Maan e fa e wun e mantan Ɲanmiɛn

“Anannganman, [...] a si min wafa bɔ n ti’n”

“KƐ SRAN kun si kɛ sran fi niɛnmɛn i lɔ’n, wafa nga i sɔ’n fa yo i ya ju’n, sɛ ɔ ti trɔ’n, é sé kɛ trɔ wie fi i nɔnnin trɛmɛn i.”a ?Amun wun w’a yo amun sɔ le? ?Yɛle kɛ w’a yo amun le kɛ amun ndɛ loman sran fi annzɛ afɛ ng’ɔ o amun su’n, sran fi wunmɛn i wlɛ? Sɛ amun wun w’a yo amun sɔ le’n, maan amun wla gua ase. Zoova fɛ i ɲin sie ninnge kwlaa nga i sufuɛ’m be yo be aliɛ ba kwlaa nun’n su. Afin be ndɛ lo i kpa. I sɔ yɛ ndɛ nga Davidi klɛli i Jue Mun 139 nun’n, ɔ kle e ɔ.

Davidi si kɛ i ndɛ lo Ɲanmiɛn kpa. I ti ɔ kwla seli kɛ: “Anannganman, a si min klun lɔ akunndan’n, a si min wafa bɔ n ti’n.” (Ndɛ mma 1) Ndɛ nga Davidi kɛnnin i wa’n, ɔ yo fɛ dan. Ndɛ mma “si” ng’ɔ o Davidi i ndɛ sɔ nun’n, Ebre nun ndɛ mma nga be kacili i sɔ’n, be fa kan wafa nga be fufu buɛ be kɔ asiɛ’n i bo lɔ ninnge’m be kunndɛlɛ’n i ndɛ. (Zɔb 28:3) Annzɛ be fa kan lika’n i kpla nianlɛ’n i ndɛ. (Jɔlɛ Difuɛ Mun 18:2) Annzɛ kusu be fa kan wafa nga jɔlɛ dilɛ nun’n, be usausa ndɛ nun kpa naan b’a wun i nanwlɛ’n i ndɛ wie. (Mmla’n 13:14) Nanwlɛ Zoova si e kpa. Afin like kwlaa nga e yo’n i ɲin tɛ i kwlaa nun. Kɛ Davidi seli kɛ ‘min’n,’ ɔ kle kɛ Ɲanmiɛn i sufuɛ’m be tinuntinun be ndɛ ti i cinnjin. Ɔ fɛ i ɲin sie be su kpa. Ɔ maan, ɔ si be kpa.

Davidi yiyili nun kpa ekun kɛ like fi fiaman Ɲanmiɛn ɲrun. Ɔ seli kɛ: “Sɛ ń trán ase o, sɛ ń jáso o, a si. [A o mmua lɔ, NW] a si akunndan nga ń wá bú’n.” (Ndɛ mma 2) Zoova tran ɲanmiɛn su lɔ. I ti e kwla se kɛ ɔ o “mmua lɔ.” Kannzɛ ɔ ti sɔ’n, kɛ é trán ase’n, yɛle kɛ wienun ɔn kɛ aliɛ w’a san mɔ afɛ’n ti’n, e su lo wunmiɛn’n, ɔ wun nun. Asa ekun’n, nglɛmun kɛ e jaso e kɔ e ninnge’m be yolɛ’n, ɔ wun nun wie. Asa kusu’n, akunndan kwlaa nga é wá bú’n, ɔ nin ninnge kwlaa nga e waan é yó’n, ɔ si be. ?Zoova i ɲin ase ng’ɔ boli niannin Davidi’n, ɔ kunnin Davidi i srɛ? Cɛcɛ, w’a yomɛn i sɔ. I kpa bɔbɔ’n, ɔ seli Zoova kɛ ɔ niɛn i klun lɔ kpa. (Ndɛ mma 23, 24) ?Ngue ti ɔ?

Davidi si kɛ, kɛ Zoova bo i ɲin ase niannian i sufuɛ mun’n, ɔ yomɛn i nin akunndan tɛ. I sɔ yɛ Davidi waan ɔ́ kɛ́n i ndɛ nga nun ɔn. Ɔ klɛli i kɛ: “Sɛ ń nánti ń sín o, sɛ ń lá o, a wun i. Sa nga n yo’n, a si i kwlakwla kpan.” (Ndɛ mma 3) Cɛn kwlaa Zoova wun ‘sa nga e yo’n’. I kpa o, i tɛ o, ɔ wun i ngba. ?Sanngɛ like tɛ nga e yo’n, i su yɛ ɔ fɛ i ɲin sie ɔ? ?Annzɛ ninnge kpakpa nga e yo’n, be su yɛ ɔ fɛ i ɲin sie ɔ? Ebre nun ndɛ mma nga be kacili i Wawle nun kɛ ‘a wun i’n,’ be fa kan like “i su kpukpulɛ” annzɛ “i nun kpajalɛ” i ndɛ. Be fa kan wafa nga fie difuɛ kun kpaja awie’n annzɛ able’n nun naan i nun wla’n w’a gua’n, i ndɛ. Asa ekun’n, Ebre nun ndɛ mma nga be kacili i Wawle nun kɛ ‘a si i’n,’ Ebre nun’n be fa kan “klolɛ mɔ be klo sran annzɛ like kun’n” i ndɛ. Ɔ maan kɛ Zoova fɛ i ɲin sie i ndɛ nga i sufuɛ’m be kɛn i cɛn kwlaa’n nin ninnge nga be yo’n, be su’n, i kpafuɛ’n su yɛ i ɲin ka ɔ. ?Ngue ti ɔ? Afin kɛ e tra e awlɛn e yo ninnge mun naan i klun jɔ’n, ɔ klo i sɔ’n kpa.

Jue Mun 139 nun’n, be kle e kɛ Zoova i sufuɛ’m be ndɛ lo i kpa. Ɔ fɛ i ɲin sie i aliɛ ba kwlaa nun ninnge nga be yo’n be su. Ɔ wun i kwlaa nun. Ɔ maan, ɔ si afɛ ng’ɔ o be su’n. Kpɛkun kplinlɛ nga be afɛ sɔ’n ti’n be kplin’n, ɔ si i. ?Kɛ mɔ sran’m be ndɛ lo Ɲanmiɛn kɛ ngalɛ sa’n ti’n, nɛ́n i yɛ amun kunndɛ kɛ amún sú i ɔ? Sɛ i sɔ yɛ amun waan bé yó’n, nán maan ndɛ nga fi amun ɲin le. Yɛle kɛ Zoova ‘i wla su fi-man junman nga án dí’n nin klolɛ nga án fá kló i’n su.’​—Ebre Mun 6:10.

[Ja ngua lɛ ndɛ’n]