?Asiɛ’n su cɛman kun?

?Wafa sɛ yɛ amún tɛ́ kosan nga su ɔ?

?E ɲrun lɔ’n, lika’n

(a) ɔ́ yó kpa?

(b) ɔ́ ká i osu kunngba’n nun?

(c) ɔ́ yó tɛ trá laa’n?

?E BU e ɲrun lɔ sa’m be wun akunndan kpa? Sɛ e bu be wun akunndan kpa’n, é ɲán su mmlusuɛ kpanngban. Sa nga sran wie’m be fali be ɲin be sieli be su’n, be kle kɛ be nga be bu be ɲrun lɔ sa’n be wun akunndan kpa’n, junman’n i wafa kwlaa nun’n, be di i kpa tra be nga mun. Sa wie mɔ be fali be ɲin sieli su cɛli kpa’n, ɔ kle kɛ yasua nga be bu be ɲrun lɔ sa’m be wun akunndan kpa’n, awlɛn ba ya’n, ɔ ti sɔsɔ be lika tra be nga be buman be ɲrun lɔ sa’m be wun akunndan kpa’n. I sɔ’n nin Biblu’n i ndɛ ng’ɔ kannin w’a cɛ kpa’n, be kɔ likawlɛ. Biblu’n kannin kɛ: ‘Aklunjuɛ’n ti kɛ are sa. Sɛ be klun timan jɔwa’n, be wun kpajaman be.’—Nyanndra Mun 17:22.

Sanngɛ kɛ e nian asiɛ’n i su ndɛ nga fluwa sifuɛ dandan’m be kan kɛ bé wá jú’n, ɔ yo maan sran kpanngban be buman e ɲrun lɔ sa’m be wun akunndan kpa. Maan e fa e ɲin e sie i asiɛ’n i wun ndɛ sroesroe nga fluwa sifuɛ sɔ’m be kan’n, i wie’m be su e nian.

Asiɛ’n i wun di kpa

Suɛdi’n lɔ anuannzɛ dan kun m’ɔ di junman kpa’n, ɔ nian lika nga e o nun’n su. Afuɛ nga be flɛ i 2002 nun’n, ɔ klɛli fluwa kun. I waan sika kunndɛlɛ’n ti’n sran’m b’a saci asiɛ’n. Naan i sɔ’n kwla “bo sa wie’n be balɛ’n i ɲrun atin. I sɔ sa’m be kusu be kwla yo maan lika’n kaci tɛ kpa’n.” Anuannzɛ sɔ’n klɛli ekun kɛ yalɛ ng’ɔ o lika wunmuan’n nun’n nin sa mɔ be yomɛn i i nuan su’n, ɔ nin asiɛ’n su ninnge nga be te saci be te kɔ’n, be kwla yo maan “kɛ lika nga e o nun’n i su sa mun nin klɔ sran’m be su sa mun ɔ nin fɔundi dilɛ su sa’m bé tɔ́ mɔ bé wíe’n, nn uflɛ’m bé káci be.”

Anuannzɛ dan nga be flɛ i ONU, ɔ fɛli i ɲin sieli i asiɛ wunmuan’n i wafa ng’ɔ su yo’n, i su lele afuɛ nnan. Kpɛkun afuɛ nga be flɛ i 2005 nun’n, ɔ yili fluwa kun. Fluwa sifuɛ dandan lele 1.360 mɔ be fin nvlenvle lele 95 nun’n, be yɛ be dili junman sɔ’n niɔn. Fluwa nga be klɛli i sɔ’n i nun ndɛ’n yo sro kpa. Be waan: “Klɔ sran’m be ninnge nga be yo be’n, be ta nga be le i asiɛ’n i su’n ɔ cɛnnin dan ngboko. Ɔ maan be lafiman su kɛ asiɛ’n yó kpa mán sran nga bé bá kasiɛn’n.” Be klɛli i ekun kɛ sɛ e kunndɛman kɛ i sɔ sa’n ju’n, “ɔ nin i fata kɛ e kaci ninnge wie mun dan kpa. Ninnge sɔ mun yɛle e ajalɛ mun ɔ nin e anuannzɛ’m be ninnge yolɛ mun yɛ e nzuɛn mun. E nin a yomɛn i sɔ’n kusu mlɔnmlɔn dɔ nga su.”

Ana Tibaijuka m’ɔ ti ONU i sa mma kun mɔ be flɛ i Programme des Nations unies pour les établissements humains i su kpɛn’n, ɔ kannin ndɛ kun mɔ fluwa sifuɛ dandan’m be nun kpanngban be nuan su sɛ su kpa ɔ. Ɔ seli kɛ: “Sɛ y’a kaciman e sa naan e yo ninnge mun kɛ nga e fa yo be titi sa’n, naan kusu y’a yoman like fi naan lika’n w’a yo kpa’n, é wá wún ɲrɛnnɛn dan kpa e ɲrun lɔ.”

Like nga ti yɛ e wla boman e wun’n

Zoova i Lalofuɛ mɔ be yili fluwa nga’n, be lafi su wie kɛ asiɛ’n su ninnge’m bé wá káci dan kpa. Yɛ i sɔ’n w’a mantan koko. Sanngɛ be liɛ’n, nán kɛ be waan ninnge sɔ’m be kacilɛ’n yó maan e ɲrun lɔ sa’m bé yó tɛ sa ngbɛn ɔn. Sanngɛ be lafi su kɛ ninnge sɔ’m be kacilɛ’n maan asiɛ’n wá káci mɛn klanman. Asiɛ’n i klanman sɔ’n awlanmannun’n be nin a wunmɛn i le. ?Yɛ ngue ti yɛ be bu e ɲrun lɔ sa’m be wun akunndan kpa sɔ ɔ? Be bu i sɔ afin kasiɛ nga Biblu’n m’ɔ ti Ɲanmiɛn Ndɛ’n boli’n, be lafi su. Kasiɛ sɔ’m be nun kun se kɛ: ‘Ɔ ka kaan sa be su wunman klunwifuɛ’n kun. Sɛ a nian kan ɔ tran lɛ’n, a su wunman sran. Yalɛfuɛ mun yɛ mɛn’n ɔ́ wá yó be liɛ ɔ. Be wun jɔ́ be kpa fɔuun!’—Jue Mun 37:10, 11.

?I sɔ’n ti laliɛ cɛnlɛ ngbɛn? Kwlaa naan amun a tɛ kosan sɔ’n su’n, amun dun mmua bu ndɛ nga i akunndan kpa. Sa dandan nga be o asiɛ’n nin klɔ sran’m be su’n andɛ’n, Biblu’n dun mmua kannin be ndɛ i afuɛ akpiakpi kpanngban yɛ. Amun kanngan Biblu’n nun ndɛ mma nga be o ndɛ ng’ɔ́ bá lɛ nun’n be nun, naan amun fa sunnzun sa nga be su ju asiɛ’n su’n. Kɛ amún yó sɔ’n, wafa nga amun lafi su kɛ Biblu’n kwla kan e ɲrun lɔ sa’m be ndɛ naan ɔ kpɛn su’n, ɔ́ yó dan kɔ́ i ɲrun.