4 ?Ngue yɛ ɔ fata kɛ e srɛ i Ɲanmiɛn sa nun ɔn?

ZEZI kleli i sɔnnzɔnfuɛ’m be Ɲanmiɛn srɛlɛ. Be waan Klistfuɛ’m be Ɲanmiɛn srɛlɛ’n nun’n, i sɔ srɛlɛ’n yɛ be kan flan nun kpa’n niɔn. Sɛ i sɔ’n ti nanwlɛ o, sɛ ɔ timan nanwlɛ o sanngɛ ng’ɔ ti weiin’n, yɛle kɛ sran sunman be wunman srɛlɛ sɔ’n i bo mlɔnmlɔn. Asiɛ wunmuan’n su’n, cɛn kwlaa sran akpinngbin kpanngban be suan srɛlɛ sɔ’n, yɛ be jin su sa cɔcɔcɔ. Sanngɛ Zezi w’a seman mlɔnmlɔn kɛ i sɔ yɛ be srɛ Ɲanmiɛn ɔn. ?Wafa sɛ yɛ e si sɔ ɔ?

Ka naan Zezi w’a kle be srɛlɛ sɔ’n, ɔ seli kɛ: “Kɛ amun nin Nyanmiɛn amún kókó yalɛ’n, nán an kan ndɛ kunngba’n flan nun.” (Matie 6:7) ?Sɛ ɔ ti sɔ’n niɔn, nn Zezi bɔbɔ wá kán ndɛ sɔ’n i asabesin’n naan kɛ sran’m bé srɛ́ Ɲanmiɛn’n be kan ndɛ kunngba’n be flan nun? Cɛcɛ, ɔ su yoman sɔ mlɔnmlɔn! Zezi su kle e ndɛ ng’ɔ fata kɛ e kɛn i e srɛlɛ’n nun’n. Ɔ su kle e ninnge nga be ti cinnjin mɔ kɛ é srɛ́ Ɲanmiɛn’n, ɔ fataman kɛ e wla fi be su’n. Maan e bo e ɲin ase e nian ndɛ ng’ɔ kannin’n. Be klɛli srɛlɛ sɔ’n i Matie 6:9-13 nun.

“E Si bɔ a o nyanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Nyanmiɛn nin-ɔn [“Maan ɔ dunman’n ɔ yo sanwun,” Anuãsɛ Fuflɛ].”

Zezi kannin sɔ fa kpɛnnin i sɔnnzɔnfuɛ’m be wla kɛ i Si Zoova yɛ ɔ fata kɛ be srɛ i ɔ. ?Sanngɛ amun si like nga ti yɛ Ɲanmiɛn i dunman’n ti cinnjin m’ɔ fata kɛ be yo i sanwun’n?

Kɛ be yili klɔ sran klikli’n, w’a cɛman yɛ Ɲanmiɛn i dunman’n i sacilɛ’n ɔ wa bali ɔ. Ɲanmiɛn i kpɔfuɛ Satan waan Zoova ti ato buafuɛ naan i ngunmin i wun akunndan yɛ ɔ bu ɔ, naan ɔ leman atin sieman ninnge ng’ɔ yili be mun’n. (Bo Bolɛ 3:1-6) Sran sunman be jrannin Satan sin. Be kleli be wiengu’m be kɛ Ɲanmiɛn ndɛ nunman e ndɛ nun naan i klun yo wi. Kpɛkun be waan ɔ tu i klunngbɔ. Wie liɛ bɔbɔ’n, be waan nán sran yɛ ɔ yili ninnge mun ɔn, naan be boli nun sa ngbɛn. Be wie’m be liɛ’n be tuli be ɲin wɔli Ɲanmiɛn i dunman’n. Kɛ bé káci Biblu’n, be nunnunnin dunman Zoova’n. Yɛ be waan nán sran’m be bo dunman sɔ’n.

Biblu’n kle kɛ Ɲanmiɛn wá yó maan i sɔ aeliɛ tɛtɛ’m be su tranman lɛ kun. (Ezekiɛl 39:7) Kɛ ɔ ko yo sɔ’n, é ɲán ninnge nga e sa mian be wun’n be kwlaa. Kpɛkun ɔ́ yó maan sa nga be o e su’n bé wíe. ?Wafa sɛ yɛ ɔ́ yó sɔ ɔ? Ndɛ yɛ mɔ Zezi kɛnnin i srɛlɛ nun’n, ɔ́ wá tɛ́ kosan sɔ’n su.

“Maan ɔ sielɛ blɛ’n ju.”

Andɛ’n Ɲanmiɛn Sielɛ’n i su ndɛ’n w’a sanngan Ɲanmiɛn sulɛ wafa’m be like klefuɛ’m be akunndan’n mlɔnmlɔn. Sanngɛ Zezi i ndɛ tiefuɛ’m be si kɛ Ɲanmiɛn nuan ijɔfuɛ’m be kɛnnin i laa kpa kɛ Defuɛ kun mɔ Ɲanmiɛn kpɛli i mɔ yɛle Mɛsi’n, ɔ́ wá dí famiɛn Sielɛ kun su. Yɛ Siɛlɛ sɔ’n ɔ́ káci ninnge mun asiɛ’n su. (Ezai 9:5, 6; Daniɛl 2:44) Ɔ́ wá yíyí Satan i gblɛ’n bo kpɛkun ɔ́ núnnún Satan ɔ nin i ninnge ng’ɔ yoli’n mun. Ɔ maan Ɲanmiɛn dunman’n yó sanwun. Ɲanmiɛn Sielɛ’n yó maan alɛ nin tukpacɛ’n nin awe’n ɔ nin wie’n bɔbɔ be su tranman lɛ kun. (Jue Mun 46:10; 72:12-16; Ezai 25:8; 33:24) Kɛ e srɛ Ɲanmiɛn kɛ maan i Sielɛ blɛ’n ju’n, ɔ ti kɛ i kwlaa ngalɛ’n yɛ e su srɛ sa.

“Maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.”

Zezi i ndɛ sɔ’n kle kɛ wafa nga ɲanmiɛn su lɔ m’ɔ ti Ɲanmiɛn i tranwlɛ’n be yo i klun sa’n, i kunngba’n saan fii bé yó i asiɛ’n su wa wie. Like fi w’a kwlá tanndanman Ɲanmiɛn i klun sa’n i yolɛ’n i ɲrun ɲanmiɛn su lɔ. Afin lɔ’n, Ɲanmiɛn i Wa’n nin Satan nin i minniɛn’m be kunnin alɛ. Yɛ ɔ toli be guɛli i asiɛ’n i bue liɛ’n su wa. (Sa Nglo Yilɛ 12:9-12) Zezi i srɛlɛ sɔ’n i nun like nsan su’n, m’ɔ ti kɛ ninnge nɲɔn klikli’m be sa’n, ɔ uka e naan y’a fa e ɲin y’a sie i like ng’ɔ ti cinnjin kpafuɛ’n su. Like sɔ’n yɛle Ɲanmiɛn i klun sa’n. Nán e bɔbɔ e klun sa liɛ’n niɔn. Ɲanmiɛn i klun sa’n yɛ ɔ́ yó naan ninnge kwlaa ng’ɔ yili be’n, b’a ɲan ye dan kpafuɛ’n niɔn. Ɔ maan i nun mɔ Zezi mɔ fɔ nunmɛn i nun’n, i bɔbɔ’n o asiɛ’n su wa’n, ɔ seli i Si kɛ: “Sanngɛ nán yo nga n klo kɛ ɔ yo su’n, sanngɛ yo nga a klo kɛ á yó i su’n.”—Lik 22:42.

“Man ye aliɛ ng’ɔ ju ye ndɛ’n.”

I sin’n, Zezi kleli kɛ e kwla srɛ ninnge nga e sa mian be wun’n be ti wie. Ninnge ng’ɔ fata kɛ e ɲan be aliɛ ba kun nun’n, sɛ be ti yɛ e srɛ Ɲanmiɛn’n, ngasi nunman nun kaan sa. I kpa’n, kɛ e yo sɔ’n ɔ yo maan e wla fiman su kɛ Zoova yɛ ɔ ti sran ‘b’ɔ man sran’m be kwlaa be nguan’n, b’ɔ man be wunmiɛn’n, b’ɔ man be like’n kwlaa’ ɔ. (Sa Nga Be Yoli’n 17:25) Biblu’n yi i nglo kɛ ɔ ti siɛ kun m’ɔ klo i mma mun ɔn. Naan ɔ klo kɛ ɔ́ fá like ng’ɔ mian be sa’n mán be. Kusu kɛ m’ɔ ti siɛ kpa’n ti’n, ɔ su faman like ng’ɔ kwla yo i mma’m be tɛ’n manman be.

“Yaci sa nga e yo wɔ’n cɛ e.”

?Sa wie o lɛ m’ɔ fata kɛ Ɲanmiɛn yaci cɛ e ɔ? Andɛ’n sran kpanngban be siman like nga be flɛ i sa tɛ’n, yɛ be wunman like nga be yo’n i tɛ lika’n. Sanngɛ Biblu’n waan sɛ ɲrɛnnɛn tɛtɛ kpa’m be o e su’n, ɔ fin sa tɛ’n. Afin i li ti yɛ maan klɔ sran’m be wu ɔ. Kɛ mɔ be wuli e sa tɛ’n nun’n ti’n, e kwlaa e yo sa tɛ kpɛ sunman. Ɔ maan sɛ Ɲanmiɛn yaci e wun sa’n cɛ e’n yɛ e kwla lafi su kɛ é trán nguan nun tititi ɔ. (Rɔmfuɛ Mun 3:23; 5:12; 6:23) Kusu kɛ e ti ndɛ yɛ mɔ Biblu’n kan’n, ɔ cici e wla. I waan: “Min Min, ɔ klun ti kpa, a yaci sran wun sa cɛ i.”—Jue Mun 86:5.

“De ye [lakafuɛ’n] i sa nun.”

?E wun i wlɛ kɛ y’a mian kɛ longa sa naan ɔ fata kɛ Ɲanmiɛn sasa e ndɛndɛ kpa? Kɛ be se kɛ “lakafuɛ’n” yɛle Satan naan ɔ o lɛ sakpa’n, sran sunman be faman su. Sanngɛ Zezi kleli kɛ Satan o lɛ sakpasakpa. I kpa bɔbɔ’n, ɔ flɛli Satan kɛ “sran ng’ɔ sie mɛn nga’n.” (Zan 12:31; 16:11) Satan m’ɔ sie mɛn nga’n, w’a saci i tɛtɛ kpa. Ɔ maan ɔ kunndɛ kpa kɛ ɔ́ sáci e sɔ wie. I waan ɔ́ yó naan e nin e Si Zoova e afiɛn’n saci. (1 Piɛr 5:8) Sanngɛ Satan i tinmin’n, ɔ juman Zoova liɛ’n nun kaan sa. Yɛ Zoova kusu kɛ ɔ sasa be nga be klo i’n, ɔ yo i fɛ.

Nga e kɛnnin i lɛ’n, ɔ bo srɛlɛ nga Zezi kleli i sɔnnzɔnfuɛ mun’n i kpɔlɛ kan. Sanngɛ ɔ kanman ndɛ ng’ɔ fata kɛ e fa wlɛ i srɛlɛ’n nun’n i ngba. Nán maan e wla fi su kɛ1 Zan 5:14 kan Ɲanmiɛn i ndɛ’n se kɛ: ‘Like kwlaa nga e srɛ i’n, b’ɔ ti i klun su’n, ɔ́ mán ye.’ I sɔ’n ti’n, nán maan e se kɛ e su ndɛ’m be timan like fi naan kɛ ninnge kɛ ngalɛ sa’m be ti’n e srɛ Ɲanmiɛn’n, ɔ yo e kɛnsrɛn.—1 Piɛr 5:7.

?Yɛ blɛ nin lika ng’ɔ fata e srɛ Ɲanmiɛn nin? ?Blɛ kwlaa nun annzɛ lika kwlaa yɛ sɛ e srɛ Ɲanmiɛn’n ɔ kwla tɛ su ɔ?