Ajalɛ nga e kwla fa’n

E bo sran’m be Biblu’n nun like klelɛ bo, Desamblu i Fue cɛn klikli’n nun

“Blɛ kekle nga nun’n, sa kekleekle nga be o e kwlaa e su’n ti’n, sran wie’m be waan klɔ sran’m be ndɛ loman Ɲanmiɛn. ?A bu i kɛ be ndɛ sɔ’n ti nanwlɛ?” Maan sran’n tɛ kosan’n su. I sin’n, fa Novamblu 1 Sasafuɛ Tranwlɛ’n mɛn i, kpɛkun fluwa’n i bue 5 i nun ndɛ nga be o i ndɛ kpɔlɛ 2 nin 3 be nun’n, amun koko be su yalɛ likawlɛ. Kanngan Biblu’n i ndɛ mma nga be o nun’n be nun wie mun annzɛ be nun kun nun. Fa Sasafuɛ Tranwlɛ’n nin Réveillez-vous ! mɛn i. Kpɛkun cɛn nga amún kókó ndɛ uflɛ su yalɛ’n, maan amun nuan sɛ su.

Sasafuɛ Tranwlɛ’n Novamblu 1

Fa periodiki’n i bue klikli’n kle sran’n kpɛkun usɛ i kɛ: “?Sɛ a wun i kɛ Ɲanmiɛn i su like nga be kleli wɔ’n ɔ ti ato’n, ɔ́ yó ɔ sɛ? [Maan sran’n tɛ kosan’n su.] Wafa nga e ko si kɛ ndɛ kun ti nanwlɛ annzɛ ato’n, nian i su ndɛ nga Zezi kannin’n. [Kanngan Zan 17:17 nun.] Ɔ maan Biblu’n kunngba cɛ yɛ ɔ kan Ɲanmiɛn i su ndɛ nanwlɛ’n kle e ɔ. Fluwa nga kan Ɲanmiɛn i su ndɛ ato nnun mɔ be kan be titi’n be ndɛ.”

Réveillez-vous ! Octobre

“Andɛ e ba awlobo’m be osu nianlɛ. Min waan ń kán ndɛ kun ń klé wɔ. ?Ba’m be talɛ nun’n, ngue yɛ a bu i kɛ ɔ ti kekle kpa man siɛ nin niɛn mun ɔn? [Maan sran’n tɛ kosan’n su.] Siɛ nin niɛn kpanngban be fa Biblu’n i afɔtuɛ’m be su. Afɔtuɛ nga siɛ nin niɛn’m be kwla nian su be tu be mma’m be fɔ’n, be nun kun yɛ ɔ o yɛ. [Kanngan Efɛzfuɛ Mun 4:31 nun.] Kɛ ɔ fɛ i ba’m be kaan nun lele m’ɔ́ fá jú be gbanflɛn nin be talua blɛ nun’n, Biblu’n nun afɔtuɛ nga siɛ nin niɛn’m be kwla nanti be su naan b’a kwla ta be kpa’n, fluwa nga kan be ndɛ.”