E seiin nantilɛ’n jɔ Zoova klun
“Min wa, fa akunndan nanti. Sɛ a fa akunndan nanti’n, n klun jɔ́. I liɛ’n, sɛ sran kan min wun ndɛ’n, ń kwlá sɔ́ su.”—NYANNDRA MUN 27:11.
1, 2. (a) ?Akplowa benin yɛ Satan kpɛli i ba mɔ Zɔb fluwa’n kɛn i ndɛ ɔ? (b) ?Ngue yɛ ɔ kle kɛ, kɛ Zɔbu wuli’n, lele m’ɔ́ fá jú andɛ’n, Satan te klɔklɔ Zoova ɔ?
ZOOVA mannin Satan i atin naan ɔ sa i sufuɛ nanwlɛfuɛ Zɔbu nian. Kɛ ɔ yoli sɔ’n, Zɔbu i sa nun nnɛn’m be fili i sa, kpɛkun i mma’m be wuli yɛ ɔ tɔli tukpacɛ tɛ kpa. Sanngɛ kɛ Satan sili Zɔbu i seiin nantilɛ’n i su akplowa’n, nán Zɔbu ngunmin i akunndan yɛ ɔ buli ɔ. Satan seli kɛ: “Sran i wunnɛn’n yɛ ɔ ti cinnjin i sa nun-ɔn. Kannzɛ sran kun i anyanbeun’n ɔ ti sɛ, sɛ sa’n tɔ cinnjin’n kpa’n, ɔ fɛ i anyanbeun’n fa to i ti-ɔ ɔ yo ye.” Akplowa sɔ’n mannin ndɛ kun su. Kpɛkun kɛ Zɔbu wuli’n, lele m’ɔ́ fá jú andɛ bɔbɔ’n, Satan te si akplowa sɔ’n.—Zɔb 2:4.
2 Kɛ be kleli Zɔbu i yalɛ wieli’n, m’ɔ́ fá dí afuɛ 600, Ɲanmiɛn maan Salomɔn klɛli i kɛ: “Min wa, fa akunndan nanti. Sɛ a fa akunndan nanti’n, n klun jɔ́. I liɛ’n, sɛ sran kan min wun ndɛ’n, ń kwlá sɔ́ su.” (Nyanndra Mun 27:11) I sɔ’n kle weiin kɛ blɛ mɔ Salomɔn klɛ́ ndɛ sɔ’n, nn Satan nin a yaciman Zoova i klɔklɔlɛ. Asa ekun’n, akoto Zan wunnin i aolia nun kɛ kɛ be takali Ɲanmiɛn i Sielɛ’n afuɛ nga be flɛ i 1914 nun’n mɔ i sin’n, be kannin Satan bo ɲanmiɛn su lɔ’n, Satan te sanman Ɲanmiɛn i sufuɛ mun. Lele m’ɔ́ fá jú andɛ’n mɔ y’a ju mɛn tɛ nga i awieliɛ’n i wun koko’n, Satan te si Ɲanmiɛn i sufuɛ’m be seiin nantilɛ’n i su akplowa!—Sa Nglo Yilɛ 12:10.
3. ?Afɔtuɛ kpakpa benin mun yɛ Zɔb fluwa’n man e ɔ?
3 I sɔ’n ti’n, afɔtuɛ kpakpa nga Zɔb fluwa’n kle e’n maan e fa e ɲin sie be nun nsan be su. I klikli’n yɛle kɛ, afɛ nga be tɔli Zɔbu su’n ti maan e wun klɔ sran’m be kpɔfuɛ dan’n i wlɛ. Kpɛkun e wun sran ng’ɔ tanndan Ɲanmiɛn i sufuɛ’m be ɲrun’n i wlɛ wie. Sran’m be kpɔfuɛ dan sɔ’n yɛle mmusu’m be si Satan. I nɲɔn su’n yɛle kɛ, kannzɛ bɔbɔ be kle e yalɛ sɛ, sɛ e nin Ɲanmiɛn e afiɛn’n mantan kpa’n, ɔ́ úka e naan y’a nanti seiin titi. I nsan su’n yɛle kɛ, sɛ afɛ tɔ e su naan ɔ yo e kɛ e fa ajalɛ tɛ wie’n, kɛ nga Ɲanmiɛn fa yoli Zɔbu sa’n, ɔ́ úka e naan y’a jran kekle. Andɛ’n, Zoova fɛ i Ndɛ’n nin i anuannzɛ’n ɔ nin i wawɛ’n yɛ ɔ fa uka e ɔ.
Maan e ɲin tran e kpɔfuɛ’n su titi
4. ?Wan dunman nun ti yɛ mɛn’n ti tɛ sɔ andɛ ɔ?
4 Sran kpanngban be bumɛn i kɛ Satan o lɛ. Ɔ maan, kannzɛ bɔbɔ ninnge nga be yo be mɛn nun’n be bo be wla’n, sanngɛ be siman like nga ti yɛ lika’n ti sɔ’n. Be siman kɛ mmusu’m be si Satan ti yɛ ɔ ti sɔ ɔ. Ɔ ti su kɛ ɲrɛnnɛn nga klɔ sran’m be wun be’n, be sunman lika fin be bɔbɔ. Adam nin Ɛvu mɔ be ti e si nin e nin klikli’n be kpɔcili be Yifuɛ’n. Kɛ ɔ fɛ i lɛ’n, sran nga i sin’n be bali’n, b’a yoman ngwlɛlɛfuɛ mlɔnmlɔn. Kannzɛ ɔ ti sɔ’n, sanngɛ Satan yɛ ɔ lakali Ɛvu yɛ maan ɔ yoli ɲin kekle Ɲanmiɛn su ɔ. Mɛn tɛ ng’ɔ o yɛ’n mɔ w’a jrɛn i ja kunngba su’n, ɔ nin i nun ninnge wafawafa nga klɔ sran’m mɔ fɔ o be nun’n be yo’n, Satan yɛ ɔ siesieli be ɔ. Kɛ mɔ Satan yɛ ɔ ti “mɛn nga i min’n” ti’n, i nzuɛn kunngba’n yɛ klɔ sran’m be yi i nglo ɔ. Yɛle kɛ be di tutre, be bu be bɔbɔ be wun akunndan, be ɲin ci sran, , be ɲin yiman like, be laka be wiengu kpɛkun be ti ɲin keklefuɛ. (2 Korɛntfuɛ Mun 4:4; 1 Timote 2:14; 3:6; an kanngan Zak 3:14, 15 nun.) Sran’m be nzuɛn sɔ’n ti’n, i politikifuɛ mun o, i asɔnunfuɛ mun o, ndɛnngan tɔ be afiɛn. Asa ekun’n, sran’m be kpɔ be wun, be di ndrunmun yɛ be yo sa sukusuku. I kwlaa sɔ’n yɛ maan sran’m be fɛ’n niɔn.
5. ?Ngue yɛ e kunndɛ kɛ é fá like kpa nga e si i’n é yó ɔ?
5 E mɔ e ti Zoova sufuɛ’n, e si sran nga ti yɛ mɛn’n w’a yo tɛ sa’n. Nanwlɛ like nga e si i’n, ɔ ti dan! ?Ɔ maan ɔ yoman e kɛ e bo jasin fɛ’n naan sran’m b’a wun mɛn’n i sacifuɛ’n? ?Yɛ kɛ e o Ɲanmiɛn Kpli Zoova sin mɔ e yiyi wafa nga ɔ́ wá núnnún Satan ɔ nin ɲrɛnnɛn ng’ɔ o sran’m be su’n i nun e kle e wiengu mun’n, ɔ yoman e fɛ?
6, 7. (a) ?Wan ti yɛ be kle Ɲanmiɛn i sufuɛ kpa’m be ɲrɛnnɛn ɔn? (b) ?Wafa sɛ yɛ e kwla nian Elii i ajalɛ’n su ɔ?
6 Ɲrɛnnɛn ng’ɔ o mɛn’n nun’n i dan lika fin Satan. Sanngɛ nɛ́n i ngba ɔ. I yɛ maan be tanndan Ɲanmiɛn i sufuɛ’m be ɲrun ɔn. W’a fua kpa kɛ ɔ́ sá e nían. Zezi Klist seli akoto Piɛli kɛ: “Simɔn, Simɔn, nian Satan srɛli amun wun atin, i waan ɔ́ sá amun nían.” (Lik 22:31) I kunngba’n, e kwlaa nga e fa Zezi i ajalɛ’n su’n, maan be lu i be blo i, saan bé klé e yalɛ. Piɛli fali Satan sunnzunnin “asɔmɔli b’ɔ wlan-wlan ɔ kpan kunndɛ nnɛn’n.” Pɔlu kusu seli kɛ: “Sran kwlaa nga i waan ɔ nin Krist-Jésus bé káci sran wunmuan naan ɔ́ yó Nyanmiɛn klun sa’n, saan bé klé i yalɛ.”—1 Piɛr 5:8; 2 Timote 3:12.
7 Kɛ sa yalɛ tɔ e wiengu Klistfuɛ kun su’n, ɔ fataman kɛ e se kɛ Zoova yɛ ɔ yoli ɔ. Kɛ e nga e fa wunnin i lɛ’n, Satan yɛ ɔ ti e kpɔfuɛ’n niɔn. I sɔ’n ti’n, sɛ kekle o e nian wie su’n, e cuɛnman e wun sanngɛ e fa e wun e mɛntɛn i, yɛ e fɔnvɔ i kɛ nga Elii fa yoli Zɔbu laa’n sa. E ukɛ i naan w’a kwla jran kekle e kwlakwla e kpɔfuɛ Satan ɲrun. (Nyanndra Mun 3:27; 1 Tɛsalonikfuɛ Mun 5:25) Like nga e kunndɛ’n, yɛle kɛ é úka e wiengu Klistfuɛ’n naan kannzɛ ɔ yo sɛ yo sɛ’n, ɔ nanti seiin titi naan i sɔ yolɛ’n jɔ Zoova klun.
8. ?Ngue ti yɛ Satan w’a kwlá yoman naan Zɔbu w’a yaci Zoova manmanlɛ ɔ?
8 Like klikli nga Satan yoli maan ɔ fili Zɔbu i sa’n yɛle i nnɛn mun. Nnɛn sɔ’m be ti i cinnjin, afin atrɛkpa’n be ti yɛ ɔ ɲan like di ɔ. Sanngɛ ɔ fa be su Ɲanmiɛn wie. Kɛ Zɔbu ko wie i mma’m be sanwun yo’n “ɔ jaso nglɛmun ndɛ ɔ kun nnɛn yi tɛ nga be yrɛ i nnɛn’n kɔlikɔli’n. Ɔ yi tɛ sɔ’n i mma’m be ti nun ti nun. Afin i waan: ‘N siman sɛ min mma’m be yoli sa tɛ wie o! Sɛ be kannin Nyanmiɛn i ya o!’ Kɛ Zɔb yo i sɔ titi-ɔ.” (Zɔb 1:4, 5) E wun i weiin kɛ Zɔbu fa nnɛn yi tɛ man Zoova titi. Sanngɛ kɛ i ɲrɛnnɛn’n boli i bo’n, w’a kwlá yomɛn i sɔ kun. Zɔbu w’a ɲanman ‘ninnge kpakpa’ naan w’a fa manman Zoova kun. (Nyanndra Mun 3:9) Sanngɛ ɔ kwla fɛ i nuan’n yi Zoova i ayɛ. Yɛ ɔ yoli sɔ kusu!
Maan e fa e wun e mantan Zoova kpa
9. ?Ngue like yɛ ɔ ti e cinnjin kpa ɔ?
9 Sɛ e ti sikafuɛ annzɛ yalɛfuɛ o, sɛ e ti kpɛnngbɛn annzɛ gbanflɛn o, sɛ e ti juejue annzɛ e timan juejue o, e kwla fa e wun e mantan Zoova kpa. Kannzɛ sa ng’ɔ o e su’n ti sɛ ti sɛ’n, sɛ e nin Ɲanmiɛn e afiɛn’n mantan kpa’n, i sɔ’n úka e naan y’a nanti seiin titi naan Zoova i klun w’a jɔ e wun. Sran wie mun bɔbɔ be siman Biblu’n nun ndɛ’n kpa, sanngɛ be trali be awlɛn be nantili seiin Ɲanmiɛn sulɛ’n nun.
10, 11. (a) ?Kɛ be sali e niaan bla kun i seiin nantilɛ’n be niannin’n, ngue yɛ ɔ yoli ɔ? (b) ?Wafa sɛ yɛ aniaan bla sɔ’n kleli kɛ Satan ti ato buafuɛ ɔ?
10 Maan e fa e ɲin e sie i aniaan bla Valentina Garnovskaya m’ɔ fin Risi’n i ndɛ’n su e nian. Ɔ ti nvle sɔ’n nun lɔ Zoova i Lalofuɛ mɔ be kleli be ɲrɛnnɛn kpa’n, mɔ sanngɛ be jrannin kekle kɛ Zɔbu sa’n, be nun kun. Afuɛ nga be flɛ 1945 nun’n, aniaan kun boli jasin fɛ’n kleli i. Kɛ ɔ́ yó sɔ’n nn w’a ɲan afuɛ 20. I sin’n aniaan’n bali yɛ ɔ nin i be wa kokoli Biblu’n su yalɛ kpɛ nɲɔn ekun. Kpɛkun w’a timɛn i ngan kun. Ɔ nin i sɔ ngba’n, Valentina boli jasin fɛ’n i bolɛ’n bo. Ɔ boli kleli i mantanfuɛ mun. I sɔ’n ti’n, be trɛli i ɔli kan nga be kle sran’m be ɲrɛnnɛn lɔ’n, ɔ ko dili afuɛ mɔcuɛ. Be yacili i nun afuɛ nga be flɛ i 1953 nun. Kɛ ɔ yoli sɔ cɛ’n, yɛ ɔ boli jasin fɛ’n i bolɛ bo ekun ɔn. Be wa trɛli i ekun. Yɛ be wlɛli i bisua afuɛ blu. Kɛ ɔ dili afuɛ kpanngban bisua kun nun’n, be fɛli i be ɔli bisua uflɛ nun. Ɔ toli aniaan bla wie’m be lɔ. Be le Biblu kun. Le kun’n, aniaan bla kun fali Biblu’n kleli Valentina. I fɛ m’ɔ yoli i’n, be kanman! Amun bɔbɔ amun nian. Kɛ afuɛ nga be flɛ i 1945 nun’n, ɔ wunnin Biblu kun aniaan ng’ɔ boli jasin fɛ’n kleli i’n i sa nun’n, ɔ nin a wunman uflɛ kun le!
11 Afuɛ nga be flɛ i 1967 nun’n, be yacili Valentina nun. Ɔ maan ɔ kwla yoli i batɛmu fa kleli kɛ ɔ fɛli i wun mannin Zoova. Kɛ ɔ ɲɛnnin i ti sɔ’n, ɔ fɛli i wun wlɛli i jasin fɛ’n i bolɛ nun lele afuɛ nga be flɛ i 1969 nun’n. Sanngɛ afuɛ sɔ nun’n, be wa trɛli i ekun. I lifuɛ’n, be wlɛli i bisua afuɛ nsan. Ɔ nin i sɔ’n ngba’n, Valentina boli jasin fɛ’n titi. Kwlaa naan w’a wu afuɛ nga be flɛ i 2001 nun’n, ɔ yoli maan sran 44 be sili Zoova. Ɔ dili afuɛ 21 bisua’m be nun. Kɛ m’ɔ kunndɛ kɛ ɔ́ nánti seiin titi’n ti’n, ɔ kplinnin su kɛ like kwlaa fi i sa. W’a ɲɛnmɛn i ti w’a yomɛn i klunklo like bɔbɔ. Kɛ Valentina wá fá wú’n, ɔ seli kɛ: “M’an ɲanman n tiaun tranwlɛ sa le. Min ninnge’m be kwlaa be sɔn valizi kunngba nun. Sanngɛ n dili aklunjuɛ Zoova i sulɛ’n nun.” Satan mɔ i waan sɛ ɲrɛnnɛn tɔ klɔ sran’m be su’n, bé yáci Ɲanmiɛn i sulɛ’n, nanwlɛ Valentina kleli klanman kɛ ɔ ti ato buafuɛ! (Zɔb 1:9-11) E kwla lafi su kɛ Valentina yoli maan Zoova klun jɔli. Naan kusu ɔ o Zoova klun kɛ, kɛ i blɛ’n ju’n, ɔ́ cɛ́n i nin sran nga be trali be awlɛn be suli i nanwlɛ su lele be fa wuli’n be kwlaa.—Zɔb 14:15.
12. ?E nin Zoova e nantilɛ’n nun’n, wafa sɛ yɛ klolɛ’n uka e ɔ?
12 Klolɛ mɔ e klo Zoova ti yɛ e nin i e tra janvuɛ ɔ. E klo Ɲanmiɛn i nzuɛn’n yɛ e nantilɛ’n nun’n, e bu i klun sa’n i akunndan. Satan seli kɛ nán e klunklo yɛ e su Zoova ɔ. Sanngɛ nɛ́n i sɔ ɔ. E tu e klun e su i yɛ kɛ é yó i sɔ’n, e nianman e sin. Klolɛ sɔ mɔ e tu e klun e klo i’n, ɔ uka e naan ɲrɛnnɛn blɛ nun’n y’a nanti seiin. Zoova kusu “ɔ sasa be bɔ be klo i’n.”—Nyanndra Mun 2:8; Jue Mun 97:10.
13. ?Wafa sɛ yɛ Zoova bu like nga e yo e mɛn i’n niɔn?
13 Kannzɛ bɔbɔ ɔ yo e kɛ e kwlá yoman like fi kun’n, sanngɛ klolɛ’n maan e manman Zoova i dunman’n. Ɔ si e akunndan’n yɛ ɔ jranman like kwlaa nga e waan é yó mɔ e kwlá yoman’n su, ɔ buman e fɔ. Nán like nga e yo’n i ngunmin yɛ ɔ ti cinnjin ɔn. Sanngɛ like nga ti yɛ e yo like sɔ’n ti cinnjin wie. Kannzɛ bɔbɔ Zɔbu fɛli kpa naan i wla boli i wun’n, sanngɛ ɔ kannin klolɛ ng’ɔ klo Zoova’n i ndɛ kleli i suɛn tɔnfuɛ mun. (An kanngan Zɔb 10:12; 28:28 nun.) Zɔb fluwa’n i ndɛ tre kasiɛn’n nun’n, Ɲanmiɛn seli kɛ ɔ fali Elifazi nin Bildadi yɛ Zɔfar be wun ya. Afin b’a diman nanwlɛ. Kɛ ɔ́ yó sɔ’n, Zoova kleli kɛ i klun jɔ Zɔbu wun. I sɔ ti’n, ɔ flɛli i kɛ “min sufuɛ,” kpɛ nnan. Kpɛkun ɔ seli i kɛ ɔ srɛ Ɲanmiɛn man sa tɛ yofuɛ sɔ mun. (Zɔb 42:7-9) Maan e kusu e yo kɛ Zɔbu sa wie naan Zoova klun jɔ e wun.
Zoova suan i sufuɛ nga be kpɔcimɛn i’n be bo
14. ?Wafa sɛ yɛ Zoova ukali Zɔbu naan w’a kaci i akunndan bulɛ’n niɔn?
14 Kannzɛ fɔ o Zɔbu nun’n, sanngɛ ɔ nantili seiin titi. Kɛ afɛ tinnin i su dan’n, blɛ sunman nun’n, w’a buman akunndan kpa. I wie yɛle kɛ ɔ seli Zoova kɛ: “Min Nyanmiɛn, n kpan flɛ wɔ-ɔ, a tɛ-man min su. [...] A fa wɔ wunmiɛn’n kwlaa a jin min su a kle min nyrɛnnɛn sa cɔcɔcɔ.” Asa ekun’n, Zɔbu seli kɛ: “A si jrɛiin kɛ m’an yo-man sa.” Yɛ ɔ seli ekun kɛ: “M’an yo-man sa tɛ. Kɛ n srɛ Nyanmiɛn’n, min akunndan nun ti weiin.” I sɔ mɔ Zɔbu kannin’n kle kɛ ɔ bu i wun akunndan ngboko yɛ ɔ kunndɛ kɛ ɔ́ klé kɛ i ndɛ yo fɛ. (Zɔb 10:7; 16:17; 30:20, 21) Ɔ nin i sɔ ngba’n, Zoova ukali Zɔbu amanniɛn su. Ɲanmiɛn usɛli i kosan wie mun naan ɔ yaci i wun akunndan bulɛ’n, naan ɔ wun kɛ Ɲanmiɛn i dan tra like kwlaa, naan klɔ sran’m be kwlá faman be wun sunnzunmɛn i. Zɔbu sɔli afɔtuɛ’n nun klanman, kpɛkun ɔ kacili i sa.—An kanngan Zɔb 40:8; 42:2, 6 nun.
15, 16. ?Wafa sɛ yɛ Zoova ukɛ i sufuɛ mun andɛ ɔ?
15 Andɛ Zoova kle i sufuɛ’m be atin yɛ ɔ man be afɔtuɛ klolɛ su wie. Asa ekun’n, e ɲan ninnge cinnjin wie mun. I wie yɛle kɛ Zezi Klist fɛli i wun yili e ti tɛ. I sɔ’n ti’n, Ɲanmiɛn kwla yaci e sa tɛ mun cɛ e. E ti tɛ sɔ mɔ Zezi yili’n ti’n, kannzɛ fɔ o e nun’n, sanngɛ e nin Ɲanmiɛn e afiɛn’n kwla mantan kpa. (Zak 4:8; 1 Zan 2:1) Asa ekun’n, kɛ afɛ o e su’n, e kwla srɛ Ɲanmiɛn kɛ ɔ fɛ i wawɛ’n suan e bo. Asa kusu’n, e le Biblu’n i wunmuan’n. Ɔ maan, sɛ e kanngan nun naan e bu su akunndan’n, kɛ be sa e Ɲanmiɛn sulafilɛ’n be nian’n, é kwlá jrán kekle. Biblu’n nun like suanlɛ’n uka e naan y’a wun nglo nin asiɛ’n be sielɛ’n i su akplowa ng’ɔ tɔli’n, ɔ nin e bɔbɔ e seiin nantilɛ’n be wlɛ.
16 Asa ekun’n, Zoova sin “sran kpa nanwlɛfuɛ b’ɔ si ngwlɛlɛ’n” i ja nun, ɔ mɛn i sufuɛ nga be o mɛn wunmuan’n nun’n be aliɛ ɲanmiɛn ninnge’m be nun. Kɛ mɔ e ti Zoova i sufuɛ wie’n ti’n, ɔ nian e lika wie. (Matie 24:45-47) Be yo aɲia Zoova i Lalofuɛ’m be asɔnun 100.000 be nun be fa kle e like, yɛ be wla e fanngan naan sɛ sa kekle’n tɔ’n y’a kwla tra e awlɛn. Sa ng’ɔ tɔli Alemaɲi lɔ Zoova i Lalofuɛ’m be nun talua kaan kun su’n, ɔ yi i sɔ’n i nglo. Be flɛ i kɛ Sheila.
17. ?Wafa sɛ yɛ sa ng’ɔ tɔli talua kan kun su’n kle kɛ aɲia’m be bo kɔlɛ titi’n, ɔ ti ngwlɛlɛ aeliɛ ɔ?
17 Cɛn kun be suklu sua liɛ’n nun lɔ’n, kɛ mɔ be like klefuɛ’m be wie fi nunman lɛ’n ti’n, suklu mma’m be waan bé yó like kun. Yɛle kɛ be waan bé fá blɔfuɛ’m be ngɔiman yilɛ like mɔ be flɛ i Ouija, bé kán ngowa. Kɛ be kannin sɔ cɛ’n yɛ Sheila fiteli ɔ. I sin’n, ndɛ ng’ɔ tili’n maan fitelɛ m’ɔ fiteli’n yoli i fɛ. Yɛle kɛ kɛ suklu mma’m bé kán Ouija nun ngowa’n, ɔ yoli be nun wie’m be kɛ mmusu’m be o lɛ sa. Ɔ maan, srɛ m’ɔ kunnin be’n ti, be bo sanndili. ?Ngue ti yɛ Sheila fiteli ndɛndɛ sɔ ɔ? I waan: “E aɲia kun bo’n, be kannin like nga ti yɛ Ouija timan kpa’n i ndɛ. Kɛ be kannin sɔ w’a cɛman yɛ i su ndɛ’n tɔli suklu lɔ ɔ. Ɔ maan n si like ng’ɔ fata kɛ n yo’n. Kɛ nga Biblu’n fa kɛn i Nyanndra Mun 27:11 nun sa’n, n kunndɛ kɛ Zoova klun jɔ min wun.” Kɛ mɔ Sheila trannin aɲia sɔ’n i bo m’ɔ fɛli i su sieli ndɛ nga be kannin’n i bo kpa’n, ɔ yoli i kpa dan!
18. ?Ngue yɛ e tinuntinun e ta nda kɛ é yó ɔ?
18 Ninnge nga Ɲanmiɛn i anuannzɛ’n kle e’n, maan e tinuntinun e ta nda kɛ é fá be su. Ninnge nga be kle e atin’n mɔ be uka e’n, yɛle aɲia’m be bo tranlɛ titi’n nin Biblu’n nun kannganlɛ’n ɔ nin Biblu’n i akua’m be nun like suanlɛ’n yɛ Ɲanmiɛn srɛlɛ’n, kpɛkun e wun mɔ e fa mantan Klistfuɛ nga be ɲin w’a ti Ɲanmiɛn ninnge’m be nun’n. Zoova kunndɛ kɛ e nanti seiin titi yɛ ɔ lafi su kɛ é yó sɔ. ?Nanwlɛ nán e cenjele like dan yɛle Zoova i dunman mɔ e kwla mɛnmɛn i’n, ɔ nin sran seiin mɔ titi e kwla yo’n? ?Yɛ nán e cenjele like wie yɛle aklunjuɛ nga e aeliɛ’n ti’n Zoova di’n?
?Amun wla kwla kpɛn su?
• ?Satan ti’n afɛ benin yɛ ɔ o mɛn’n nun ɔn?
• ?Like benin yɛ e le i m’ɔ ti e cinnjin kpa ɔ?
• ?Ngue su yɛ e nin Zoova e janvuɛ tralɛ’n taka ɔ?
• ?Ninnge nga Zoova fa suan e bo andɛ’n, be nun wie mun yɛle benin?
[Foto, bue 15]
E kwla uka e wiengu Klistfuɛ mun naan b’a nanti seiin titi.