Gbanflɛn nin talua mun, an bɔbɔ an su Zoova
‘Like nga be kleli wɔ mɔ a lafi su’n, nian su kpa.’—2 TIM. 3:14.
1. ?Junman nga Zoova i Lalofuɛ gbanflɛn nin talua’m be di’n, ɔ ti Zoova i sɛ?
JUNMAN nga gbanflɛn nin talua’m be di man Zoova’n, ɔ ti i cinnjin dan. I sɔ’n ti’n, ɔ fali ndɛ yɛ’n wlɛli i nuan ijɔfuɛ kun nuan kɛ ɔ kan. Ɔ seli kɛ: ‘Blɛ nga á yíayía wɔ alɛ kunfuɛ’m be nuan’n, sonja yakpafuɛ’m be nin wɔ ɔ. Ɔ gbanflɛn’m bé bá ɔ wun ɔ oka’m be su, bé bá kɛ nglɛmun bɔlɛ’n m’ɔ gua’n sa.’ (Jue. 110:3.) Nanwlɛ, gbanflɛn nin talua nga be klunklo be su Zoova’n, be ti i sran kpa mun.
2. ?Atin benin yɛ mɛn nunfuɛ’m be kwla se gbanflɛn nin talua’m be kɛ be fa su ɔ?
2 ?Gbanflɛn nin talua mɔ amun o asɔnun nun’n, amun a fa amun wun b’a man Zoova kɛ amún yó i klun sa? Sɛ Gbanflɛn nin talua’m bé sú Ɲanmiɛn Kpli o annzɛ be su sumɛn i o, be nun kpanngban be wunman ajalɛ kun nga be ko fa ɔ. Aata difuɛ dandan mun nin like klefuɛ’m be wla gbanflɛn nin talua’m be fanngan kɛ be fa be wun wla aɲanbeun ninnge’m be kunndɛlɛ’n nun. Wie liɛ’n, gbanflɛn nin talua’m be osufuɛ nin be janvuɛ mun yɛ be se be kɛ be yo sɔ ɔ. Kɛ gbanflɛn nin talua’m be kaci Zoova i sufuɛ’n, mɛn nunfuɛ’m be yo be finfin. Sanngɛ, Ɲanmiɛn Kpli i sulɛ’n yɛ ɔ ti like kpafuɛ’n niɔn. (Jue. 27:4) I sɔ’n ti’n, maan amun fa kosan nsan yɛ mun usa amun wun: ?Ngue ti yɛ ɔ fata kɛ n su Ɲanmiɛn ɔn? ?Sɛ bɔbɔ min wiengu’m be kan min wun ndɛ tɛ annzɛ be yo min like tɛ’n, wafa sɛ yɛ n kwla fa min wun man Ɲanmiɛn naan m’an su i kpa ɔ? ?Ɲanmiɛn i junman kpa benin yɛ n kwla di ɔ?
Zoova sulɛ’n yɛ ɔ ti ajalɛ kpafuɛ’n niɔn
3. ?Ninnge nga Zoova yili be’n ti’n, ngue yɛ ɔ fata kɛ e yo ɔ?
3 ?Ngue ti yɛ ɔ fata kɛ amun su Ɲanmiɛn Kpli ɔ? Sa Nglo Yilɛ 4:11 kle like ti’n. Ɔ se kɛ: ‘E Min Ɲanmiɛn, kɛ bé yí wɔ ayɛ bé mánmán wɔ mɔ be se kɛ a kwla sa’n kwlaa yo’n i su ɔ, afin wɔ yɛ a yili like’n kwlaa ɔ, a klo kɛ á yí be ti yɛ a yili be ɔ, yɛ ɔ ti yɛ be o lɛ ɔ.’ Zoova yɛ ɔ yili like kwlaa ɔ. Asiɛ m’ɔ yili’n ti klanman kpa. I yɛ ɔ yili waka mun nin waka nɲrɛ mun, ɔ nin nnɛn mun ɔn. Jenvie’n nin kpɔlɛ mun, ɔ nin nzue m’ɔ fin kpɔlɛ annzɛ cenje’m be su ɔ bu gua’n, be ti i sa nuan ninnge. Jue Mun 104:24 se kɛ: ‘Ɔ sa nuan ninnge’n w’a yi asiɛ’n.’ Wafa nga klolɛ su Zoova yili e’n ti’n, e kwla wun asiɛ’n ɔ nin i su ninnge’m be fɛ. Nanwlɛ, i sɔ’n ti’n, é lɛ́ i ase! ?Kɛ e nian ninnge abonuan nga Zoova yili be’n, i sɔ’n kleman e kɛ e su i?
4, 5. ?Sa benin mun yɛ Zoova yoli be mɔ be ti yɛ Zozie fɛli i wun mɛntɛnnin i ɔ?
4 Zozie i ndɛ ng’ɔ kannin’n, ɔ kle e like kun ekun nga ti yɛ ɔ fata kɛ e su Zoova’n. Kɛ Zozie wunnin i kɛ ɔ su wa wu’n, ɔ kannin ndɛ kleli Ɲanmiɛn i nvle nunfuɛ mun. Ɔ seli be kɛ: ‘Amun bɔbɔ amun si jrɛiin kɛ kasiɛ nga Anannganman m’ɔ ti amun Ɲanmiɛn’n boli amun’n, i wie fi nunman lɛ m’ɔ kali ngbɛn ɔn. Be kwlaa be nuan yiali, wie fi a kaman.’ ?Ngue ti yɛ Zozie kwla seli sɔ ɔ?—Zoz. 23:14.
5 Ezipti lɔ yɛ be tali Zozie ɔ. Ɔ maan, Zoova i nda ng’ɔ tali Izraɛlifuɛ mun kɛ ɔ́ mán be lika kun m’ɔ́ yó be liɛ’n, ɔ tili i su ndɛ. (Bob. 12:7; 50:24, 25; Tul. 3:8) Kɛ Zoova bó nda ng’ɔ tali’n i nuan su like’n i yolɛ bo’n, ɔ fali ɲrɛnnɛn blu yili Ezipti mɛn’n su. Ɔ maan, Ezipti famiɛn tutrefuɛ’n yacili Izraɛlifuɛ’m be nun naan b’a wɔ. Zozie fɛli i ɲin sieli i sɔ liɛ’n su. Izraɛlifuɛ nga be kpɛli ndɛ mma jenvie’n mɔ be fiteli nun’n, Zozie o be nun. Ɔ maan, kɛ jenvie’n ɔ́ núnnún Ezipti famiɛn’n nin i sonja mun’n, ɔ wunnin nun. Kɛ bé sín Sinai “aawlɛ flɛnnɛn dan sroesroe” nun’n, Zoova mannin be ninnge kwlaa nga be miɛn i wun’n. Be nun wie fi w’a wuman nzuewe annzɛ awe ti. (Mml. 8:3-5, 14-16; Zoz. 24:5-7) Izraɛlifuɛ’m be nin Kanaanfuɛ wlɛfuɛ’m be kunnin alɛ naan b’a fa mɛn klanman mɔ Zoova tali nda kɛ ɔ́ mán be’n. Kɛ bé kún alɛ sɔ’n, Zozie wunnin wafa nga Ɲanmiɛn mɔ be su i’n, ɔ ukali be’n.—Zoz. 10:14, 42.
6. ?Ngue yɛ ɔ́ úka amun naan amun a su Zoova ɔ?
6 Zozie wunnin kɛ Zoova yo like ng’ɔ se kɛ ɔ́ yó’n. I sɔ’n ti’n Zozie seli kɛ: ‘N liɛ’n, e nin min osufuɛ mun, é sú Anannganman.’ (Zoz. 24:15) ?Yɛ amun li? Kɛ amun bu ninnge nga Ɲanmiɛn w’a yo be’n, ɔ nin ng’ɔ su wa yo be’n be akunndan’n, amun kunndɛ kɛ amún sú i kɛ Zozie sa. ?Nɛ́n i ɔ?
7. ?Ngue ti yɛ ɔ ti cinnjin kpa kɛ be yo amun batɛmu ɔ?
7 Maan amun bu ninnge nga Zoova yili be’n, ɔ nin ninnge ɲɛnmɛn ng’ɔ seli kɛ ɔ́ yó be’n, mɔ amun kwla lafi su kpa kɛ ɔ́ yó be’n be su akunndan. I liɛ’n, amún fá amun wun mán Zoova, kpɛkun bé yó amun batɛmu nzue nun. Batɛmu’n ti like cinnjin kpa kun m’ɔ fata kɛ be nga be kunndɛ kɛ bé sú Ɲanmiɛn’n, be yo ɔ. Zezi m’ɔ ti e Ajalɛ Klefuɛ’n, ɔ kleli i sɔ liɛ’n weiin. Ka naan w’a bo Mɛsi junman m’ɔ fata kɛ ɔ di’n i bo’n, ɔ fɛli i wun kleli Zan batɛmu yofuɛ’n kɛ ɔ yo i batɛmu. ?Ngue ti yɛ Zezi yoli sɔ ɔ? I bɔbɔ seli kɛ: ‘N fin ɲanmiɛn su lɔ bali, m’an baman m bɔbɔ n klun sa yolɛ, sanngɛ sran ng’ɔ sunmannin min’n, i klun sa yɛ n yo ɔ.’ (Zan 6:38) Be yoli Zezi batɛmu naan w’a yi i nglo kɛ ɔ fɛli i wun mannin kɛ ɔ́ yó i Si’n i klun sa.—Mat. 3:13-17.
8. ?Ngue ti yɛ Timote suli Ɲanmiɛn ɔn? ?Yɛ ngue yɛ ɔ fata kɛ amun yo ɔ?
8 Amun bu Timote m’ɔ ti Klistfuɛ gbanflɛn kun’n, i akunndan. Zoova mɛnnin i junman kpanngban kɛ ɔ di. ?Ngue ti yɛ Timote suli Ɲanmiɛn Kpli ɔ? Biblu’n kle e kɛ ‘be kleli i like yɛ ɔ lafili su.’ (2 Tim. 3:14) Sɛ be kleli amun Ɲanmiɛn Ndɛ’n i nun like naan amun lafi su kɛ ɔ ti nanwlɛ’n, nn amun ti kɛ Timote sa. Siɛn’n, ɔ fata kɛ amun fa ajalɛ kun. ?Sɛ amun kan like nga amun waan amún yó’n kle amun si nin amun nin’n, ɔ timan kpa? Be nin asɔnun kpɛnngbɛn’m be kwla uka amun. I liɛ’n, amun kwla yia ninnge nga Ɲanmiɛn Ndɛ’n kle kɛ amun yo be naan b’a yo amun batɛmu’n, be nuan.—An kanngan Sa Nga Be Yoli’n 8:12 nun.
9. ?Sɛ be yo amun batɛmu’n, ɔ kwla yo amun wiengu’m be sɛ?
9 Kɛ be yo amun Batɛmu’n, ɔ ti kɛ amun a bo Ɲanmiɛn Kpli i sulɛ bo sa. Ɔ ti kɛ amun a bo wanndilɛ kun bo sa. Wanndilɛ sɔ’n i akatua’n yɛle anannganman nguan’n, ɔ nin aklunjuɛ nga Ɲanmiɛn klun sa yolɛ’n ti be di’n. (Ebr. 12:2, 3) Asa ekun’n, amún yó maan amun osufuɛ mɔ b’a bo wanndilɛ sɔ’n i bo’n, be klun jɔ́. Kpɛkun, amun janvuɛ nga be o asɔnun nun’n, be kusu be klun jɔ́. Ng’ɔ ti cinnjin kpa’n yɛle kɛ Zoova klun jɔ́. (An kanngan Nyanndra Mun 23:15 nun.) Atrɛkpa’n, sran wie’m be su wunman like nga ti yɛ amun su Zoova’n i wlɛ. Ɔ maan, be kwla bu i kɛ amun su mlin. Be kwla tanndan amun ɲrun bɔbɔ. Sanngɛ, amun kwla jrɛn i sɔ’n i ɲrun kekle.
Sɛ amun wiengu’m be usa amun kosan annzɛ be tanndan amun ɲrun’n
10, 11. (a) ?Kosan benin yɛ sran’m be kwla usa amun, sulɛ m’ɔ amun su Ɲanmiɛn’n su ɔ? (b) ?Wafa nga Zezi tɛli kosan mɔ be usɛli i i Ɲanmiɛn sulɛ’n su’n, ngue yɛ ɔ kle amun ɔn?
10 Atrɛkpa’n, amun janvuɛ suklu ba mun annzɛ amun mantanfuɛ mun, annzɛ kusu amun osufuɛ’m be su wunman like nga ti yɛ amun su Zoova siɛn’n i wlɛ. Ɔ maan, be kwla fɛ i sɔ liɛ’n usa amun. Kpɛkun, be kwla usa amun amun Ɲanmiɛn sulafilɛ’n i su kosan. ?Wafa sɛ yɛ ɔ fata kɛ amun tɛ su ɔ? Ɔ fata kɛ amun bɔbɔ amun bu amun klun lɔ nian naan amun a kwla yiyi like nga ti yɛ amun su Ɲanmiɛn’n, i nun a kle be. I sɔ liɛ nun’n, Zezi yɛ ɔ kle e ajalɛ’n i kpafuɛ’n niɔn.
11 Zuifu’m be Ɲanmiɛn sulɛ nun kpɛnngbɛn’m be usali Zezi i kosan sran cɛnlɛ’n su. Kɛ ɔ yoli sɔ’n, Zezi fali be ɲin sieli Ɲanmiɛn ndɛ kun mɔ be ɲin kpali su’n, i su. (Tul. 3:6; Mat. 22:23, 31-33) Asa ekun kɛ mmla klefuɛ kun seli Zezi kɛ ɔ kle i mmla’n i danfuɛ’n, Zezi boli Biblu’n nun ndɛ mma ng’ɔ nin i fata’n su kleli i. Bian sɔ’n i klun jɔli wafa nga Zezi tɛli i su’n su. (Sau. 19:18; Mml. 6:5; Mar. 12:28-34) Ɲanmiɛn Ndɛ’n mɔ Zezi fa tɛli sran’m be su’n, ɔ nin wafa ng’ɔ kannin ndɛ kleli be’n ti’n, “be bubuli be wun nun.” I sɔ’n ti’n, i kpɔfuɛ’m b’a kwlá yomɛn i like. (Zan 7:32-46) Kɛ amún tɛ́ sran’m be su’n, amun fa Biblu’n. Kpɛkun, ‘an tɛ be su amanniɛn su, maan be wun kɛ an sro Ɲanmiɛn.’ (1 Piɛ. 3:15, 16) Sɛ amun siman kosan kun i su tɛlɛ’n, maan amun di i nanwlɛ naan amun se kɛ amún kúnndɛ i su tɛlɛ’n. I sin’n, amun fa Index des publications de la Société Watch Tower annzɛ Watchtower Library m’ɔ o CD-ROM su’n, aniɛn kun mɔ amun ti’n i nun. Sɛ amun siesie amun wun kpa’n, amún ‘tɛ́ sran ng’ɔ usa amun sa’n, i su klanman.’—Kol. 4:6.
12. ?Ngue ti yɛ ɔ fataman kɛ yalɛ klelɛ’n bubu amun sa sin ɔn?
12 Atrɛkpa kusu’n, ɔ su kaman kosan nga be usa amun, sulɛ mɔ amun su Ɲanmiɛn’n ti’n, i su. Afin i kwlaa yoli o, mmusu’m be si Satan yɛ ɔ sie mɛn’n niɔn. (An kanngan 1 Zan 5:19 nun.) Ɔ maan, nán amun bu i kɛ sran kwlaa wá yó amun mo annzɛ i klun jɔ́ ajalɛ nga amun fali’n su. Sran wie’m bé tánndan amun ɲrun. Atrɛkpa’n, wie mun kusu ‘bé kpɛ́ amun nzowa.’ (1 Piɛ. 4:4) Sanngɛ, nán amun wla fi su kɛ nán amun kunngba yɛ be yo amun sɔ ɔ. Be kleli Zezi yalɛ wie. Akoto Piɛli kusu’n, be kleli i yalɛ. Sanngɛ ɔ seli kɛ: ‘N sran kpa mun, nán maan sa ng’ɔ tɔ amun su amun sa nianlɛ’n ti’n, ɔ bo amun nuan. Nán an bu i kɛ ɔ ti sa tɛ. Sanngɛ kɛ an wun ɲrɛnnɛn kunngba nga Klist wunnin i’n wie’n, maan amun klun jɔ.’—1 Piɛ. 4:12, 13.
13. ?Ngue ti yɛ kɛ be kle Klistfuɛ’m be yalɛ’n be klun jɔ ɔ?
13 Sɛ Klistfuɛ mɔ amun ti’n ti be kle amun yalɛ annzɛ be tanndan amun ɲrun’n, ɔ fata kɛ amun klun jɔ. ?Ngue ti ɔ? Ɔ fata kɛ amun klun jɔ afin, sɛ mɛn nunfuɛ mun yɛ be klo amun sa’n, nn i sɔ’n kle kɛ amun nantiman Ɲanmiɛn i atin’n su, sanngɛ Satan i liɛ’n su yɛ amun nanti ɔ. Zezi seli kɛ: ‘Kɛ sran’m be kwlaa be bo amun dunman kpa’n, an yako, afin kɛ be nannan’m be boli be mɔ be tɔn be wun suɛn kɛ be ti Ɲanmiɛn nuan ijɔfuɛ’n be dunman sɔ ɔ!’ (Lik 6:26) Kɛ Satan nin i mɛn’n i nunfuɛ’m be kle amun yalɛ’n, i sɔ’n kle kɛ be fali amun wun ya afin amun su Zoova. (An kanngan Matie 5:11, 12 nun.) Kpɛkun, ‘sɛ be kpɛ amun nzowa Klist dunman m’ɔ o amun su’n ti’n,’ maan amun klun jɔ i sɔ liɛ’n ti.—1 Piɛ. 4:14.
14. ?Kɛ be kle Klistfuɛ kun yalɛ m’ɔ kpɔciman Zoova’n, ngue yɛ i sɔ’n yo i ye ɔ?
14 Kɛ be kle amun yalɛ mɔ amun kpɔciman Zoova’n, i sɔ’n yo like nnan ye. Yɛle kɛ i sɔ’n yo maan amun bo Ɲanmiɛn nin i Wa’n be dunman fɛ. Asa ekun’n, amun awlɛn mɔ amun tra’n, ɔ wla amun niaan Klistfuɛ’m be fanngan. Kpɛkun, sran nga be siman Zoova mɔ be fa be ɲin sie amun su’n, be kwla kunndɛ kɛ bé sí i. (An kanngan Filipfuɛ Mun 1:12-14 nun.) Asa kusu’n, kɛ amun wun kɛ Zoova man amun fanngan naan yalɛ nga be kle amun’n w’a sɔn amun nun’n, amun klo i dan tra laa’n.
B’a man amun “atin dan”
15. ‘?Atin dan’ benin yɛ be mannin akoto Pɔlu ɔ?
15 Jasin fɛ’n mɔ akoto Pɔlu boli Efɛzi lɔ’n, i su ndɛ ng’ɔ kannin’n yɛ: “B’a man min atin dan, ɔ maan n kwla di junman kpa.” (1 Kor. 16:8, 9) Atin dan sɔ’n yɛle kɛ ɔ kwla bo jasin fɛ’n kpa. Kpɛkun, ɔ kwla uka klɔ sɔ’n i sufuɛ mun kpa naan b’a kaci Zezi i sɔnnzɔnfuɛ. Pɔlu jrannin atin dan mɔ be mɛnnin i’n su’n, ɔ ukali sran kpanngban naan b’a si Zoova, naan b’a su i.
16. ?Kɛ afuɛ nga be flɛ i 1919 nun be ‘tikeli anuan kun’ mannin Klistfuɛ nga be kpa be sieli be ngunmin be onga’n, wafa sɛ yɛ be sinnin nun ɔn?
16 Afuɛ nga be flɛ i 1919 nun’n, Zezi Klist m’ɔ i ɲrun w’a ba ɲan’n, ɔ ‘tikeli anuan kun’ mannin Klistfuɛ nga be kpa be sieli be ngunmin be onga’n. (Ngl. 3:8) Be sinnin anuan sɔ’n nun. Yɛle kɛ, be boli jasin fɛ’n bolɛ bo. Be wlali be wun ase kpa be kleli sran mun Biblu’n nun nanwlɛ ndɛ’n trali laa’n. ?Jasin fɛ’n bolɛ sɔ’n i bo’n guali sɛ? Siɛn’n, jasin fɛ’n w’a ju asiɛ’n i awieliɛ lɔ. Kpɛkun, sran kɔe akpinngbin nso be wla o su kɛ bé ɲán anannganman nguan Ɲanmiɛn i mɛn uflɛ’n nun.
17. ?Wafa sɛ yɛ amun kwla fa ‘atin dan, mɔ maan amun kwla di junman kpa’n,’ i su ɔ?
17 ‘B’a man Zoova i sufuɛ’m be atin dan, ɔ maan be kwla di junman kpa.’ Yɛ atin dan sɔ’n te la nun. Be nga be fa atin sɔ’n su’n, be bo jasin fɛ’n dan kpa. Ɔ maan, be klun jɔ dan. ?Gbanflɛn nin talua nga amun su Zoova’n, atin mɔ amun le i uka amun wiengu mun naan b’a ‘lafi Ɲanmiɛn i jasin fɛ’n su’n,’ ɔ ti amun cinnjin kpa? (Mar. 1:14, 15) ?Titi atin bolɛ’n annzɛ cɛn kunngun atin bolɛ’n ti amun sɛ? Amun nun kpanngban kwla yo Ɲanmiɛn Sielɛ Blɛ sua kplanfuɛ annzɛ Betɛli lɔ junman difuɛ, annzɛ kusu ngaliɛ difuɛ, annzɛ ngunmin atin bofuɛ. Kɛ Satan i mɛn’n kɔ́ i awieliɛ’n, nn cɛn kwlaa’n Ɲanmiɛn Sielɛ’n i junman sɔ’m be dilɛ’n yó cinnjin kpa kɔ́ i ɲrun. ?Siɛn mɔ amun te le i wun atin’n, amún fá “atin dan” sɔ’n su?
‘Amun sie amun ɲin ase be nian, amún wá wún kɛ Anannganman ti kpa dan!’
18, 19. (a) ?Ngue ti yɛ Davidi kunndɛli kɛ ɔ́ sú Zoova ɔ? (b) ?Ngue yɛ ɔ kle kɛ Ɲanmiɛn sulɛ’n w’a yoman Davidi i nsisɔ le ɔ?
18 Ɲanmiɛn maan Davidi toli jue wlɛli i wiengu’m be fanngan kɛ ‘be sie be ɲin ase be nian. Bé wá wún kɛ Anannganman ti kpa dan!’ (Jue. 34:9) Davidi yoli laa Izraɛli nvle’n i famiɛn. I nun m’ɔ te yo bakan’n, ɔ niɛn i si’n i bua’m be su. Blɛ sɔ nun’n, Zoova deli i nnɛn ngble’m be sa nun. Asa ekun’n, kɛ ɔ nin Goliati bé kún’n, Ɲanmiɛn jrɛnnin i sin. Kpɛkun ɔ deli i sa kekleekle wie mun ekun be nun. (1 Sam. 17:32-51; Jue. 18, i su fitilɛ’n) Ɲanmiɛn i klun ufue dan’n ti’n, Davidi seli kɛ: ‘Anannganman min Ɲanmiɛn, abonuan sa nga a yoli’n, be sɔnnin. Yɛ akunndan kpakpa nga a bu i e wun’n, be sɔnnin. Like fi nin wɔ sɛman.’—Jue. 40:6.
19 Davidi kloli Zoova dan kpa trali laa’n. Ɔ maan, ɔ kunndɛli kɛ ɔ́ tú i klun, ɔ́ fɛ́ i akunndan’n kwlaa ɔ́ yí Zoova i ayɛ. (An kanngan Jue Mun 40:9-11 nun.) Kɛ Davidi ɲín kɔ́’n, Ɲanmiɛn Kpli sulɛ’n w’a yomɛn i nsisɔ le. I wun m’ɔ fa mantannin Ɲanmiɛn’n, ɔ yoli i awlɛn su like. I fɛ m’ɔ yoli i’n, ɔ lemɛn i wunsu. Kɛ Davidi yoli kpɛnngbɛn’n, ɔ seli kɛ: ‘Min Min Ɲanmiɛn, min sunnzunlɛ’n kwlakwla taka ɔ su. Kɛ ɔ fin min kaan nun’n, ɔ su yɛ n lafi ɔ. Ee Ɲanmiɛn, siɛn’n mɔ m’an yo oke mɔ min ti’n w’a bo je yɛ’n, nán yi min ase.’ (Jue. 71:5, 18) Kannzɛ bɔbɔ Davidi yoli oke’n, sanngɛ ɔ lafili Zoova su tankaan, kpɛkun ɔ fɛli i wun mɛntɛnnin i kpa.
20. ?Ngue ti yɛ Ɲanmiɛn sulɛ’n yɛ ɔ ti like kpafuɛ’n niɔn?
20 Wafa nga Zozie nin Davidi, ɔ nin Timote be nantili’n, ɔ kle kɛ Zoova sulɛ’n yɛ ɔ ti like kpafuɛ’n niɔn. Sɛ amun di mɛn’n nun junman’n, amún ɲán su mmlusuɛ le nɲɔn kun. Sanngɛ, ɔ kwlá toman mmlusuɛ nga amún ɲɛ́n i sɛ ‘amun nian nun be su Zoova kpa kɛ ɔ fata’n sa’n.’ (Zoz. 22:5) Sɛ amun nin a srɛman Zoova kɛ amún fá amun wun mɛ́n i’n, maan amun usa amun wun kosan yɛ’n: ‘?Ngue ti yɛ n kaciman Zoova i Lalofuɛ ɔ?’ ?Sɛ amun ti Zoova i Lalofuɛ’n, amun kunndɛ kɛ amun klun jɔ kpa tra laa’n? Sɛ ɔ ti sɔ’n, maan amun di Ɲanmiɛn i junman’n i dan ekun tra laa’n. Kpɛkun, maan amun wɔ amun ɲrun titi Ɲanmiɛn sulɛ nun. Like suanlɛ ng’ɔ́ bá lɛ’n, ɔ́ wá klé amun wafa nga amun kwla kɔ amun ɲrun Ɲanmiɛn sulɛ nun kɛ akoto Pɔlu sa’n.
?Wafa sɛ yɛ amún tɛ́ kosan’m be su ɔ?
• Amun kle like nɲɔn nga ti yɛ ɔ fata kɛ amun su Ɲanmiɛn’n.
• ?Ngue ti yɛ Timote suli Ɲanmiɛn ɔn?
• ?Sɛ bɔbɔ be kle amun yalɛ’n, ngue ti yɛ ɔ fata kɛ amun jran kekle ɔ?
• ?Atin dan benin yɛ amun kwla ɲɛn i su Ɲanmiɛn ɔn?
[Foto, bue 22]
Zoova sulɛ’n yɛ ɔ ti like kpafuɛ’n niɔn.
[Foto, bue 23]
?Amun kwla kan amun Ɲanmiɛn sulafilɛ’n i ndɛ kle sran?