Ɲanmiɛn sulɛ kpafuɛ’n nun’n, maan e yo juejuefuɛ
“Fie’n w’a yo ye, sanngɛ i su junman difuɛ’m b’a sɔn-man.”—MAT. 9:37.
1. ?Sa benin yɛ amun kwla fa yiyi like’n i ndɛndɛ yolɛ’n nun ɔn?
?SƐ FLUWA cinnjin wie o e sa nun m’ɔ fata kɛ sran kun dun mmua nian nun naan lika’n w’a san’n, ngue yɛ é yó ɔ? É klɛ́ su kɛ “BE YO I NDƐNDƐ KPA!” ?Sɛ ndɛ cinnjin wie ti e su nanti é kɔ́ naan e nin sran é kó yía’n, ngue yɛ é yó ɔ? É nánti ndɛndɛ! Kɛ ɔ ti sɔ ɔ. Sɛ e le like wie e yo naan dɔ’n su sin’n, e ɲin blo kpa. E wun usu e sa tututu. Kpɛkun e mian e ɲin e yo like sɔ’n i ndɛndɛ kpa. I kwlaa ngalɛ’n yɛ be flɛ i like’n i ndɛndɛ yolɛ’n niɔn!
2. ?Junman ng’ɔ fata kɛ Klistfuɛ kpa’m be di i ndɛndɛ kpa andɛ’n yɛle benin?
2 Junman ng’ɔ fata kɛ Klistfuɛ kpa’m be di i ndɛndɛ kpa andɛ’n, yɛle Ɲanmiɛn Sielɛ’n i jasin fɛ’n i bolɛ’n. Kpɛkun be kle nvlenvle kwlaa nun sran’m be like maan be kaci Zezi i sɔnnzɔnfuɛ. (Mat. 24:14; 28:19, 20) Zezi i sɔnnzɔnfuɛ Marki boli ndɛ nga Zezi kannin’n su. I waan ɔ fata kɛ be ‘dun mmua’ di junman sɔ’n ka naan mɛn’n i awieliɛ’n w’a ju. (Mar. 13:10) I sɔ’n kusu ti su. Zezi seli kɛ: “Fie’n w’a yo ye, sanngɛ i su junman difuɛ’m b’a sɔn-man.” Sɛ ɔ ti awie fie yɛ sran kun dili’n, kɛ awie’n ko blo’n, be kwlá minndɛman lele kun. Ɔ fata kɛ be kpɛ awie’n ka naan i kpɛlɛ blɛ’n w’a sin.—Mat. 9:37.
3. ?Kɛ mɔ jasin fɛ’n bolɛ’n ti like m’ɔ fata kɛ be yo i ndɛndɛ’n ti’n, ngue yɛ sran wie’m be yoli ɔ?
3 Kɛ mɔ jasin fɛ’n i bolɛ junman’n ti cinnjin kpa man e’n ti’n, ɔ fata kɛ e fa e blɛ’n nin e wunmiɛn’n i dan lika e di. Yɛ e fa e ɲin e sie su kpa. I sɔ’n bɔbɔ yɛ aniaan sunman be yo ɔ. Wie’m be yacili be bɔbɔ be ninnge’m be yolɛ naan b’a bo jasin fɛ’n blɛ’n kwlaa nun. Be kaci atin bofuɛ annzɛ ngaliɛ difuɛ annzɛ Betɛli nga be o mɛn’n nun’n, be nun junman difuɛ. Be ɲanman be ti mlɔnmlɔn. Wie liɛ’n, be klɛnnin be wun kpa yɛ ninnge ng’ɔ fata kɛ be mian be ɲin naan b’a kwla yo’n be sɔnnin. Sanngɛ Zoova ra be su kpa liɛ su. I sɔ’n yo e fɛ. (An kanngan Lik 18:28-30 nun.) Wie’m be kusu mɔ be kwlá boman jasin fɛ’n i blɛ kwlaa nun’n, be fa blɛ kpanngban be fa di junman sɔ m’ɔ man nguan’n. Junman sɔ’n i wie yɛle e mma mɔ e uka be naan b’a fin nun b’a fite’n.—Mml. 6:6, 7.
4. ?Ngue ti yɛ sran wie’m be kwla cuɛncuɛn be ja ase ɔ?
4 Kɛ nga e fa wunnin i lɛ’n sa’n, kɛ be se kɛ be yo like kun ndɛndɛ’n, nn like sɔ i yolɛ blɛ’n su wa sin. Annzɛ i awieliɛ’n w’a mantan koko. E o mɛn’n i awieliɛ blɛ’n nun. Ninnge kpanngban kpa be yi i sɔ liɛ’n i nglo. Ninnge sɔ’m be o Biblu’n nun ɔ nin laa sa nga be juli’n be nun. (Mat. 24:3, 33; 2 Tim. 3:1-5) Sanngɛ klɔ sran fi siman dɔ nga mɛn i awieliɛ’n jú ɔ. Kɛ Zezi yíyí “nzɔliɛ” ng’ɔ́ klé kɛ “mɛn’n i awieliɛ’n” w’a mantan’n i nun’n, ɔ kɛnnin i weiin kɛ: “Cɛn sɔ’n nin i dɔ’n, sran fi si-mɛn i, saan min Si kunngba cɛ yɛ ɔ si i-ɔ. M bɔ n ti i Wa’n bɔbɔ n si-mɛn i, yɛ nyanmiɛn su lɔ anz’m be kusu be si-mɛn i.” (Mat. 24:36) Kɛ m’ɔ ti sɔ’n ti’n, kɛ afuɛ’m bé sín bé kɔ́’n, ɔ kwla yo kekle man sran wie’m be kɛ be yo ninnge mun wakawaka su kɛ laa’n sa. I li sɛ be sɔ i sɔ yolɛ w’a cɛ’n yɛ ɔ ti kekle man be kpa’n niɔn. (Nya. 13:12) ?Ɔ ju wie’n, ɔ yo e sɔ wie? ?Ngue yɛ ɔ kwla uka e naan junman nga Ɲanmiɛn Zoova nin Zezi Klist be kunndɛ kɛ e di i andɛ’n, y’a cuɛncuɛnman e ja ase i dilɛ’n nun ɔn?
Maan e bu e ajalɛ klefuɛ Zezi i akunndan
5. ?Wafa sɛ yɛ Zezi kleli kɛ Ɲanmiɛn junman’n i dilɛ’n nun’n ɔ cuɛncuɛnmɛn i ja ase ɔ?
5 Be kwlaa nga b’a cuɛncuɛnman be ja ase Ɲanmiɛn i junman’n i dilɛ’n nun’n, be nun sran nga ɔ kleli ajalɛ danfuɛ’n, yɛle Zezi Klist. Like nga ti yɛ ɔ yoli ninnge’m be ndɛndɛ sɔ’n, yɛle kɛ afuɛ nsan nin sin cɛ yɛ ɔ fata kɛ ɔ fa yo ninnge kpanngban ɔn. Ɔ nin i sɔ ngba’n, Ɲanmiɛn sulɛ kpafuɛ’n nun’n, like nga Zezi yoli’n, ɔ tra be nga’m be liɛ’n i kwlaa. Ɔ yoli maan be sili i Si i dunman’n ɔ nin like nga i Si waan ɔ́ yó’n. Ɔ boli Ɲanmiɛn Sielɛ’n i jasin fɛ’n. Kpɛkun Ɲanmiɛn sulɛ wafa’m be kpɛnngbɛn’m be ato ndɛ nga be kle sran mun’n, ɔ yiyili i bo. Kannzɛ bɔbɔ bé kún i o, sanngɛ Zoova m’ɔ le atin sie nglo nin asiɛ’n i sin yɛ ɔ jrannin ɔn. Lika kwlaa nga Zezi ɔli’n ɔ tuli i klun kleli sran’m be like, ɔ ukali be kpɛkun ɔ yoli be juejue. (Mat. 9:35) Sran fi w’a kwlá faman blɛ kpe kaan kɛ ngalɛ’n sa w’a diman junman dan kɛ Zezi liɛ’n sa. Kɛ be se kɛ sran kun miɛnnin i ɲin dili junman’n yɛle Zezi liɛ’n.—Zan 18:37.
6. ?Zezi i mɛn dilɛ’n nun’n, ngue yɛ ɔ fɛli i ɲin sieli su ɔ?
6 ?Ngue ti yɛ kɛ Zezi dí i junman’n, w’a siman afɛ ɔ? Kasiɛ nga Daniɛli boli’n ti maan Zezi kwla sili blɛ nga Zoova siesieli i kɛ ɔ fa di i junman’n. (Dan. 9:27) Ɔ maan kɛ nga kasiɛ sɔ’n fa kannin’n sa’n, i junman ng’ɔ́ dí i asiɛ’n su wa’n, ɔ́ dí ‘afuɛ nsan nin sin.’ Afuɛ nga be flɛ i 33 nun’n, kɛ Zezi ɔli Zerizalɛmu’n, w’a cɛman kpɛkun ɔ seli kɛ: “M bɔ n kacili Sran’n, n sran wafa nga n ti’n i nglo yilɛ cɛn’n w’a ju.” (Zan 12:23) Kannzɛ Zezi sili kɛ i wie cɛn’n w’a mantan koko’n, sanngɛ w’a fɛmɛn i ɲin w’a siemɛn i sɔ’n su sa trilili. Nɛ́n i sɔ’n ti yɛ ɔ miɛnnin i ɲin dili junman kpa’n niɔn. Sanngɛ like ng’ɔ fɛli i ɲin sieli su’n, yɛle kɛ blɛ kwlaa nun’n, ɔ́ yó i Si i klun sa’n, yɛ ɔ́ yí i klolɛ’n i nglo i wiengu klɔ sran’m be lika. I sɔ klolɛ’n yoli maan ɔ kpali i sɔnnzɔnfuɛ mun yɛ ɔ kleli be like, kpɛkun ɔ sunmannin be kɛ be ko bo jasin fɛ’n. Ɔ yoli sɔ naan junman ng’ɔ boli i bo’n, i sɔnnzɔnfuɛ’m b’a kwla di b’a ɔ be ɲrun, naan b’a di i dan kpa b’a trɛ i liɛ’n bɔbɔ.—An kanngan Zan 14:12 nun.
7, 8. ?Kɛ Zezi fúan sran mun Ɲanmiɛn i sua’n nun’n, i sɔ’n yoli i sɔnnzɔnfuɛ’m be sɛ? ?Yɛ ngue ti yɛ Zezi yoli sɔ ɔ?
7 Sa wie m’ɔ juli Zezi blɛ su’n, ɔ yi wafa nga Zezi dili i junman’n juejue su’n i nglo weiin. Afuɛ 30 nun delɛ cɛn’n i blɛ nun’n, mɔ Zezi boli i junman’n dilɛ bo’n yɛ sa sɔ’n juli ɔ. Zezi nin i sɔnnzɔnfuɛ’m be ɔli Zerizalɛmu. Kpɛkun be wunnin “be nga be su yo nannin, nin bua, ɔ nin okunmomo atɛ’n Nyanmiɛn i sua’n nun lɔ be lɛ. Ɔ toli sika kacifuɛ’m bɔ be titi lɛ’n be lɛ wie.” ?Kɛ ɔ yoli sɔ’n, ngue yɛ Zezi yoli ɔ? ?Yɛ i sɔ’n yoli i sɔnnzɔnfuɛ’m be sɛ?—An kanngan Zan 2:13-17 nun.
8 Like nga Zezi yoli i blɛ sɔ’n nun’n, ɔ nin ndɛ ng’ɔ kannin’n be yoli maan i sɔnnzɔnfuɛ’m be wla kpɛnnin ndɛ kun mɔ Davidi kɛnnin i jue kun nun’n i su. I waan: “Ɔ sua’n i klolɛ’n w’a kun n kpo.” (Jue. 69:10) ?Ngue ti yɛ i sɔ ndɛ’n kpɛnnin be klun ɔn? Yɛle kɛ saan sran nga mɔ Ɲanmiɛn sua’n i klolɛ’n w’a kun i kpo’n, yɛ ɔ kwla yo like sɔ m’ɔ́ fɛ́ i nguan’n síe i wie nuan’n niɔn. Afin Ɲanmiɛn ɲrun jranfuɛ nin mmla klefuɛ mun ɔ nin sran uflɛ mɔ be nian Ɲanmiɛn i sua’n su’n, be yɛ be o aata dilɛ ninnge tɛtɛ nga be yo be lɔ’n be sin ɔn. Kɛ Zezi yiyili blɛ sɔ’n nun Ɲanmiɛn sulɛ wafa’m be su kpɛnngbɛn’m be bo m’ɔ sacili be ninnge nga be siesieli’n, ɔ wa kacili be kpɔfuɛ. Kɛ nga Zezi i sɔnnzɔnfuɛ’m be fa wunnin i wlɛ klanman’n sa’n, Ɲanmiɛn i “sua’n i klolɛ’n,” yɛle kɛ Ɲanmiɛn sulɛ kpafuɛ’n i klolɛ’n mɔ w’a kun Zezi kpo’n, i ɲin fiteli weiin. ?Sanngɛ ngbaciɛ o like juejue su yolɛ’n nin i ndɛndɛ yolɛ’n be afiɛn?
Like juejue su yolɛ’n nin i ndɛndɛ yolɛ’n be ngbaciɛ’n
9. ?Wafa sɛ yɛ e kwla yiyi like juejue su yolɛ’n i nun ɔn?
9 Ndɛ’m be bo tulɛ fluwa kun waan “like juejue su yolɛ’n” i bo’n yɛle “like mɔ be klo kpa kɛ bé tú be klun bé yó’n,” ɔ nin “be awlɛn m’ɔ ra be klun kɛ be yo like sɔ’n.” Ɔ ti kɛ sin sa yɛ ɔ ra be klun lɔ sa fiaan ɔn. Kɛ Zezi dili i junman’n kɛ ngalɛ’n sa. Ɔ maan Biblu’n kun kacili ndɛ mma sɔ’n kɛ: “Ɲanmiɛn, ɔ sua’n i klolɛ’n, ɔ yra min klun lɔ sa fiaan kɛ sin sa.” (Today’s English Version) I sɔ’n ti’n, kɛ Zezi i sɔnnzɔnfuɛ’m be wunnin like nga Zezi yoli i Ɲanmiɛn sua’n nun lɔ’n, sɛ be wla kpɛnnin ndɛ nga Davidi kannin’n su’n, ɔ boman e nuan. ?Sanngɛ ngue li ti yɛ Zezi i awlɛn’n rɛli i klun lɔ kɛ sin sa m’ɔ yoli like ng’ɔ yoli i lɛ’n niɔn?
10. ?Biblu’n nun’n, “like juejue su yolɛ’n” i bo’n yɛle benin?
10 Davidi i jue sɔ’n nun’n, Ebre ndɛ mma nga be kacili i kɛ ‘w’a kun n kpo’n,’ ɔ fin ndɛ mma kun mɔ Biblu’n i bue uflɛ nun’n be kacili i kɛ ‘n si kwla’n.’ Wie liɛ’n, Biblu’n Traduction du monde nouveau kaci ndɛ mma sɔ’n kɛ: “N klo kɛ be su min kunngba cɛ.” (Tul. 20:5; 34:14; Zoz. 24:19) Fluwa kun m’ɔ tu Biblu’n nun ndɛ mma’m be bo’n waan: “Kpɛ sunman’n, be fa ndɛ mma sɔ’n be kan aja nun ndɛ. [...] Be nga be o aja’n nun’n, be kunndɛ kɛ be yi annzɛ be wun yo be ngunmin be liɛ. I ti’n be si kwla. I kunngba’n, Ɲanmiɛn kunndɛ kɛ be nga be ti i liɛ’n be su i kunngba cɛ. Ɔ maan ɔ si i sɔ liɛ’n i ti kwla.” I sɔ’n ti’n, Ɲanmiɛn i sua’n i ti kwla nga Davidi sili’n, kwla silɛ’n i kpafuɛ’n niɔn. Yɛle kɛ ɔ kplinman su kaan sa kɛ sran fi sin Zoova i osu annzɛ ɔ saci i dunman’n. Kwla silɛ wafa sɔ’n ti yɛ Davidi sasali Zoova i dunman’n annzɛ ɔ yoli like nga ɔ nin Zoova fata’n.
11. ?Ngue ti yɛ Zezi yoli ninnge mun juejue su ɔ?
11 Kɛ Zezi i sɔnnzɔnfuɛ’m be wunnin like nga Zezi yoli i Ɲanmiɛn sua’n nun lɔ’n mɔ be buli ndɛ nga Davidi kannin’n i akunndan’n, be ndɛ yo fɛ. Nán kɛ blɛ ng’ɔ fata kɛ Zezi fa di junman’n ɔ le awieliɛ’n ti yɛ ɔ yoli like juejue su ɔ. Sanngɛ i Si i dunman’n ɔ nin Ɲanmiɛn sulɛ kpafuɛ’n, be ti kwla m’ɔ sili’n ti ɔ. Kɛ ɔ wunnin wafa nga be saci Ɲanmiɛn i dunman’n, ɔ sili i ti kwla. Yɛle kɛ ɔ fali ajalɛ naan w’a tinngɛ ndɛ sɔ’n. Kɛ ɔ wunnin kɛ Zuifu’m be Ɲanmiɛn sulɛ wafa’m be su kpɛnngbɛn’m be mianmian afɛfuɛ mun’n, Ɲanmiɛn i ti kwla m’ɔ si’n ti’n, ɔ kunndɛli kɛ ɔ́ yó afɛfuɛ sɔ’m be ye. Kpɛkun ɔ yiyili Zuifu’m be kpɛnngbɛn sɔ’m be bo juejue su.—Mat. 9:36; 23:2, 4, 27, 28, 33.
Ɲanmiɛn sulɛ kpafuɛ’n nun’n, maan e yo juejuefuɛ
12, 13. (a) ?Be nga be tɔn be wun suɛn kɛ be ti Klistfuɛ’n, be su kpɛnngbɛn’m be yoli Ɲanmiɛn i dunman’n i sɛ? (b) ?Yɛ be yoli Ɲanmiɛn Sielɛ’n i sɛ?
12 Andɛ’n, be nga be waan be su Ɲanmiɛn’n, be aeliɛ’n ti kɛ Zezi i blɛ sufuɛ’m be liɛ’n sa. Maan e wla kpɛn su kɛ like klikli nga Zezi seli i sɔnnzɔnfuɛ’m be kɛ be srɛ i ti’n, yɛle Ɲanmiɛn i dunman’n. Ɔ seli kɛ: “Maan ɔ dunman’n ɔ yo sanwun.” (Mat. 6:9, Anuãsɛ Fuflɛ) ?E wun kɛ Ɲanmiɛn sulɛ wafa’m be su kpɛnngbɛn mun, ɔ nin be nga be tɔn be wun suɛn kɛ be ti Klistfuɛ’n be su kpɛnngbɛn mun bɔbɔ’n, be kle sran’m be kɛ be si Ɲanmiɛn i dunman’n naan be yo dunman sɔ’n i sanwun? Be yoman sɔ mlɔnmlɔn. I asabesin’n yɛ be yo ɔ. Yɛle kɛ b’a diman Ɲanmiɛn i su nanwlɛ. Be fali like kɛ atre nsan annzɛ klɔ sran mɔ be waan ɔ le i sin like kun m’ɔ wuman’n, annzɛ sin fɛtɛ’n be fa kleli Ɲanmiɛn i su ndɛ ng’ɔ timan nanwlɛ’n. Ɔ maan sran’m be kwlá siman Ɲanmiɛn kpa. Be ɲrun’n, Ɲanmiɛn ti kɛ klunwifuɛ tɛ wie sa. Asa ekun’n be aeliɛ tɛtɛ nin dunman klolɛ’n ti’n be sacili Ɲanmiɛn i dunman’n. (An kanngan Rɔmfuɛ Mun 2:21-24 nun.) Asa kusu’n be wlali be wun ase be fali Ɲanmiɛn i dunman’n fiɛli i sran’m be ɲrun. Wie liɛ’n kɛ bé káci Biblu’n aniɛnaniɛn’m be nun’n, be yili dunman sɔ’n bɔbɔ. Ɔ maan be yoli maan sran’m be kwlá faman be wun be mantanman Ɲanmiɛn naan be nin i be afiɛn’n w’a sɛ.—Zak 4:7, 8.
13 Zezi kleli i sɔnnzɔnfuɛ’m be kɛ be srɛ Ɲanmiɛn Sielɛ’n i ti wie. I waan be se kɛ: “Maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.” (Mat. 6:10) Kannzɛ be nga be tɔn be wun suɛn kɛ be ti Klistfuɛ’n be su kpɛnngbɛn’m be kan ndɛ kunngba sɔ’n be flan nun’n, sanngɛ be wlali sran’m be fanngan kɛ be suan politiki anuannzɛ nin klɔ sran’m be ninnge siesielɛ’m be bo. Asa ekun’n, be nga be mian be ɲin be bo Sielɛ sɔ’n i jasin fɛ’n, be buman be like fi. I sɔ’n ti’n, be nga be tɔn be wun suɛn kɛ be ti Klistfuɛ’n, be kanman Ɲanmiɛn Sielɛ’n i ndɛ kun. Yɛ be lafiman su kun.
14. ?Wafa sɛ yɛ be nga be tɔn be wun suɛn kɛ be ti Klistfuɛ’n be su kpɛn’m be kpɛli Ɲanmiɛn Ndɛ’n wun ɔn?
14 Ɲanmiɛn srɛlɛ kun nun’n, Zezi seli weiin kɛ: “Ɔ ndɛ’n ti nanwlɛ.” (Zan 17:17) Kpɛkun ka naan w’a ɔ ɲanmiɛn su’n, ɔ seli kɛ ɔ́ síe “sran kpa nanwlɛfuɛ b’ɔ si ngwlɛlɛ’n,” naan Ɲanmiɛn ninnge’m be nun’n, ɔ mɛn i sran’m be aliɛ. (Mat. 24:45) Be nga be tɔn be wun suɛn kɛ be ti Klistfuɛ’n be su kpɛnngbɛn’m be waan be kle sran’m be Ɲanmiɛn Ndɛ’n. ?Sanngɛ be Min’n i liɛ’n su sɛsɛsɛ yɛ be yoli ɔ? Ɔ si’ɛ. Ndɛ nga be kan’n yɛle kɛ Biblu’n nun ndɛ’n ti ngua dilɛ. Ɲanmiɛn ninnge’m be nun’n, b’a manman be nga be nian be su’n be aliɛ naan w’a cici be wla naan b’a wun sa wlɛ. Sanngɛ klɔ sran’m be ngwlɛlɛ’n yɛ be fa kle like nga ɔ yo sran’m be fɛ’n niɔn. Asa kusu’n, Ɲanmiɛn sulɛ wafa sɔ’m be nunfuɛ’m be bu i kɛ be bɔbɔ be nzuɛn’n ti kpa. Ɔ maan, kɛ mɔ be su kpɛn sɔ’m be kunndɛman kɛ bé wɔ́ be safle’n ti’n, be fia Ɲanmiɛn mmla wie’m be su. Mmla nga be su falɛ’n timan kekle’n yɛ be kle be ɔ.—2 Tim. 4:3, 4.
15. ?Kɛ amun wun be nga be tɔn be wun suɛn kɛ be ti Klistfuɛ’n be su kpɛn’m be like nga be yo i Ɲanmiɛn dunman nun’n, ɔ yo amun sɛ?
15 Kɛ mɔ be waan Ɲanmiɛn nga Biblu’n kɛn i ndɛ’n i dunman nun yɛ be yoli i sɔ ninnge mun’n ti’n, sran kpa sunman be sa sin bubuli be. Annzɛ b’a lafiman Ɲanmiɛn nin Biblu’n be su kun. Satan nin i mɛn tɛ’n be kwlali be. ?Kɛ e wun kɛ be yo i sɔ ninnge mun cɛn kwlaa’n, ɔ yo e sɛ? ?E mɔ e ti Zoova i sufuɛ’n, sɛ e wun kɛ be su saci Ɲanmiɛn i dunman’n, ɔ yoman e kɛ e yo like kwlaa nga e kwla yo’n naan nanwlɛ’n i ɲin fite? ?Kɛ e wun kɛ be su laka sran kpa mun’n, ɔ yoman e kɛ e fɔnvɔ sran sɔ mɔ be su mianmian be’n? Zezi i blɛ su’n, kɛ ɔ wunnin sran mɔ ‘be ti afɛfuɛ yɛlɛ kɛ b’a bo je kɛ bua bɔ be lɛ-man sunianfuɛ’n sa’n,’ b’a yomɛn i annvɔ sa ngbɛn. Yɛ ɔ “boli be like klelɛ’n bo-ɔ, ɔ kleli be like kpanngban.” (Mat. 9:36; Mar. 6:34) Ɲanmiɛn sulɛ kpafuɛ’n nun’n, ɔ fata kɛ e yo juejuefuɛ kɛ Zezi sa.
16, 17. (a) ?Ngue yɛ ɔ fata kɛ ɔ yo naan y’a bo jasin fɛ’n i juejue su ɔ? (b) ?Ngue yɛ é wá wún i like suanlɛ ng’ɔ́ bá lɛ’n nun ɔn?
16 Kɛ e bo jasin fɛ’n juejue su’n, ndɛ nga akoto Pɔlu kɛnnin i 1 Timote 2:3, 4 nun’n i bo’n yo kploun kpa man e. (An kanngan nun.) Nán mɛn’n i awieliɛ blɛ mɔ e o nun’n i ngunmin ti yɛ e mian e ɲin e bo jasin fɛ’n niɔn. Sanngɛ like ti mɔ e yo sɔ’n, i wie yɛle kɛ e wun i wlɛ kɛ Ɲanmiɛn kunndɛ kɛ sran’m be si ndɛ nanwlɛ’n, naan be su i wie naan ɔ ra be su. Like klikli nga ti yɛ ɔ ti cinnjin man e kɛ e bo jasin fɛ’n, nɛ́n i yɛle i bolɛ blɛ m’ɔ su sin’n. Sanngɛ e kunndɛ kɛ é mánmán Ɲanmiɛn i dunman’n naan é úka sran mun naan be si i klun sa’n. Ɲanmiɛn sulɛ kpafuɛ’n nun’n, e ti juejuefuɛ.—1 Tim. 4:16.
17 E mɔ e ti Zoova i nvle’n i nunfuɛ’n, like nga Ɲanmiɛn waan ɔ́ yó mán klɔ sran mun nin asiɛ’n, e si i su ndɛ nanwlɛ’n. I sɔ’n ti e cenjele like. E kwla uka sran mun naan b’a di aklunjuɛ naan b’a fa be wla b’a gua be ɲrun lɔ like kpa kun su. Kɛ bé wá núnnún Satan i mɛn’n, wafa nga be kwla fin nun fite’n, e kwla kle be. (2 Tɛs. 1:7-9) Nán maan ɔ yo e kɛ Zoova i cɛn’n ɔ su cɛ ngboko ti’n, e akunndan’n sánngan annzɛ e sa sin búbú e. Sanngɛ maan ɔ yo e fɛ kɛ Ɲanmiɛn sulɛ kpafuɛ’n nun’n, e te le blɛ e yo juejuefuɛ. (Mis. 7:7; Aba. 2:3) ?Wafa sɛ yɛ e kwla yo juejuefuɛ kɛ ngalɛ’n sa ɔ? É wá wún i sɔ liɛ’n like suanlɛ ng’ɔ́ bá lɛ’n nun.
?Amun kwla yiyi nun?
• ?Ngue yɛ ɔ yoli mɔ Zezi i junman’n i dilɛ nun’n, w’a siman afɛ ɔ?
• ?Biblu’n nun’n, “like juejue su yolɛ’n” i bo’n yɛle benin?
• ?Ngue yɛ e wun i andɛ m’ɔ fata kɛ ɔ yo naan Ɲanmiɛn sulɛ kpafuɛ’n nun’n, y’a yo juejuefuɛ ɔ?
[Foto, bue 16]
Like ng’ɔ yoli Zezi i cinnjin’n yɛle i Si i klun sa yolɛ’n nin sran klolɛ’n.
[Foto, bue 18]
Ɲanmiɛn sulɛ kpafuɛ’n nun’n, ɔ fata kɛ e yo juejuefuɛ.