?E di e ninnge’m be su aklunjuɛ ɔ yo ye?

“Ninnge nga yalɛfuɛ’n le i’n, sɛ ɔ ju i’n, ɔ ti kɛ aɲanbeunfuɛ sa. Asa kusu, ninnge nga aɲanbeunfuɛ’n le i’n, sɛ ɔ jumɛn i’n, ɔ ti kɛ yalɛfuɛ sa.” —Benjamin Franklin.

KƐ NGA ɲanndra sɔ’n fa kan’n sa’n, sran kpanngban be wunnin kɛ be yoman aklunjuɛ’n i atɛ gua bo. Ɔ maan sɛ be klun m’ɔ jɔ mɔ maan be wla gua ase’n, ɔ ti kɛ lafilɛ nun like sa mɛn’n nunfuɛ’m be ɲrun’n, ɔ boman e nuan! Afin akunndan nga be fa tru i lika’n nun’n, yɛle kɛ sran’m be kunndɛ ninnge kpanngban, annzɛ be konvi sɔ sran uflɛ’m be mɛn dilɛ liɛ’n. ?Sa nga é wá kán be ndɛ yɛ’n, i wie kannin e?

• Aata dilɛ ninnge’m be ndolo bofuɛ’m be jin e su cɛn kwlaa kɛ sɛ e to ninnge kpanngban’n yɛ é kwlá dí aklunjuɛ ɔ.

• Junman su lɔ’n annzɛ suklu lɔ’n junman’n nun akplowa silɛ’n, ɔ yo maan e fa e wun sunnzun e wiengu mun.

• Sran’m be siman like nga e yo man be’n i su ye.

• E janvuɛ’m be fa ninnge nga be le be’n be laka e konvi.

• Mɛn dilɛ’n i su kosan cinnjin nga e usa’n, e wunman be su tɛlɛ’n.

?Kɛ sa kɛ ngalɛ sa’m be o sran kun su’n, ɔ kwla di aklunjuɛ? Akoto Pɔlu seli kɛ: “N si yalɛ nun tran, ɔ nin blɛ mɔ like ɔ o min sa nun’n i nun tran.” Ɔ juli wie’n, ɔ ɲannin ninnge kpanngban. Sanngɛ blɛ wie nun’n, like ng’ɔ le i’n ti kaan sa. I aeliɛ sɔ’n ti’n, i wun yoli i janvuɛ’m be klanman, sanngɛ sran uflɛ’m be yoli i finfin. Ɔ nin i sɔ ngba’n, ɔ seli kɛ ninnge’m be ɲanlɛ’n nun’n, ɔ ‘suɛnnin i kɛ i kwlaa nga ɔ tra nun’n ɔ jɔ i klun.’—Filipfuɛ Mun 4:11, 12, Anuãsɛ Fuflɛ.

Be nga be nin a faman ajalɛ le naan ninnge nga be le i’n w’a ju be’n, be simɛn i sɔ ajalɛ’n i su aklunjuɛ nga sran kun kwla di’n. Sanngɛ kɛ nga Pɔlu fa kannin’n sa’n, be kwla suɛn i sɔ yolɛ. Ɔ maan siɛn’n, ajalɛ nnun nga be o Biblu’n nun mɔ be kwla kle e wafa nga e kwla di ninnge nga e le be’n be su aklunjuɛ’n, é srɛ́ amun kɛ amun bu be akunndan.