Maan Ɲanmiɛn klun sa yolɛ’n yɛ e ɲin tran su dɔ nga su ɔ
‘Klist wuli be ngba be ti, i sɔ’n ti’n, olɛ nga be o lɛ’n, nán be bɔbɔ be olɛ yɛ be wo-ɔ.’—2 KORƐNTFUƐ MUN 5:15.
1. An kan sa kun mɔ ngaliɛ difuɛ kun yoli’n, i ndɛ.
BE FLƐ ngaliɛ difuɛ kun kɛ Arɔn.a Sran ble mɛn’n nun yɛ ɔ di i junman’n niɔn. Cɛn kun’n, ɔ nin aniaan wie’m be ɔli klɔ kun su. Klɔ sɔ’n, ɔ o lika’n i mmuammua crɔcrɔ kpa, yɛ asɔnun kaan kun o lɔ. Alɛ tɔli lɔfuɛ’m be afiɛn. Arɔn waan: “Kɛ alɛ’n wieli’n, e yɛ e nin e loto’n e dun mmua juli lɔ. Alɛ’n ti’n, y’a kwlá timan aniaan nga be o lɔ’n be ngan. Ɔ maan kɛ é kɔ́’n, e fali aliɛ nin tralɛ naan é fá kó mán be. Sanngɛ kusu’n, e fali Biblu’n i akua mun, ɔ nin kasɛti video Les Témoins de Jéhovah : un nom, une organisation.b Klɔfuɛ be yiali be lika wie lɛ kpata kun bo, ɔ nin i nun televiziɔn. Kɛ mɔ be bali kpanngban ti’n, e fa kleli be kpɛ nɲɔn naan be ngba b’a nian. Be nun kpanngban be kunndɛli be kɛ bé súan Biblu’n nun like. Nanwlɛ, e ɲin mɔ e miannin e ɔli klɔ sɔ’n su lɔ’n, w’a yoman ngbɛn.”
2. (a) ?Ngue ti yɛ ɔ o Klistfuɛ’m be klun kɛ bé yó Ɲanmiɛn klun sa ɔ? (b) ?Kosan benin yɛ é wá tɛ́ be su ɔ?
2 ?Ngue ti yɛ Arɔn nin i wiengu’m be ɔli lika kɛ ngalɛ sa’n nun lɔ ɔ? Yɛle kɛ e ti kpɔlɛ tɛ mɔ Zezi yili’n, be si su ye. I sɔ’n ti’n, be fali be wun mannin Ɲanmiɛn kɛ bé yó i klun sa’n. Kɛ be sa’n, e Klistfuɛ kwlaa mɔ e fali e wun mannin Ɲanmiɛn’n, ɔ o e klun kpa kɛ é yó ninnge’n kwlaa “jasin fɛ’n ti.” Afin ‘olɛ nga e o lɛ’n, nán e bɔbɔ e olɛ yɛ e o ɔ.’ (2 Korɛntfuɛ Mun 5:15; 1 Korɛntfuɛ Mun 9:23) Asa ekun’n, e si kɛ, kɛ mɛn’n wá wíe’n, sika nin dunman dan’n be su yoman like fi ye. I sɔ’n ti’n, blɛ mɔ e te yo juejue’n, e waan é fɛ́ i sɔ blɛ’n é yó Ɲanmiɛn klun sa. (Akunndanfuɛ’n 12:1) ?Sanngɛ, wafa sɛ yɛ e kwla yo sɔ sakpa ɔ? ?Kusu’n, nin yɛ e kwla to e ti e naan y’a ɲan wunmiɛn ɔn? ?Yɛ Ɲanmiɛn junman fanunfanun benin yɛ e kwla ɲan be wun atin ɔn?
Nán maan e kpli
3. ?Kɛ é yó Ɲanmiɛn klun sa’n, ngue su yɛ e bo i bo ɔ?
3 Ɲanmiɛn klun sa mɔ e se kɛ é yó’n, sɛ ɔ ti atin’n, nn é sé kɛ ɔ timan tika. É nánti su lele é fá jú e awieliɛ. Kɛ é bó i bo’n, e di Ɲanmiɛn junman dilɛ suklu, e kanngan Biblu’n nun cɛn kwlaa, e bo jasin fɛ’n. Kpɛkun kɛ é kɔ́ e ɲrun’n, be yo e batɛmu. Kɛ é yó i kwlaa sɔ’n, e wla kpɛn ndɛ yɛ mɔ akoto Pɔlu kannin’n su. I waan: ‘Mian ɔ ɲin yo ninnge sɔ mun, maan be yolɛ’n lo wɔ kpa naan sran’n kwlaa be wun kɛ a su yo kpa tra laa’n.’ (1 Timote 4:15) Sanngɛ, nán kɛ e waan é yó kpa tra laa’n naan é kúnndɛ dunman ɔn. Ɲanmiɛn klun sa yolɛ’n ti yɛ e yo sɔ ɔ. Kɛ e yo sɔ kusu’n, e kle kɛ sa kwlaa nun’n, Ɲanmiɛn yɛ ɔ bo e ɲrun atin ɔn. Afin, i atin liɛ’m be ti kpa tra e liɛ’n lele.—Jue Mun 32:8.
4. ?Wafa sɛ e kwla yaci e liɛ kokolɛ ɔ?
4 Sɛ Ɲanmiɛn junman’n i dilɛ’n nun e waan é yó kpa tra laa’n, naan sanngɛ e sisi e bo, annzɛ kusu e bu e bɔbɔ e wun akunndan dan’n, ɔ su yoman ye. (Akunndanfuɛ’n 11:4) I sɔ’n ti’n, like ng’ɔ fata kɛ e dun mmua yo naan y’a su Ɲanmiɛn aklunjuɛ su naan y’a uka e wiengu mun’n, yɛle kɛ e yaci kokolɛ. I lɛ nun’n, amun e fa Eriki i ndɛ e nian. Eriki waan ɔ́ kɔ́ asɔnun mɔ be kan aniɛn uflɛ lɔ’n nun naan ɔ́ kó úka be. Sanngɛ, ɔ yaciman kokolɛ. ‘?Ń kwlá trán asɔnun sɔ’n nun? ?Aniaan’m be kusu’n, bé sɔ́ min nun yɛ min nin be é kwlá trán klanman?’ I sɔ yɛ cɛn kwlaa ɔ koko ɔ. Sanngɛ i sin’n, i waan: “N wa wunnin i wlɛ kɛ n kpa’n, ɔ fata kɛ n yaci kokolɛ naan n bu like nga n kwla yo man aniaan mun’n, i akunndan. I sɔ’n ti’n, n srɛli Ɲanmiɛn. Kpɛkun, yɛ n jaso n ɔli ɔ. Dɔ nga su’n, junman nga n di i lɔ’n, ɔ yo min fɛ kpa.” (Rɔmfuɛ Mun 4:20) Nanwlɛ, sɛ e klɛn e wun e su Ɲanmiɛn yɛ e uka e wiengu mun’n, é liɛ yó ye, yɛ e klun jɔ́ dan.
5. ?Sɛ e waan é dí Ɲanmiɛn i junman’n, ngue ti yɛ ɔ fata kɛ e siesie e wun kpa ɔ? Amun fa aniaan wie’m be ndɛ yiyi nun.
5 Sɛ e waan é dí Ɲanmiɛn i junman’n naan ɔ yo ye’n, ɔ fata kɛ e siesie e wun kpa. I wie yɛle kɛ, ɔ fataman kɛ kalɛ dan tran e su. Afin sɛ ɔ yo sɔ’n, kalɛ’n i tualɛ ti’n, e ɲin su kwlá tranman Ɲanmiɛn i junman liɛ’n su naan y’a di i kpa. Biblu’n waan: “Sran ng’ɔ fa like sran sa nun’n, ɔ kaci kɛ sran sɔ i akua sa.” (Nyanndra Mun 22:7) I sɔ’n ti’n, maan e lafi Zoova su e dun mmua yo i ninnge liɛ mun. I liɛ’n, e akunndan su yoman nɲɔnnɲɔn. I sɔ yɛ Guoming nin i niaan bla nɲɔn’n, be yoli ɔ. Yɛle kɛ, be tranwlɛ lɔ sua nga be nin be nin o nun’n, i gua’n cɛnnin. Kusu’n, nán kɛ junman kpa yɛ bé ɲɛ́n i naan b’a di ɔ. I sɔ’n ti’n, sika kan nga be ɲɛn i’n, be yo i cɛcɛ. Kpɛkun be sran nsan’n, be cɛ kalɛ’m be nun. Guoming waan: “Ɔ ju cɛn wie’n, e nun wie diman junman. Sanngɛ, e kwla nian e nin’n i lika yɛ e yaciman atin bolɛ junman’n. E nin kusu’n, w’a kunndɛman cɛn kun sa le kɛ e yaci Ɲanmiɛn ninnge’m be yolɛ naan e niɛn i lika naan ɔ tran pɔɔ nun. I sɔ’n ti’n, é yó i mo dan.”—2 Korɛntfuɛ Mun 12:14; Ebre Mun 13:5.
6. Like ng’ɔ kle kɛ e kwla kaci e nantilɛ’n e yo Ɲanmiɛn klun sa’n, an fa sran kun i ndɛ yiyi nun.
6 Sɛ sika kunndɛlɛ annzɛ like uflɛ yolɛ ti’n, amun ɲanman amun ti’n, ɔ fata kɛ an kpli amun ti naan Ɲanmiɛn i junman liɛ’n w’a kaman siɛn. Sanngɛ, nán cɛn ba kunngba nun yɛ sran kaci ɔ. I sɔ’n ti’n, sɛ e fa ajalɛ wie naan w’a yoman ye’n, nán maan e se kɛ e liɛ’n w’a wie. Amun e fa Koichi i ndɛ e nian. Koichi i gbanflɛn nun’n, ɔ suannin Biblu’n nun like. Sanngɛ i like m’ɔ klo i m’ɔ fɛ i blɛ ngba’n, yɛle video nun ngowa kanlɛ. Cɛn kun’n, i bɔbɔ waan ɔ tran buli akunndan, ɔ usɛli i wun kɛ: ‘?Naan n kpa’n, ngue yɛle nga ń yó i yɛ’n? ?N kaklaka nga m’an yo m’an di afuɛ 30 tra su yɛ’n, n su yoman like kpa kun sa naan nga su yɛ ń ká trilili ɔ?’ Biblu’n nun like m’ɔ yacili i suanlɛ’n, ɔ wa sɛli i sin suannin i ekun. W’a yoman pɔpɔ i sa nun. Sanngɛ, w’a yacimɛn i suanlɛ. Ɔ srɛli Ɲanmiɛn yɛ aniaan’m be ukɛli i. Ɔ maan, ɔ wlɛli i ɲin su yiyilɛ’n i ase. (Lik 11:9) Kɛ é sé yɛ’n, Koichi ti asɔnunfuɛ’m be lika nianfuɛ, i sɔ’n yo i fɛ kpa.
Maan e yo ngwlɛlɛfuɛ
7. ?Ngue ti yɛ ɔ fata e fa ngwlɛlɛ e di Ɲanmiɛn i junman’n niɔn?
7 Nvɛɛfuɛ kwlá diman Ɲanmiɛn i junman’n. (Ebre Mun 6:11, 12) Sanngɛ kusu’n, Zoova w’a seman kɛ e di i junman’n lele naan sɛ é kwlá sé’n, e fɛ kɛ akɔ nuan nun kakaa sa. I sɔ’n ti’n, maan e di i ngwlɛlɛ su naan Ɲanmiɛn ɲan ɲrun. Yɛle kɛ, maan e kle kɛ e lafiman e bɔbɔ e wun su naan Ɲanmiɛn su yɛ e lafi e di i junman’n niɔn. (1 Piɛr 4:11) Zoova seli kɛ ɔ́ mán e wunmiɛn naan e di i junman’n. Sanngɛ, w’a seman kɛ e yo like ng’ɔ tra e kpɛn’n. (2 Korɛntfuɛ Mun 4:7) Sɛ e kunndɛman kɛ Ɲanmiɛn junman’n tin e su’n, maan e si e wun aunnvuɛ.
8. ?Kɛ Klistfuɛ kun fɛli i wun wlali junman nun naan i kunngba’n, ɔ́ dí Zoova i junman liɛ’n, i bo’n guali sɛ? ?Ajalɛ benin yɛ i sin’n, ɔ fali ɔ?
8 Amun e fa e niaan bla Ji Hye m’ɔ o Azi lɔ’n i ndɛ e nian. Ɔ di junman kpɛkun i kunngba’n, ɔ ti atin bofuɛ. Junman m’ɔ di’n kusu timan blɛblɛ. Ɔ yoli sɔ lele afuɛ nɲɔn. Ɔ seli kɛ: “N mian min ɲin n di junman naan n kunngba’n, m’an di Zoova liɛ’n. Kɔnguɛ’n, n lafiman kpa. Afin, dɔ nnun cɛ yɛ n lafi ɔ. Ɔ maan, m’an wunman min wun fɛ Zoova junman’n i dilɛ’n nun kun.” Kɛ ɔ ko yo naan Ji Hye w’a ‘fɛ i wla’n kwlaa nin i akunndan’n kwlaa, nin i wunmiɛn’n kwlaa’ w’a su Zoova’n, ɔ kunndɛli junman uflɛ. (Mark 12:30) I waan: “Min osufuɛ’m be waan saan fii n kunndɛ sika kpanngban. Sanngɛ, Ɲanmiɛn junman liɛ’n yɛ n dun mmua n mian min ɲin n dili ɔ. Sika nga n ɲɛn i’n kusu, ɔ ju min. N kwla to tralɛ klanman, n wla. Siɛn’n, n lafi kpa pɔɔ. Min wun yo n fɛ Zoova junman’n i dilɛ’n nun. Kpɛkun, min nin i e afiɛn’n mantan kpa tra laa’n. Afin, n faman min blɛ’n i dan lika n yoman mɛn’n nun ninnge mun.”—Akunndanfuɛ’n 4:6; Matie 6:24, 28-30.
9. ?Kɛ e mian e ɲin e bo jasin fɛ’n, wafa sɛ yɛ i sɔ’n kwla uka sran mun ɔn?
9 I yo, nán e kwlaa yɛ e kwla yo blɛ kwlaa nun Ɲanmiɛn junman difuɛ ɔ. Ɔ maan, sɛ e ti kpɛnngbɛn annzɛ e kwlaman nun’n, maan e si kɛ like nga e kwla yo mɔ e yo’n, Zoova bu i like dan kpa. (Lik 21:2, 3) Kusu’n, e siman wafa nga e ɲin mɔ e mian’n, ɔ kwla wla sran uflɛ fanngan ju’n. Yɛle kɛ wie liɛ’n, kɛ é bó jasin fɛ’n, sran’m be sɔman e nun klanman. Kannzɛ be yo sɔ’n, sanngɛ be sie e nzɔliɛ kpa. Jasin fɛ’n mɔ e bo’n, e si kɛ sran wie’m bé síe be su. (Matie 13:19-23) Wie’m be liɛ’n, sa ng’ɔ ju be bɔbɔ be su’n annzɛ mɛn’n m’ɔ kaci ti’n, cɛn uflɛ be kwla sɔ e nun klanman. I kwlaa yoli o, Ɲanmiɛn junman yɛ e di ɔ. Afin, e nin ‘Ɲanmiɛn yɛ e di junman’n niɔn.’—1 Korɛntfuɛ Mun 3:9.
10. ?Ngue yɛ e kwlaa e kwla yo i asɔnun’n nun ɔn?
10 Kannzɛ e ti sɛ e ti sɛ, e kwlaa e kwla uka e awlofuɛ mun nin e niaan Klistfuɛ mun. (Galasifuɛ Mun 6:10) E nzuɛn kpa ti’n, cɛn wie lele be kwla kaci be nzuɛn liɛ’n. (Akunndanfuɛ’n 11:1, 6) Kɛ asɔnun kpɛnngbɛn nin asɔnunfuɛ’m be lika nianfuɛ’m be tu be klun be di be junman’n, ɔ maan asɔnunfuɛ’m be nin Zoova be afiɛn’n mantan kpa. Kpɛkun, be bo jasin fɛ’n i kpa kɔ i ɲrun. E si kɛ, kɛ e ‘di e Min’n i junman’n kpa’n, ɔ kaman ngbɛn.’—1 Korɛntfuɛ Mun 15:58.
Maan Ɲanmiɛn klun sa yolɛ’n kaci e junman mlɔnmlɔn
11. Sɛ e fa e asɔnun liɛ’n nun junman mun e sie’n, junman benin ekun yɛ e kwla ɲan be wun atin ɔn?
11 E Klistfuɛ mun’n, e klo fɛ. Sanngɛ, like kwlaa nga é yó’n, e klo kɛ é yó naan Ɲanmiɛn ɲan ɲrun. (1 Korɛntfuɛ Mun 10:31) E bo jasin fɛ’n, yɛ e kle sran’m be like naan be kaci Zezi i sɔnnzɔnfuɛ. Sɛ e yo i sɔ’n juejue su’n, é ɲán junman uflɛ wun atin. (Matie 24:14; 28:19, 20) I wie yɛle kɛ, e kwla ɲan atin e ko bo jasin fɛ’n i lika uflɛ, annzɛ lika mɔ be kan aniɛn uflɛ lɔ’n. Asɔnun kpɛnngbɛn nin asɔnunfuɛ’m be lika nianfuɛ mɔ be nin a jaman bla’n, be kwla ko di suklu nga be flɛ i kɛ École de formation ministérielle. Kpɛkun i sin’n, be kwla sunman be asɔnun nga be sa mian sran mɔ be si junman’n i di kpa’n be wun’n, be nun. Annzɛ kusu’n, be kwla sunman be nvle uflɛ nun. Klistfuɛ nga b’a ja bla mɔ be leman ba’n, mɔ be ti titi atin bofuɛ’n, be kwla ko di ngaliɛ difuɛ’m be suklu’n. Kpɛkun i sin’n, be sunman be nvle uflɛ nun. Betɛli lɔ kɔlɛ’n kusu o lɛ. Asɔnun sua nin Betɛli’m be kplanlɛ’n, ɔ nin be ye siesielɛ’n o lɛ wie.
12, 13. (a) ?Ngue yɛ ɔ kwla uka amun naan amun a fa Ɲanmiɛn junman kun wun i ajalɛ kɛ amún dí ɔ? (b) Wafa nga kɛ sran kun sie junman kun di kpa’n ti’n, ɔ kwla di uflɛ’n, amun fa aniaan wie’m be ndɛ yiyi nun.
12 ?Junman benin yɛ ɔ fata kɛ amun fa amun ɲin sie su ɔ? Zoova mɔ amun fali amun wun mɛnnin i’n, amun lo amun wun mɛn i cɛn kwlaa. Atin nga i anuannzɛ’n kle amun kusu’n, amun fa su. I liɛ’n, Ɲanmiɛn “wawɛ’n” i fanngan nun’n, amún fá ajalɛ kpa. (Neemi 9:20) Junman nga e kwla di’n, be diman be yalɛ. Kɛ e ko si kun di kpa’n, uflɛ o lɛ mɔ e kwla di ɔ.
13 I lɛ nun’n, amun e fa Denisi nin i yi Jenni be ndɛ e nian. Titi sɛ be su kplan Ɲanmiɛn Sielɛ Sua’n, be nin be ɔ. Afuɛ nga be flɛ 2005 nun, Utu nun’n, aunmuan dan wie tuli Amlɛnkɛn’m be mɛn’n i ngua lɔ lika’n nun naan w’a saci ninnge mun. Be tɔnnin aunmuan sɔ’n i dunman kɛ Katerini. Kɛ ɔ yoli sɔ’n, Denisi nin yi be ko ukali sran mun. Denisi waan: “Like nga Ɲanmiɛn Sielɛ Sua’m be kplanlɛ’n ti e sili i yo’n, e fa ko ukali e niaan mun. I sɔ’n yoli e fɛ dan. Aniaan’m be kusu be yoli e mo lele. I sɔ’n jɔli e klun wie. Be mɔ be timan Zoova i Lalofuɛ’n, be ɔli sran’m be ukalɛ wie. Sanngɛ, b’a diman junman’n i kɛ e sa. E liɛ’n, sua uflɛuflɛ nga e kplannin be’n, ɔ nin nga e siesieli be ye’n, ɔ trɛ i liɛ 5.300. Ɲanmiɛn Sielɛ Sua’m be liɛ’n, e kɛnmɛn i lele. Sran’m be sieli i sɔ’n i nzɔliɛ. Ɔ maan siɛn’n, kɛ aniaan’m bé bó jasin fɛ’n, be sɔ be nun klanman.”
14. ?Sɛ amun kunndɛ kɛ amún yó blɛ kwlaa nun Ɲanmiɛn junman difuɛ’n, ngue yɛ ɔ fata kɛ amun dun mmua yo ɔ?
14 ?Ngue ti yɛ amun faman blɛ kwlaa nun Ɲanmiɛn junman dilɛ’n kaciman amun junman mlɔnmlɔn ɔn? Sɛ amun yo sɔ’n, nanwlɛ’n, amún dí ye dan. Sɛ sa wie ti’n, dɔ nga su amun kwlá yoman sɔ’n, amun siesie amun ninnge’m be ye kan be nian. Atrɛkpa’n, amún kwlá dí i siɛn’n. Amun yo kɛ Neemi sa. Kɛ ɔ ɲannin junman dan kpa kun m’ɔ́ wá dí’n, ɔ srɛli Ɲanmiɛn. Ɔ seli kɛ: ‘Min Min, sie ɔ su tie min srɛlɛ’n. Maan n ɲan muae ndɛkɛn.’ (Neemi 1:11) Kɛ amun yo sɔ’n, an lafi ‘Ɲanmiɛn mɔ be srɛ i ɔ ti’n’ i su be yo like nga amun srɛli’n i su sa. (Jue Mun 65:3) Kɛ ɔ ko yo naan Zoova w’a ra amun su’n, amun dun mmua yo ninnge sɔ mun. I sin’n, blɛ kwlaa nun Ɲanmiɛn junman mɔ amun waan bé dí’n, amun bo i bo. Kɛ ɔ́ kɔ́ i ɲrun’n, amun sa tɔ́ nun. Kpɛkun, ɔ́ yó amun fɛ́ dan.
Ɔ su yoman amun nzisɔ
15. (a) ?Sɛ amun nin be mɔ be su Zoova w’a cɛ’n be koko yalɛ’n, annzɛ amun kanngan be nun wie’m be su ndɛ’n, mmlusuɛ benin yɛ amún ɲɛ́n i ɔ? (b) Amun kan sran sɔ’m be nun kun i su ndɛ m’ɔ wlali amun fanngan’n, i ndɛ.
15 ?Sɛ Ɲanmiɛn klun sa yɛ amun waan bé yó’n, mmlusuɛ benin yɛ amún ɲɛ́n i ɔ? Be mɔ be su Zoova w’a cɛ’n, i li be mɔ be ti blɛ kwlaa nun Ɲanmiɛn junman difuɛ w’a cɛ’n, amun usa be nian. Nanwlɛ, be di ye dan! (Nyanndra Mun 10:22) Bé sé amun kɛ Zoova i sa w’a yoman tika be lika le. Naan kɛ lika’n yo kekle bɔbɔ’n, ɔ suan be bo. (Filipfuɛ Mun 4:11-13) Kɛ ɔ fɛ i afuɛ nga be flɛ i 1955 nun lele m’ɔ́ fá jú afuɛ nga be flɛ i 1961 nun’n, Sasafuɛ Tranwlɛ’n i lika kun o lɛ’n, ɔ kan Zoova i sufuɛ kpa sɔ’m be nun wie be ndɛ. Be flɛ i kɛ: “Comment je poursuis le but de ma vie.” Kɛ ɔ fɛ i lɛ’n, be kan sran kpanngban kpa wie mun ekun be ndɛ Sasafuɛ Tranwlɛ’n nun titi. Be ndɛ sɔ mun, ɔ nin be nga Sa Nga be Yoli fluwa’n kan be ndɛ’n be liɛ’n, ɔ ti kun. Yɛle kɛ, be ti juejue su jasin fɛ’n bofuɛ yɛ be di aklunjuɛ. Sɛ amun kanngan be ndɛ fɛfɛ sɔ’m be nun’n, ɔ lemɛn i yowlɛ. Saan amún sé kɛ: ‘Nga liɛ’n, i sɔ wie yɛ ń yó ɔ!’
16. ?Ngue yɛ maan Klistfuɛ’m be wun kɛ be nunman mɛn’n nun ngbɛn mɔ i ti’n, be klun jɔ ɔ?
16 Arɔn mɔ e kɛnnin i ndɛ i bo bolɛ nun’n, ɔ seli kɛ: “Sran ble’m be lɔ lika nga n ɔli’n, n wunnin kɛ gbanflɛn’m be ɲanman like naan b’a yo. Be o lɛ sa ngbɛn. Sanngɛ n liɛ’n, lɔ tranlɛ yoli e fɛ dan. Afin junman kpa kun yɛ n ɔli i dilɛ ɔ. Junman sɔ’n, yɛle Ɲanmiɛn Sielɛ’n i jasin fɛ’n i bolɛ’n. Kɛ be se kɛ sɛ a cɛ sran like’n, ɔ ti kpa tra kɛ be cɛ wɔ like’n, n wunnin i wlɛ kɛ ɔ ti sɔ sakpa.”—Sa Nga Be Yoli’n 20:35.
17. ?Ngue ti yɛ ɔ fata kɛ e ɲin tran Ɲanmiɛn klun sa yolɛ’n su dɔ nga su ɔ?
17 ?Yɛ amun li? ?Ngue yɛ amun ɲin o su kɛ amún yó ɔ? Sɛ nán Ɲanmiɛn junman’n yɛ amun ɲin o su’n, like uflɛ fá amun blɛ’n mlɔnmlɔn ndɛndɛ kpa. ?Sanngɛ, Satan mɛn’n i nun ninnge’m be kunndɛlɛ mlɔnmlɔn sɔ’n, i kpa lika’n o nin? Ɔ ka kan’n, ‘ɲrɛnnɛn dan’n’ wá jú. Blɛ sɔ nun’n, be su buman aɲanbeun nin dunman dan’n, be like. Sanngɛ e nin Zoova e afiɛn m’ɔ mantan’n i liɛ’n, ɔ su yoman sɔ. Ɲanmiɛn klun sa mɔ e fa e ɲin sieli su e yoli mɔ e ukali e wiengu mun ti’n, nanwlɛ, e liɛ’n yó ye dan!—Matie 24:21; Sa Nglo Yilɛ 7:14, 15.
[Ja ngua lɛ ndɛ mun]
a Be kacili sran wie’m be dunman’n.
b Zoova i Lalofuɛ mun yɛ be yili ɔ.
?Amun kwla yiyi nun?
• ?Wafa sɛ yɛ Zoova bu i sulɛ nga e su i’n niɔn?
• ?Sɛ e kpliman naan e yo ngwlɛlɛfuɛ’n, wafa sɛ yɛ i sɔ’n úka e naan y’a su Ɲanmiɛn naan y’a uka e wiengu mun ɔn?
• ?Junman benin yɛ e kwla ɲan be dilɛ’n i wun atin ɔn?
• ?Like kpa benin yɛ e ɲin kwla tran su dɔ nga su ɔ?
[Foto mun, bue 25]
Sɛ e waan é fá e wla’n kwlaa sú Zoova’n, ɔ fata kɛ e yo i ngwlɛlɛ su.
[Foto mun, bue 26]
Ɲanmiɛn junman mɔ e kwla di’n, ɔ ti fanunfanun.