?E tu e klun e su Klist su sakpa?
‘Sa nga an fali su yɛ an wo i yolɛ su’n, an yo i sɔ tra laa’n.’—1 TƐS. 4:1.
1, 2. (a) ?Ninnge dandan benin yɛ Zezi i blɛ sufuɛ’m be wunnin be ɔ? (b) ?Ngue ti yɛ e blɛ liɛ’n lemɛn i wunsu wie ɔ?
AMUN nin a seman amun wun le kɛ: ?Sɛ ɔ ti kɛ i nun mɔ Zezi o asiɛ’n su’n, yɛ n wo lɛ’n nn ɔ́ yó min fɛ kpa? Atrɛkpa’n amun kwla bu i kɛ Zezi wá yó amun juejue. Yɛ ɲrɛnnɛn nga tukpacɛ wie ti amun o nun’n, amun kwla fin nun be fite. Wie liɛ kusu amun kunndɛ kɛ amún wún i naan amún tíe i nuan ndɛ. Annzɛ amun kunndɛ kɛ ɔ kle amun like annzɛ kusu amun waan amún wún i kɛ ɔ su yo abonuan sa wie. (Mar. 4:1, 2; Lik 5:3-9; 9:11) Nanwlɛ sɛ ɔ ti kɛ i nun mɔ Zezi yó i sɔ ninnge mun e o lɛ’n, nn ɔ yoli e cenjele like dan! (Lik 19:37) Kɛ ɔ fɛ i blɛ sɔ’n nun lele’n, sran fi nin a wunmɛn i sɔ like le. Yɛ like nga Zezi “i wun b’ɔ fa sɔli Nyanmiɛn’n ti’n” ɔ yo ye’n, be su yomɛn i sɔ kun le.—Ebr. 9:26; Zan 14:19.
2 Blɛ nga e o nun yɛ’n kusu leman wunsu. ?Ngue ti ɔ? E o blɛ nga Ɲanmiɛn Ndɛ’n seli kɛ ɔ ti mɛn’n i “awieliɛ blɛ’n” ɔ nin mɛn’n i “bue nuan’n” i nun. (Dan. 12:1-4, 9; 2 Tim. 3:1) I sɔ blɛ’n nun’n be fuannin Satan ɲanmiɛn su lɔ. Ɔ cɛ kan’n bé wá cí i bé yí i “kunman dan bɔ be si-mɛn i bo’n” nun. (Ngl. 12:7-9, 12; 20:1-3) I sɔ blɛ nun kusu yɛ e yo e cenjele like dan kpa kun ɔn. Yɛle kɛ e bo ‘Nyanmiɛn sielɛ’n i jasin fɛ’n’ mɛn’n wunmuan’n nun. E kan Ɲanmiɛn i mɛn klanman’n i ndɛ e kle sran mun. I sɔ junman liɛ’n be su dimɛn i kun le.—Mat. 24:14.
3. ?Kɛ Zezi wá fú ɲanmiɛn su’n, ngue yɛ ɔ seli i sɔnnzɔnfuɛ’m be kɛ be yo ɔ? ?Yɛ wafa sɛ yɛ bé yó i sɔ liɛ’n niɔn?
3 Kɛ Zezi wá fú ɲanmiɛn su’n, ɔ seli i sɔnnzɔnfuɛ’m be kɛ: “Án wá kán min ndɛ Zerizalɛm wa, nin Zide mɛn wunmuan’n nun, ɔ nin Samari lɔ lele fá jú asiɛ’n i awieliɛ.” (Yol. 1:8) Bé klé sran’m be like lika kwlakwla. ?Ngue ti yɛ bé dí junman sɔ’n niɔn? Bé kúnndɛ Klist i sɔnnzɔnfuɛ uflɛ wie mun ka naan mɛn’n i awieliɛ’n w’a ju. (Mat. 28:19, 20) ?Ngue yɛ ɔ fata kɛ e yo naan y’a kwla yo like nga Klist waan e yo’n niɔn?
4. (a) ?Ndɛ nga Piɛli kɛnnin i 2 Piɛr 3:11, 12 nun’n, ɔ fa e ɲin sie i ngue su? (b) ?Ngue yɛ ɔ fata kɛ e nian e wun i lika ɔ?
4 Maan e nian ndɛ nga akoto Piɛli kɛnnin i yɛ’n. I waan: “?Like onin yɛ sɛ an yo-ɔ ɔ ti su-ɔ? Maan amun nzuɛn’n yo kpa, yɛ an fa amun wun mantan Nyanmiɛn! Kɛ amún mínndɛ kɛ Nyanmiɛn i cɛn’n ju’n, an yo like kwlaa nga an kwla yo’n maan ɔ ju ndɛndɛ.” (2 Piɛ. 3:11, 12) Piɛli i ndɛ sɔ’n fa e ɲin sie su kɛ ɔ fata kɛ blɛ sɔ’n nun’n, maan e mɛn dilɛ’n nun’n, e nzuɛn’n kle kɛ e fa e wun e mantan Ɲanmiɛn. Nzuɛn sɔ’n kun yɛle jasin fɛ’n i bolɛ’n. Ɔ maan, nanwlɛ kɛ e wun kɛ e niaan nga be o mɛn wunmuan’n nun’n, be bo jasin fɛ’n juejue su kɛ nga Klist fa kannin’n sa’n, ɔ yo e fɛ! Kɛ é yó sɔ’n, ɔ fata kɛ e nian e wun su naan mianmianlɛ nga Satan i mɛn’n mianmian e’n, ɔ nin fɔ’n m’ɔ o e nun’n b’a yoman naan e juejue nga e fa di Ɲanmiɛn junman’n w’a kan ase. I ti’n, maan e nian wafa nga e kwla yo naan y’a jran su kpa y’a su Klist su’n.
Junman nga Ɲanmiɛn fa man e’n, maan e sɔ nun klanman
5, 6. (a) ?Ngue ti yɛ Pɔlu yoli i niaan Klistfuɛ nga be o Zerizalɛmu lɔ’n be mo ɔ? ?Yɛ ngue yɛ ɔ wlali be su nun kɛ nán be yo ɔ? (b) ?Ngue ti yɛ ɔ fataman kɛ e fa junman nga Ɲanmiɛn fa man e’n, e yo kondro vaa ɔ?
5 Fluwa nga akoto Pɔlu klɛli ko mannin Klistfuɛ nga be o Zerizalɛmu lɔ’n i nun’n, ɔ yoli be mo. Afin laa’n, ɲrɛnnɛn nun bɔbɔ’n, be jrannin kekle. Ɔ seli be kɛ: “Laa bɔ kɛ Nyanmiɛn maan an wunnin ase’n, nyrɛnnɛn dan kpa nga an wunnin i’n bɔ an jrannin kekle’n, an bu i akunndan.” Zoova i wla kpɛnnin be seiin nantilɛ’n su sakpa. (Ebr. 6:10; 10:32-34) Pɔlu i ndɛ sɔ’n m’ɔ man fanngan’n, ɔ wlali Klistfuɛ sɔ mɔ be ti Ebre’n be fanngan kpa. Sanngɛ fluwa kunngba sɔ’n nun’n, Pɔlu wlali be su nun kɛ be nian be wun klɔ sran nzuɛn kun i lika. Sɛ b’a yoman sɔ’n, be Ɲanmiɛn junman’n i dilɛ’n kwla kan ase. Ɔ seli Klistfuɛ’m be kɛ be nian be wun naan nán be “kpalo” Ɲanmiɛn i mmla’n. Annzɛ Ɲanmiɛn i mmla’n i su falɛ’n nun’n, nán be kpɛ atin srɛ.—Ebr. 12:25.
6 Afɔtuɛ sɔ mɔ be mannin e kɛ nán e “kpalo” junman nga Ɲanmiɛn fa man e’n, ɔ wɔ Klistfuɛ mun wie andɛ. I ti’n, e wun i wlɛ kɛ ɔ fata kɛ e mian e ɲin kpa e di e Klistfuɛ junman’n i juejue su. (Ebr. 10:39) I kwlaa yoli o, junman nga e di man Ɲanmiɛn’n, ɔ ti wie nin nguan ndɛ.—1 Tim. 4:16.
7, 8. (a) ?Ngue yɛ ɔ́ úka e naan y’a di Ɲanmiɛn i junman’n juejue su titi ɔ? (b) ?Sɛ e timan juejuefuɛ kɛ laa’n sa kun’n, ngue yɛ ɔ fata kɛ e wla kpɛn su Zoova nin Zezi be lika ɔ?
7 ?Ngue yɛ ɔ́ úka e naan y’a kpaloman like ng’ɔ fata e yo e man Ɲanmiɛn’n niɔn? Like cinnjin kun mɔ e kwla yo naan y’a jrɛn i sɔ liɛ’n i ɲrun’n, yɛle kɛ maan e bu e wun nga e fa mannin Ɲanmiɛn’n i akunndan titi. E kan kleli Zoova kɛ e mɛn dilɛ’n nun’n, like ng’ɔ́ yó e ninnge’m be nun cinnjin kpafuɛ’n yɛle i klun sa’n i yolɛ. Yɛ e kunndɛ kɛ é nánti i sɔ’n su titi. (An kanngan Matie 16:24 nun.) I ti’n, ɔ fata kɛ ɔ ju wie’n, e usa e wun kɛ: ‘?N te mian min ɲin n te nanti min wun nga e fa mannin Ɲanmiɛn su kɛ i nun mɔ be yoli min batɛmu’n sa? ?Annzɛ kɛ blɛ’n sín’n nn min juejue yolɛ’n kán ase kɔ́?’
8 Sɛ nanwlɛ su e nian siin naan e wun kɛ y’a kpɔnzɔ Zoova i sulɛ’n nun’n, ɔ fata kɛ e ɲin kpɛn Ɲanmiɛn nuan ijɔfuɛ Sofoni i ndɛ yɛ m’ɔ wla fanngan’n su. Ɔ seli kɛ: “Nán amun sa sin bubu amun! Anannganman amun Nyanmiɛn’n jin amun sin. Ɔ lɛ wunmiɛn, ɔ́ yó maan amún kwlá. I klun ti jɔwa dan amun wun.” (Sof. 3:16, 17) I klikli nun’n, ndɛ sɔ’n wɔ laa Izraɛlifuɛ nga be fin kanga nun Babilɔni lɔ be ɔli Zerizalɛmu’n. Sanngɛ, ndɛ sɔ’n wɔ Ɲanmiɛn i sufuɛ kpa mun wie andɛ. Junman nga e di’n, ɔ ti Zoova i junman. I ti’n, maan e lafi su titi kɛ Zoova nin i Wa’n be sran nɲɔn’n, be jran e sin yɛ be wla e fanngan naan y’a kwla di i kpa liɛ su. (Mat. 28:20; Fil. 4:13) Sɛ e mian e ɲin naan e di Ɲanmiɛn junman’n juejue su titi’n, ɔ́ rá e su yɛ ɔ́ úka e naan y’a wɔ e ɲrun Ɲanmiɛn ninnge’m be nun.
Maan juejue su e ‘dun mmua fa e wun man Nyanmiɛn maan ɔ sie e’
9, 10. ?Ndɛ cinnjin ng’ɔ o ɲanndra nga Zezi buli i nnɔsua nun aliɛ dan kun su’n nun’n, yɛle benin? ?Yɛ ngwlɛlɛ benin yɛ e kwla fɛ i nun ɔn?
9 Cɛn kun mɔ Zezi dí aliɛ Farizifuɛ kun i awlo lɔ’n, ɔ buli ɲanndra kun fa kannin nnɔsua nun aliɛ dan kpa kun i ndɛ. Ɲanndra sɔ’n nun’n, ɔ kannin wafa nga sran fanunfanun be kwla yo naan b’a yo Ɲanmiɛn Sielɛ’n i nunfuɛ ɲanmiɛn su lɔ’n, i ndɛ. Like nga be flɛ i kɛ junman wie ‘kpalolɛ’ annzɛ like nga be flɛ i atin srɛ kpɛlɛ’n, ɔ fali sunnzun ase yiyili nun. (An kanngan Lik 14:16-21 nun.) Zezi i ɲanndra’n nun’n, be nga be yiali be’n, kɛ mɔ be waan be baman’n ti’n, be kannin ndɛ wie’m be fa kpaloli yialɛ sɔ’n. Kun waan ɔ su ko niɛn i asiɛ mɔ w’a to’n. Kun kusu waan w’a to nannin wie mun naan ɔ su ko nian be. Kun ekun waan: ‘N fin bla jalɛ icra’n, i sɔ’n ti n kwlá kɔ-man.’ Nanwlɛ nán ninnge ngalɛ’m be ti yɛ sɛ be yia sran kun’n, ɔ su kɔman ɔn. Kun ng’ɔ toli asiɛ’n annzɛ nannin mun’n, ɔ dun mmua niannin ka naan w’a to. Ɔ maan, ɔ timan cinnjin kɛ ɔ sɛ i sin ko nian be ekun. ?Kusu bla kun mɔ sran kun w’a jɛ i uflɛuflɛ’n ti yɛ ɔ kwlá sɔman yialɛ cinnjin kpa kɛ ngalɛ sa’n nun ɔn? I sɔ’n ti’n, sɛ ɲanndra sɔ nun’n, sran ng’ɔ yiali be’n, ɔ fali ya dan kpa’n, ɔ boman e nuan!
10 Ɲanmiɛn i sufuɛ’m be kwlaa be kwla fa ngwlɛlɛ Zezi i ɲanndra sɔ’n nun. ?Ngwlɛlɛ sɔ’n yɛle benin? Yɛle kɛ nán e bɔbɔ e ninnge mɔ be wie yɛle nga y’a bo su Zezi i ɲanndra nun lɛ’n, be yo e cinnjin tra Ɲanmiɛn ninnge mun naan e yaci i junman’n i dilɛ. Sɛ Klistfuɛ kun siemɛn i bɔbɔ i ninnge’m be kan ɔ fata’n, ɔ cɛman naan blɛblɛblɛ w’a kpɔnzɔ Ɲanmiɛn junman’n i dilɛ’n nun. (An kanngan Lik 8:14 nun.) Kɛ ɔ ko yo naan w’a yoman sɔ’n e nanti Zezi i ndɛ nga su. I waan: “An dun mmua fa amun wun man Nyanmiɛn maan ɔ sie amun, yɛ an yo i klun sa’n.” (Mat. 6:33) Nanwlɛ kɛ e wun kɛ Ɲanmiɛn i sufuɛ gbanflɛn nin talua nin kpɛnngbɛn’m be nanti afɔtuɛ cinnjin sɔ’n su’n, ɔ wla e fanngan! Be nun sunman be fali ajalɛ be siesieli be mɛn dilɛ wafa’n naan b’a ɲan blɛ kpanngban b’a di Ɲanmiɛn junman’n. Be bɔbɔ be wun i wlɛ kɛ sɛ juejue su sran kun dun mmua fɛ i wun man Nyanmiɛn maan ɔ sie i’n, ɔ di aklunjuɛ dan.
11. ?Biblu’n nun ndɛ benin yɛ ɔ kle kɛ ɔ ti cinnjin kɛ e tu e klun e su Ɲanmiɛn juejue su ɔ?
11 Kɛ ɔ ko yo naan y’a wun like nga ti yɛ ɔ ti cinnjin kɛ e yo juejue Ɲanmiɛn i junman dilɛ’n nun’n, maan e fa sa wie m’ɔ juli Izraɛli famiɛn Zɔasi su’n e nian. Zɔasi buli i kɛ Siri nvle’n wá fá alɛ wlá Izraɛli nvle’n i sin naan ɔ́ kwlɛ́ i. I ti’n, ɔ ko toli Elize nin sunlɛ. Ɲanmiɛn nuan ijɔfuɛ’n seli i kɛ ɔ tike fenɛtri’n naan ɔ to ta mma kun Siri nvle’n i lika. I waan i sɔ’n klé kɛ Zoova wá kwlá nvle sɔ’n mán be. Nanwlɛ i sɔ’n wlali famiɛn’n i yakpa. I sin’n, Elize seli Zɔasi kɛ ɔ fɛ i ta mma mun bo asiɛ’n. Zɔasi fa be finnin i kpɛ nsan cɛ. I sɔ’n w’a yoman Elize fɛ mlɔnmlɔn. Afin, sɛ ɔ ti kɛ ɔ fa finnin asiɛ wun kpɛ nnun annzɛ kpɛ nsiɛn’n, nn ‘ɔ kwlali Sirifuɛ mun yɛ ɔ nunkunnin be mlɔnmlɔnmlɔn.’ Sanngɛ siɛn’n, Zɔasi kwlá be kpɛ nsan cɛ. Kɛ mɔ Zɔasi w’a yomɛn i juejue su’n ti’n, i kwlalɛ’n yoli kpe kan. (2 Fam. 13:14-19) ?Ngue yɛ i sɔ ndɛ’n kle e ɔ? Yɛle kɛ sɛ e tu e klun e di Zoova i junman’n juejue su’n, yɛ ɔ́ rá e su kpa ɔ.
12. (a) ?Kɛ é jrán sa nga be tɔ e su’n be ɲrun kekle’n, ngue yɛ ɔ́ úka e naan y’a di Ɲanmiɛn junman’n i juejue su titi ɔ? (b) Kɛ amun tu amun klun be di Ɲanmiɛn junman’n wafa nga amun bɔbɔ amun ɲan su ye’n, an kɛn i ndɛ.
12 Kekle ng’ɔ o e su’n yo maan Ɲanmiɛn junman dilɛ’n juejue su’n, ɔ yo kekle man e. Sika ndɛ’n wo aniaan kpanngban be su. Wie’m be liɛ’n tukpacɛ tɛ wie ti’n, be kwlá suman Zoova kɛ nga be fa suli i laa’n sa. Ɔ maan be akunndan’n sanngan. Ɔ nin i sɔ ngba’n, e tinuntinun e kwla fa ajalɛ naan y’a tu e klun y’a su Klist su juejue su titi. Maan e fa e ɲin e sie i ajalɛ nin Biblu’n nun ndɛ mma nga be o kuku nga be flɛ i kɛ “?Ngue yɛ ɔ́ úka amun naan amun a su Klist su titi ɔ?” i su. Maan e bu wafa nga e kwla nian be su kpa e nanti’n i akunndan. Sɛ e yo sɔ’n, é ɲán su ye kpa. Kɛ e fa e wun e wlɛ i Ɲanmiɛn junman’n i dilɛ’n nun’n, sɛ é kwlá sé’n, e bo’n wla ase kpa. Kpɛkun e mɛn dilɛ’n yo fɛ yɛ e wla gua ase yɛ e di aklunjuɛ. (1 Kor. 15:58) Asa ekun’n, kɛ e tu e klun e su Ɲanmiɛn’n, i sɔ’n uka e naan kɛ é ‘mínndɛ kɛ Nyanmiɛn i cɛn’n ju’n, y’a yo like kwlaa nga e kwla yo maan ɔ ju ndɛndɛ’n.’—2 Piɛ. 3:12.
Maan e di e wun nanwlɛ
13. ?Wafa sɛ yɛ e tinuntinun e kwla wun kɛ e tu e klun e di Ɲanmiɛn junman’n sakpa ɔ?
13 Sanngɛ nán maan e wla fi su kɛ, nán dɔ kpanngban nga sran kun di i jasin fɛ’n i bolɛ’n nun yɛ ɔ kle kɛ ɔ tu i klun di Ɲanmiɛn i junman’n niɔn. Ɔ le sran kun nin i su sa. Sɛ sran kun kpinndinman naan ɔ fa dɔ kun annzɛ nɲɔn bo jasin fɛ’n anglo kwlaa nun’n, naan ng’ɔ kwlɛ i yo sakpa’n yɛ ɔ yoli’n, Zoova i klun kwla jɔ i wun kpa. (An nian Mark 12:41-44.) Ɔ maan sɛ e waan é wún kɛ e tu e klun e di Ɲanmiɛn junman’n sakpa’n, ɔ fata kɛ e bu ninnge nga e kwla be yo’n be sin nanwlɛ su. Kɛ mɔ e ti Klist i sɔnnzɔnfuɛ’n ti’n, e kunndɛ kɛ akunndan nga e bu’n, ɔ nin i liɛ’n be yo kun. (An kanngan Rɔmfuɛ Mun 15:5 nun; 1 Kor. 2:16) ?Zezi i mɛn dilɛ’n nun’n, ngue yɛ ɔ fa sieli like kwlaa ɲrun ɔn? Ɔ seli sran kpanngban mɔ be yiali Kapɛrnaɔmu lɔ’n be kɛ: ‘Nyanmiɛn sielɛ’n i ndɛ kanlɛ’n ɔ ti n cinnjin, i sɔ’n ti yɛ Nyanmiɛn sunmannin min-ɔn.’ (Lik 4:43; Zan 18:37) Maan jasin fɛ’n mɔ Zezi boli i juejue su’n ɔ ka e klun. Kpɛkun maan e nian naan sɛ e kwla uka jasin fɛ’n nga e bo’n su o.—1 Kor. 11:1.
14. ?Wafa sɛ yɛ e kwla uka Ɲanmiɛn junman nga e di’n su ɔ?
14 Sɛ e bu i akunndan kpa’n, atrɛkpa’n e kwla wun kɛ e kwla uka blɛ nga e di i jasin fɛ’n i bolɛ’n nun’n su. (Mat. 9:37, 38) I wie yɛle gbanflɛn nin talua kpanngban mɔ be wieli suklu di’n be liɛ’n. Be ukali blɛ nga be fa bo jasin fɛ’n su. Yɛ dɔ nga su’n, aklunjuɛ nga kɛ sran kun di titi atin bofuɛ junman’n ɔ di’n, be di wie. ?Amun kunndɛ kɛ amún dí i sɔ aklunjuɛ’n wie? Kɛ aniaan wie’m be trannin ase be niɛnnin i kpa’n, be wunnin kɛ be kwla tu ajalɛ be kɔ be nvle’n i asa uflɛ su. Annzɛ be kɔ nvle uflɛ mɔ be le Ɲanmiɛn Sielɛ’n i jasin bofuɛ’m be awuliɛ lɔ’n i nun. Wie’m be kusu be suannin aniɛn uflɛ naan b’a kwla uka be nga be kan nvle uflɛ nun aniɛn mun’n. Ɲanmiɛn junman’n nga e di’n, i su ukalɛ’n kwla yo kekle sɔ, sanngɛ suralɛ kpanngban o nun. Kpɛkun atrɛkpa’n, é kwlá úka sran kpanngban naan “be wun sa ng’ɔ ti nanwlɛ’n i wlɛ kpa.”—1 Tim. 2:3, 4; 2 Kor. 9:6.
Biblu’n nun sran wie’m be ajalɛ m’ɔ fata kɛ e fa su’n
15, 16. ?Wan’m be ajalɛ yɛ e kwla fa su naan y’a yo Klist i sɔnnzɔnfuɛ juejuefuɛ ɔ?
15 ?Kɛ Klist seli sran wie mɔ be wa kacili akoto mun kɛ be su i su’n, ngue yɛ be yoli ɔ? Biblu’n kan Matie ndɛ se kɛ: “Ɔ yacili i ninnge’n kwlaa naan w’a jao w’a su i su.” (Lik 5:27, 28) Piɛli nin Andre mɔ be su tra jue’n, be su ndɛ nga e kanngan’n yɛ: “Be yacili lala’m be lɛ, yɛ be suli i su-ɔ.” I sin, Zezi wunnin Zaki nin Zan be o be si i wun lɛ be su tanndan be lala’m be nun. ?Kɛ Zezi yiali be’n ngue yɛ be yoli ɔ? “Be yacili be si nin alie’n lɛ, yɛ be suli i su-ɔ.”—Mat. 4:18-22.
16 Sɔlu mɔ wa kacili akoto Pɔlu’n, ɔ kleli e ajalɛ kpa kun ekun. Kannzɛ bɔbɔ ɔ boli manndrɛn kleli Klist i sɔnnzɔnfuɛ’m be ɲrɛnnɛn kpa’n, sanngɛ ɔ kacili i ajalɛ’n. Kpɛkun Klist ‘fɛli i kɛ ɔ di i junman’n,’ naan ɔ bo i dunman’n nvle’m be nun. Be osu kunngba’n nun lɛ’n, Pɔlu “su kan ndɛ Nyanmiɛn ndɛ suanlɛ nin i srɛlɛ sua’m be nun, ɔ kan kɛ Jésus ti Nyanmiɛn Wa.” (Yol. 9:3-22) Yɛ kannzɛ bɔbɔ kekle tɔli Pɔlu su yɛ be kleli i ɲrɛnnɛn’n, sanngɛ ɔ boli jasin fɛ’n juejue su titi.—2 Kor. 11:23-29; 12:15.
17. (a) ?Klist i su sulɛ nun’n, ngue yɛ amun kunndɛ kɛ amún yó ɔ? (b) ?Kɛ mɔ e tu e klun e yo Zoova i klun sa’n ti’n, suralɛ benin yɛ e ɲan be ɔ?
17 E kunndɛ kɛ é nían Zezi i sɔnnzɔnfuɛ sɔ’m be ajalɛ kpa’n su naan yialɛ nga Klist yia e’n, é sɔ́ nun ndɛndɛ kpa. (Ebr. 6:11, 12) ?Kɛ e tu e klun e su Klist su juejue su titi’n, ye benin yɛ e ɲɛn i ɔ? E di aklunjuɛ Ɲanmiɛn i klun sa’n i yolɛ’n nun. Asa kusu’n, kɛ sran kun kplin su kɛ ɔ́ úka junman ng’ɔ di i asɔnun’n nun’n i su’n, ɔ di aklunjuɛ. I sɔ aklunjuɛ liɛ’n e kwla di wie. (Jue. 40:8; an kanngan 1 Tɛsalonikfuɛ Mun 4:1 nun.) Nanwlɛ kɛ e mian e ɲin naan y’a su Klist su titi’n, e ɲan suralɛ kpakpa mun. Yɛle kɛ e wla gua ase, e di aklunjuɛ, like nga e ɲɛn i’n ɔ ju e yɛ Ɲanmiɛn klun jɔ e wun yɛ e kwla ɲan anannganman nguan.—1 Tim. 4:10.
?Amun wla kwla kpɛn su?
• ?Junman cinnjin benin yɛ be fa mannin e ɔ? ?Yɛ wafa sɛ yɛ ɔ fata kɛ e bu junman sɔ’n niɔn?
• ?Klɔ sran nzuɛn benin yɛ ɔ fata kɛ e nian e wun i lika ɔ? ?Yɛ ngue ti ɔ?
• ?E wun nanwlɛ benin yɛ ɔ fata kɛ e di ɔ?
• ?Ngue yɛ ɔ́ úka e naan y’a su Klist su titi ɔ?
[Kuku/Foto, bue 31]
?Ngue yɛ ɔ́ úka amun naan amun a su Klist su titi ɔ?
▪ Amun kanngan Ɲanmiɛn Ndɛ’n nun cɛn kwlakwla yɛ amun bu nga amun kanngan’n su akunndan.—Jue. 1:1-3; 1 Tim. 4:15.
▪ Amun srɛ Ɲanmiɛn kpɛ sunman naan ɔ suan amun bo yɛ ɔ fɛ i wawɛ’n kle amun atin.—Zkr. 4:6; Lik 11:9, 13.
▪ Amun nin be nga be tu be klun be di Ɲanmiɛn junman’n be san nun.—Nya. 13:20; Ebr. 10:24, 25.
▪ Amun wun i wlɛ kɛ blɛ nga e o nun yɛ’n ti tɛ naan e ɲrun’n w’a ka koko.—Efɛ. 5:15, 16.
▪ Amun wun i wlɛ kɛ sɛ amun “kpalo” Ɲanmiɛn junman’n annzɛ amun kpɛ i atin srɛ’n, i bo kwla gua tɛ kpa.—Lik 9:59-62.
▪ Amun wun nga amun fa mannin Ɲanmiɛn’n, ɔ nin suralɛ nga kɛ amun su Zoova mɔ amun tu amun klun be su Klist su amun ɲan be’n, amun bu be akunndan titi.—Jue. 116:12-14; 133:3; Nya. 10:22.