?Ngue ti yɛ ɔ ti cinnjin kɛ be wu sran kun i uflɛ ɔ?

KƐ Zezi nin Nikodɛmu bé kókó yalɛ’n, ɔ jrannin su kpa kɛ ɔ ti cinnjin kpa kɛ be wu sran kun uflɛ annzɛ be wu i ekun. ?Wafa sɛ yɛ ɔ tuli i sɔ liɛ’n i ɲin ɔn?

Wafa nga Zezi tinnin awuliɛ uflɛ’n su kleli Nikodɛmu’n, maan e fa e ɲin e sie su. I waan: ‘Sran nga b’a wu-mɛn i ekun’n, ɔ su kwlá yo-man mɛn nga Nyanmiɛn sie’n i nunfuɛ mlɔnmlɔn.’ (Zan 3:3) Kɛ Zezi seli kɛ ɔ su “kwlá yo-man” mɛn nga Nyanmiɛn sie’n i nunfuɛ ‘mlɔnmlɔn’n,’ i sɔ’n kle kɛ ɔ ti cinnjin kɛ be wu sran’n i uflɛ. Maan e fa sunnzun ase kun. Sran kun kwla se kɛ: “Nanwlɛ, sɛ wia’n w’a boman’n, lika’n kwlá kpajaman.” I ndɛ sɔ’n i bo’n yɛle kɛ saan wia’n bó naan lika’n w’a kpaja. I sɔ kunngba’n, Zezi waan ɔ́ sé kɛ sɛ b’a wuman sran kun i uflɛ’n, ɔ su kwlá yoman mɛn nga Ɲanmiɛn sie’n i nunfuɛ mlɔnmlɔn.

I agualiɛ su’n, kɛ ɔ ko yo naan w’a wun i wlɛ kpa’n, Zezi seli kɛ: ‘Saan bé wú amun ekun.’ (Zan 3:7) Ɔ ti weiin kɛ Zezi liɛ’n, sɛ b’a wuman sran kun uflɛ’n, ɔ kwlá “yo-man mɛn nga Nyanmiɛn sie’n i nunfuɛ.”—Zan 3:5.

Zezi ɲrun’n, ɔ ti cinnjin kɛ be wu sran kun i uflɛ. I sɔ’n ti’n, ɔ fata kɛ Klistfuɛ’m be wun ndɛ sɔ’n i wlɛ kpa. ?Ɔ maan sɛ bé wú Klistfuɛ kun i ekun o, annzɛ be wumɛn i ekun o, i bɔbɔ yɛ ɔ fa ajalɛ sɔ’n niɔn?

[Ndɛ kwle, bue 5]

“Nanwlɛ, sɛ wia’n w’a boman’n, lika’n kwlá kpajaman.”