?Kɛ be se kɛ be wu sran kun ekun’n, i bo’n yɛle benin?

Ndɛ nga Biblu’n kan’n

Kɛ be se kɛ “be wu sran kun ekun’n,” i bo’n yɛle kɛ sran sɔ’n w’a kaci Ɲanmiɛn i wa. (Zan 3:3, 7) Ɲanmiɛn fɛ i wawɛ’n yɛ ɔ fa kpa sran sɔ mun-ɔn. (Rɔmunfuɛ Mun 8:15, 16; Galasifuɛ Mun 4:5; 1 Zan 3:1) Andɛ’n, sran wie’m be fa ba wie mɔ nán be yɛ be wuli be’n, be kaci be wa. I wafa kunngba’n, Ɲanmiɛn fa sran wie mun fa kaci i awlobo’n nunfuɛ.—2 Korɛntifuɛ Mun 6:18.

?Ngue ti yɛ be wu sran wie mun ekun-ɔn?

Zezi seli kɛ: “Sɛ b’a wuman sran kun ekun’n, ɔ kwlá wluman Ɲanmiɛn i Famiɛn Diwlɛ’n nun.” (Zan 3:3) Ɔ maan be wu sran wie mun ekun naan be nin Klisi be ko di famiɛn Ɲanmiɛn i Famiɛn Diwlɛ’n nun. Ɲanmiɛn i Famiɛn Diwlɛ sɔ’n wo ɲanmiɛn su lɔ. I sɔ’n ti’n, Biblu’n waan be nga “be wuli be uflɛ’n,” ‘be fali like kun sieli be ɲanmiɛn su lɔ.’ (1 Piɛli 1:3, 4) Be nga be wuli be ekun’n, be lafi su kpa kɛ be nin Klisi “bé dí famiɛn likawlɛ.”—2 Timote 2:12; 2 Korɛntifuɛ Mun 1:21, 22.

?Wafa sɛ yɛ be wu sran kun ekun-ɔn?

Zezi yiyili ndɛ sɔ’n nun. Ɔ seli kɛ be nga be wuli be ekun’n, ‘be awuliɛ’n fin nzue nin Ɲanmiɛn wawɛ’n.’ (Zan 3:5) I ndɛ sɔ’n kle kɛ be dun mmua yo sran sɔ’m be batɛmun nzue nun. Kpɛkun i sin’n, Ɲanmiɛn fɛ i wawɛ’n yo be batɛmun ekun.—Sa Nga Be Yoli’n 1:5; 2:1-4.

Sran klikli nga be wuli i ekun’n yɛle Zezi. Be yoli i batɛmun Zurdɛn nzue’n nun. I sin’n, Ɲanmiɛn fɛli i wawɛ’n yoli i batɛmun, yɛle kɛ ɔ kpɛli i sieli i ngunmin. I lɛ nun’n, Zezi kacili Ɲanmiɛn i wa, yɛ ɔ lafili su kɛ ɔ́ sɛ́ i sin ɲanmiɛn su lɔ ekun. (Marki 1:9-11) Sakpasakpa, kɛ ɔ wuli’n Ɲanmiɛn cɛnnin i, yɛ ɔ sɛli i sin ɲanmiɛn su lɔ.—Sa Nga Be Yoli’n 13:33.

Be nga be wu be ekun’n, be kusu be dun mmua yo be batɛmun nzue nun ka naan Ɲanmiɛn w’a fɛ i wawɛ’n w’a kpa be.a (Sa Nga Be Yoli’n 2:38, 41) Kɛ be ko kpa be’n, be lafi su kɛ bé kó trán ɲanmiɛn su lɔ. Sakpasakpa, kɛ be wu’n Ɲanmiɛn cɛn be, yɛ be ko tran ɲanmiɛn su.—1 Korɛntifuɛ Mun 15:42-49.

Be nga be wu be ekun’n be su ndɛ wie mɔ be timan su’n

Ndɛ ng’ɔ timan su’n: Sran kun bɔbɔ kwla fa ajalɛ kɛ be wu i ekun.

Ndɛ nanwlɛ’n: E ngba e kwla fa e wun mantan Ɲanmiɛn naan y’a ɲan e ti. (1 Timote 2:3, 4; Zaki 4:8) Sanngɛ be nga be wu be ekun’n be liɛ’n, Ɲanmiɛn bɔbɔ yɛ ɔ fɛ i wawɛ’n kpa be-ɔ. Biblu’n waan i sɔ liɛ’n “finman sran’n i like ng’ɔ klo kɛ ɔ́ yó’n annzɛ i wunmiɛn’n, sanngɛ ɔ fin Ɲanmiɛn.” (Rɔmunfuɛ Mun 9:16) Be nga “be wu be ekun’n,” be flɛ be ekun kɛ be nga “be awuliɛ’n fin nglo lɔ’n.” I sɔ’n kusu kle kɛ Ɲanmiɛn yɛ ɔ kpa sran sɔ mun-ɔn.—Zan 3:3, nja ngua lɔ ndɛ’n.