?Zezi yɛ ɔ ti Ɲanmiɛn mɔ like fi nunmɛn i sin’n niɔn?

Wafa nga sran sunman be tɛ su’n:

▪ “Ɛɛn, Zezi yɛ ɔ ti Ɲanmiɛn mɔ like fi nunmɛn i sin’n niɔn.”

▪ “Ɲanmiɛn yɛ ɔ kacili i wun sran mɔ be flɛ i Zezi’n niɔn.”

?Ngue ndɛ yɛ Zezi kannin ɔn?

▪ “Sɛ an klo min’n, wuun kɛ n su kɔ e Si sin’n, wuun amun klun jɔ́, afin e Si’n lɛ nyrun tra min.” (Zan 14:28) Zezi seli kɛ ɔ nin i Si be sɛman.

▪ “Ń fú kɔ́ min nin amun e Si’n b’ɔ ti min nin amun e Nyanmiɛn’n i wun lɔ.” (Zan 20:17) Zezi w’a seman kɛ i yɛ ɔ ti Ɲanmiɛn ɔn. Sanngɛ ɔ kleli kɛ ɔ nin Ɲanmiɛn be timan kun.

▪ “Ndɛ nga n kan’n, n kpɛ-man n ti nun yɛ n kan-an, sanngɛ n Si b’ɔ sunmannin min’n, i bɔbɔ yɛ ɔ kleli min ndɛ nga n kan’n nin ninnge wafa nga n kle nin-ɔn.” (Zan 12:49) Ninnge nga Zezi kleli be’n be finmɛn i bɔbɔ. Be fin i Si.

ZEZI waan ɔ ti Ɲanmiɛn Wa, naan nɛ́n i yɛ ɔ ti Ɲanmiɛn mɔ like fi nunmɛn i sin’n niɔn. ?Sɛ ɔ ti kɛ Zezi yɛ ɔ ti Ɲanmiɛn’n, nn kɛ ɔ o asiɛ’n su wa’n Ɲanmiɛn ng’ɔ srɛli i’n yɛle wan? (Matie 14:23; 26:26-29) Nanwlɛ, e kwlá seman mlɔnmlɔn kɛ Zezi kpɛli gblɛ kɛ ɔ nin sran uflɛ be ijɔ!

Kɛ Zezi i sɔnnzɔnfuɛ nɲɔn be seli i kɛ ɔ man be tranwlɛ ng’ɔ le ɲrun i Sielɛ’n nun’n, ɔ tɛli be su kɛ: “N fama su nin m bɛ su tranlɛ liɛ’n, nán min yɛ m man-an, saan be nga n Si sie mannin be’n, be yɛ bé trán lɛ-ɔ.” (Matie 20:23) ?Kɛ Zezi seli be kɛ ɔ leman atin faman like nga be su srɛ i’n manman be’n, ato yɛ ɔ su bua ɔ? Cɛcɛ! Sanngɛ ɔ dili i nanwlɛ kɛ Ɲanmiɛn kunngba yɛ ɔ le i sɔ atin’n niɔn. I kpa’n Zezi yiyili nun kɛ ninnge wie’m be o lɛ’n, i Si kunngba cɛ yɛ ɔ si be ɔ. Naan i bɔbɔ o anzi mun o be siman be.—Mark 13:32.

?San kɛ Zezi o asiɛ’n su wa’n yɛ Ɲanmiɛn ɲannin ɲrun trɛli i ɔ? Cɛcɛ. Afin kɛ ɔ wuli mɔ be cɛnnin i bɔbɔ’n, Biblu’n kɛnnin i ndɛ seli kɛ Ɲanmiɛn le ɲrun trɛ i. Akoto Pɔlu kpɛn e wla kɛ “Nyanmiɛn kusu sie Krist.” (1 Korɛntfuɛ Mun 11:3) Biblu’n se kɛ e ɲrun lɔ’n, “kɛ ɔ ko fa Krist ko sie i like’n kwlaa su’n, i sin Krist bɔbɔ b’ɔ ti i Wa’n, ɔ́ fɛ́ i wun mɛ́n i kɛ ɔ sie i naan Nyanmiɛn sie like’n kwlakwlakwla.”—1 Korɛntfuɛ Mun 15:28.

E wun i weiin kɛ nán Zezi yɛ ɔ ti Ɲanmiɛn mɔ like fi nunmɛn i sin’n niɔn. I ti yɛ, kɛ ɔ́ kɛ́n i Si ndɛ’n ɔ seli kɛ ‘min Nyanmiɛn’n’ niɔn.—Sa Nglo Yilɛ 3:2, 12; 2 Korɛntfuɛ Mun 1:3, 4.a

[Ja ngua lɛ ndɛ’n]

[Ndɛ kwle, bue 7]

Zezi seli kɛ ninnge wie’m be o lɛ’n, i bɔbɔ o anzi mun o be siman be saan i Si kunngba cɛ yɛ ɔ si be ɔ.