nga Satan tanndan Zoova ɲrun’n, Biblu’n i bue nga be klɛli i Glɛki nun’n kɛn i su ndɛ kpanngban. Sa Nglo Yilɛ fluwa nun’n, e wun i kɛ ɔ ka kaan sa’n, Zoova wá klé kɛ i yɛ ɔ le atin sie nglo nin asiɛ’n niɔn. Kpɛkun bé núnnún Satan mlɔnmlɔn. Biblu’n i bue nga be klɛli i Ebre nun’n i nun’n, be kannin Satan i junman tɛ ng’ɔ di i Zoova i klɔklɔlɛ nun’n, ɔ nin klɔ sran’m be lakalɛ’n nun’n i ndɛ. Zɔb fluwa’n uka e naan y’a si ɲin klekle nga Satan yo’n i su ndɛ wie mun ekun. Kɛ anzi’m be yiali ɲanmiɛn su lɔ’n mɔ Satan ɔli wie’n, nán Zoova manmanlɛ ti yɛ ɔ ɔli ɔ. Kɛ ɔ́ kɔ́’n, akunndan tɛ o i klun. Kɛ Satan sanmannin Zɔbu mɔ be mɛnnin i atin kɛ ɔ sɛ i nian’n, ɔ “jasoli Anannganman nyrun lɛ ɔli.”—Zɔb 1:12; 2:7.
14. ?Ajalɛ benin yɛ Satan fɛli i Zɔbu wun ɔn?
14 Kɛ nga e fa wun i lɛ’n, Zɔb fluwa’n kle kɛ Satan yɛ ɔ ti klɔ sran’m be kpɔfuɛ m’ɔ siman aunnvuɛ’n niɔn. Aɲia nga be yoli i ɲanmiɛn su lɔ mɔ Zɔb 1:6 kɛn i ndɛ’n, ɔ nin nga Zɔb 2:1 kɛn i ndɛ’n, e siman blɛ ng’ɔ o be afiɛn’n nun’n. I sɔ blɛ nun’n, Zɔbu wunnin ɲrɛnnɛn kpa. Zɔbu nantili seiin ti’n, Zoova kwla seli Satan kɛ: “[Zɔb] tɛ jran cinnjin, be kwlá saci-mɛn i wun bɔ kaan sa. ?Ɔ waan n kle i nyrɛnnɛn ngbɛn?” Sanngɛ Satan w’a kplinman su kɛ ndɛ ng’ɔ kɛnnin i Zɔbu su’n ti ato. I kpa bɔbɔ’n, ɔ seli kɛ maan be fa sa kekle kun ekun yi i Zɔbu su naan be fa sɛ i nian. Ɔ maan, kɛ Zɔbu o pɔɔ nun’n, Satan sɛli i niannin. Asa ekun’n, kɛ i sa nun ninnge’n kwlaa wieli’n, ɔ sɛli i ekun. I lɛ nun’n, e wun i weiin kɛ i yalɛfuɛ mun o, i be nga sa kekle o be su mun o, Satan siman be aunnvuɛ. Ɔ kpɔ sran nga be nanti seiin’n. (Zɔb 2:3-5) Kannzɛ ɔ yoli sɛ, Zɔbu yili i nglo kɛ Satan ti ato buafuɛ.
15. ?Ngue nun yɛ e blɛ liɛ’n nun sran nga be kpɔcili Ɲanmiɛn’n be aeliɛ’n nin Satan liɛ’n ti kun ɔn?
15 Sran ng’ɔ dun mmua kpɔcili Ɲanmiɛn’n yɛle Satan. E blɛ liɛ nun’n, be nga be kpɔci Ɲanmiɛn’n be nzuɛn’n fa Satan liɛ’n. Be aeliɛ’n kwla kle kɛ be ɲin yiman asɔnun’n nun sran mun ɔ nin asɔnun kpɛnngbɛn mun yɛ e Ɲrun dinfuɛ’m be anuannzɛ’n. Sran sɔ’m be nun wie’m be kloman kɛ e fa dunman Zoova’n e fa flɛ Ɲanmiɛn. Be kunndɛman kɛ bé súan Zoova i su like, naan bé sú i. Be kunndɛ kɛ bé yó be nga be nanti seiin be tɛ kɛ nga be si Satan fa yo’n sa. (Zan 8:44) I sɔ’n ti yɛ Zoova i sufuɛ’m be faman be wun mantanman be kaan sa’n niɔn.—2 Zan 10, 11.
Zɔbu manmannin Zoova dunman’n kpa
16. ?Wafa sɛ yɛ Zɔbu nin Zoova be nantili ɔ?
16 Zɔbu fali Zoova i dunman’n flɛli i, kpɛkun ɔ mɛnmɛnnin i. Kɛ ɔ tili i mma’m be wie ndɛ’n bɔbɔ mɔ i wla boli i wun’n, i nuan w’a toman Ɲanmiɛn. Kannzɛ Zɔbu seli kɛ Ɲanmiɛn yɛ maan i ninnge’m be kwlaa be fili i sa’n, sanngɛ ɔ manmannin Zoova i dunman’n. Zɔbu i ndɛ ng’ɔ kannin be’n be nun kun nun’n, ɔ seli kɛ: “Be nyin b’ɔ yi Anannganman’n, yɛ be flɛ i ngwlɛlɛ nin-ɔn. Sa tɛ’n i atin’n su jasolɛ’n yɛ ɔ ti ngwlɛlɛ nin-ɔn.”—Zɔb 28:28.
17. ?Ngue yɛ ɔ ukali Zɔbu naan w’a nanti seiin titi ɔ?
17 ?Ngue yɛ ɔ ukali Zɔbu naan w’a nanti seiin titi ɔ? Ɔ ti weiin kɛ ka naan sa yalɛ’n w’a tɔ i su’n, ɔ nin Zoova be afiɛn’n sɛ. Kannzɛ bɔbɔ kɛ Satan fɛli i ɲin wlawlali Zoova’n like fi kleman kɛ Zɔbu sili nun’n, sanngɛ ɔ fuali kpa kɛ ɔ su kpɔciman Zoova le. Ɔ seli kɛ: “N su yaciman kɛ: ‘M’an yoman sa’n’ i selɛ le naan m’an fa wu.” (Zɔb 27:5) ?Zɔbu yoli sɛ yɛ ɔ nin Ɲanmiɛn be afiɛn’n mantannin sɔ ɔ? Yɛle kɛ ɔ tili wafa nga Ɲanmiɛn nin i nannan Abraamu nin Izaaki yɛ Zakɔbu be nantili’n, yɛ i sɔ’n yoli i fɛ. Asa ekun’n, kɛ ɔ niannin ninnge nga Zoova yili be’n, ɔ wunnin i wlɛ kɛ Zoova nzuɛn’n ti kpa.—An kanngan Zɔb 12:7-9, 13, 16 nun.
18. (a) ?Wafa sɛ yɛ Zɔbu nin Zoova be nantili klanman ɔn? (b) ?Wafa sɛ yɛ e nian Zɔbu i ajalɛ klanman’n su ɔ?
18 Like nga Zɔbu sili i Zoova su’n, ɔ yoli maan ɔ kunndɛli kɛ Zoova klun jɔ i wun. Wienun ɔn, i mma’m be yoli sa wie annzɛ “be kannin Nyanmiɛn i ya.” I sɔ’n ti’n, ɔ yili tɛ mannin Ɲanmiɛn titi. (Zɔb 1:5) I nun mɔ afɛ’n tí Zɔbu kpa bɔbɔ’n, ɔ kannin Zoova wun ndɛ kpakpa. (Zɔb 10:12) Nanwlɛ, ɔ kleli e ajalɛ klanman! Ɔ fata kɛ e kusu e suan Zoova su like kpa titi naan e si ninnge nga i waan ɔ́ yó be’n. Kusu’n, e le ninnge kpakpa mɔ be kwla uka e naan e nin Zoova e afiɛn’n w’a mantan kpa ɔ. Ninnge sɔ mun yɛle Biblu’n nun like suanlɛ’n, nin aɲia’m be bo kɔlɛ’n, ɔ nin Ɲanmiɛn srɛlɛ’n yɛ jasin fɛ’n i bolɛ’n. Asa ekun’n, e yo like kwlaa nga e kwla yo naan sran’m b’a si Zoova i dunman’n. Wafa nga Zɔbu i seiin nantilɛ’n jɔli Zoova klun’n, i kunngba’n andɛ Ɲanmiɛn i sufuɛ’m be seiin nantilɛ’n yo maan i klun jɔ. Like suanlɛ ng’ɔ́ bá lɛ nun’n é wá kɛ́n i sɔ’n i ndɛ.
?Amun wla kwla kpɛn su?
• ?Ngue ti yɛ mmusu’m be si Satan fɛli i ɲin sieli i Zɔbu su ɔ?
• ?Sa benin mun yɛ be tɔli Zɔbu su ɔ? ?Yɛ ngue yɛ ɔ yoli ɔ?
• ?Ngue yɛ ɔ kwla uka e naan y’a nanti seiin titi kɛ Zɔbu sa ɔ?
• ?Ngue yɛ e suɛn i Satan su Zɔb fluwa’n nun ɔn?
[Foto, bue 12]
?Blɛ benin nun yɛ be kwla sa e seiin nantilɛ’n nian ɔn?