I nun mɔ Ɲanmiɛn sie nglo nin asiɛ’n, fɔundi o lɛ

?Ngue ti yɛ e mian Ɲanmiɛn i Sielɛ’n i wun-ɔn?

Mɛn’n i bo bolɛ nun’n, e Yifuɛ mɔ i dunman’n yɛle Zoova’n, i yɛ ɔ sie like kwlaa-ɔ. Ɔ sieli klɔ sran mun klolɛ su. Ɔ mannin be lika klanman kpa kun kɛ be tran nun. Lika sɔ’n yɛle Edɛnin fie’n. Asa ekun’n, ɔ mannin be aliɛ kpanngban kpa. Yɛ ɔ mannin be junman kpa kun kɛ be di. (Bo Bolɛ 1:28, 29; 2:8, 15) Sɛ ɔ ti kɛ klɔ sran’m be kplinnin su kɛ Ɲanmiɛn sie be titi’n, nn dɔ nga su e di fɔundi.

Ɛvu w’a fa waka mma nga Ɲanmiɛn seli kɛ nán be di’n w’a fa man Adan. — Klɔ sran klikli’m b’a kplinman su kɛ Ɲanmiɛn sie be

Biblu’n se kɛ anzi kun jasoli Ɲanmiɛn wun. Be wa flɛli anzi sɔ’n kɛ Suɛn tɔnfuɛ Satan. Ɔ seli kɛ Ɲanmiɛn leman atin sieman klɔ sran mun. I waan sɛ klɔ sran’m be sie be bɔbɔ be wun’n yɛ bé kwlá dí aklunjuɛ’n i kpafuɛ’n niɔn. Adan nin Ɛvu mɔ be ti e nannan klikli mun’n, be niannin Satan i ayeliɛ’n su. Yɛle kɛ be jasoli Ɲanmiɛn wun wie.—Bo Bolɛ 3:1-6; Sa Nglo Yilɛ 12:9.

Kɛ mɔ Adan nin Ɛvu b’a kplinman su kɛ Ɲanmiɛn yo be Siefuɛ’n ti’n, lika klanman nga be tran nun’n fili be sa. Asa ekun’n, nguan m’ɔ leman awieliɛ mɔ Ɲanmiɛn waan ɔ́ fá mán be’n, w’a fa manman be kun. Yɛ fɔ’n wa trannin be nun. (Bo Bolɛ 3:17-19) Ajalɛ sɔ mɔ be fali’n ti’n, ba nga be wuli be’n be wunnin be ɲrun. Biblu’n waan Adan i sa tɛ m’ɔ yoli’n ti yɛ ‘sa tɛ yolɛ’n bali mɛn’n nun-ɔn.’ (Rɔmunfuɛ Mun 5:12) Sa tɛ yolɛ’n kpɛli sa uflɛ ba. Yɛle kɛ ‘kɛ sran kun sie i wiengu kun’n, ɔ kle i yalɛ.’ (Akunndanfuɛ’n 8:9) Ndɛ sɔ’n kle kɛ, kɛ klɔ sran’m be sie be wiengu’n, ɔ ti afɛ ngunmin.

KLƆ SRAN’M BE BOLI BE WIENGU SIELƐ BO

Wafa nga Nimrɔdu w’a jran lɛ’n, ɔ kle kɛ ɔ tu i wun. I sin lɔ’n, sran wie’m be su kplan sua. — Nimrɔdu yoli ɲin kekle Zoova su

Biblu’n se kɛ sran klikli ng’ɔ yoli famiɛn asiɛ’n su wa’n yɛle Nimrɔdu. Ɔ yoli ɲin kekle Zoova su. I ayeliɛ’n kleli kɛ ɔ kunndɛman kɛ Ɲanmiɛn sie klɔ sran mun. Kɛ ɔ fɛ i Nimrɔdu blɛ su’n, sran wie mɔ be le kwlalɛ’n, be mianmiannin be wiengu mun. I afuɛ 3.000 yɛ, Famiɛn Salomɔn seli kɛ: “N wunnin be nga be kle be yalɛ’n be ɲinmuɛn nzue’n, yɛ sran fi nunman lɛ naan w’a fɔnvɔ be. Be yalɛ klefuɛ’m be le wunmiɛn.”—Akunndanfuɛ’n 4:1.

Sa kunngba’n yɛ e wun i andɛ-ɔ. Afuɛ 2009 nun’n, fluwa kun seli kɛ sa nga ti yɛ sa tɛ’n w’a sɔn mɛn’n nun’n, i kun yɛle kɛ klɔ sran’m be siman be wiengu sie.

ƝANMIƐN SU WA SIE KLƆ SRAN MUN SIƐN’N!

Mɛn wunmuan’n nun’n, sran’m be kunndɛ siefuɛ mɔ be kwla sie be kpa’n. I sɔ siefuɛ mun yɛ e Yifuɛ’n tali e nda kɛ ɔ́ fá mán e-ɔ.

Foto mun: Klɔ sran’m be wiengu sielɛ’n i sin sa mun. 1. Bla kun m’ɔ o lika fiɛn kun nun’n, w’a fɛ i wa m’ɔ su sun’n. 2. Bian kpɛnngbɛn kun m’ɔ kpinndinman’n la dɔɔtrɔ. 3. Sonja wie’m be su kun alɛ. 4. Sran wie mɔ b’a fa ya’n, be su nanti. 5. Bla kun nin i wa be sa be sin awlo-ɔ, be sie i nzɔliɛ kɛ b’a bo be anuan’n i vitri’n. 6. Sin wɛnsrɛn m’ɔ fin junman diwlɛ wie’m be nun fite’n, w’a fa klɔ wunmuan’n. Yɛ kolan ɲanman wie’m be sendesende lika’n nun. — Awa nga be waan be ti kpa bɔbɔ’n b’a kwlá yiman klɔ sran’m be su ɲrɛnnɛn’n

Ɲanmiɛn takali famiɛn diwlɛ kun. Ɔ ti awa kun m’ɔ́ wá sín klɔ sran’m be awa’m be osu-ɔ. Yɛ “i ngunmin ɔ́ ká lɛ tititi.” (Daniɛl 2:44) Famiɛn Sielɛ sɔ’n yɛ sran miliɔn kaka be srɛ Ɲanmiɛn kɛ i blɛ’n ju’n niɔn. (Matie 6:9, 10) Sanngɛ nán Ɲanmiɛn bɔbɔ yɛ ɔ ti i su famiɛn’n niɔn. Ɔ sieli sran uflɛ famiɛn. Sran sɔ’n trannin asiɛ’n su wa. ?Wan yɛle sran sɔ’n?