?Sɛ be wu sran kun ekun’n yɛ maan ɔ́ kwlá fíte nun ɔn?

SƐ BE usa amun kɛ: “?Be wuli amun ekun?” ?Amún tɛ́ su sɛ? Asiɛ’n wunmuan’n su’n, sran akpinngbin mɔ be waan be lafi Ɲanmiɛn su’n, bé tɛ́ su kpa kɛ “Ɛɛn!” Be liɛ’n, be bu i kɛ sɛ be wu sran kun ekun’n, nn sran sɔ’n o Klistfuɛ kpa’m be nun wie. Naan i sɔ’n yɛ maan ɔ́ fíte nun ɔn. Ndɛ kunngba nga Ɲanmiɛn sulɛ wafa ng’ɔ timan su’n be su kpɛnngbɛn’m be kan’n, mɔ i wie yɛle nga Ɲanmiɛn Ndɛ’n su like suanfuɛ’n mɔ be flɛ i Robert Sproul klɛli’n, be kan wie. Ɔ klɛli i kɛ: “Sɛ b’a wuman sran kun ekun’n, [...] nn nán Klistfuɛ ɔ.”

?Amun o sran nga be bu i kɛ sɛ be wu sran kun ekun’n yɛ ɔ kwla fite nun’n, be nun wie? Sɛ ɔ ti sɔ’n, amun kunndɛ kɛ amún úka amun osufuɛ mun naan be fite nun wie. Kɛ ɔ ko yo naan b’a yo sɔ kusu’n, ɔ fata kɛ be wun ngbaciɛ ng’ɔ o sran nga be wuli i ekun’n, ɔ nin nga b’a wumɛn i ekun’n be afiɛn’n. ?Ɔ maan, kɛ be se kɛ be wu sran kun ekun’n, wafa sɛ yɛ amun kwla yiyi nun kle be ɔ?

Sran wie’m be bu i kɛ, sran nga be se kɛ be ‘wuli i ekun’n,’ yɛle sran ng’ɔ tali nda kɛ ɔ́ sú Ɲanmiɛn nin Klist’n, mɔ i sɔ’n ti’n, ɔ nin Ɲanmiɛn be afiɛn’n w’a sɛ siɛn’n.

?Sɛ be se amun kɛ Biblu’n kanman sɔ’n, ɔ́ bó amun nuan? ?Like nga Ɲanmiɛn Ndɛ’n kle i sran nga be wu i ekun’n i su’n, amun klo kɛ amún sí i? Sɛ amun fa amun ɲin sie i ndɛ sɔ’n su naan amun si i bo kpa’n, ɔ́ yó amun liɛ ye. ?Ngue ti ɔ? Afin sɛ amun si i bo kpa’n, wafa nga amún dí mɛn’n, ɔ nin akunndan nga amun bu i amun ɲrun lɔ ninnge wie’m be su’n, ɔ́ káci.

?Ngue like yɛ Biblu’n kle ɔ?

Biblu’n nun’n, Zan 3:1-12 nun kunngba cɛ yɛ be kan sran nga be ‘wu i ekun’n’ i ndɛ ɔ. Zezi nin Zerizalɛmu lɔ Zuifu’m be Ɲanmiɛn sulɛ kpɛnngbɛn kun be yalɛ kokolɛ nun yɛ ɔ kannin ndɛ sɔ’n niɔn. Yalɛ sɔ mɔ be kokoli’n, ɔ o kuku ng’ɔ o ndɛ nga i awieliɛ lɔ’n, i nun. Amun bo amun ɲin ase be kanngan nun.

Ndɛ sɔ’n nun’n, Zezi yili sran nga be ‘wu i ekun’n’ i su ninnge kpanngban nglo.a I kpa bɔbɔ’n, Zezi i ndɛ sɔ’n ti’n, e kwla tɛ kosan cinnjin nnun nga be su:

◼ ?Ngue ti yɛ ɔ ti cinnjin kɛ be wu sran’m be uflɛ ɔ?

◼ ?Sɛ bé wú sran kun i uflɛ o, annzɛ be wumɛn i uflɛ o, i bɔbɔ yɛ ɔ fɛ i sɔ ajalɛ’n niɔn?

◼ ?Ngue ti yɛ be wu sran kun i uflɛ ɔ?

◼ ?Wafa sɛ yɛ be wu sran kun i uflɛ ɔ?

◼ ?Kɛ be wu sran kun i uflɛ’n, ɔ nin Ɲanmiɛn be afiɛn’n yo sɛ siɛn’n?

É wá tɛ́ kosan sɔ’m be su kunngunngun.

[Ja ngua lɛ ndɛ’n]

[Kuku/Foto, bue 4]

‘Saan bé wú amun ekun’

“Bian kun o lɛ, le kun kɔnguɛ ɔ ɔli Jésus wun lɔ. Be flɛ bian sɔ’n kɛ Nikodɛm, ɔ ti Farizifuɛ’m be nun kun, Zuif’m be kpɛnngbɛn’n kun-ɔn. Ɔ seli Jésus kɛ: ‘Baba, e si kɛ a ti ninnge klefuɛ kun bɔ Nyanmiɛn yɛ ɔ sunmannin wɔ-ɔ, afin sran nga Nyanmiɛn jin-mɛn i sin’n, ɔ kwlá yi-man atrɛ nga a yi be’n be wie.’ Jésus seli i kɛ: ‘Nanwlɛ, sran nga b’a wu-mɛn i ekun’n, ɔ su kwlá yo-man mɛn nga Nyanmiɛn sie’n i nunfuɛ mlɔnmlɔn.’ Nikodɛm kusu seli i kɛ: ‘?Sɛ sran kun yo kpɛnngbɛn’n, ɔ́ yó sɛ yɛ bé kwlá wú i ekun-ɔn? ?Ɔ́ kwlá sɛ́ i sin i nin klun naan b’a wu i ekun?’ Yɛ Jésus seli i kɛ: ‘Nanwlɛ, sɛ sran i awuliɛ’n fin-man nzue nin Nyanmiɛn wawɛ’n, ɔ su kwlá yo-man mɛn nga Nyanmiɛn sie’n i nunfuɛ.’ Sran nga klɔ sran wu i’n, ɔ ti klɔ sran, yɛ nga Nyanmiɛn wawɛ’n wu i’n, ɔ ti i liɛ. Kɛ n seli wɔ kɛ: Saan bé wú amun ekun’n, nɛ́n i sɔ’n bo ɔ nuan. Aunngban’n fita kan ɔ klo’n, a ti i ngan, sanngɛ a si-mɛn i finwlɛ nin i kɔwlɛ. Sran kwlaa nga Nyanmiɛn wawɛ’n wu i’n, kɛ ɔ ti sɔ-ɔ. Yɛ Nikodɛm usɛli i kɛ: ‘?Ɔ́ yó sɛ yɛ sa sɔ’n kwlá yó-ɔ?’ Jésus seli i kɛ: ‘?Wɔ bɔ a ti Izraɛlfuɛ’m be ninnge klefuɛ dan’n, a wun-man sa nga wlɛ?’ Nanwlɛ, sa nga e si i’n nin nga e wunnin i’n, yɛ e kɛn i ndɛ kle amun-ɔn, sanngɛ an fa-man e ndɛ’n su. ?Kɛ bɔ n kan sa ng’ɔ yo asiɛ’n su wa’n be ndɛ kle amun bɔ an lafi-man su’n, sɛ n kan sa ng’ɔ yo nyanmiɛn su lɔ’n be ndɛ kle amun’n, ɔ́ yó sɛ yɛ amún láfi su-ɔ?”—Zan 3:1-12.